JORHENGUARHIKUA 1
¿Nénaksïni uaa jarhuatani Biblia?
Iáminduechachi uékasïnga míteni andichisï uarhijki, andichisï komu nitamakuarhijki ka nénachi irekaa sánderu orhepani, ístuchi uétarhinchasïnga jarhuajperata para úni orhepani uérakuani uandanhiatechani, komu néna andani sentabu parachi nitamakuarhini o néna sési irekani juchaari familia jingoni. Uánikuechaksï exestia eska Biblia mókuantasïnga ini kurhamarhikuechani, perujtsïni ístu uánikua ambe arhistachisïndi engajtsïni uaaka marhuacheni juchaari irekuarhu. ¿Míteskijtsï nemani enga uaaka jarhuatani ambe enga Biblia uandajka?
1. ¿Nákiskiksï máru kurhamarhikuecha enga Biblia mókuantajka?
Biblia mókuantasïndi arini kurhamarhikuechani. ¿Né kueraaski iámindu ambe enga jaka? ¿Andichisï kueraanha? ¿Andiksïsï komu nitamakuarhijki imeecha engaksï no no sési ambe újka? ¿Ambe úkuarhisïni enga kʼuiripu ma uarhijka? Engaksï iámindu uéjka sési irekani, ¿andiksïsï xáni guerrecha úkuarhijki? ka ¿ma jurhiani kʼamakurhia i Echeri? Bibliajtsïni pʼímarhisïndi jirinhantaani mókuntskuechani i kurhamarhikuecheri ka uánikuecha engaksï ísï úkia sésiksï pʼikuarherasïndi imani ambe jingoni engaksï jorhenguarhika.
2. ¿Nénajtsïni jarhuatasïni Biblia parachi tsípikua jingoni irekani?
Bibliajtsïni ambakiti ambe jorhendasïndi. Jorhendaasïndi familiechani nénaksï uaa sési irekani. Arhisïndijtsïni ambechi uaa úni engachi jukari uandanhiani jauaka ka parachi sési pʼikuarherani juchaari ánchikuarhita jingoni. Engachi na jorhenguarhipani jauaka exeakajtsï ambe enga Biblia uandajka íri ambe ka ístu uánikua ambeeri. Exeakajtsï eska “iámindu Diosïri Karakata [ambe enga Biblia uandajka] [...] marhuasïn[ga]” (2 Timoteo 3:16).
I publikasioni no Bibliaesti, peruksïni jarhuataati parajtsï úni sési míteni Bibliani. Jimboksïnisï pʼímarhijka parajtsï iámindu tekstuechani arhiantani engaksï mándani jorhenguarhikua jimbo jauaka ka parajtsï terukutantani imani ambe jingoni engajtsï jorhenguarhipani jauaka.
JORHENGUARHI JE SÁNDERU AMBE
Exeakajtsï na enga Biblia uánikua kʼuiripuechani jarhuataakia, ambe engajtsï uaaka úni parajtsï tsitini Bibliani arhintani ka andisï xáni jukaparhakue eskaksïni nema jarhuataaka Bibliani kurhanguni.
3. Bibliajtsïni jarhuatasïndi
Biblia ísïsti eska lampara ma enga kánikua uinhanharhijka ka engajtsïni tʼíntskachijka nani engachisï niuaka. Jarhuatasïndijtsïni parachi imani ambe úni enga sési jaka ka aiangusïndijtsïni ambe enga úkuarhiaka sánderu orhepani.
Arhinta je Salmo 119:105 ka uandontskuarhi je íri ambe:
¿Na exesïreni Bibliani ima enga ini salmuni karaka?
Ka ¿chá na exesïni ambe enga Biblia arhijka?
