Jeobajtsïni jurhimberantasïndi jimbokajtsïni xénchasïnga

Jurhimberantani nemani arhikuekasïndi jorhendani, joperu ístu ménisï arhikuekasïndi kastigarini. Jeobajtsïni jurhimberantasïndi parachi ísï kómarhini eska ima na uékajka (Ro 12:1; Eb 12:10, 11). Ménisï jurhimberantskuajtsïni uáti no sési pʼikuastani, joperu engachi jiókuarhiska, ambakiti kʼuiripu máeuakachi ka Tata Diosïjtsïni újchakuraati (Pr 10:7). ¿Ambeksï jatsiski para miáni imecha engaksï jurhimberantaajka máteruechani ka imecha engaksï jurhimberanhantajka?

Imecha engaksï jurhimberantaajka máteruechani. Orhejtsïkuticha, táticha ka máteruecha, jánguarhintasïndiksï uékperakua ka xénchperakua jingoni jurhimberpintani ísï eska Jeoba (Jer 46:28). Asta jiáni jamberi enga ma uinhamu jurhimberanhantaaka, jatsisti para mámaru ambe exekuarhini ka méntkisï jatsisti para xénchperakua jingonini (Tit 1:13).

Imecha engaksï jurhimberanhantajka. No arhiparini na engajtsïni jurhimberantaaka, jatsiskachi para jiókuarhini ka sóntku ísï úni eskachi na arhinhaaka (Pr 3:11, 12). Iáminduechachi uétarhinchasïnga eskachi jurhimberanhantaaka jimbokachi pekadoriska. Uákachi jurhimberanhantani imani ambe jingoni engachi Bibliarhu arhintaaka o ambe engachi kurhauaka tánguarhikuecharhu. O ménisï uétarhiati eskajtsïni komite judisiali ma jurhimberantaaka. Engachi jiókuarhiaka engachi jurhimberanhantaaka ka engachi mójtakuska ambe enga xáni uétarhiaka, jatsiakachi tsípikua para méntkisï (Pr 10:17).

ENGACHI EXEAKIA BIDEUNI JEOBA JURHIMBERANTASÏNDI IMANI ENGA XÉNCHAJKA, MÓKUANTA JE ARINI KURHAMARHIKUECHANI:

• 

  ¿Néna irekaspti Canoni enga sapichuepka ka ambe úkuarhispi tátsekua?

• 

  ¿Néna jurhimberantaspi Jeoba?

• 

  ¿Ambejtsïni jorhendasïni ambe enga Canoni nitamakuarhipka?