Úni ambe enga sési jaka: ¿Nénaksï erakusïni kʼuiripuecha ambe engaksï jatsika para úni?

Sáno iámindu kʼuiripuechaksï mítesti ambesï sési jaki ka ambe nómbe. Kʼuiripuechaksï no sési exesïndi enga nema afuersa jupikajka o biolariini máteru nemani o sapini ma, o ístu uándikpini. Joperu ístuksï jarhasti uánikua kʼuiripuecha engaksï sési pʼikuarherajka jimboka nema sési kámpisïnga o kurhangutspini ka sésiksï exesïndi enga justisia úkuarhijka. Ka jarhastiksï kʼuiripuecha engaksï mámaru uandajka seksueri ambe, néna kʼuiriperaani sapiichani o sinksï jatsiski para uandantani jurhimbitku o nómbe; jimboksïsï újti ambe engaksï imeecha uandajka eska sési jarhaska, oksï imani ambe úni engaksï máteruecha arhiajka. Joperu ¿sési jarhaski ísï eratseni?

SEGUNI NA ENGACHI PʼIKUARHERANI JARHAJKA ÍSÏCHI ERAKUSÏNGA ÚNI AMBE MA

Sáno méntkisïchi imani ambe úsïnga engajtsïni juchaari konsiensia arhijka. Konsiensiajtsïni méntkisï miátantani jarhasïndi ambesï sési jaki ka ambe nómbe (Roma 2:14, 15). Asta sapiicha jamberiksï kuenta íntskukuarhesïndi enga ambe ma no sési jauaka, ka no sésiksï pʼikuarherasïndi engaksï no sési ambe niátajka. Juchachi ísï kʼuiripesïnga seguni ambe engachi jakajkujka, nani engachi anapueka, ka ambe engajtsïni juchaari familia jorhendajka, kompanieruecha, maestruecha o besinuecha. Ka iámindu i ambe úsïndi eska juchaari konsiensia ísï pʼindeni jauaka. Ísï jimbo, jiáni engachi jatsijka para erakuni ambe úni, konsiensiajtsïni arhisïndi sini sési jarhaski o nómbe.

Juchaari konsiensiajtsïni jarhuatasïndi parachi kurhangukuani máteruechani, agradesidueni, sési ambe úni ka pʼamojpeni. Ka ístujtsïni konsiensia jarhuatasïndi parachi no no sési pʼikuastaani máteruechani o imani ambe úni engajtsïni kʼuratsetaaka ka tátsekuachi no sési pʼikuarherani jarhania.

¿Méntkisï sési jarhasïni ambe engachi jucha eratsejka? Jiáni enga Gabrielia tumbiipka, niáraspti ísï irekani eska ima na uékeenga. Joperu tátsekua kuenta íntskukuarhespti eska kánikua no sési jarhaspka ísï irekani. Méntku no sáni tsípikua jingoni irekaxapti jimboka “masi úxapka ísku jándikua ambe niátani, droga ambe úrani, kauini ka uarhipeni jámani”.

¿MÉNTKISÏ SÉSI JARHASÏNI AMBE ENGAKSÏ MÁTERUECHA UANDAJKA ESKA SÉSI JARHASKA?

Ísïisti, juchachi imani ambe úsïnga engajtsïni juchaari konsiensia arhijka, joperu ístuchi eratsesïnga nénaksï exea máteruecha indeni ambe. Ka engachi kurhajchajka juchaari familiani, amiguechani ka juchaari iretarhu anapuechani ka imani ambechi úni enga sési jaka, imeechajtsïni sési exesïndi ka ístuchi niárasïnga uánikua ambe jorhenguarhini imeecheeri ambe ka jánhaskatiinchi.

¿Méntkisï sési jarhaski imani ambe úni engaksï máteruecha uandajka eska sési jarhaska? Jiáni enga Priscila uátsïipka, ima imani ambe úsïreendi ambe engaksï amigu jémbeecha niáteenga; imeechaksï no tembuchatixapti nijtu uambuchatini ka né uéjki jingonksï apondisïreendi ka nóksï no sési exesïreendi. Joperu Priscila kuenta íntskukuarhespti eska méntku no sáni sési pʼikuarherasïreenga imani ambe úni engaksï máteruecha sési exeenga. Priscila uandantasïndi: “Méntku no sáni sési pʼikuarheraska ísï jámani eskaksï máteruecha. Ískuni jatini xáni no sési nitamakuarhispka jimbokani imani ambe úsïreenga enga kánikua no sési japka”.

¿AMBEKSÏNI JARHUATAA SÁNDERU SÉSI ÚNI AMBE MA?

Kánikuajtsïni jarhuatasïndi exeni ambe engachi jucha eratsejka ka ístu ambe engaksï máteruecha eratsejka parachi úni erakuni ambesï sési jaki ka ambe nómbe. Joperu engachi indeni ambejku kuenta újka, ménichantsïni no sési nichesïndi. Ménisïchi no úsïnga exeni na engajtsïni xáni no sési úchiaka juchantsïni o máteruechani (Proverbios 14:12). Ístuchi úpiringa uandani eskachi jucha ka máteruecha sési jámasïnga ka jini no ísïini. Pori ejemplu, na enga jámajka iásï kʼuiripu, tátsekua mójtakurhisïndi. Ióntki, uánikua k’uiripuechaksï no sési exesïreendi máru ambe ka tátsekuaksï sánhani arhisptia jaiapanhentani. Ístuksï ióntki sési exesïreendi máru ambe joperu iásï nóteria.

Ísï jimbo, ¿jaki ambe ma enga jurhimbitku uandantajka ambesï sési jaki ka ambe nómbe? ¿Jaki juramukua ma engajtsïni arhiaka na engachi jatsika para jámani ka engajtsïni jarhuataaka ambakiti ambe erakuni úni parachi tátsekua no pʼamondakuarhini jarhani?

¡Jo! Jarhasti ambe ma engajtsïni arhistachijka nénachisï jatsi para jámani ka engajtsïni jurhimbitku aiangujka. Ka jindeesti para iáminduecha no arhiparini nani uéjkichi anapueni. Máteru artikulu jimbochi míteaka ambe engajtsïni jarhuataaka méntkisï imani ambe úni enga sési jaka.