Uétarisïndi eska jucha jorhenguarhiaka Tatá Diosïri ambe

Para uni jindéni Tatá Diosïri pʼíchpirini, jucha jatsiska para oreta mítini. Juchari pʼíchpirichaksï mítesti juchari arhinhakuani ka úrasïndiksï, ¿no isïski? Istu, Tatá Diosï uékasïndi eska jucha imeri arhinhakuani o jakangurhikuani mítiaka ka úraka. Tatá Diosï arhinhasïndi Jeobá (Salmo 83:18; Mateu 6:9). Istu jucha, jatsiska para mítini ambe jaiapanhintasïni ka ambe no jaiapanhintasïni, ka néksï jindeski ka néksï no jindeski imeri pʼíchpiricha. Para sesi mítini nemani ióni uétaresïndi, isï jimbo Tatá Diosïri karakata uandasïndi eska jucha jánhaskua xarhatasïnga enga jucha arhutajka jurhiatikua para jorhenguarhini Tatá Jeobéri ambe (Efesu 5:15, 16).

Tatá Diosïri pʼíchpiricha úsïndiksï ambe enga ima jaiapanhintajka. Eratsia chári pʼíchpirichani. Enga cha no sesi káuaka ka uni imani ambe engaksï imecha no jaiapanhintajka, ¿útasïksï jindeua chári pʼíchpirini? Noteria. Istu, enga jucha uéjka Tatá Diosïri pʼíchpirini, jucha jatsiska para imani ambe uni, enga ima jaiapanhintajka (Juanu 4:24).

No iámindu religiónichajtsïni jarhuatati para Tatá Diosïri pʼíchpiri úkuarheni. Jesúsi, enga sánderu ambakiti pʼíchpirika Tatá Diosïri, uandaspti tsimani xanharhuecheri. Ma enga kóruraka ka enga uánikua kʼuiripu nirani jaka. Inde xanharhu uarhikuarhu pájpesïndi. Máteru xanharhu no kórurasti ka indeni jimbo namunitítku kʼuiripu niraxati. Inde xanharhu pájpesïndi tsípekuarhu para méntkisï. Inde arhikuekasïndi, enga jucha uéjka eska Tatá Diosï jindeuaka juchari pʼíchpirini, jucha jatsiska para mítini néna sesi jasï kómarhikua íntskuni (Mateu 7:13, 14).