SEMANA 52
Ju je jarhuataani imeechani engaksï no sési nitamakuarhini jarhajka
“Asï pʼíngukuarhi parari jarhuataani imeechani engaksï uétarhinchani jauaka engari exekuarhijka eskari uaaka jarhuataani” (PROV. 3:27).
PIREKUA 103 Jeobajtsïni íntsaasti orhejtsïkutichani
AMBE ENGACHI EXEAKAa
1. ¿Ambe úsïni Tata Diosï Jeoba sáno méntkisï para mókukuantani imeeri marhuariicheeri kómarhikuechani?
¿MÍTESPIJTSÏ eskaksïni Tata Diosï Jeoba uaaka chánksïni úrani para mókukuntani erachini ma enga kómarhijka? Juchachi uaaka jarhuajpeni no arhiparini engachi orhejtsïkutiika, orhejtsïkutiiri jarhuajpiriini, prekursoriini, publikadoriini, tumbiini ochi jatiriini, tatakeeni o nanakeeni. Enga nema enga xénchajka Tata Diosï Jeobani mintsita jingoni kómarhijka eska jarhuataaka, juchaari Tata Diosï sáno méntkisï úraasïndi orhejtsïkutiichani o máteru imeeri marhuariichani para sési pʼikuastantani indeni kʼuiripuni (Kol. 4:11). Kʼéri kóntperata máesti ísï marhuakuni Tata Diosï Jeobani ka juchaari erachiichani. Uaakachi ísï jarhuajpeni enga epidemia ambe jauaka, enga no sési ambe úkuarhiaka o engachi no sési kánhaaka.
ENGAKSÏ EPIDEMIECHA JARHAJKA
2. ¿Andisï úpirini úkua jukani jarhuataani erachiichani engaksï epidemiecha jarhajka?
2 Enga epidemia ma jarhajka jamberichi sánderu úkua jukanchajka jarhuajperani máteruechani jingoni. Pori ejemplu, jamberichi uékapiringa nirani pʼorhembiani erachiichani, peru no seguruepirindi ísï úni. O jamberichi tsitipiringa pʼímarhiani tʼireni imeechani engaksï no káni jatsika sentabu, peru ístuchi no uaaka indeni ambe úni. Jamberichi mintsita jingoni uékani jaka jarhuataani máteruechani, peru juchaari familiajtu no sési nitamakuarhini jarhani. Nájkiruka ísïika, uékasïngachi jarhuataani juchaari erachiichani ka Tata Diosï Jeoba kánikua sési pʼikuarherasïndi enga exejka na engachi xáni jánguarhintani jaka para jarhuajpeni (Prov. 3:27; 19:17). Jiájkani, ¿ambechi uaa úni?
3. ¿Ambejtsïni jorhendasïni orhejtsïkutiicheri ejemplu engaksï Desiiri kúnguarhikua jimbo jaka? (Jeremías 23:4).
3 Ambe engaksï orhejtsïkutiicha uaaka úni. Engajtsï chá kúnguarhikuarhu anapu orhejtsïkutiika, sési mítea je karichiichani (arhinta je Jeremías 23:4). Desi, engachi máteru jorhenguarhikua jimbo uandaka, uandantasïndi: “Orhejtsïkutiicha engaksï juchiiti grupurhu jaka aianhpikueri, pʼindesptiksïa uérani aianhpini jíndeni jingoni ka ístu erachiicha jingoni, ístuksï úsïreendi ambe ma juchantsïni jingoni”.b Inde ambe kánikua jarhuataaspti ini orhejtsïkutiichani parakaksï no úkua jukanchapiringa jarhuatani Desini enga pandemia COVID-19 ueenapka ka enga ístu uarhiranchaapka máru familiariichani indeni pʼamenchakua jimbo.
4. ¿Andiksïsï orhejtsïkutiicha úpi jarhuatani Desini ka ambejtsïni jorhendasïni inde ambe?
4 Desi uandantasïndi: “Orhejtsïkutiichaksï juchiiti amiguesptia, ísï jimbo, no úkua jukanchaspka aianguani na engani pʼikuarhereenga ka ambe engareni uandanhiateenga”. ¿Ambeksï uaa jorhenguarhini orhejtsïkutiicha? Eskaksï jatsiska para kuidariuani karichiichani ka imeecheri amigu úkuarhinksï ante de no sési ambe úkuarhini. Engajtsï epidemia jimbo no uaaka pʼorhembiani imeecheri kʼumanchikuecharhu, exe je néna engajtsï uaaka uandajpaani. Desi miásïndi: “Ménichani, ma jurhiatikua jimbojku uánikua orhejtsïkutiichajtsïni uandajpasïreendi ójtsïni mensajichani axacheani. Ima tekstuechani engajtsïni axacheauenga mintsitarhujtsïni niárachesïreendi nájkirukani ji sési míteapkia”.
