Tatá Diosïri pʼíchpiricha sesi jándekuarhuksï irékaati

Jima sesi jándekuarhu no májkueniuati eska iásï ixu parhakpinirhu. Tatá Diosï no méni uékaspti eska parhakpinirhu xani uandanhiata ambe japiringa, pʼamenchakuecha ka no sesi nitamakuecha. Nóteru ióndani Tatá Diosï uáti eska iámindu parhakpinirhu sesi jándintaka. ¿Néna jándia jima? Ju je exeni na uandasïni Biblia.

Kʼuiripu sesi úricha. Tatá Diosïri pʼíchpirichaksï irékati sesi jándekuarhu. Indeksï jarhoajperati sesi jasï ambe uni máteru ka máteruni jingoni ka irékatiksï jurhimbikua jingoni eska Tatá Jeobá na jaiapanhintajka (Proverbios 2:21).

Kánikua tʼirekua. Jima sesi jándekuarhu no nema kʼarhingua nitamati. Biblia uandasïndi: «Ka nóteruksï méni kʼarhimati ka níjtuksï kʼarhichani» (Jaŋaskuecha 7:16).

Sesi járhati kʼumanchikuecha ka ánchikuarita ma engajtsïni tsípikuarita íntskuaka. Enga echerirhu sesi jándentakia, iámindu kʼuiripuecha jatsikuariatiksï kʼumanchikua ka iáminduechaksï jatsikuariati ánchikuarita ma, engaksï jimbo kánikua tsípiaka (Isaías 65:21-23).

Jauati pínandikua iámindu parhakpinirhu. Kʼuiripuechaksï nóteru méni uarhiperati, nijtu uarhinhani kʼéri uarhiperatechani jimbo. Tatá Diosïri karakata uandasïndi: «[Diosï] úsïndi eska kʼérati uarhiperakuecha kʼamaraka» (Salmo 46:8, 9).

Nóteru jauati pʼamenchakuecha. Biblia aiatspesïndi: «No nema enga jima irékaka [sesi jándekuarhu] uandati: “Pʼamenchaxaka”» (Isaías 33:24). Nijtuksï jaua mangusïcha, ni imecha engaksï no újka exeni, nijtu kándicha ka ni nunusïcha (Isaías 35:5, 6).

Nóteru jauatia kómu nitamakua, pʼamenchakua ka ni uarhikua. Tatá Diosïri karakata uandasïndi: «Ka nóteru jauatia uarhikua, ka ni uandanhiata, ka nóteru nema ueraati o pʼamenchani, jimboka nitamaakia iámindu ueenani anapu ambe» (Jaŋaskuecha 21:4).

Nóteru jauatia kʼuiripu no sesi úricha. Tatá Jeobá aiatspesïndi: «Kástigariani tsʼïmani engaksï no jurhimbitku jámajka, imani jurhiatikua jimbo eka jusgarpiaka» (2 Pedru 2:9).

Kʼuiripuechaksï uékperati ka janhanharperatiksï. Nóteru jauatia enga no jurhimbikueka, ni no sesi kámberakua, nijtu tsʼïma engaksï tsitijka kánikua jatsikuareni, nijtu kurhunhperakua. Kʼuiripuecha márkuksï jauati ka irékatiksï jurhimbikua jingoni, na enga Tatá Diosï uéjka (Isaías 26:9).