¿Andisï jukaparhakue para Jesúsi

Eskachi na exeka máteru jorhenguarhikua jimbo, Jesúsi úraspti imeeri tsípikuani para aianhpini ‘ambakiti aianhperakua Tata Diosïri juramukueri’ (Lukasʌ 8:⁠1). Kánikua jánguarhintaspti ka uánikua kilometru xanharaspti iápuru Israeli jimbo para uandantani i juramukueri ambe. Ístu, tʼámu Ebanjeliuecha enga Jesúsiri aianhpikueri ambe uandajka, jukari sieni xanharisï uandasïndi Tata Diosïri Reinueri ambe, ka sáni iámindu Jesúsi uandantasti. Peru i jindeesti sánititu ambe enga xarhatajka eska ambe enga sánderu uandapka jindeesti Tata Diosïri Reinueri ambe (Juanu 21:25).

¿Andisï xáni jukaparhakue para Tata Jesukristu Tata Diosïri Reinu? Jimboka Tata Diosï erakuspti para juramutini imani Reinuni jimbo (Isaías 9:⁠6; Lukasʌ 22:28⁠-⁠30). Peru no uékasïreendi eska k’éri ambe exenhapiringa (Mateu 11:29; Markusʌ 10:​17, 18). Sánderu jukaparhakua ambe jimbo aianhpisïreenga Reinueri ambe. Ima mítespti ka mítesti eska inde juramukua ambakiti ambe uaaka kʼuiripuecha jimbo enga ima kánikua xénchajka: imeeri Taati ka imeeri chúxapaticha.a

AMBE ENGA REINU UAAKA JESÚSIRI TÁTEMBA JIMBO

Jesúsi xénchasïndi imeeri Taatini iámu mintsita jingoni (Proverbios 8:30; Juanu 14:31). Jesúsi kánikua sési exesïndi na enga jásïika imeeri Taati, uékpitini, pʼamojpitiini ka jurhimbitiini (Deuteronomio 32:⁠4; Isaías 49:15; 1 Juanu 4:⁠8). Jimbosï kurhunhiajti iámu ima chkuanderakuecha enga uandanhajka Tata Diosïri ambe. Pori ejemplu, uandanhasïndi eska Tata Diosï no uandanhiasïnga imeecheri engaksï kómu nitamakuarhini jarhajka o asta jamberi uandanhasïndi eska imasï újka eskaksï kómu nitamakuarhiaka. I jindeesti enga jimbo Tata Jesukristu sánderu jánguarhintapka aianhpini ambakiti “aianhperakua [Tata] Diosïri juramukueri” ambe: jimboka i Reinuni jimbo pímbinhajkuntaaka imeeri Taatiri nombri (Mateu 4:23; 6:​9, 10). ¿Néna uaa i ambe?

Reinuni jimbo Tata Diosï uánikua ambe mójtakuati para kʼuiripu sési irekani. Jeoba “kutsunharhikuauati iámindu uekua”. Kénditaati iámu ambe enga újka eskachi ueraaka ka “nóteru jauatia uarhikua ka ni uandanhiata ka nóteru nema ueraati o p’amenchani” (Jaŋaskuecha [Apocalipsis] 21:​3, 4). Tata Diosïri Reinuni jimbo, kʼuiripuechaksï nóteru méni kómu nitamakuarhiatia.b

Nójtsïni ísku pakatasïndi enga Jesúsi uékeenga uandantani Reinueri ambe, jimboka inde juramukuani jimbo xarhataati eska imeeri Taati meru pʼamojpitiska ka uinhapitiini (Santiagu 5:11). Peru Reinu no solu ambakiti ambe uaati Tata Diosïni jimbo. Ístu Tata Diosïri Reinu ambakiti ambe uaati imeechani jimbo enga Jesúsi kánikua xénchajka: imeeri chúxapatichani.

AMBE ENGA REINU UAAKA JESÚSIRI CHÚXAPATICHANI JIMBO

Ante de Echerirhu jurhani, Jesúsi kánikua tiempu irekaspti imeeri Taati jémba jingoni auandarhu. Jarhuataspti kueraani iámu ambe enga jaka: jóskuechani engaksï auandarhu jaka, juchaari sési jásï parhakpini ka ístu iámu ambe enga tsípiti jaka (Kolosasi 1:​15, 16). Peru iámu ambeeri enga kueraakata jaka, Jesúsi niáraspti sánderu xénchani kʼuiripuechani (Proverbios 8:31).

Ima xénchperakua enga Jesúsi xarhatapka kʼuiripuechani jimbo, úspti eska aianhpipiringa. Enga Echerirhu japka, Jesúsi uandaspti eska jurhaspka para “aianhpini ambakiti aianhperakuani” imeechani enga uétarhinchajka (Lukasʌ 4:18). Peru Jesúsi no solu uandasïreendi, ístu úsïreendi ambe ma. Pori ejemplu, engaksï máru kʼuiripuecha tánguarhintapka paraksï kurhajchani, “pʼamojkuaspti, ka ambakeraantaspti imeechani engaksï pʼamenchani japka” (Mateu 14:14). Ka ístu enga acheeti ma uinhamu pʼamenchani japka, arhispti Jesúsini: “Engari tʼu uékajka, uaakareni ambakerantani”. Ima, uékperakua ka pʼamojperakua jingoni, mókukuspti: “Uékasïngani, ambakintia”, ka ambakerantaspti (Lukasʌ 5:​12, 13). Ka enga Jesúsi exepka imeeri amiga Maríani eska ueraxapka jimboka uarhispka imeeri mími jémba Lásaru, “kánikua no sési pʼikuarheraspti ka uandanhiani” ka “pʼiáraspti uerani” (Juanu 11:​32-36). Jiájkani úspti ambe ma enga no nema eratsepiringa: nájkiruka Lásaru tʼámu jurhiani páni japkia enga uarhipka, Jesúsi tsítantaspti (Juanu 11:​38-44).

