¿Ambe uá engaksï afuersa uékaaka parani relasioni sexuali jatsini?

¿AMBERI ÚPIRINI TʼU?

Eranhaska arini ambe: Heather ka Mike apenasiksï tsimani kutsï páxati mítperani, peru para Heather ísïsti enajkiksï ióni májku kʼéri jakiia. Chúskutasïndiksï mensaji axatsperaani ka telefonu jimbo uandontskuarhini, astaksï mítistia ambe uandaa máteru ante de kʼamarani uandakuani. Peru, Mike nóteru uandontskuarhinkusï uéjtia.

Asta iásï jamberiksï Mike ka Heather solu niárasti jájki jupitsperani ka ménisï putimukperani. Heather no uékasïndi sánderu ambe úni, peru ístu no uékasïndi tsïtani imeri nobiuni. No nema xáni tsíperasïndi ka sési pʼikuastani. Eratsisïndi: “No no sési jarhasti, jimbokachi Mike ka ji xénchperasïnga”.

Engari jatirikia parari mítperani nema jingoni ka májkueniri ambe nitamani jarhani eska Heather, ¿amberi úpirini?

EROKA KA ERATSINTA

Engari kʼuanikurhiska anhatapurhu ma uératini ka uékandi ísï kárani eska pájaru ma, no sési amberi úkuarhinchaaka. Májkueni ambe úkuarhiati engari no kurhajchaaska pímbinharhati leichani, eska ima engajtsïni arhijka eskachi no jámaaka ísku jándikua ambe úni, komueska relasioni sexuali jatsini ante de tembuchani o uambuchani (1 Tesalonika 4:3).

¿Amberi úkuarhincha engari no kurhajchaska ini juramukuani? Biblia uandasïndi: “Ima enga ísku jándi úkuarhijka, imeri kuerpuni jimbosï pekadu újti” (1 Korintu 6:18). ¿Ambe arhikuekasïni i ambe?

Inbestigasionicha engaksï únhaka, xarhatasïndiksï eska uánikua uátsïcha ka tumbiicha engaksï relasioni sexuali jatsika antedeksï tembuperani, niáraska máru arini ambe pʼikuarherani:

• NO SÉSI PʼIKUARHERANI. Sáno iámindu uátsïcha ka tumbiicha engaksï relasioni sexuali jatsika antedeksï tembuperani, uandasïndiksï eskaksï niáraspka pʼamondakuarhini engaksï ísï úpka.

• NÓTERU MINTSINHARHINIA. Engaksï na jatsijkia relasioni sexuali, máruksï kurhamarhikuarhisïndi né jingoniteru apondi imeri nobia o nobiu.

• KÓMU PʼIKUARHERANI. Uánikua uátsïchaksï sánderu uékasïndi nema jingoni jarhani enga kuájchakuauaka ka no imani jingoni enga fásili exeauaka. Ka uánikua tumbiichaksï nóteru uéasïndia imani uátsïchani engaksï sóntku újka ambe engaksï imecha uéjka.

• I jindesti jorhenguarhikua: engari relasioni sexuali jatsipiringa antederi uambuchani o tembuchani, nori jukaparharani japiringa ambe ma enga kánikua jukaparhakueka: chíti birjinidadi (Roma 1:24). Chíti kuerpu kánikua jukaparhakuesti. ¡Asï intsïkuarpi!

Uinhapikuarhintsï ka asï apondi nema jingoni antederi uambuchani o tembuchani (1 Tesalonika 4:3). Engari uambuchaakia o tembuchani, uákari tsípikua jingoni ísï úni. Peru imecha engaksï apondijka ante de uambuchani o tembuchani niárasïndiksï no sési pʼikuarherani, uandanhiani ka chéni (Proverbios 7:22, 23; 1 Korintu 7:3).

¿NARI EXESÏNI?

• Engakini nema xénchajka, ¿no ísïski eska uékapiringa eskari sési japiringa ka eskari sési pʼikuarherapiringa?

• Ka enga nema meru uandanhiajka tʼungini jimbo, ¿kurhachepiringuini eskari úpiringa ambe ma engari jimbo úpiringa tsïtani chíti pájperakua Tata Diosïni jingoni? (Ebreu 13:4).