“Kánikua sóntkuni ikiasïrenga”

NA ENGANI IREKAPKA IÓNTKI

San Juan Chancalaíto andajpenuska, ireta sapichu ma jimbo jini Chiapas (México). Juchiti familia idioma chol uandasïrendi. Juchiti tátichaksï 12 uájpechani kaaspti, engani ji andajpenupka, tátichaksï tʼuini tʼámu kásïrendia. Engani sapipka, juchiti ermanuecha jingonchi Bibliaeri ambe jorhenguarhisïrenga Jeobaeri testiguecha jingoni. Peruni ji no seguirispka úni ambe engaksï Bibliaeri konsejuecha uandajka.

Engani 13 jatiripka, úrasïrenguia droga ambe ka sïpani jámasïrenga. Xáni jatiri uéakuspka juchiniu ka ísku nani uéjkisï jámasïrenga. Engani 16 jatiripkia, uénaspka ánchikuarhini mariuana ikarani. Chúrekua ma jimbo engani ma uéxurhinisï páni japkia jima ánchikuarhini, máru kʼuiripuechaksï máteru grupurhu anapuecha engaksï sési armadu japka ka engachi jingoni no pájperenga, kʼuanirasptijtsïni engachi kánikua mariuana páni japka barku ma jimbo. Parajtsïni no pʼitarani, ríurhu kʼuanimespka ka ióni inchamikurhitini jarhaspka. Tátsekua, Estados Unidos sïpakuarhispka.

Engani jima japkia, seguirispka droga ambe jingoni ánchikuarhini ka no sési ambe niátani. Engani 19 jatiripkia, jupinhaspka ka ónhanhaspka jimbokani sïpani jámasïrenga ka sáno atajpespka. Engani ónhakata japkia, kúrhispka pandiiani ma ka útasïni uarhipesïrenga. Ísï jimbo, móskusptijtsïni kárselirhu ma jini Lewisburg (Pensilvania), nani engachi sánderu sési exenhani jarhenga iámindu ambe jimbo.

Kárselirhu enga Lewisburg jaka, sánderuni no sési ambe úsïrengia. Jimbokani pandiieri ma tatuajichani úrhikuarhitiaxapkia, sóntkuni kúrhiaspka imani mísmu pandiieri anapuechani engaksï imani kárselirhu japka. Sánderuni no ambakespkia ka seguirixapka uarhipeni. Ma xanhari, kárselirhuchi uarhiperaspka máteru pandiia jingoni, úraaspkachi bat beisboliri ka pesechani jimnasiurhu anapu. Kánikua no sési jánhaskuarhispti. Polisiechaksï úraspti gasi lakrimogenu parajtsïni jarhakutantani. Tátsekua, kárselirhu anapuechaksï eratsipti móskuntsïni jima engaksï pérauenga imechani engaksï sánderu no ambarhapka. Sóntkuni ikiasïrenga ka kánikua nánderkueni uandasïrenga. Ambe uéjki jimbo uarhipesïrenga. Asta jamberini tsitisïrenga ísï jámani. Ka no na pʼikuarherasïrenga na engani jásïpka.

NA ENGARINI BIBLIA MÓJTAKUCHEKA IREKUA

Imani selda jimbo, kasi chúskutasïrenga ónhakata jarhani. Jiájkani uénaspka arhintani Bibliani parani no xáni kuatantani. Ísï tátsekua, uarhiiti ma enga polisiepka, íntskusptirini libruni Usted puede vivir para siempre en el paraíso en la Tierra.a Engani na arhintapani japka ima libruni enga jarhuajperata máepka para Bibliani kurhanguni, miápantaxapka ambe engani jorhenguarhipka sapichuetini Testiguecha jingoni. Eratsintaspka na engani xáni no sési úpka engani xáni no ambakipka. Ka ístuni eratsintaspka juchiti familiani. Ka jimbokaksï juchiti tsimani pirenchicha Jeobaeri testiguepkia, eratsispka: “Imaksï irekaati para méntkisï”. Ka ji kurhamarhikuarhispka: “¿Ka andi ji nómbe?”. Jimajkani, eratsispka eskani mójtakurhipiringa.

Peruni mítispka eskani uétarhinchasïrenga jarhuajperata parani mójtakurhini. Ka ambe engani orheta úpka, kómarhispka Jeobani ka kurhakuni eskarini jarhuatapiringa. Tátsekua, karakuaspka Jeobaeri testiguecheri sukursalini jini Estados Unidos parani arhijpini eskani uékasïrenga Bibliaeri ambe jorhenguarhini. Sukursali arhispti kúnguarhikuani ma enga no iauani japka parajtsïni nirani exeni. Jiájkanisï, solu familiarichaksï úsïrendi inchani kárselirhu. Ísï jimbo, Testigu ma imani kúnguarhikueri, uénasptirini axachiani kartechani engajtsïni uinhaperantenga ka publikasionichani engaksï úpka eskani uékapiringa mójtakurhini.

