¿Káni ueenaski juramuni Tata Diosïri Reinu? (Parte dosi)

REPASU MA NABUKODONOSORI TSÁNHARHIKUERI

Juliu: Ernestu, kánikua tsípisïnga ménderukeni exeni. Kánikua tsitisïnga mándani semana uandontskuarheni tʼungini jingoni Biblieri ambe.a ¿Nári jarhaski?

Ernestu: Sési jarhaska, diosmaiamu.

Juliu: ¡Xáni sési! Últimu xanhari engakeni pʼorhembipka, uandontskuarhespkachi andichisï Jeobaeri testiguecha uandajki eska Tata Diosïiri Reinu ueenaska juramuni 1914 jimbo.b Exeskachi eska kapitulu 4 Danieliiri libru, aiangusïngajtsïni máru ambe parachi úni míteni ini ambe. ¿Miásïndi ambechisï exepi?

Ernestu: Jo, ambe enga tsánharhipka rei Nabukodonosori.

Juliu: Ísïisti. Ima kʼéri anhatapuni ma tsánharhispti enga niárapka asta auandarhu jamberi. Tsánharhikua jimbo kurhaaspti ánjelini ma enga uandapka eskaksï chʼapapiringa anhatapuni. Ambe enga pakarapka jindeespti sïrangua ka tronku. Tátsekua nitamaspti “siete tiempu” ka anhatapu ménderu tsikintaspti.c Ístuchi exeskia eska i profesia tsimani xanharu kumplirikuarhiskia. ¿Náki jindeeski orheta xanharu? ¿Miásïntsï?

Ernestu: Jindeespti ambe ma enga Nabukodonosori úkuarhinchapka ¿no ísïiski? Loku úkuarhispti ka ísï pakaraspti siete uéxurhini.

Juliu: Ísïisti. Loku úkuarhispti ka nóteru úsptia juramutini. Segundu xanhari enga kumplirikuarhipka i profesia jindeespti enga siete tiempu Tata Diosï nóteru jatsiapkia juramutichani ixú echerirhu. I tiempu uénaspti enga Jerusaléni kʼamajkunhapka uéxurhini 607 ante de Jesúsi. Jiáni uératini, nóteruksï jarhaspti juramutiicha ixú echerirhu enga Tata Diosï Jeoba peeraapka. Enga na nitamapiringia inde tiempu, Tata Diosï peerapirindi jimbanhi juramutini ma, peru iásï auandarhuia. Engaksï na kʼamarapiringia inde siete tiempuecha, ueenapirindi juramuni Tata Diosïiri Reinu auandarhu. Buenu, exeskachia kánksï ueenaski kuenta úkuarhini i siete tiempuecha. Iásï, jatsiskachi para exeni na xáni duraripirini i tiempu parachi úni míteni káni ueenapirini juramuni Tata Diosïiri Reinu. ¿Kurhanguxakijtsï?

Ernestu: Jo, miántaxakaia ambe engachi uandontskuarhepka últimu xanhari.

Juliu: Sési jarhasti. Jiájkani ju je exeni na xáni duraripirini i siete tiempu. Ji mismu jatsispka para ménderu repasarintani antedeksïni jurhani exeni parani úni miántani iámindu ambe. Jánguarhintaaka parajtsï úni fásili kurhanguni.

Ernestu: Sési jarhasti.

KʼAMARASÏNDIKSÏ SIETE TIEMPUECHA KA UÉNASÏNDIKSÏ ÚLTIMU JURHIATIKUECHA

Juliu: Primeru kumplimienturhu rei Nabukodonosoriri siete tiempuechaksï siete uéxurhini durarispti. Peru segundu kumplimientu jimbo Tata Diosïiri Reinuni jimbo siete tiempuechaksï sánderu kánikua durarispti.

Ernestu: Ka ¿nénajtsï míteski ini ambe?

Juliu: Para ueenani, siete tiempuechaksï ueenaspti uéxurhini 607 ante de Jesúsi enga Jerusaléni kʼamajkunhapka. Engachi jima uératini miiuska siete uéxurhini, niáraakachi uéxurhini 600 ante de Jesúsi ka imani uéxurhini jimbo no ma ambe úkuarhispti enga Tata Diosïiri Reinu inchaakupiringa. Ístu, eskachi na exepkia enga Jesúsi jupka ixú echerirhu, uánikua uéxurhini ísï tátsekua uandaspti eskaksï siete tiempuecha nótki kʼamarasïrenga.

Ernestu: Jo, jo. Miántaskia.

Juliu: Ísï jimbo jiájkani, iásï siete tiempu no jindeeti siete uéxurhini sino sánderu kánikua tiempu.

Ernestu: ¿Sánderu ióni? ¿na xáni sánderu ióni?

Juliu: Buenu, Jaŋaskuecheri libru jimbo jarhasti profesia ma enga sáno terukuntajka Danieliiri jingoni ka engajtsïni jarhuatajka parachi úni kurhanguni na xániski siete tiempu. Indeni profesia jimbo uandanhasïndi eska tanimu tiempu ka terujkani jindeeskaksï 1.260 jurhiatikua jimajkani siete tiempu jindeestiksï 2.520 jurhiatikua.d ¿Ixú jamberiri kurhanguxaki?

