Ricardo ka Andrés

Jorhentperakua enga Bibliarhu jupindaskuarhijka, úsïndi eskaksï kʼuiripuecha sánderu sési irekaaka. Ju je exeni na enga jarhuataka Ricarduni ka Andrésini.

RICARDO. Engani 15 jatiripkia, no sési úricha jingoni kúnguarhispka. Komu iatiru sapichuepka, juchiti amiguechajtsïni pájtamaspti no sési ambe niátani. Asta jamberini uékasïrenga diesi uéxurhini kárselirhu jarhani. Ísï xarharasïndi enajkini ísku ambe ma eratsini japi, peru jimesï engani irekapka, janhanharhiasïrendiksï ka kʼéri ambe exeani imechani engaksï niárapka ónhakata jarhani. Ji uékasïrenga ísïni eska imecha.

Ísku jándikua ambe niátasïrenga, droga ambe úrani ka no sési kámpini. Ma chúri, balasera ma jimbo partisiparispka. Eratsispka eskajtsïni uándikupiringa, peruni úspka sïpakuarhini. Jiájkani uénaspka sési eratsintani na engani irekani japka ka ambe engani uékenga úni. Eratsispka mójtakurhini, peru ¿néna úpirini ísï úni? ¿Nérini úpirini jarhuatani?

Sáno iámindu juchiti familiarichaksï uánikua problemechani jatsiaspti ka nóksï felisispti, peru juchiti tíueri familia ma kánikua ménderuenispti. Mítispka eskaksï ambakiti kʼuiripuechespka ka eskaksï úsïrenga ambe enga Biblia jorhentpijka. Imajtsïni arhispti eska Tata Diosï, Jeoba arhinhasïnga. Ísï no ióni jimbo enga balasera úkuarhipka, kómarhispka Jeobani imeri nombri úraparini ka kurhakuspka eskarini jarhuatapiringa. No úsïrenga jakajkuni enga ísï pauandikua Jeobaeri testigu ma kústapka juchiti puertarhu. Uénaspka jorhenguarhini Bibliaeri ambe ima jingoni.

No ióndaspka problema ma jatsini. Telefonu jimbojtsïni uandajpasïrendi imecha engani antesi kúrhiauenga parani imecha jingoni nirani. Nájkiruka no fásilipka, arhiaspka eska nómbe. Eratsitixapkia seguirini Bibliaeri ambe jorhenguarhini, ka kánikua tsípisïnga engani ísï úka. Iásï máteru jásï kʼuiripu máeskia ka meru felisiska.

Ji uékasïrenga diesi uéxurhini kárselirhu jarhani parajtsïni janhanharini imecha engani jingoni kúnguarhienga. Jimbosïni kurhakupka Tata Diosïni eskani úpiringa sikiera diesi uéxurhini jarhuataani máteruechani Biblia jingoni, ísï eskajtsïni na jarhuataka jíndeni. Tata Diosï mókuntasti juchiti kómarhikuani, jimbokani diesisiete uéxurhini paxakaia inde ambe úni. Ka ambe enga sésika, no méni niáraska kárselirhu jarhani.

Uánikua imecha engani antesi kúriaguenga, iónksï páxatia kárselirhu ka máteruksï uarhistia. Kánikua sési exeasïnga juchiti familiari Testiguechani engaksï uékapka ménderueni irekani ka úni ambe enga Biblia jorhentpijka. Sánderu janhanharhiasïnga imechani ka eska náki uéjki máteru nemani engani antesi kúrhiauenga. Peruni sánderuni agradeserikusïnga Tata Diosïni engarini jorhendaka néna sánderu sési irekani.

ANDRÉS. Ima lugari jimbo andajpenuska ka tʼarhexeni nani enga pobrinhaka, enga droga ambe úranhajka, uándikperanhani, sïpatsperanhani ka ísku jándikua ambe únhani. Juchiti táti kánikua kauisïrendi ka kokaina ambe úrani. Juchiti nándi ka táti, méntkuksï no sési arhijperani jarhasïrendi ka atajperani.

Sapichkuni uénaspka kauini ka droga ambe úrani. Puru xanharu jimbo jámasïrenga, sïpani ka atarantani ambe engani sïpenga. Ísï ióni jimbo, juchiti táti seguni uékasïrendi sési pájperani jíndeni jingoni, peru no sési ambe úspti jimbokarini jorhendaspka néna inchaatani droga ambe ka máteru ambe enga no sésikua japka para úrakuarini paisurhu para tátsekua atarantani. Sóntkuni kánikua tumina andaspka. Ma jurhiatikua polisia niáraspti juchini. Jupikasptijtsïni ka arhinhaspka eskani sinku uéxurhini ónhakata japiringa jimbokani uékaspka uándikpini.

Tsípa ma jimbo, iáminduecha engachi ónhakata japka, pʼímarhinhaspkachi parachi Jeobaeri testiguecha jingoni exeni Bibliaueri ambe, ka niraspka. Ísïspti ambe engaksï Testiguecha uandapka, jimbosïni jiókuarhipka Bibliaeri ambe jorhenguarhini. Testiguechajtsïni jurhimbitku aianguspti ambe engaksï arhijka Tata Diosïri juramukuecha engaksï Bibliarhu jaka.

Sóntkuni kuenta íntskukuarhispka eskani uétarhinchapiringa jarhuajperata parani úni mójtakurhini, ka sánderia engani exepka eskajtsïni máteruecha engaksï ónhakata japka, uénaspka chérani, jimbokaksï no uékasïrenga eskani Bibliaeri ambe jorhenguarhipiringa. Uinhapikua kurhakuspka Jeobani ka jánhaskakua. Indeni ambe jimbo, úspka exeni ambe úni ka aianhpini ambe engani jorhenguarhini japka.

Engani uéntapkia kárselirhu, xáni chéxapka engani jamberi uékenga útasï jima pakarani ma tiempu. Engani uéntani japkia, máru engaksï ónhakata japka, jájki manataparintsïni uandanuntaxapti. Astajtsïni máru arhispti: “Niia níntani jorhentpiri sapichu”.

Chésïnga eratsini na engani irekani japiringa engani no jurajkupiringa eskarini Tata Diosï arhistachipiringa. Kánikua diosmeiamukua íntskuntasïnga na engarini xáni xénchajka ka norini ísku exeni.a