Enga no sési ambe úkuarhijka

“Kánikuachi no sési pʼikuarheraspka uénani jámani. Iorhentperakua ka atsïmu méntkusï iámindu ambe kʼamajkupti engachi xáni jatsipka” (Andres, Sierra Leona anapu).

“Engachi kʼuanhatsintapka enga nitamapkia urakani, nóteru ambe ma jarhasptia. Nochi úsïrenga jakajkuni ambe engachi exeni japka. Juchiti nanaka tinguikuatsespti ka pʼiaraspti uerani” (David, islas Vírgenes anapu).

¿MÉNISÏJTSÏ nitamakuarhiski ini ambe? Enga ísïka, seguru eskajtsï kurhangujka na engaksï no sési pʼikuarherajka imecha engaksï inde ambe nitamakuarhijka: no úni jakajkuni ambe enga úkuarhika, kánikua uandanhiani, uandani eska no ísïska ambe enga úkuarhika, no nani máru kurhanguni ka no sési jásï ambe tsánharhini. Uánikua engaksï ini ambe nitamakuarhijka, kánikuaksï no sési pʼikuarherasïndi ka kuataranksï engaksï ísï pʼikuarherajka enajkiksï nóteru ma rasoni jatsiia para seguirini irekani.

Engajtsï niáraka iámindu ambe tsïtani jimboka no sési ambe úkuarhiska, jamberijtsï chájtu ísï pʼikuarherajka enajkijtsï nóteru uáia seguirini irekani. Jamberijtsï eratsini jaka eska no jukaparhakueska irekani. Peru Biblia uandasïndi eska kánikua jukaparhakueska ka eskaksï ambakiti rasonicha jarhaska para jakajkuni eska niáraaka ambakiti ambe úkuarhini.

MÍTINI AMBE ENGA BIBLIA ARHIJKA, EXESÏNGACHI ESKA JUKAPARHAKUESKA IREKANI

Eclesiastés 7:8 arhisïndi: “Sánderu sésisti enga ambe ma kʼamarajka eska enga uénajka”. Enga cha no sési jásï ambe nitamakuarhika ka jatsintsï para ménderu uéntani úni ambe, jamberijtsï ísï pʼikuarheraaka eska ískueuaka ísï úni. Peru tekantskua jingoni ka jánguarhintaparini, uákajtsï ménderu sési irentani.

Biblia arhisïndi eska niáraaka jurhiatikua enga nóteru kurhakuarhiakia “eska uenhaxaka ni eskaksï kómu atsïkuarhixaka uandanhiata jimbo” (Isaías 65:19). I ambe niáraati úkuarhini enga Tata Diosïri Reinu Echerini paraisu ma úntaaka (Salmo 37:11, 29). Nóteru méni no sési ambe úkuarhiatia. Nóteruchi méni miáuakia iámindu imani ambe engachi nitamakuarhika ka engajtsïni no sési pʼikuastajka. Tata Diosï enga iámindu ambe újka úni, aiatspesïndi: “Nóteru miánhantaatia no sési jásï ambe enga ióntki japka ka i ambe nóteru no sési pʼikuastaatia mintsitani” (Isaías 65:17).

Eratsi je arini ambe: juchari Kuerajpiri ústia ambe enga xáni uétarhika para “sánderu orhepani” ka parachi “erokuarhikua ma jatsini”, uékasïndi eskachi pínandikua jingoni irekaaka jiáni enga juramuni jauakia imeri ambakiti gobiernu (Jeremías 29:11). I ambe enga úkuarhiaka, ¿uáksïni jarhuatani parajtsï uékani seguirini irekani? Sandy engachi primeru artikulurhu uandaka, uandasïndi: “Eratsini imani ambakiti ambe enga sánderu orhepani úkuarhiaka jiáni enga Tata Diosïri Reinu juramuni jauakia, uátiksïni jarhuatani nóteru miánia ambe engajtsï nitamakuarhika ka seguirintsï jarhani orhepani uérani”.

No ióni jimbo, ¿ambe sánderu ambe uá Tata Diosïri Reinu? Ju je exeni. Ísïjtsï mítiaka eska jukaparhakueska seguirini jarhani irekani nájkirukajtsï xáni no sési ambe nitamakuarhika ka eska nóteru méni úkuarhiakia no sési jásï ambe. Enga jamberi ísï úkuarhiaka, Bibliaeri ambakiti konsejuechaksïni jarhuataati orhepani uérani engajtsï no sési ambe nitamakuarhiaka.

Bibliaeri karakatecha engaksïni uáka jarhuatani

Jánguarhinta je sési mintsikuarhini

“Sánderu sésisti mintsikuarhini sáni ka eska jukari kánikua ánchikuarhini ka ísku xáni jánguarhintani” (Eclesiastés 4:6).

Inbestigadorichaksï uandasïndi eska kʼuiripu ma enga no sési ambe nitamakuarhijka ka “no sési mintsikuarhini ni sési kʼuíni, úsïnga eska sánderu no sési pʼikuarheraaka”. Ísï jimbo, marhuasïndi sési mintsikuarhini.

Aiangu je nemani na engajtsï pʼikuarherani jaka

“Enga kʼuiripu ma uandanhiani jarhajka imeri mintsitarhu, kánikua no sési pʼikuarherasïndi, peru ambakiti uandakuechaksï sési pʼikuastantasïndi” (Proverbios 12:25).

Familiarhu anapu ma jingoni uandontskuarhi je o amigu ma jingoni engajtsï mintsinharhijka. Aparte deksïni jingontku kurhajchani, uinhaperantaatiksïni ka imani ambe jingonksïni jarhuatani engajtsï uétarhinchajka.a

Eratsi je eska niáraaka ambakiti ambe úkuarhini

“Peru jucha kʼóru erokaxaka jimbanhi auandani ka jimbanhi parhakpinini jima enga jurhimbitku jánhaaka, eskajtsïni Diosï na eiachika” (2 Pedru 3:13).

a Kʼuiripu ma enga ióni jamberi no sési pʼikuarherajka o méntkisï ísï pʼikuarherani enajki sóntku úpirini ambe ma, jamberi uétarhinchajti doktori jingoni nirani.