Penchumikuani úrani, ¿meru jindeeski relasioni seksuali jatsini?

Estados Unidos anapu Centros para el Control y la Prevención de Enfermedades, seksueri ambe kurhamarhiaspti tumbiichani ka uátsïichani engaksï 15 ka 19 jatiriika ka sáno terujkanksï uandaspti eskaksï niáraspka seksu orali jatsini.a “Engari uandontskuarheska náki uéjki tumbi ma jingoni seksu oraliiri ambe, arhiatikeni eska inde ambe normaliiska”, ísï uandasïndi Sharlene Azam, enga libru ma úka enga arhinhajka Oral Sex Is the New Goodnight Kiss (Sexo oral: el nuevo beso de buenas noches). Ka ístu uandasïndi: “Nóksï ísï exesïndi eska inde ambe úni, jindeeska relasioni seksuali jatsini”.

• ¿Tʼu na eratsesïni?

• ¿Ambe meru ísïiski?

• ¿Uétarhisïni míteni ini ambe?

¿Tʼu na eratsesïni?

Uanda jo o nómbe.

1. ¿Uaa nanaka ma embarasada pakarani enga relasioni seksuali jatsiaka penchumikuani úraparini?

   1. Jo

   2. Nómbe

2. ¿Uaa nema pʼamenchakua ma pʼirani enga relasioni seksuali jatsiska penchumikuani úraparini?

   1. Jo

   2. Nómbe

3. Penchumikuani úrani, ¿meru jindeeski relasioni seksuali jatsini?

   1. Jo

   2. Nómbe

¿Ambe meru ísïiski?

Terukutanta ambe engari uandaka ini ambe jingoni enga kétsekua jaka.

1. ¿Uaa nanaka ma embarasada pakarani enga relasioni seksuali jatsiaka penchumikuani úraparini?

   Mókuntskua: Nómbe. Ka indeni jimboksïsï uánikuecha uandajti eska no ma ambe úkuarhisïnga enga nema seksu orali jatsijka.

2. ¿Uaa nema pʼamenchakua ma pʼirani enga relasioni seksuali jatsiska penchumikuani úraparini?

   Mókuntskua: Jo. Enga nema seksu orali jatsijka uaati pʼirani herpes A o B, verrugas genitales, gonorrea, herpes, sida o sífilis.

3. Penchumikuani úrani, ¿meru jindeeski relasioni seksuali jatsini?

   Mókuntskua: Jo. Iámindu ambe enga únhajka órganu jenitaliicha jingoni jindeesti seksu, pori ejemplu, relasioni seksuali jatsini, úrani penchumikuani para relasioni seksuali jatsini, engaksï relasioni seksuali jatsijka tátsepanisï ka p’ájchukuni máteru nemani.

¿Uétarhisïni míteni ini ambe?

Ju je exeni ambe enga Biblia uandajka seksu oraliiri ambe.

Biblia uandasïndi: “Ini ambesï uéjti Tata Diosï [...] eskajtsï no jámaaka ísku jándikua ambe niátani” (1 Tesalonika 4:3).

Uandakua enga ióntki úranheenga para “ísku jándikua”, arhikuekasïndi iámindu imani ambe engaksï imeecha újka engaksï no temungurhiriijka komu relasioni seksuali jatsini, úrani penchumikuani para relasioni seksuali jatsini, engaksï relasioni seksuali jatsijka tátsepanisï ka p’ájchukuni máteru nemani. Imeecha engaksï ísku jándikua ambe újka kánikua no sési nikuauati ka niáraatiksï nóteru sési pájperania Tata Diosï jingoni (1 Pedru 3:12).

Biblia uandasïndi: “Enga nema ísku jándikua ambe niátajka, imeeri kuerpunisï no sési úkujti” (1 Korintu 6:18).

Ima enga relasioni seksuali jatsijka penchumikuani úraparini uaati pʼamenchakua ma pʼirani ka nóteru sési jarhania Tata Diosï jingoni. Ka ístu niáraati imajkumindu no sési pʼikuarherani jarhani. Libru Cómo hablar de sexo con los adolescentes para que te escuchen uandasïndi: “Imeecha engaksï relasioni seksuali jatsijka jiáni enga no sési jarhajka para ísï úni, kánikuaksï no sési pʼikuarherasïndi ka májkuenksï no sési pʼikuarherasïndi imeecha engaksï na uéjki jásï relasioni seksuali jatsijka enga no sési jaka. Iámindu ini ambe úni, májkueniisti eska apondini nema jingoni”.

Biblia uandasïndi: “Ji, Jeoba, chiiti Tata Diosïiska, ima engakeni jorhendajka parari sési jarhani” (Isaías 48:17).

¿Exesïniri eskaksï Tata Diosïiri leiicha engaksï seksueri ambe uandajka jindeeska parakaksïni sési nicheaka? ¿Ori exesïni eskaksïni pʼíngusïnga parari no úni ambe engari tʼu uéjka? Eranhaska eskari karretera jimbo niraxaka engaksï uánikua karruecha jámani jaka ka jarhastiksï senialiicha engaksï jukaka nári xáni uinhamu uaa nirani ka nani engari jatsika para anhaxurhini. ¿Tʼu uandapirini eskaksïni i senialiicha no jurajkusïnga úni ambe engari tʼu uéjka o eskaksïni kuájchakusïnga? ¿Ambe úkuarhipirini engari tʼu ka máteru kʼuiripuecha no kasu uaapiringa ini senialiichani?

Májkueniisti indeni ambe jingoni engajtsïni Tata Diosï juramuchijka. Engari no kurhajchauaka no sésikeni nicheati (Galasia 6:7). “Engari jurajkuska ambe engari jakajkujka ka nóteruri únia ambe enga sési jaka ka ísturi imani ambe úni engari míteka eska no sési jarhaska, niáraakari tʼujkumindu nóteru janhanharhikuarhinia”, ísï uandasïndi libru Sex Smart (Sexo inteligente). Peru engari ísï irekaska eskaksï Tata Diosïiri leiicha na uandajka, xarhataakari eskari jukaparharasïnga sési jámani ka ísturi ambakiti konsiensia ma jatsiaka (1 Pedru 3:16).