Ernestu: Jo, peruni útasïni nótkini kurhangusïnga, andijtsï chá jakajkujki eska Tata Diosïiri Reinu ueenaska 1914 jimbo.

Juliu: Sési jarhasti, iáiasïchi exeaka. Máru profesiecha jimbo engaksï Bibliarhu jaka, ma jurhiatikua jindeesïndi ma uéxurhini. e Engachi májkueni uaaka siete tiempu jingoni 2.520 jurhiatikua, jiájkani jindeepirindiksï 2.520 uéxurhini. Ka engachi kuenta úska 2.520 uéxurhini ueenaparini uéxurhini 607 ante de Jesúsi, jimboka i jindeespka jiáni enga uénapka siete tiempu, niárasïngachi 1914 jimbo.f Ini ambe jimbochisï újka uandani eska 1914 jimbo, kʼamakurhispkaksï siete tiempuecha ka eska Jesúsi ueenaska juramuni Tata Diosïiri Reinurhu. Ístu 1914 jimbo ueenasti úkuarhini uánikua ambe enga Biblia uandapka eska úkuarhipiringa últimu jurhiatikuecha jimbo.

Ernestu: ¿Ambe úkuarhipirini?

Juliu: Mateu 24:⁠7 jimbo, Jesúsi uandaspti ambe enga úkuarhipiringa enga ima ueenapiringia juramuni auandarhu, uandaspti: “Ma nasioni anapuecha jauaraaka paraksï uarhiperani máteru nasioni anapuechani jingoni, ka ístu ma juramukuarhu anapuecha máteru juramukuarhu anapuechani jingoni, ka jauati pʼamenchakua ka kʼarhingua ambe, ka naninterkisï jencheati”. Exeskijtsï, Jesúsi uandaspti eska japiringa kʼarhingua ambe ka jenchekuecha. ¿No í ambesï úkuarhini jaki iáiasï interu parhakpinirhu desde 1914?

Ernestu: Jo ísïisti.

Juliu: Jesúsi ístu uandaspti eskaksï japiringa guerrecha. Ka Jaŋaskuecheri libru uandaspti eska no jindeepiringa engaksï uarhiperapiringa iretechajku sino uarhiperatecha nani engaksï inchaakupiringa nasionicha engaksï interu parhakpinirhu úkuarhipiringa.g ¿Miásïntsï káni ueenaspi Primera Guerra Mundiali?

Ernestu: 1914 jimbo, imani uéxurhini engajtsï chá uandajka eska Jesúsi ueenaska juramuni. No méni eratsespka ji ini ambe.

Juliu: Ísïisti, engachi eratsentajka profesia siete tiempueri ka ístu profesia últimu jurhiatikueri kuentachi íntskukuarhesïnga eska iámu ambe terukuntasïnga. Jeobaeri testiguechachi sési mintsinharhixaka eska 914 jimbo ueenaska juramuni Jesúsi ka eska ístu, jiánchi ueenaska irekani últimu jurhiatikuecha jimbo.h

Ernestu: Jánguarhintaxaka útasï jiókuarhini i ambe engani kʼamaraka kurhaaka.

Juliu: Kurhangusïnga. Jíjtuni úkua jukanchaska kurhanguni orheta xanharu engajtsïni aiangupka iiri ambe. Peru erokuarhisïnga eska i uandontskuarhitaksïni jarhuataka parajtsï úni exeni eska nájkiruka Biblia no uandajka meru 1914, Jeobaeri testiguecha uánikua ambe jimboksï jakajkusïndi eska Jesúsi ueenaska juramuni inde uéxurhini jimbo. Ístu, erokuarhisïnga eska i uandontskuarhitaksïni jarhuataka kurhanguni eska iámu ambe engachi jucha jakajkujka Bibliarhu pʼitakata jarhaska.

Ernestu: Jo, inde amberini méntkisï ístu pakatasïndi. Chájtsïni méntkisï aiangusïnga ambe ma Biblia jingoni. Ambe uéjki engaksïni kurhamarhiaka chájtsï no méni uandasïnga “Ji jakajkusïnga” o “ Ji eratsesïnga”. Méntkisïjtsï úrasïnga Bibliani. Peru ¿andisï xáni úkua juka kurhanguni? ¿Andisï Tata Diosï no mátirku uandapi eska Jesúsi 1914 jimbo ueenapiringa juramuni?

Juliu: Ambakiti kurhamarhikua máesti Ernestu. Uánikua ambe jarhasti Bibliarhu engajtsïni Tata Diosï no mátirku aiangujka. ¿Andisï Tata Diosï ísï úpi? ¿Andichisï jatsi para jánguarhintani parachi úni kurhanguni? ¿Uékapirintsï uandontskuarhi iiri ambe máteru semana jimbo?

Ernestu: Jo, tsitipiringa ixukini erokaaka.