Tatá Diosï jindesti sánderu ambakiti pʼíchpiri enga jucha uáka jatsini

Tatá Diosïri pʼíchpiri úkuarhini, inde jindesti sánderu ambakiti ambe enga cha uáka uni. Tatá Diosïksïni jorhendati néna exentani tsípekuarita ka néna uni sesi irékani; imaksïni jarhuáuati jurajkuani uánikua jakajkukuechani engaksï no jurhimbitika ka imani úkuechani engaksï no sesi útspejka. Tatá Diosï kurhauati chári kómarhikuechani. Ka uáti eska cha sesi pʼikuarinhiaka ka mintsikani imani (Salmo 71:5; 73:28). Tatá Diosïksïni jarhoáuati enga cha no sesi nitamakuareni jauaka (Salmo 18:18). Istu, Tatá Diosïksïni aiachesïndi ma intsïmperakua enga jindeka tsípikua para méntkisï (Roma 6:23).

Enga jucha andarerajka Tatá Diosïni, jucha andarerasïnga imeri pʼíchpirichani. Tatá Diosïri pʼíchpirichaksï niárati jindéni chári pʼíchpirini. Isïksï niárati jindéni eska chári kʼumanchikuarhu anapuecha. Tsípekua jingonksïni jorhendaati Tatá Diosïri ambe, jarhoauatiksïni ka uinhaperantatiksïni.

Jucha no májkueniska Tatá Diosïni jingoni. Enga jucha uéjka Tatá Diosïri pʼíchpirini, jucha jatsiska para kurhanguntani ma ambe enga jukaparakueka: eska juchari sesi pájperakua Tatá Diosïni jingoni no májkueniska eska kʼuiripu ma jingoni. Ima sánderu uánikua uéxurini jatiristi, iauani sánderu jánhaskasïndi ka istu sánderu uinhapitisti eska jucha. Imajku jatsisti sésikua para jindéni juchari Juramutini. Isï jimbo, enga jucha uéjka imeri pʼíchpirini, jucha jatsiska para kurhajchani ka uni ambe engajtsïni ima kurhachijka. Kurhajchani Tatá Diosïni, méntkisïjtsïni sesi nichiati (Santiagu 1:25).