KRISTIANUECHERI IREKUA
Ju je májku kʼéri ánchikuarhini engachi jimesï aianhpijka engaksï uánikua idiomecha uandanhajka
Kʼuiripu sánderu sési jiókuarhisïndi Reinueri ambe enga imeri idioma jimbo kurhaajka. Jamberi jimbosï Jeoba úpti eskaksï Pentekostesi uéxurhini 33 jimbo, judiuecha engaksï janhanharienga Jeobani ka engaksï uápurisï anapuepka, kurhaapiringa ambakiti eianhperakuani imecheri idioma jimbo, nájkirukaksï jamberi iáminduecha uandenga ebreu o griegu (Uk 2:5, 8). Iásï, jarhastiksï kúnguarhikuecha mámaru járhati idiomecheri engaksï imani mismu territoriurhu aianhpijka. ¿Ambeksï uá úni aianhpiricha engaksï imani kúnguarhikuecharhu jaka paraksï úni iáminduechani predikarikuani ka nóksï ísku tiempu tsïtani ni úni eska kʼuiripu ikiauaka?
Sési organisarikuarhini (Pr 15:22): Orhejtsïkuticha engaksï aianhpikueri ambe exejka, jatsistiksï para uandontskuarhini ka exeni néna sánderu sési japirini eskaksï aianhpipiringa. Jamberi kúnguarhikuecha engaksï máteru idioma jimbo jaka, sánderuksï sési exeati eskachi no niáraaka imani kʼumanchikuecharhu engaksï imecheri territoriu jingoni kuenta úkuarhijka jimboka imecheri territoriu no káneska. Peru enga imecheri territoriu káneka ka imecha no úni someni nirani aianhpini, jamberiksï sánderu sési exeati eskachi iámindu kʼumanchikuecharhu aianhpiaka ka eskachi aianguauaka enga nema interesi xarhataaka (od-S páj. 93 párr. 37). O jamberiksï uékaati eska juchari kúnguarhikua jarhuatauaka jirinhantaani imechani engaksï imecheri idioma uandajka paraksï imecheri territoriu jingoni kuenta uáni (km-S 7/12 páj. 5, rekuadru). Ju je miáni jarhani eska kʼumanchikuarhu ma, no solu ma idioma uáka uandanhani. Jatsiskachi para kumpliriuani leichani engaksï kuidarijka kʼuiripuecheri informasioni engachi aianhpiaka juchari territoriurhu.
Jarhuajperani (Ef 4:16): Jatsiskachi para iámindu ambe ísï úni eskajtsïni na arhiaka orhejtsïkuti enga aianhpikueri ambe exejka. ¿Jorhendaxakichi Bibliaeri ambe kʼuiripuni ma enga no juchari kúnguarhikueri idioma uandajka? Jamberi ima kʼuiripu sánderu kókuani progresariuati enga estudiariska aianhpiri ma jingoni enga imani kúnguarhikuarhu o grupurhu jaka enga imeri idioma uandanhajka.
Prepararikuarhini (Pr 15:28; 16:1): Engajtsï exentaaka chári territoriurhu nemani enga máteru idioma uandajka, jánguarhi je predikarikuni. Parajtsïni úni preparadu jarhani, eratsi je náki idiomechaksï uandanhasïni chári territoriurhu ka késku je Bibliani ka máru bideuechani imani idioma jimbo. Ístujtsï uáka úrani aplikasioni JW Language parajtsï mítini néna saludarperanhasïni máteru idiomecha jimbo.