Jesúsi mítespti eska ima milagruecha enga uaapka, ma tiempujku marhuapiringa. Jimboka kʼuiripuecha enga ambakerantapka ka tsítantani, ménderuksï niárapirindi pʼamenchani ka uarhini. Peru, ístu mítespti eska ambe enga úpiringa Reinuni jimbo jindeati para méntkisï. Ísï jimbo no solu uaapti milagruechani, sino sánderu sési, úraspti imeeri tsípikuani para aianhpini “ambakiti aianhperakuani [Tata] Diosïri juramukueri” (Mateu 9:35). Milagruechani enga Jesúsi uaapka xarhatasïndi ambe enga uaaka Tata Diosïri Reinuni jimbo no ióndani iámu Parhakpinirhu. ¿Ambe úkuarhia? Bibliajtsïni aiangusïndi.

• Nóteruksï jauatia pʼamenchakuecha.

  “Jiáni, imeecha engaksï no újka exeni uaatiksïa exeni ka imeecha engaksï no újka kurhaani uaatiksïa kurhaani. Jiáni, ima enga no újka sési xanharani ísï tsanguaraati komueska axuni ma ka katamba imeeri enga no újka uandani, uinhachaati xáni tsípini.” Ístu, “no nema enga jima irekaaka uandaati: ‘Pʼamenchaxaka’” (Isaías 33:24; 35:​5, 6).

• 

  Nóteru jauatia uarhikua.

  “Echeri jurhimbiticheriuati, ka jimaksï irekaati para méntkisï.” (Salmo 37:29.)

  “[Tata Diosï], kʼamajkuati uarhikuani para méntkisï, ka juchaari Juramuti Jeoba kutsunharhikuauati uekua iáminduechani.” (Isaías 25:⁠8.)

• Uarhirichaksï tsíntaati.

  “Iámindu imeecha engaksï inchatsikurhini jaka, kurhaaka imeeri uandakuani ka [...] tsíntaatiksï.” (Juanu 5:​28, 29.)

  Tsíntaatiksï uarhiricha. (Ukuecha [Hechos] 24:15.)

• 

  Iáminduksï jatsikuarheati kʼumanchikua ma ka ánchikuarhita.

  “Uáuatiksï kʼumanchikuechani ka jimaksï irekaati; ka niáraatiksï ubasï jatsikuni ka akuatiksï frutani. Nóksï uáti kʼumanchikuani ka máteru nema irekani; nóksï ikaraati ka máteru nema akuni [...;] ka juchiiti erakukatechaksï marhuataati ambe engaksï uáka imeecheri jájkicha jingoni.” (Isaías 65:​21, 22.)



• Nóteru jauatia uarhiperakuecha.

  “[Tata Diosï] úsïndi eskaksï guerrecha kʼamakurhiaka iámu parhakpinirhu.” (Salmo 46:⁠9.)

  “Iretechaksï no uarhiperaati máteru iretecha jingoni, niteruksï jorhenguarhiatia uarhiperani.” (Isaías 2:⁠4.)

• 

  Jauati t’irekua para iáminduecha.

  “Echerirhu uánikua ambe jauati enga akueka; Tata Diosï, juchaari Tata Diosïjtsïni, újchakuraati.” (Salmo 67:⁠6.)

  “Kánikua tʼirekua jauati echerirhu; juátecharhu karhakua kánikua tʼirekua jauati.” (Salmo 72:16.)

• Iáminduechaksï jatsikuarheati.

  “Imeecha engaksï no jatsikuarherika nóksï mirikurhinhaati.” (Salmo 9:18.)

  “Ima jarhuataa[ti] imani enga no jatsikuarheka ka enga jarhuajperata kurhajkuarhini jaka, ístu imani enga kaxumbitiika ka imani enga no jatsika né enga jarhuataaka. Pʼamojkuati imani enga kaxumbitiika ka imani enga no jatsikuarherika, ka pʼímutantauati imeechani engaksï no jatsikuarherika.” (Salmo 72:​12, 13.)

Eskachi na exekia ini aiatsperakuechani, ¿kurhangusïntsï andisï xáni jukaparhakue para Jesúsi, Tata Diosïri Reinu? Ima aianguaspti Tata Diosïri Reinu iámu imeecha engaksï uékapka kurhajchani, jimboka mítespka eska no jarhaspka máteru ambe enga úpiringa sési peentani juchaari uandanhiatechani.

¿Tsitiasïntsï ini Tata Diosïri aiatsperakuechani? Enga ísïika, ¿nénajtsï uaa sánderu ambe míteni imeeri Reinueri ambe? ¿Ambejtsï uaa úni para intsïnhani i kóntperatechani? Máteru jorhenguarhikua jimbochi exeaka mókuntskuechani.