5. ¿Nénaksï uaa míteni orhejtsïkutiicha ambe engaksï uétarhinchajka erachiicha ka nénksï uaa jarhuataani?
5 Ma ambe jimbo engaksï orhejtsïkutiicha uaaka míteni ambe engaksï erachiicha uétarhinchajka, jindeesti kurhamarhikuechani úkuani enga no no sési pʼikuastauaka (Prov. 20:5). Pori ejemplu, orhejtsïkutiichaksï uaati kurhamarhikuarhini: ¿Erachiichaksï jatsiski ambe engaksï uétarhinchajka komu tʼirekua o medisina ambe? ¿Úpirinksï tsïtani imeecheri ánchikuarhitani o kʼumanchikuani? ¿Uétarhinchasïnksï eskachi jarhuatauaka paraksï kurhajkuarhini jarhuajperata ambe enga Gobiernu íntspijka? Desini, máru erachiichaksï sentabu jingoni jarhuataspti. Joperu ambe enga sánderu jarhuatapka, jindeespti na engaksï orhejtsïkutiicha xáni xénchperakua jingoni kámapka ka engaksï Biblia jingoni uinhaperantapka. Ima uandasïndi: “Orhejtsïkutiichaksï jindeeni jingoni kómarhisïreendi. No miásïnga ambe engaksï uandeenga imeecheeri kómarhikuecharhu, joperuni kʼóruni miásïnga na engani pʼikuarhereenga. Ísïisïreendi enajkirini Tata Diosï Jeoba arhini jarheeni ‘Nóri jandiajku jarhaska’” (Is. 41:10, 13).
Erachi ma enga parti ma nitamatarani jaka tánguarhikuarhu sési pʼikuarherasïndi kurhauani komentariuechani erachiicheeri engaksï Kʼumanchikua Reinuerirhu jaka ka erachiiri ma enga pʼamenchani jaka ka enga bideoiamada jimbo komentarini jaka. (Exe je párrafu 6).
6. ¿Nénachi uaa jarhuajperani máteru ka máteruni jingoni kúnguarhikuarhu? (Exea je fotuechani).
6 Ambe enga kúnguarhikua uaaka úni. Míteskachi eskaksï orhejtsïkutiicha ueenasïnga jarhuataani erachiichani ambe engaksï jingoni uétarhinchajka. Joperujtsïni Tata Diosï Jeoba iáminduechani kurhachesïndi eskachi uinhaperantauaka ka eskachi jarhuatauaka máteruechani (Gal. 6:10). Asta sapichu ambe jingoni uaakachi xarhatakuni imani enga pʼamenchani jaka eskachi xénchasïnga ka inde ambe kánikua uinhaperantaati. Sapiichaksï úpirindi tarjeta ma karakuni o dibujitu ma úkuni erachini ma para uinhaperantani. Tumbiichaksï úpirindi aiakukuarheni para ánchperata ambe úkuni o para ambe ma piákuni pirenchini ma. Máteruechaksï úpirindi tʼirekua ambe úntani para nema enga pʼamenchani jaka ka imeecho pákuni. Ka enga kʼéri pʼamenchakua ma jámani jauaka, iámindu kúnguarhikuarhu anapuechachi uétarhinchasïnga eskachi uinhaperanhantaaka. Ísï jimbo, sési japirindi eskachi sánderu ióni pakarapiringa enga na kʼamarakia tánguarhikua ma parachi úni uandontskuarheni erachiicha jingoni engaksï jima jauaka o bideokonferensia jimbo. Orhejtsïkutiichajtuksï uétarhinchasïndi eska nema uinhaperantauaka. Jimboka jiáni enga epidemia ma jarhajka, sánderuksï ánchikuarhisïndi paraksï erachiichani jarhuataani. Ísï jimboksïsï máru erachiicha noteechani ambe karakuajti paraksï agradeserikuani. Kánikua sési jarhasti engachi iáminduecha jánguarhintajka ísï úni eska na uandajka i Bibliarhu anapu konseju: Seguirii je “uinhaperperantani máteru ka máteruni jingoni” (1 Tes. 5:11).
