Tata Diosï janhanharhiasïndi ka jukaparharaani nanakechani

ENGA Jesúsi Echerirhu japka, sési xarhataspti na enga jásïika ka na enga kámpijka imeeri Taati auandarhu anapu. Ima uandaspti: “No ísku jatini pʼitsïkuarhisïnga parani úni ambe ma, sánderu sési, imani ambesïni uandajka ambe engareni Taati jorhendaka”. Ka ístu uandaspti: “Jimbokani ji méntkisï úsïnga ambe enga ima jaiapanhentajka” (Juanu 8:28, 29; Kolosasi 1:15). Ísï jimbo, engachi uéjka míteni na enga Tata Diosï exeajka nanakechani ka na enga uéjka eskaksï máteruecha káuaka, jatsiskachi para exeni Jesúsiri ejempluni.

Jesúsi no májkueni kámaspti nanakechani komu eskaksï jiáni anapuecha na kámenga. ¿Ka néna ménderueni kámaspi? Ka sánderia, ¿uaa jarhuataani iásï anapu nanakechani ima ambe enga Jesúsi jiáni jorhentpipka?

¿Néna kámaspi Jesúsi nanakechani?

Jesúsi no eratsesïreendi ísku jándikua ambe enga nanakechani exeauenga. Uánikua judiuecha engaksï relijionini orhejtsïkuenga, eratsesïrendiksï eska enga tataka o acheeti ma uandontskuarhepiringa nanaka o uarhiiti ma jingoni, úpiringaksï ikichakueni jásï ambe únchani. Jimboksïsï arhiapti nanakechani eskaksï no jámapiringa tatakecha jingoni uandontskuarheni ka eskaksï sési ójtsïpiringa ka ónharhini engaksï nipiringa nani. Joperu Jesúsi no méni uandaspti eskaksï no jatsispka para nanakecha jingoni uandontskuarheni. Sánderu sési, jorhentpispti eskaksï tatakecha o acheeticha no jatsispka para ikichakueni jásï ambe eratseni ka eskaksï janhanharhikua jingoni kaapiringa nanakechani (Mateu 5:28).

Ístu uandaspti: “Ima enga jurajkuaka imeeri témbani ka máteru nemani tembuni, ísku jándikua ambe niátasïndi ka no sési úkusïndi imani enga orheta témbeepka” (Markusʌ 10:11, 12). Jesúsi no sáni sési exesïreendi engaksï relijioniri orhejtsïkuticha uandeenga eskaksï acheeticha úpiringa ‘ísku jatiniʼ jurajkuni témbani (Mateu 19:3, 9). Sáno iámindu judiuechaksï no kurhangusïreendi ambemindusï arhikuekeendi ísku jándikua ambe úni. Uandasïreendiksï eska no ísku jándikua ambeespka enga acheeti ma apondipiringa máteru uarhiti jingoni enga no imeeri témbeepiringa. Relijioniri orhejtsïkutichaksï jorhentpisïreendi eskaksï acheeticha no méni ísku jándikua ambe niátasïreenga, solu uarhiiticha. Libru ma enga Biblieri ambe uandajka, arhisïndi eska enga Jesúsi arhiapka acheetichani eskaksï imeechajtu no jámapiringa ísku jándikua ambe úni, ísï eskaksï imeecha na arhiauenga uarhiitichani, ima xarhataxapti eska janhanharhiasïnga nanakechani ka jukaparharaani.

Na enga i ambe marhuakuajka iásï anapu nanakechani: Jeobaeri testiguecheri kúnguarhikuecharhu, nanakecha ka tatakechaksï uandontskuarhesïndi ka májku kʼériksï marhuakusïndi Tata Diosïni; ka nóksï chésïndi eskaksï tatakecha ikichakueni jásï ambe eratseaka imeecha jingoni o eskaksï no janhanharhikua jingoni káuaka. Acheeticha ka tatakecha engaksï Tata Diosïni marhuakujka, ísï exeasïndi imani uarhiitichani engaksï jatirikia, enajkiksï imeecheri naandii ka imeechani engaksï sánderu sapichu jaka, enajkiksï imeecheri pirenchii, ka méntkisïksï janhanharhikua jingoni kaasïndi (1 Timoteo 5:2).

Jesúsi arhutaspti tiempu para nanakechani jorhendaani. Jiáni anapu relijioniri orhejtsïkutichaksï no uékasïreendi eskaksï nanakecha jorhenguarhipiringa ambe ma. Joperu Jesúsi arhutaspti tiempu para jurhimbikua ambe jorhendaani ka pʼímarhiaspti parakaksï uandapiringa ambe engaksï eratseenga. Jiáni enga Jesúsi jurajkupka eska María kurhaapiringa ambe enga ima jorhentpini japka, xarhataspti eskaksï nanakecha no solu jatsiska para kʼumanchikuarhu anapu ambe úni jarhani o paraksï máteruechani kéndaani jarhani ambe ma (Lukasʌ 10:38-42). Ka na enga xáni sési mókuntapka Marta, Marieri jingonikua jémba, jiáni enga Lasaru uarhipka, xarhataspti eska imajtu sési jorhenguarhispka ima ambeeri enga Jesúsi jorhentpienga (Juanu 11:21-27).

