Ambe engaksï jakajkujka máru relijionicha

Hinduismo

I relijionirhu anapuechaksï ísï jakajkusïndi eskachi kómu nitamasïnga imani ambe jimbo engachi úka ini tiempu jimbo o imani tiempu jimbo engachi antesi irekapka. Eska kʼuiripu ma nóteru kómu nitamasïnguia enga arini ambe úkuarhinchajka enga arhinhajka moksha, o sea, enga kʼamarajkia imeri tiempu para andajpenuni jarhani. Para i ambe úni, jatsisti para jorhenguarhini nóteru uandanhiania i parhakpini anapu ambe jimbo.

Islam

I relijionirhu anapuechaksï ísï exesïndi eska kómu nitamakua, kastigu máeska kʼamanharhintskuecha jimbo ka eska tsʼéjkukua máeska. Seguni Sayyid Syeed enga orhejtsïkujka Sociedad Islámica de América del Norte, uandasïndi eskajtsïni kómu nitamakua miátantasïnga eskachi “méntkisï jatsiska para diosmaiamukua íntskuntani Tata Diosïni iámindu kóntperatechani jimbo ka eskachi jatsiska para jarhuataani imechani engaksï uétarhinchajka”.

Judaísmo

Seguni ambe engaksï judiuecha jakajkujka jindesti eskachi niárasïnga kómu nitamani juchari úkuecha jimbo. Máru judiuechaksï uandasïndi eskaksï uarhiricha tsíntaaka ka eskaksï ísï tátsekua niáraaka jurhimbikua jingoni kánhani imecha engaksï ísku jatini kómu nitamaka. Ka judaísmo místiko o kabalístiko jorhentpisïndi eska kʼuiripu ma ménderu andajpenusïnga ka eska i ambe úsïnga uánikua xanhari sésikua íntskuni para úni nóteru ma kʼamanharhintskua jatsinia.

Budismo

I relijionirhu anapuechaksï ísï exesïndi eskachi uánikua xanhari andajpenusïnga ka eskachi kómu nitamasïnga mándani xanhari engachi niárajka irekani asta jiáni jamberi engachi újka jurajkuni no sési ambe engachi tsitijka, no sési járhati úkuechani ka pʼikuarherakuechani. Uandasïndiksï eska kʼuiripu ma enga jánhaskakua jingoni jámajka, ambakiti ambe újka ka sési eratseni, úsïnga niárani arini ambe úkuarhinchani enga arhinhajka nirvana, o sea, tiempu ma nani enga kʼamakurhijka kómu nitamakua.

Confucionismo

Diccionario de religiones comparadas uandasïndi eskaksï imecha engaksï i kʼuiripueri chúxapatika enga Confucio arhinhenga, ísï exesïnga eska kómu nitamakua jarhaska jimboka “ambe ma no úsïnga sési uérani ka jimboka kʼuiripu no sési ambe niátasïnga”. Jiókuarhisïndiksï eska no xáni kómu nitamakua ambe japiringa engaksï kʼuiripuecha ambakiti ambe úpiringa. Joperuksï uandasïndi eskachi sánderumindu kómu nitamasïnga jimbokaksï jarhaska espirituecha engaksï sánderu uinhapitika eska kʼuiripuecha. Ka eska ini ambe jimbo, kʼuiripuechaksï solu jatsiska para jiókuarhini ambe enga uaxastakata jakaia eska úkuarhiaka.

Máru Africa anapu relijionicha

Máru Africa anapu relijionichaksï uandasïndi eska kʼuiripu kómu nitamasïnga jimboka sïkuamikua ambe jarhaska. Máru kʼuiripuechaksï ísï exesïndi eskaksï brujuecha úsïnga úni eska nemani sési nikuaka o eska no sési ambe úkuarhinchaaka ka eskaksï úsïnga pʼikurhiantani mámaru ambe úparini. Ísï jimbo, engaksï i kʼuiripuecha pʼamenchajka, sïkuami ma jingonksï nirasïndi paraka imeri sïpiati ambe ka ima ambe engaksï imecha újka, uáka pʼikurhintani ambe engaksï brujuecha úkuka.

Cristianismo

I relijionirhu anapuechaksï jakajkusïndi eska kómu nitamakua ambe jarhaska imani kʼamanharhintskua jimbo engaksï Adani ka Eba úpka, ísï eska na uandajka Bibliarhu anapu libru Génesis. Joperu uánikua kʼuiripuechaksï niárastia uaxastani ambe engaksï imecha eratsejka. Por ejemplu, máru katolikuechaksï ísï exesïndi eskaksï uáka Tata Diosïni jimbo kómu nitamakuarhini paraka ima újchakuraaka imecheri tiósïuni o paraka pʼímutantaaka máteru kʼuiripuni.