ENGA NO SÉSI AMBE ÚKUARHIJKA
7. ¿Ambe úpirini úkuarhinchani kʼuiripu ma enga no sési ambe úkuarhijka?
7 Enga no sési ambe úkuarhijka kʼuiripueri tsípikua ma, uaati ma repentku mójtakurhini. Jamberi tsïtaati imeeri jatsikuarhekuani, kʼumanchikuani o uarhiranchani nemani. Ka juchaari erachiichajtuksï niárasïndi i ambe úkuarhinchani. ¿Nénachi uaa jarhuataani?
8. Ante de no sési ambe úkuarhini, ¿ambeksï jatsiski para úni orhejtsïkutiicha ka taatiicha?
8 Ambe engaksï orhejtsïkutiicha uaaka úni. Orhejtsïkutiicha, jarhuata je erachiichani paraksï prepararikuarhini ante de no sési ambe úkuarhini. Ístu, jarhuata je iámindu kúnguarhikuarhu anapuechani paraksï míteni ambe engaksï uaaka úni paraksï kuájchakukuarhini ka paraksïni úni chánksïni uandajpani. Margaret engachi máteru jorhenguarhikua jimbo uandapka, uandantasïndi: “Kúnguarhikuarhu anapu orhejtsïkutiichaksï nitamataraspti arhijtsïkperata ma partirhu ambe enga kúnguarhikua uétarhinchajka ka arhisptijtsïni eska jimeesïsï engachi jucha irekani japka útasï kurhundexapka ka eska engajtsïni juramutiicha arhipiringa eskachi uéakupiringa o eska enga úndapiringa sánderu no sési jánhaskuarhini eskachi jirejiresï uéakuntapiringa. Engajtsïni orhejtsïkutiicha ísï arhipka, kánikuajtsïni jarhuataspti jimboka sinko semana tátsekua uénaspka kʼéri ma kurhundeni”. Taatiicha, engajtsï familieri jorhenguarhikuani jatsiaka, uandontskuarhi je ambe engajtsï uaaka úni mándani arini jiáni enga no sési ambe úkuarhiaka. Engajtsï chá ka chaari uájpeecha preparadu jauaka sánderu fásiliuati míteni ambe úni.
9. ¿Ambeksï jatsiski para úni orhejtsïkutiicha ante de no sési ambe úkuarhini ka ísï tátsekua?
9 Engajtsï chá orhejtsïkujka grupuni ma aianhpikuarhu, asï erokuarhi je eska no sési ambe úkuarhiaka parajtsï kurhakuani chaari grupurhu anapuechani imeecheeri direksioni ka telefonueri númeruechani. Ú je lista ma ka exe je eskaksï erachiicha útasï úrasïnga indeeni direksionini ka telefonueri númeruni. Engajtsï ísï úska, jiáni enga no sési ambe úkuarhiaka, uaakajtsï uandajpani mándani aianhpirini ka exeni ambeksï uétarhinchaxaki. Íntsku je ini informasionini orhejtsïkutini enga orhejtsïkuajka máteru orhejtsïkutiichani ka ima aianguati sirkuitueri orhejtsïkutini ambe enga úkuarhini jaka. Engaksï i erachiicha márku ánchikuarhijka úsïndiksï sánderu jarhuajpeni. Enga nóteru kurhundeni japkia, Margaretiiri sirkuitueri orhejtsïkuti 36 ora no kʼuíspti para organisariuani orhejtsïkutiichani engaksï ánchikuarhini japka para exeantani ka jarhuataani 450 erachiichani engaksï jurajkuapka imeecheri kʼumanchikuechani (2 Kor. 11:27). Ini ambe úparini, úsptiksï jirinhakuani nani engaksï úpiringa pakarani iámindu erachiicha engaksï uétarhinchani japka.
10. ¿Andisï xáni jukaparhakue eskaksï orhejtsïkutiicha kuidariuaka karichiichani? (Juanu 21:15).
