Jorhenguarhikua 6
¿Ambeski Tatá Diosïri Juramukua?
¿Nani jarhaski Tatá Diosïri Juramukua? (1)
¿Né jindeski Juramutini? (2)
¿Néksï juramua Juramutini jingoni?, ¿ka namuniskiksï? (3)
¿Ambe xarharapirini kʼamarhukua jurhiatikuechani jimbo? (4)
¿Ambe uá Tatá Diosïri Juramukua kʼuiripuechani jimbo? (5-7)
1. Enga Jesúsi parhakpinirhu jápka, jorhendaspti imeri chúxapatichani kurhajkuarhini kómarhikua jimbo eska jupiringa Tatá Diosïri Juramukua. Ma reinu juramukua máesti, enga ma juramuti páni jarhajka. Tatá Diosïri Juramukua no ísïsti eska máteru juramukuecha. Auandarhu uaxastakata jarhasti ka jini uératini, juramuati parhakpinirhu. Kʼéri ambe úntati ka pímbinhajkuntati Tatá Diosïri arhinhakuani. Ístu uáti eska úkuarhiaka Tatá Diosïri eratsikua ixu parhakpinirhu, ísï eska auandarhu (Mateu 6:9, 10).
2. Tatá Diosï aiakuspti Jesúsini eska ima jindepiringa Juramutini Imeri Juramukuarhu (Lukasʌ 1:30-33). Enga Jesúsi parhakpinirhu jápka, xarhataspti eska jindepiringa pʼamojpiti, jurhimbiti ka pímbinhasï Juramuti ma. Enga kʼuanhatsentapka auandarhu, no jiájkani uénaspti juramuni (Ebreu 10:12, 13). Tatá Jeobá 1914 jimbo, íntskuspti Jesúsini, imani juramukuani enga aiakupka, ka jima uératini Jesúsi juramuxatia auandarhu komueska juramuti enga Tatá Diosï erakupka (Daniel 7:13, 14).
3. Tatá Jeobá erakuaspti ixu parhakpinirhu máru achatichani ka uarhitichani engaksï no méni jurajkuka paraksï auandarhu nirani. Imaksï Jesúsini jingoni juramukuauatiksï kʼuiripuechani komueska juramuticha, juesicha ka saserdoticha (Lukasʌ 22:28-30; Jaŋaskuecha 5:9, 10). Indechani Jesúsi ísï arhinhataraspti, namunitítku karichicha. Xánistiksï 144,000 (Lukasʌ 12:32; Jaŋaskuecha 14:1-3).
4. Enga Jesúsi uénapka juramuni, jirejiresï uekopantaspti Satanásini ka imeri ánjili no sési úrichani ixu Echerirhu. Ka ísï, imani uéxurhini 1914 jimbo, uénasti sánderu no sési jánhaskuarheni ixu parhakpinirhu (Jaŋaskuecha 12:9, 12). Uarhiperakuecha, kʼarhinguecha, pʼamenchakuecha, ka no sési járhati úkuecha engaksï sánderu uánipani jaka..., iámindu inde ambe «mínda» máesti eska Jesúsi juramuxakaia ka eska i jurhiatikuecha kʼamaraxamkia (Mateu 24:3, 7, 8, 12; Lukasʌ 21:10, 11; 2 Timoteo 3:1-5).
5. Nóteru ióni jimbo, Jesúsi miiúkua kurhakuantauati ka arhukuantauati iámindu kʼuiripuechani ísï eska ma karichi eranguti ná jarharitajka karichichani, chíbuechani jingoni. Karichicha jindeuatiksï imecha engaksï no méni jurajkuka Jesúsini, ka íntsauati tsípikua para méntkisï ixu parhakpinirhu. Chíbuecha jindeuatiksï imecha engaksï no jiókuarhijka Tatá Diosïri Juramukuani (Mateu 25:31-34, 46). Nóteru ióni jimbo, Jesúsi kʼamajkuauati imani kʼuiripuechani engaksï ísïka eska chíbuecha (2 Tesalonika 1:6-9). Enga cha uéjka jindéni Jesúsiri «karichini», jatsiskajtsï para kurhajchani eianhperakua Juramukuerini ka ísïjtsï irékani eskajtsï ná jorhenguarhini jaka (Mateu 24:14).
6. Ari parhakpini arhukukata jarhasti uánikua irétechani jimbo ka mándani irétecha jatsikuarhistiksï juramutini, ka ménichani ísï uarhiperasïndiksï. Joperu Tatá Diosïri Juramukua kénditauati iámindu parhakpinirhu anapu juramutichani ka Tatá Diosïri Juramukuaterku juramuatia (Daniel 2:44). Jiájkani nóteru jauatia uarhiperakuecha, uandikperakuecha ka níjtu no sési kámberakua. Iáminduksï márku ka pínandikua jingoni irékatiksï (Miqueas 4:3, 4).
7. Imani mili uéxurhini jimbo enga Jesúsi juramuni jauakia, tsʼïma engaksï no méni jurajkuaka Tatá Jeobáni, niáratiksï pímbinhasïntani ka iámindu parhakpini sési jándintati. Enga Jesúsi kʼamarhukuakia juramuni mili uéxurhini, tʼuini uátia ambe enga Tatá Diosï uékemga eska ima úpiringa. Tátsekua Jesúsi íntskuntati Juramukuani imeri Táti jémbani (1 Korintu 15:24). ¿Cha andisï no aianguajki chári pʼíchpirichani ka chári kʼumanchikuarhu anapuechani, ambe enga uáka Tatá Diosïri Juramukua?
[Ilustrasioni pájina 13 anapu]
Enga Jesúsi juramuni jauakia, nóteru jauati ikiatsperakua, iáminduechaksï exenchperati