Ístuni úspka máteru ambe, eratsispka eskani nóteruni kúnguarhipiringuia imani pandiia jingoni engani xáni ióni kúrhepka. Pandiieri jefi ka ji, mismu lugari jimbochi jarhaspka, jimbosïni andarhierapka jiáni engachi sáni mintsikuarhini japka ka arhispka eskani uékasïrenga Jeobaeri testigu úkuarheni. Ískuni pakaraspka engarini arhipka: “Engari meru uéjka ísï úni, ú. Nókini uékasïnga ójkutani Tata Diosïri ambe jingoni. Peru engari solu uéjka pandiiani jurajkuni, mítiskaria ambe engari úkuarhinchaaka”.

Tsimani uéxurhini tátsekua, kárselirhu anapuechaksï exespti eskani mójtakurhixapkia. Jimbojtsïnisï, nóteru xáni no sési kámendia. Por ejemplu, nóterujtsïni jójkutini pásïrendia baniurhu. Astarini polisia ma andarhieraspti ka arhindirini eskani seguiripiringa mójtakurhini. Ísï jimbo, autoridadichajtsïni móskuspti jima engachi nóteruni xáni uétarhinchenguia parachi kuidarinhani jarhani, jima andangutaspka últimu uéxurhini engani xáni ónhakata japiringa. Uéxurhini 2004 jimbo, engani diesi uéxurhini ónhakata japkia, petanhantaspka ka México axanhantaspka kárselirhu anapu autobusi ma jimbo.

Ísï no ióni jimbo engani México niántapkia, exentaspka Kʼumanchikua Reinueri ma Jeobaeri testiguecheri. Engani primeru xanhari nípka tánguarhikuarhu ma, kárseliri anapu uniformi jukapaspka jimbokani imantkusï kámenga enga no xáni náderkueni jáxepka. Nájkirukani ísï nípka, Testiguechajtsïni uékperakua jingoni kámaspti. Engani exepka na engajtsïni sési kámapka, kuenta íntskukuarhispka eskani meru ambakiti kristianuecha jingoni jarhaspka (Juanu 13:35). Imani mismu jurhiatikua, kúnguarhikuarhu anapu orhejtsïkutichaksï exespti né engarini úpiringa jorhendani Bibliaeri ambe. Ma uéxurhini tátsekua, 3 de septiembrini de 2005, itsï atakuarhispka komu Jeobaeri testigu.

Eneruni 2007 jimbo, uénaspka marhuani komu prekursori regulari, setenta ora úrasïrenga parani jorhendaani kʼuiripuechani Bibliaeri ambe. Uéxurhini 2011 jimbo graduarikuarhispka Escuela Bíblica para Varones Solteros (enga iásï arhinhajkia Jorhentperakua para Eianhpiricha Reinueri). Ambe engani jima jorhenguarhipka, kánikuarini jarhuataspti parani sánderu sési úni ambe kúnguarhikuarhu.

Uéxurhini 2013 jimbo, tembuchaska Pilari jingoni. Engani eiangujka Pilarini ambe engani ióntki úenga, terekuarhiparindini arhisïndi eska no úsïnga jakajkuni eskani ji imani ambe úsïrenga. Nóteruni méni ísï jámaskia eska ióntki. Juchiti uarhiiti ka ji, jakajkusïngachi eska na engani jásï kʼuiripu máekia iásï, xarhatasïnga eska Biblia úsïnga mójtakuani kʼuiripuechani (Roma 12:2).

NÁKI KÓNTPERATECHANI INTSÏNHAASKIA

Exesïnga eska ambe enga Jesusi uandapka Lukasʌ 19:10 jimbo, juchiti ambe uandasïnga. Jimini ima uandaspti eska jurhaspka “jirinhantani ka pʼímutantani imani enga tsïnchitini japka”. Nóteruni tsïnchitini pʼikuarherasïngia. Nóteruni jámasïngia máteruechani no sési úkuani. Bibliaeri jarhuajperata jimbo, iásï jánguarhintaxakaia sési úrani juchiti tsípikuani. Sési pájperasïnga iáminduecha jingoni ka ambe enga sánderu jukaparhakueka, jindesti eskani sési pájperasïnga juchiti Kuerajpiri jingoni, Jeoba.