10 Orhejtsïkutiichaksï jatsisti para uinhaperantaani erachiichani Biblia jingoni ka sési pʼikuastantaani (1 Ped. 5:2). Enga no sési ambe úkuarhijka, orhetaksï jatsisti para exeni eska mándani erachi sési jauaka, eska jatsiaka tʼirekua, xukuparhakua ka nani pakarani. Joperu jamberi i erachiicha engaksï no sési nitamakuarhika, ióni jamberiksï uétarhinchaati eskaksï jarhuatanhaaka Biblia jingoni ka eskaksï sési pʼikuastanhantaaka (arhinta je Juanu 21:15). Harold enga Grupurhu jaka enga Betelini ma Orhejtsïkujka, uánikuecha jingoni uandontskuarhestia engaksï no sési nitamakuarhika, ima uandasïndi: “Tiempu uétarhisïndi para ma sési pʼikuarherantani. Jamberi erachiichaksï újtia ménderu ísï irentani eskaksï na irekapka, joperuksï úpirindi mémindu miántani ambe enga úkuarhipka, úpirindiksï miántani familiarini ma engaksï uarhiranchaka o ambe ma engaksï imeecha jatsipka o na engaksï xáni no sési nitamakuarhipka. Engaksï ini ambe miántajka, úpirindiksï ménderu ueenani no sési pʼikuarherani. Ka no no sési jarhasti ísï pʼikuarherani ka níjtu arhikuekajki eskaksï nóteru mintsikasïngia Tata Diosïni”.
11. ¿Náki jarhuajperataksï uétarhinchaa ma tiempu ima familiecha engaksï no sési nitamakuarhika?
11 Jukaparhakuesti eskaksï orhejtsïkutiicha ísïiuaka eska na uandajka i konseju: “Uera je imeecha jingoni engaksï uerajka” (Rom. 12:15). Orhejtsïkutiichaksï jatsisti para miátantani imeechani engaksï no sési ambe nitamakuarhika eska Tata Diosï Jeoba ka iámindu erachiichaksï útasï xénchaasïnga. Ístuksï uaati jarhuataani familiechani paraksï seguiriini kómarhini Tata Diosïni, Biblieri ambe jorhenguarhini, tánguarhikuecharhu nirani ka aianhpini. Ka ístuksï orhejtsïkutiicha uaati arhiani taatiichani eskaksï jarhuatauaka uájpeechani paraksï no méni mirikurhini eska nájkiruka no sési ambe úkuarhiaka, imeechaksï méntkisï jatsiati máru ambe. Pori ejemplu, taatiicha miátaanta je chaari uájpeechani eska Tata Diosï Jeoba méntkisï imeecheeri amigueuaka ka eska no méni jurajkuauaka. Arhia je eskaksï uánikua erachiicha ka pirenchicha jarhaska iámu parhakpinirhu engaksï ísïika eska imeecheeri familia ka eskaksï listu jarhaska paraksï jarhuataani (1 Ped. 2:17).
Enga no sési ambe úkuarhiaka jimeesïsï engachi jucha irekaka, ¿uaachi aiakukuarheni parachi jarhuajpeni? (Exe je párrafu 12).e
12. ¿Ambeksï uaa úni kúnguarhikuarhu anapuecha paraksï jarhuajpeni jima enga no sési ambe úkuarhika? (Exe je fotuni).
12 Ambe enga kúnguarhikua uaaka úni. Engajtsï jimeesïsï irekaka enga no sési ambe úkuarhika, kurhamarhia je orhejtsïkutiichani ambejtsï uaa úni parajtsï jarhuajpeni. Jamberiksï uaati chaari kʼumanchikuarhu pakarani ima erachiicha engaksï jurajkuapka imeecheeri kʼumanchikuechani o ístu imeecha engaksï jarhuajpeni jaka jima enga no sési ambe úkuarhika. O jamberijtsï uaaka jarhuajpeni para pákuani erachiichani tʼirekua ambe o máteru ambe engaksï uétarhinchaaka. Ka enga iauanisïika enga no sési ambe úkuarhika ístujtsï uaaka jarhuajpeni. ¿Néna? Kómarhijpikuani erachiichani ka donasioni íntspiparini jima enga jindeeka para ánchikuarhita enga iámu Parhakpinirhu úkuarhijka parachi úni jarhuajpeni jima enga no sési ambe úkuarhika (2 Kor. 1:8-11; 8:2-5). Peru engajtsï uaaka nirani jima enga no sési ambe úkuarhika, kurhamarhia je orhejtsïkutiichani nénajtsï uaa jarhuajpeni. Ka engajtsï pʼímarhinhaska, jamberijtsï jorhendanhaaka parajtsï úni jarhuajpeni jiáni ka jima enga sánderu uétarhini jauaka.
ENGACHI NO SÉSI KÁNHAJKA
13. ¿Náki uandanhiateechanksï jatsiasïni juchaari erachiicha engaksï jima irekaka nani engachi no jurajkunhajka juchaari ánchikuarhitani úni?