Jesúsi pendienti pásïreendi para nanakechani jorhendaani. Sáno iámindu uarhiiti judiecha engaksï jiánisï irekapka, uékasïreendiksï tataka sapichuni ma kánguarhini enga niárapiringa kʼéri ambeeni. Eratsesïreendiksï eska solu ísï niárapiringa meru felisiini, ka sánderia enga ima tataka niárapiringa profeta máeni. Ísï jimbo, enga uarhiiti ma arhipka Jesúsini “na xáni tsípijki ima uarhiiti engakeni kánguarhika”, ima jimajku jorhendaspti eska sánderu jukaparhakueska ísï úni ambe enga Tata Diosï uandajka (Lukasʌ 1:27, 28). Ini ambe jingoni, Jesúsi jorhentpixapti eskaksï uarhiiticha no uétarhinchasïnga sapini ma kánguarhini paraksï tsípikua jingoni irekani, sánderu sési, eska tsípikua jingoni irekasïnga ima enga ambakiti pájperakua ma jatsijka Tata Diosïni jingoni (Juanu 8:32).

Na enga i ambe marhuakuajka iásï anapu nanakechani: Imeecha engaksï Jeobaeri kúnguarhikuecha jimbo jorhentpijka, jingontkuksï kurhaasïndi enga nanaka ma o uarhiiti ma íntspijka komentariu ma tánguarhikuarhu. Kánikuaksï janhanharhiasïndi nanakechani engaksï ambakiti eratsekua jukaka ka engaksï ambakiti ambe jorhentpijka imeecheri ejemplu jingoni (Titu 2:3). Ístu, kúnguarhikuarhu anapu orhejtsïkutichaksï mítesti eska imeecha engaksï sánderu aianhpijka Tata Diosïri Reinueri ambe, jindeeskaksï nanakecha (Salmo 68:11, exe je rekuadruni “¿Uandaspi apostoli Pablu eskaksï nanakecha no jatsiska para uandani?”).

Jesúsi jukaparharaasïreendi nanakechani. Biblieri jurhiatikuecha jimbo, kʼuiripuechaksï sánderu jukaparharaasïreendi tatakechani ka eska nanakechani. Libru Talmud, uandasïreendi: “Xáni enga sésiika para imeecha engaksï tatakechani kánguarhiajka, peru xáni enga no sésiika para imeecha engaksï nanakechani kánguarhiajka”. Máru taatichaksï ísï exesïreendi eska nanakani ma kánguarhini, kʼuetsapeti ambeespka jimbokaksï jatsisïreenga para jirinhakuni né jingoni uambuchani ka ístu para maiampini, ístu ima nanaka no úpirindi kuidariuani taati jémbechani engaksï kʼériipiringia.

Joperu Jesúsi májkueni jukaparharaasïreendi nanakechani ka ístu tatakechani. Ima tsítantaspti tsïndiri tatakani enga Naíni anapuepka ka ístu Jairueri nanakani (Markusʌ 5:35, 41, 42; Lukasʌ 7:11-15). Ka ístu ambakerantaspti uarhiitini ma “enga 18 uéxurhini páni japkia pʼamenchani, jimboka no sési jásï espiritu ma incharhitixapka enga iámu chkéreenga”. Ka ístu uandaspti: “I uarhiiti, Abraáni uájpeesti”, peru judiuechaksï kási no úrasïreendi i uandakuecha para nanakechani arhikuekani (Lukasʌ 13:10-16). Joperu enga Jesúsi xáni sési arhipka ka janhanharhikua jingoni, xarhataspti eska ima uarhiiti májkueni jukaparhakuespka eska náki uéjki máteru kʼuiripu ka eska mítespka eska ima uarhiiti kánikua mintsikasïreenga (Lukasʌ 19:9; Galasia 3:7).

Na enga i ambe marhuakuajka iásï anapu nanakechani: Asia anapuechaksï eratsesïndi eska nanakani ma tʼarhexerani, no marhuakusïnga familiani. Uandasïndiksï: “Nanakani ma tʼarhexerani ísïisti komu itsï jatsikuni jarhani besinueri jardinini”. Joperu taati ma enga Tata Diosïni marhuakujka ka uékpiti, no jatsisti para ísï eratseni. Sánderu sési, jingontku kuidariuasïndi uájpeechani, no ariparini sinksï tatakeski o nanakeni ka úsïndi eskaksï májkueni jorhendanhaaka ka eskaksï intsïnhaaka iámindu ambe paraksï no pʼamenchani.

Jesúsi mintsikaasïreendi nanakechani: Jima engaksï judiuecha jusgarpienga, nóksï xáni kasu úkusïreendi uarhiitini ma enga uandantapiringa ambe ma, ísï eskaksï na no kasu úkuenga jántspirini ma. Josefo, enga istorieri ambe uandantapka primeru siglurhu, uandasïreendi eskaksï nanakecha no mintsinharhikueska jimbokaksï nanakeeska.

