Ju je jarhuataani sieguechani jorhenguarhini Jeobaeri ambe
1. ¿Néna xarhataspi Jesusi eska uandanhiasïrenga sieguechani jimbo?
1 Jesusi uéakuxamentia Jeriko uératini. Jiájkani, tsimani sieguecha engaksï tumina kurhajkuarhienga úndasptiksï uinhachakuni: “Tata [...] kóndintajtsïni”. Jamberi Jesusi kánikua uandanhiani japti, jimboka mítispka eska no ióni jimbo uarhipiringia. Peru nájtuka uandanhiani japka, ima anhaxurhispti, ioarhiaspti ka tsinaaspti (Mat. 20:29-34). ¿Nénachi uá xarhatatspini pʼamojperakua májkueni eska Jesusi?
2. ¿Nénachi uá eianguani kʼuiripuechani engaksï siegueka, engachi xanharu jimbo exeantauaka?
2 Ju je jarhuataani. Engachi exentaaka kʼuiripu sieguni ma, pori ejemplu xanharu jimbo, uétarhisïndi arhini néskichi ka eskachi uékasïnga jarhuatani. Jamberijtsïni siegu no mintsikaati, jimboka sáno méntkisï jarhasïnga kʼuiripu enga fásili exeajka sieguechani ka no sési úkuani. Peru engachi sési arhiska ka xarhatakunchi eskachi uandanhiasïnga imani jimbo, jamberi trankilu pʼikuarheraati. Ístuchi miáuaka eskaksï jarhaska máru engaksï meru siegueka ka máru engaksï újka sánisï exeni, i ambejtsïni marhuachiati parachi exeni nénachi uá jarhuatani. Engachi na jarhuataakia, uákachi arhini eskachi Bibliaeri ambe jorhentpixaka. Uákachi arhikuntani textu ma, komu Salmo 146:8 o Isaías 35:5, 6. Ístuchi úpiringa jarhuatani késkuani máru grabasionichani jw.org uératini. Enga újka arhintani braile jimbo, kurhamarhiakachi uékapirini jatsini publikasioni ma braile jimbo, enga jarhuataaka sánderu jorhenguarhini Bibliaeri ambe. Enga jatsika komputadora programa ma jingoni enga újka arhintani textu enga pantaiarhu xarharajka, jamberi uáti ístu marhuanchani artikuluechani engaksï jw.org jaka ka publikasionichani engaksï újka késkuani formatu de texto enriquecido (RTF). I últimu tsimani formatuecha publikasionicheri, soluksï utusï jimbo jarhasti o máteru idiomecha engaksï sánderu uandanhajka parhakpinirhu. (Exe je rekuadruni “Engajtsï kʼuiripu sieguni ma jarhuatani jauaka...”.)
3. ¿Nénachi uá jirinhantani juchari territoriurhu kʼuiripuni enga siegueka?
3 Ju je jirinhantani kʼuiripuni enga siegueka. Jamberichi kasi no méni exentajka kʼuiripuni ma enga siegueka engachi kʼumanchikuecharhu eianhpini jarhajka, jimbokaksï kasi no uékasïnga uandontskuarhini kʼuiripu jingoni engaksï no mítika. Jimbochisï jatsika para jánguarhintani jirinhantaani ka eianguani (Mat. 10:11). ¿Mítiskichi kompanieruni ma eskuelaeri o ánchikuarhiteri enga siegueka? Ju je uandontskuarhikuni jurhimbikueri ambe. Enga juchari territoriurhu jaka eskuela ma para sieguecha, ju je kurhamarhini direktorini sini uékasïni eskachi pákuaka máru publikasionichani braile jimbo para imeri biblioteka. ¿Mítiskichi nemani enga jatsika familiari sieguni ma? ¿Jarhaskiksï kúnguarhikuecha engaksï jarhuatajka sieguechani juchari territoriurhu o kʼumanchikuecha para kʼuiripu enga pʼamenchajka nani engaksï sieguecha irekaka? Ju je arhini siegueri familiarini, imani enga kʼumanchikueri resibidorirhu jarhajka o direktorini eskuelaeri eskachi Jeobaeri testiguecha uékasïnga jarhuataani sieguechani ka eskachi jatsiaska publikasionichani braile jimbo ka grabasionichani audiueri para imecha. Ju je exerani Biblia jingoni eska Tata Diosï aiatspisïnga méntku kʼamarani indeni pʼamenchakua jingoni. Ístuchi uáka exerani bideuni enga arhinhajka “No sé qué haría sin ella”, enga jw.org jaka. I bideu uandantasïndi experiensia erachi siegueri ma enga marhuanchaka jatsini Bibliani braile jimbo. Engachi uandaska andichisï jima jaki, sánderu fásiliuati exeantaani sieguechani.
4. ¿Ambejtsïni jorhendasïni experiensia enga nitamanchaka pirenchi ma enga Janet arhinhajka?
4 Pirenchi ma enga siegueka ka enga Janet arhinhajka, niraspti kʼumanchikuarhu ma engaksï sieguecha irekaka, ka úndaspti uandontskuarhini uátsï ma jingoni. Janet arhispti: “Enga Jesusi Echerirhu japka, tsinaspti máru kʼuiripuni enga sieguepka para xarhatani ambe enga uáka sánderu orhepani iámindu sieguechani jimbo”. Jiájkani exesptiksï ambe enga arhijka Jaŋaskuecha 21:3, 4, ka Janet kuerantaspti na enga Tata Diosïri Reinu kumpliriuaka ini eiatsperakuani. Uátsï ísku pakaraspti ka tátsekua uandaspti: “I primeru ueltaesti engarini siegu ma i ambe arhijka. Sáno iámindu kʼuiripu enga újka exeni eratsisïndi eska siegu jarhani kastigu máeska ambe ma jimbo engachi úka o engaksï juchari ióntki anapu parienticha úpka”. Janet axakuspti direksionini para libru Enseña, korreu elektroniku jimbo ka iásïksï májku kʼéri estudiarixatiia Bibliani tsimani uelta mándani semana.
5. Nájkirukachi no újka tsinaani sieguechani, ¿nénaksï uá sánderu sési irekani engachi uandanhiaska imechani jimbo?
5 Nájkirukachi jucha no újka tsinaani sieguechani eska Jesusi na úpka. Uákachi úni ambe ma. Diosï i parhakpiniri, siegu ústi uánikua kʼuiripueri eratsitarakuani, ka máru imecheri engaksï meru no újka exeni. Uákachi jarhuataani iáminduechani kurhanguni jurhimbikua Tata Diosïri Karakateri (2 Kor. 4:4). Jesusi tsinaaspti tsimani sieguechani Jeriko no iauani, jimboka pʼamojkuaspka (Mat. 20:34). Engachi juchajtu uandanhiaska sieguechani jimbo, uákachi jarhuataani mítini Jeobani, imani enga uáka eskaksï exeaka ménderu ka enga íntsauaka tsípikua para méntkisï.