Tata Diosïri Reinu úati eska kánikua pínandikua jauaka

Tata Diosïri Reinu, juramukua engachi xáni ióni erokuarhikia, úati eskachi iáminduecha májku kʼéri irekaaka ka pínandikua jingoni. Eska na aiatspijka Salmo 72:7, “kánikua pínandikua jauati” Parhakpinirhu. Peru ¿káni uéna jurhamuni Tata Diosïri Reinu? ¿Néna juramua? Ka ¿nénaksïni marhuchia chánksïni inde Reinu?

¿KÁNI JUUA TATA DIOSÏRI REINU?

Biblia tʼuini uandasptia eska uánikua ambe úkuarhipiringa enga jindepiringa “mínda” ma eska Tata Diosïri Reinu janoxakaia. Máru míndechaksï jindesti guerrecha interu parhakpini, kʼarhimakua, pʼamenchakua ambe, kʼérati jenchekuecha ka eska kʼuiripu sánderu no ambakipiringa (Mateu 24:3, 7, 12; Lukasʌ 21:11; Apocalipsis 6:2-8, TNM).

Máteru profesia uandasïndi: “Uétarhisïndi eskari mítitini jauaka eska últimu jurhiatikuechani jimbo jauaka peligru, jimboka jimajkanisï anapu kʼuiripuecha solu pendienti pákuarhiaka para imechajkumindu sési uérani ka jukari jatsikuarhikuekanksï, [...] nóksï janhanharhiani táti jembechani, ka nóksï agradeseritspini ka niksï janhanharhini Diosïni. Nóksï uéauati imecheri kʼumanchikuarhu anapuechani ka parienti jembechani, sino kurhurasïnksï ka uandatspinksï jámani, ka no ma ambe jimboksï pʼíngukuarhiati, sino no sési kámpinksï ka nóminduksï jaiapanhintani ambakiti ambe. [...] Uéki jimboksï teparakuarhini, ka sánderuksï uékaati tsípikuarhini pekaduni jimbo ka eska Diosïni uékani” (2 Timoteo 3:1-4). Ísïsti eskaksï méntkisï jarhaska i jarhati kʼuiripuecha, peru no xáni uánikua eska iásï.

Íksï profesiauecha 1914 jimbo uénaspti kumplirikuarhini. Asta jamberi, máru inbestigadoricha, politikuecha ka kararichaksï májkueni eratsisïndi eska parhakpini mójtakurhiska ima uéxurhini uératini. Por ejemplu, inbestigadori danés Peter Munch karaspti: “Enga uénapka guerra 1914, uánikua ambe mójtakurhispti kʼuiripueri irekuarhu. Tiempu ma jimbo enga ambakiti ambe uérani japka, [...] uénaspkachi irekani tiempu ma jimbo enga no sési janhaskuarhipka, chétapu ambe jarhani ka kurhunhperakua, lugari ma nani enga no nema seguru irekaka”.

Peru ístu jarhasti ambakiti ambe. Nájkiruka xáni no sési jánhaskuarini jaka, niáraati sési jánhaskuarhintani. Ima mínda engachi uandakia, xarhatasïndi eska nóteru ióndani Tata Diosïri Reinu interu Parhakpini juramuni jauakia. Tata Jesukristu ístu ari mínda uandaspti enga ambakiti ambeka: “I ambakiti aianhperakua Diosïri juramukueri, aianhpinhaati iápuru parhakpinirhu paraka iápuru anapu kʼuiripuecha mítitinksï jauaka, ka jimajkani kʼamaraati i tiempu” (Mateu 24:14).

I ambakiti aianhperakua, jindesti jukaparhakua ambe engachi uandantajka Jeobaeri testiguecha. Ísï jimbo, juchari rebista enga sánderu mítikateka, arhinhasïndi Aianhpiri. Enga Jeobaeri Reinueri ambe Uandantajka. I rebista arhisïndi iámindu ambe enga Tata Diosïri Reinu úaka Echerirhu ka kʼuiripuecha jimbo.

¿NÉNA UÉNA TATA DIOSÏRI REINU JURAMUNI PARHAKPINIRHU?

Parachi úni mókuntani, ju je exeni tʼamu ambe enga úkuarhiaka:

1. Tata Diosïri Reinu no úrauati parhakpini anapu politikuechani.

2. Parhakpinirhu anapu politikuechaksï no uékaati jurajkuni imecheri juramukuani ka uékaatiksï uarhiperani Tata Diosïri Reinu jingoni (Salmo 2:2-9).

3. Tata Diosïri Reinu jatsiati para k’ámajkuani gobiernuechani jimbokaksï uékaaka seguirini juramukua jatsini (Daniel 2:44; Jaŋaskuecha 19:17-21). Ini últimu uarhiperakuani, Biblia arhirasïndi Armajedoni (Jaŋaskuecha 16:14, 16).

4. Imecha engaksï uékaka jarhani Tata Diosïri Reinurhu, tsípitiksï pakaraati Armajedonirhu ka irekaatiksï jimbanhi parhakpinirhu enga pínandikua jauaka. Biblia arhisïndi eskaksï ‘uánikua kʼuiripuecha’ jauaka (Jaŋaskuecha 7:9, 10, 13, 14).

¿NÉNAKSÏNI MARHUACHIA CHÁNKSÏNI TATA DIOSÏRI REINU?

Ma ambe engachi orheta uétarhinchajka parachi úni Tata Diosïri Reinurhu jarhani, jindesti mítini Tata Diosïni. Kómarhikua ma jimbo enga Jesusi úkupka Tata Diosïni, uandaspti: “I jindesti tsípikua para méntkisï, eskaksïni mítiaka tʼunksïni engari tʼujku jindeeka Diosï engari sési jimboeka, ka ístu Jesukristuni engari tʼu axaka” (Juanu 17:3).

Mítini Tata Diosïni, uánikua ambe jimbojtsïni marhuachesïndi. Ju je exeni tsimani ambe. Orheta, jarhuatasïndijtsïni parachi sánderu jakajkuni Tata Diosïni. Inde jakajkua, enga úkuecha jimbo jupindaskuarhijka, úsïndi eskachi jakajkuaka eska Tata Diosïri Reinu meru jarhaska ka eska no iondani janoakia (Ebreu 11:1). Ka máteru ambe, úsïndi eskachi sánderu xénchaaka Jeobani ka kʼuiripuechani. Uékperakua Tata Diosïni jimbo, úsïndi eskachi mintsita jingoni kurhajchaaka, ka uékaani kʼuiripuechani, úsïndi eskachi úaka ambe enga Jesusi uandapka: “Eskajtsï cha na uékajka eskaksïni kámaaka kʼuiripuecha, ístu kaa je cha imechani” (Lukasʌ 6:31).

Ísï eska táti uékpiti ma, juchari Kuerajpiri sánderu ambakiti ambe uékasïndi para jucha. Uékasïndi eskachi jatsiaka ambe enga Biblia arhijka “tsípikua [para] méntkisï” (1 Timoteo 6:19). I irekua engachi irekani jaka no ambakiti irekua máesti. Para uánikua kʼuiripuecha, úkua jukasti orhepani uérani. ¿Nénaeua ambakiti irekua? Ju je exeni máru ambakiti ambe enga úaka Tata Diosïri Reinu kʼuiripuecha jimbo.