¡Joperu Jesúsi ménderueni eratsesïreendi! Ima erakuasti máru uarhiitichani parakaksï uandantapiringa eska ima tsíntaspkia (Mateu 28:1, 8-10). Nájkirukaksï i ambakiti uarhiiticha exepka engaksï uándikupka ka jatsintani Tatani, asta apostolichaksï úkua jukanchaspti jakajkuni ambe engaksï ima uarhiiticha uandapka (Mateu 27:55, 56, 61; Lukasʌ 24:10, 11). Ísï jimbo, enga Jesúsi erakuapka ini ambakiti uarhiitichani paraksï orheta exeni eska ima tsíntaspkia, xarhataxapti eskaksï imeechajtu úpiringa uandantani imeeri ambe ísï eska náki uéjki máteru imeeri chúxapati (Ukuecha [Hechos] 1:8, 14).

Na enga i ambe marhuakuajka iásï anapu nanakechani: Kúnguarhikuarhu anapu orhejtsïkutichaksï xarhatasïndi eskaksï jukaparharaasïnga nanakechani engaksï jingontku kurhaajka ambe engaksï uandajka. Ka imeecha engaksï tembuchatikia, xarhatasïndiksï eska janhanharhisïnga témbani engaksï jingontku kurhajchajka (1 Pedru 3:7; Génesis 12:12).

Biblieri konsejuechaksï jarhuajpesïndi parakaksï nanakecha sánderu felisiuaka

Imeecha engaksï májkueni jámajka eska Kristu, jurajkusïndiksï eskaksï nanakecha mámaru ambe uaaka ka janhanharhiasïndiksï ísï eska Tata Diosï na uékeenga jiáni enga kuerauapka (Génesis 1:27, 28). Acheeticha engaksï Tata Diosïni marhuakujka, nóksï ísï exeasïndi témbechani enajkiksï no jukaparhakue. Sánderu sési, úsïndiksï ambe enga Biblia uandajka parakaksï témbecha sánderu felisiuaka (Efesu 5:28, 29).

Enga Yelena ueenapka Biblieri ambe jorhenguarhini, imeeri acheeti jukari no sési kámasïreendi ka no sési arhini. Jima enga ima kʼuiriperanhapka, jukari no sési kámberanhasïreendi, tataka ma úsïreendi afuersa páni nobia jémbani ka no sésiksï kaasïreendi nanakechani. Ima uandasïndi: “Ambe engani Bibliarhu jorhenguarhika, uinhaperantastirini. Jorhenguarhiska eska jarhaska Tata Diosï ma engareni kánikua xénchajka, jukaparharani ka enga uandanhiajka jíndeni jimbo. Ka úspka exeni eska juchiiti acheeti úpiringa mójtakurhini enga imajtu jorhenguarhipiringa Biblieri ambe”. Ambe enga Yelena xáni uékeenga, niáraspti ísï úkuarhini jimboka tátsekua imeeri uámba itsï atakuarhispka ka Jeobaeri testigu úkuarhini. Yelena uandasïndi: “Ima niárasti iámindu ambe jimbo pʼíngukuarhini ka iásï ambakiti ejemplu máestia. Ístu, tsimarhanchi jorhenguarhiska puátsperantani. Biblieri konsejuechaksï marhuasti parani ji ísï pʼikuarherani eskani xénchanhasïnga ka eskani sési kuájchakukata jarhaska juchiiti acheeti jimbo” (Kolosasi 3:13, 18, 19).

No Yelenajkusï niárapti ini ambe nitamakuarhini. Iámu parhakpinirhu, jarhastiksï uarhiiticha engaksï sési irekani jaka imeecheri acheeti jémbeecha jingoni jimbokaksï márku jánguarhintajka para úni ambe enga Biblia uandajka para temungurhiricha. Ka ístu, máteruecha engaksï márku marhuakuni jaka Tata Diosïni, sésiksï pʼikuastantaasïndi, janhanharhiasïndiksï ka nóksï pʼínguasïndi para úni ambe ma (Juanu 13:, 34, 35).

Acheeticha ka uarhiiticha engaksï Tata Diosïni marhuakujka, sésiksï mítetixati eskaksï imperfektueska ka eskaksï someni niárasïnga no sési ambe úni jimbokaksï imani kueraakata jingoni kuenta úkuarhisïnga enga ‘míndakata japkia para xántkisku irekani jarhaniʼ ka engaksï no ma ambe erokuarhini japka para sánderu orhepani. Joperu ístu mítestiksï eska engaksï andarhieraska Jeobani enga jindeeka imeecheri Tata Diosï ka Taati, niáraatiksï pʼímutanhantani “para nóteru jántspirinia pekadueri nijtu uarhikueri ka ísïiuatiksï komueska Tata Diosïri uájpeecha engaksï no jántspirika”. Para ima tatakecha ka nanakecha enga Tata Diosï kuájchakuani jaka, ambakiti ambe jarhasti iásï ka para sánderu orhepani (Roma 8:20, 21).