13 Engaksï erachiicha no sési kánhani jarhajka sánderuksï no sési nitamakuarhisïndi. Erachiicha engaksï jimeesïsï irekaka engaksï no jurajkunhajka para juchaari ánchikuarhitani úni, ístuksï uandanhiateechani jatsiasïndi sentabu jimbo, pʼamenchasïndiksï ka uarhiranchaasïndiksï familiarichani. Engaksï ísï no jurajkunhajka paraksï mámaru ambe úni, jamberi orhejtsïkutiichaksï no uaati nirani erachiichani exeani ni uandontskuarheni imeecha jingoni paraksï úni uinhaperantaani. Indeni ambesï úkuarhinchapti erachi Andréi engachi máteru jorhenguarhikua jimbo uandaka. Pirenchi ma enga imeeri grupu aianhpikuarhu japka, úkua jukanchaxapti sentabu jimbo ka tátsekua aksidenti ma jatsispti. Uánikua operasionichanksï úkuaspti ka no úsïreendi ánchikuarhini. Nájkirukaksï erachiicha nóteru ueengia mámaru ambe úni pandemia jimbo ka ístu jimbokaksï juramutiicha no jurajkuasïreenga imeecheeri ánchikuarhitani úni, erachiichaksï jánguarhintasti jarhuatani ini pirenchini ka Tata Diosï Jeobajtu jingontku jarhaspti iámu ambe jingoni enga úkuarhini japka.
14. ¿Nénaksï xarhatasïni orhejtsïkutiicha eskaksï mintsikasïnga Tata Diosï Jeobani?
14 Ambe engaksï orhejtsïkutiicha uaaka úni. Andréi kómarhispti Tata Diosï Jeobani ka úspti imani ambe enga úpiringa úni. ¿Ka néna mókukuspi Tata Diosï? Úraaspi máteru erachiichani engaksï sánderu ambe ueenga úni paraksï jarhuatani pirenchini. Máruksï pásïreendi pirenchini doktori jingoni ka máteruechaksï jarhuatasïreendi sentabu jingoni. Tata Diosï Jeoba újchakuraaspti ini erachiichani jimbokaksï májku ánchikuarhispka ka no sáni chéparinksï jarhuajperaspti (Ebr. 13:16). Orhejtsïkutiicha, engachi nóteru jurajkunhaakia juchaari ánchikuarhitani úni, kurhakua je máteruechani eskaksïni jarhuataka (Jer. 36:5, 6). Peru ambe enga sánderu jukaparhakueka jindeesti mintsikani Tata Diosï Jeobani. Imaksïni jarhuataati parajtsï úni erachiichani ka pirenchiichani jarhuataani.
15. Engachi no sési kánhani jauaka, ¿ambechi uaa úni parachi márku jarhani?
15 Ambe enga kúnguarhikua uaaka úni. Jiáni engachi no sési kánhani jauaka, jamberichi jatsiaka parachi grupu sapirhatiichani jimbo tánguarhini. Ísï jimbo, kánikua jukaparhakuesti sési pájperani iáminduecha jingoni. Ju je uarhipeni Satanási jingoni ka no juchaari erachiicha jingoni. Ju je puákuantani juchaari erachiichani ka sési peentani náki uéjki arhirperata ma engachi jatsiaka imeecha jingoni (Prov. 19:11; Efes. 4:26). Ju je jucha ueenani úni ambe ma parachi jarhuajperani máteruechani jingoni (Titu 3:14). Ambe engaksï Andréiiri grupurhu anapuecha úpka pirenchini jimbo, kánikua jarhuataaspti máteruechani. Niárasptiksï sánderu márku jarhani ísï eska familia ma (Sal. 133:1).
16. Eska na arhijka Kolosasi 4:3, 18, ¿ambechi uaa úni erachiichani jimbo engaksï no sési kánhani jaka?
16 Uánikua erachiichaksï seguirixati marhuakuni Tata Diosï Jeobani nájkirukaksï juramutiicha no jurajkuajka paraksï ísï úni. Máruksï ónhakata jarhasti imeecheeri jakajkukua jimbo. Ju je kómarhijpikuani ini erachiichani, imeecheeri familiechani ka imani erachiichani engaksï jarhuataani jaka nájkirukaksï ístu úpiringa ónhanhani. I erachiichaksï jarhuataasïndi paraksï seguiriini mintsikani Tata Diosïni, paraksï íntsaani ambe engaksï uétarhinchaaka ka paraksï kuájpiani engaksï tribunalicharhu jarhajka (arhinta je Kolosasi 4:3, 18).c Ju je no mirikurhini eskaksï juchaari kómarhikuecha kánikua jarhuatauaka juchaari erachiichani ka pirenchiichani (2 Tes. 3:1, 2; 1 Tim. 2:1, 2).
