¿Uandakata jarhasïnia na enga jindeuaka chaari irekua?

AMBE ENGAKSÏ UÁNIKUECHA JAKAJKUJKA

ASTROLOJIA. Uánikuechaksï eratsesïndi eska imeecheri irekua ísïiuaka eskaksï na japka jóskuecha jiáni engaksï imeecha andajpenupka. Ísï jimboksïsï arhiantajti oroskopuechani paraksï míteni ambe engaksï nitamanchaaka sánderu orhepani ka jánguarhintasïndiksï úni ambe ma paraksï no jatsiani uandanhiatechani o paraka sési nikuauaka.

FENG SHUI. Máteruechaksï eratsesïndi eskaksï tsípikua jingoni irekaaka seguni na engaksï uáuaka imeecheri kʼumanchikuechani. Acheeti ma enga Hong Kong anapueka, uandasïndi: “Maestru ma enga feng shui jorhentpijka, arhisptirini eskani sánderu sentabu andapiringa engani jima peerapiringa kristalini ma engareni ima arhipiringa juchiiti tiendarhu”.

IÓNTKI ANAPUECHANI KÓMARHIANI. Máteruechaksï eratsesïndi eskaksï jatsiska para ióntki anapuechani kómarhiani o uánikua diosï úkatechani paraksï kuájchakuani ka újchakuraani. Vana uarhiiti ma enga Vietnam irekaka, uandasïndi: “Jakajkusïreenga eska engani kómarhiapiringa ióntki anapuechani, sési irekapiringa iásï ka eska juchiiti sapiicha ka ji ambakiti irekuachi ma jatsipiringa sánderu orhepani”.

MÉNDERU UEENANI ANDAJPENUNI. Uánikuechaksï jakajkusïndi eska engachi uarhijka, ménderuchi ueenasïnga andajpenuni ka eska i ambe uánikua xanhari ísï úkuarhisïnga. Eratsesïndiksï eska ima ambe engaksï nitamakuarhijka imani ambe jimboesïnga engaksï máteru irekua jimbo úpka.

Nájkirukaksï uánikuecha uandajka eskaksï no jakajkusïnga indeni ambe, arhiantasïndiksï oroskopuechani, nirasïndiksï exerkuarhini ka jurajkusïndiksï eskaksï exeminhaaka jájkini..., enga ma repentku i ambe úska paraksï míteni ambe engaksï nitamakuarhiaka sánderu orhepani.

¿MARHUASÏNI I AMBE?

¿Sánderuksï sési irekasïnia ka úsïnksï ambakiti irekua ma jatsini imeecha engaksï jakajkuka ini ambe?

Ju je exeni ambe enga nitamanchapka acheeti ma enga Vietnam irekaka. Ima úraspti astrolojiani, feng shui ka kómarhiasïreendi ióntki anapuechani paraksï jarhuatani ambakiti irekua ma jatsini. Peru ¿néna nikuspi? Ima uandantasïndi: “No sésirini nichespti juchiiti negosiurhu, kántspeni pakaraspka, problemechani jatsiaspka familiarhu ka inde ambe úspti eskani no sési pʼikuarherapiringa”.

Qiuming enga Taiwán anapueka jakajkusïreendi astrolojiani, eska nema úsïnga ménderu ueenani andajpenuni, eska uandakata jarhasïngia ambe engachi úkuarhinchaaka, feng shuini ka kómarhiasïreendi ióntki anapuechani. Peru enga na sési mítepkia i jakajkukuecheri ambe, uandaspti: “Kuenta íntskukuarheska eska i jakajkukuecha ka pʼindekuecha nóksï terukuntasïnga ka nóksï kurhangukuarhini. Mémindu, ambe enga astrolojia jimbo uandanhajka eska úkuarhiaka, no ísï úkuarhisïndi. Ka enga uandanhajka eska ma úsïnga ménderu andajpenuni, engari no miájka ambe engari úpka ante deri ménderu andajpenuni, ¿nénari uaa mójtakukuarhini ka ambakiti kʼuiripu máeni engari ménderu andajpenuaka?”.

I tsimani kʼuiripuecha ka uánikua máteruecha, kuentaksï íntskukuarhestia eska i jakajkukuecha komueska uandakata jarhasïngia ambe enga úkuarhiaka, jóskuecheri ambe, kómarhiani ióntki anapuechani ka eska ma úsïnga ménderu andajpenuni, nóksï úsïnga jarhuajpeni para ma ambakiti irekua ma jatsini sánderu orhepani. Jiájkani, ¿arhikuekasïni i ambe eskachi no ma ambe uaaka úni parachi sési irekani sánderu orhepani?

Uánikuechaksï eratsesïndi eska para ambakiti irekua ma jatsini sánderu orhepani, uétarhisïnga karrera ma kʼamarani o kánikua sentabu jatsini. ¿Peru nénaksï pʼikuarherasïni imeecha engaksï ísï úka?