4. Biblia mókuntasïndi imani ambe engachi kurhamarhikuarhijka
Uarhiiti ma exespti eska Biblia jorhentpisïnga imani ambe enga ima desde iónisï uékengia míteni. Exe je BIDEUNI ka uandontskuarhi je íri ambe:
¿Ambe kurhamarhikuarhisïreni uarhiiti enga i bideurhu xarharajka?
¿Néna jarhuataski ini uarhiitini míteni Bibliaeri ambe?
Bibliajtsïni arhisïndi eskachi kurhanguarhiaka imani ambe engachi uéjka míteni. Arhinta je Mateu 7:7 ka uandontskuarhi je íri ambe:
¿Náki kurhamarhikuechantsï exesïni chá eskaksïni Biblia uaaka mókuchiantani?
5. Niáraakajtsï tsitini Bibliani arhintani
Uánikuechaksï tsitisïndi Bibliani arhintani ka kánikua marhuakuasïndi ambe engaksï jorhenguarhijka. Exe je BIDEUNI ka uandontskuarhi je íri ambe:
¿Tsitisïnksï arhintani tumbiicha engaksï bideurhu xarharajka?
Joperu ¿andiksïsï tsitijki Bibliani arhintani?
Ambe engajtsïni Biblia jorhendajka sésijtsïni pʼikuastantasïndi ka úsïndi eskachi ambakiti ambe erokuarhiaka. Arhinta je Roma 15:4 ka uandontskuarhi je íri ambe:
¿Uékapirintsï sánderu ambe míteni indeni tekstueri ambe engajtsï arhintaka?
6. Uaakachi kurhanguni Bibliani engajtsïni nema jarhuataska
Nájkirukaksï máru jandiajku arhintajka Bibliani, uánikuechani marhuakuasïndi eska máteru nema jarhuataaka kurhanguni Bibliani. Arhinta je Ukuecha 8:26-31 ka uandontskuarhi je íri ambe:
¿Ambejtsïni jarhuataa parachi kurhanguni Bibliani? (Exea je bersikuluechani 30 ka 31).
Etiopía anapu achamasï ma uétarhinchaspti eska nema jarhuatapiringa kurhanguni Tata Diosïri Karakatani. Iásïjtu uánikuechani kánikua marhuakuasïndi enga máteru nema jarhuataajka kurhanguni ambe enga Biblia uandajka.
MÁRUKSÏ I AMBE UANDASÏNDI: “Ískuesti Bibliani arhintani”.
¿Nájtsï eratsesïni chá? ¿Andi?
AMBE ENGACHI JORHENGUARHIKA
Bibliajtsïni jorhendasïndi néna sési irekuarhini, mókuntasïndi imani ambe engachi kurhamarhikuarhijka, sésijtsïni pʼikuastantasïndi ka úsïndi eskachi ambakiti ambe erokuarhiaka.
Ambejtsï jorhenguarhiski
¿Ambejtsïni jorhendasïni Biblia?
¿Náki kurhamarhikuechani mókuantasïni Biblia?
Ka chá, ¿ambejtsï uékapirini jorhenguarhini Bibliaeri ambe?
ÍSTU EXE JE INI AMBE
Jorhenguarhi je andijtsïnisï xáni marhuachejki iásï ambe enga Biblia uandajka.
“Ambe enga Biblia uandajka méntkisï marhuasïndi” (Aianhpiri, núm. 1 2018)
Exe je na enga Biblia jarhuatapka acheetini ma enga jiáni uénapka no sési pʼikuarherani enga sapiipka.
Jorhenguarhi je eska Biblia uandasïnga ambe engaksï uaaka úni familiaecha paraksï sési irekani.
“12 ambe enga uétarhijka para familia ma sési irekani” (¡Tsínharhi!, núm. 2 2018)
Uánikua kʼuiripuechaksï no mítesti né juramuxaki ini parhakpini jimbo, joperujtsïni Biblia aiangusïndi neeski.
¿Andisï uétarhijki jorhenguarhini Bibliaeri ambe? (iámu bideu) (3:14)