¿Nénajtsï uaa iásï prepararini chaari familiani para jiáni engachi no sési kánhaaka? (Exe je párrafu 17).
17. ¿Nénachi uaa prepararikuarhini iásï para jiáni engachi no sési kánhaaka?
17 Desde iásï chá ka chaari familia uaakajtsï prepararikuarhini para jiáni engachi no sési kánhaaka (Uku. 14:22). Asï eratsi je iámindu imani ambe enga úpiringa úkuarhini. Sánderu sési, jánguarhinta je sánderu sési pájperani Tata Diosï Jeoba jingoni ka jarhuataa je chaari uájpeechani paraksï májkueni úni. Ka engajtsï ma repentku niáraska kánikua uandanhiani, aiangukuarhi je Tata Diosï Jeobani na engajtsï pʼikuarherajka (Sal. 62:7, 8). Uandontskuarhi je chaari familia jingoni iámindu ima ambeeri engachi jimbo mintsikajka Tata Diosï Jeobani.d Ísï eska na uétarhijka preparariuani sapiichani para jiáni enga no sési ambe úkuarhiaka, ístu uétarhisïndi preparariuani para jiáni engachi no sési kánhaaka ka jorhendaani mintsikani Tata Diosï Jeobani. Ísïksï uaati balori jukani ka no xánksï uandanhiani.
18. ¿Nénachi irekaa sánderu orhepatini?
18 Tata Diosïiri pínandikua úsïndi eskachi ísï pʼikuarheraaka eskachi kuájchakukata jarhaska (Filip. 4:6, 7). Inde pínandikua engajtsïni Tata Diosï Jeoba íntskujka jarhuatasïndijtsïni parachi no xáni uandanhiani jiáni engaksï epidemiecha jarhajka, enga no sési ambe úkuarhijka o engachi no sési kánhani jarhajka. Tata Diosï úraasïndi orhejtsïkutiichani engaksï jánguarhintajka sési kuidariuani karichiichani, ka sésikuajtsïni íntskusïndi iáminduechani parachi úni jarhuajperani. Tata Diosïiri pínandikuajtsïni jarhuatasïndi parachi preparadu jarhani jiáni engachi sánderu kʼéri tsʼéjkukuechani jatsiauaka ka ístu enga “kʼéri mískuarhita” úkuarhini jauaka (Mat. 24:21). Enga i ambe úkuarhini jauaka kánikua jukaparhakueuati pínandikua jatsini ka jarhuataani máteruechani paraksï májkueni úni. Ka enga na nitamakia kʼéri mískuarhita nóteru jauati no sési jásï ambe engajtsïni no sési pʼikuastaaka. Iásï kʼóruchi uaakia ísï irekani eska Tata Diosï na uékeenga: pínandikua jingoni ka para méntkisï (Is. 26:3, 4).
PIREKUA 109 Ju je mintsita jingoni uékperani
a Someni, Tata Diosï Jeoba úraasïndi imeeri ambakiti marhuariichani para jarhuataani imani erachiichani engaksï no sési nitamakuarhini jarhajka. Imaksïni uaati chánksïni úrani parajtsï uinhaperantaani imeechani engaksï uétarhinchajka. Ini jorhenguarhikua jimbo, exenchi jauaka ambe engachi uaaka úni para jarhuataani imeechani engaksï no sési nitamakuarhini jarhajka.
b Mójtakukuarhistiksï máru nombriicha.
c Beteli no úsïndi axakuani juchaari kartechani erachiichani ka pirenchichani engaksï ónhakata jaka nijtu Beteli nani enga Jeobaeri testiguecheeri ánchikuarhita exenhajka.
d Exe je jorhenguarhikuani “Ju je prepararikuarhini iásï engachi niáraaka no sési kánhani”, enga uéraka rebistarhu Aianhpiri juliu de 2019.
e AMBE ENGA XARHATAJKA IMAJENI: Temungurhiri ma tʼirekuaksï pákuxati familiani ma enga no sési ambe nitamakuarhika ka engaksï jima pakarani jaka engaksï kʼuiripuecha kuájchakukuarhijka.