¿Ambeksïni jarhuataa parajtsï úni sési irekani sánderu orhepani?

Eskachi na exekia, kʼuiripuechaksï jánguarhintasïndi ambakiti irekua ma jatsini mintsikaparini suertini, estudiuechani, sentabuni o eska ambakiti kʼuiripueni jarhuatauaka ísï irekani. I ambe úni ísïipirindi komu lugari ma jimbo nirani mapa ma úraparini enga no sési úkata jaka. Peru i ambe no arhikuekasïndi eska no ma ambe jarhaska engajtsïni jarhuataaka ambakiti irekua ma jatsini sánderu orhepani.

JARHUAJPERATA NEMEERI ENGA SÁNDERU JÁNHASTIIKA

Engachi uékani jarhajka úni ambe ma, sáno méntkisïchi kurhamarhisïnga nemani enga sánderu míteka ima ambeeri o enga sánderu kʼériuaka eska jucha. Ísï jimbo, engachi uéjka ambakiti irekua ma jatsini sánderu orhepani, jatsiskachi para mintsikani jarhuajperatani engajtsïni íntskujka ima enga sánderu mítekuka ka enga sánderu jánhastiika eska jucha. I jarhuajperata librurhu ma jarhasti enga Biblia arhinhajka ka enga sáno 3,500 uéxurhinisïikia enga ueenaka karanhani.

¿Andichisï uaa mintsinharhini Bibliani? Jimboka ima enga kararkuarhika sánderu jánhastiiska iámu unibersurhu. Jindeesti ima enga “Kánikua Jatirikia” ka enga jaka “desde méntkisï asta méntkisï” (Daniel 7:9; Salmo 90:2). Ima jindeesti “enga auandani kueraaka, ima Tata Diosï enga sési jimboeka, ima enga úka echerini” (Isaías 45:18). Ima minsmujtsïni arhisïndi eska imeeri nombri jindeeska Jeoba (Salmo 83:18).

Jimboka Biblia imani jimboeska enga Kuerauaka iámindu kʼuiripuechani, no jorhentpisïndi eska máru kʼuiripuecha sánderu jukaparhakueska eska máteruecha. Imeeri konsejuechaksï méntkisï marhuasïndi ka jarhuataastiksïa uánikua kʼuiripuechani. I jindeesti libru enga sánderu uánikua idiomecha jimbo tradusirikuarhikia ka enga sánderu etsakunhani jaka iámu parhakpinirhu.a Náki uéjki kʼuiripu úsïndi sési kurhanguni ka ísï úni eska jimini na arhijka. Asta Biblia arhisïndi:

Tata “Diosï no nani kʼuetsapesïndi, sino jaiapanhentasïn[di] nákinterku ma nasioni anapu kʼuiripuni enga janhanharhijka imani, ka sési úni” (UKUECHA [HECHOS] 10:34, 35).

Ísï eska taati ma na xénchaajka ka jarhuataani imeeri uájpeechani, Tata Diosï Jeobajtsïni ístu xénchasïndi ka jarhuatasïndijtsïni Bibliani úraparini (2 Timoteo 3:16). Chájtsï uaaka mintsikani Tata Diosïri Karakatani. Jimbokajtsïni ima kueraaska mítesti ambe enga sánderu sési ambeeka para jucha.

JARHUAJPERATA MA ENGA MINTSINHARHIKUEKA

Uaakachi seguru jarhani eskajtsïni Biblia uaaka jarhuatani, jimboka ma 2,000 uéxurhinisï antesi uandaspkia ambe enga úkuarhipiringa parhakpinirhu ka na engaksï jásïipiringa kʼuiripuecha ini jurhiatikuecha jimbo.

AMBE ENGA ÚKUARHIPIRINGA

“Ma nasioni anapuecha uarhiperaati máteru nasioni anapuechani jingoni, ka ístu ma juramukuarhu anapuecha máteru juramukuarhu anapuechani jingoni. Ka kʼérati jencheati, ka uápuru jauati kʼarhingua ka pʼamenchakua [ambe]” (LUKASʌ 21:10, 11).

NA ENGAKSÏ JÁSÏIPIRINGA KʼUIRIPUECHA

“Últimu jurhiatikuechani jimbo jauati peligru, jimboka jimajkanisï anapu kʼuiripuecha solu pendienti pákuarhiaka para imeechajkumindu sési uérani, ka jukari jatsikuarhekuekanksï, ka teparakuarhinksï, ka kʼéri ambe exekuarhinksï, ka no sési arhinksï [Tata] Diosïni, ka nóksï janhanharhiani taati jémbeechani, ka nóksï agradeseritspini ka niksï janhanharhini [Tata] Diosïni. Nóksï uéauati imeecheri kʼumanchikuarhu anapuechani ka parienti jémbeechani, sino kurhurjaxenksï ka uandatspinksï jámani, ka no ma ambe jimboksï pʼíngukuarhiati, sino no sési kámpinksï ka nóminduksï jaiapanhentani ambakiti ambe. Amigu jémbeechanksï entragarpiauati, ka sóntku únksï ambe enga imeechajkumindu tantiariuaka, ka uéki jimboksï teparakuarhini, ka sánderuksï uékaati tsípikuarhini pekaduni jimbo ka eska [Tata] Diosïni uékani” (2 TIMOTEO 3:1-4).

Engajtsï exejka eska ísï úkuarhixaka eska Biblia na uandapkia, jamberijtsï májkueni eratsejka eska achamasï ma enga Hong Kong anapueka. Ima uandaspti: “I ambe enga xáni ióni karanhapkia no úpirindi ísï úkuarhini enga kʼuiripu ma karapiringa. Bibliani kararkuarhiti nema enga sánderu jánhastiika eska jucha”.

Uánikua ambe enga Biblia uandajka niárastia ísï úkuarhini.b I ambe xarhatasïndi eska Tata Diosïri Karakateska. Tata Diosï Jeoba uandasïndi: “Ji jindeeska Tata Diosï ka no nema jarhasti enga ísïika eska ji. Desde ueenakuarhutki, ji tʼuini uandasïngia na enga kʼamaraaka” (Isaías 46:9, 10). Ísï jimbo, jarhasti ambakiti ambe engachi jimbo uaaka mintsikani ambe enga Biblia arhijka eska úkuarhiaka sánderu orhepani.

JARHUAJPERATA MA ENGAKSÏNI UAAKA JARHUATANI IÁSÏ KA PARA MÉNTKISÏ

Engajtsï ísï úska eska na arhijka Tata Diosïri Karakata, kánikuaksïni sési nicheati. Eratseanta je arini ejempluechani.

AMBAKITI KONSEJUECHA PARA SENTABU KA ÁNCHIKUARHITA

“Sánderu sésiisti mintsikuarhini sáni ka eska jukari kánikua ánchikuarhini ka ísku xáni jánguarhintani” (ECLESIASTÉS 4:6).

AMBAKITI KONSEJUECHA PARA FAMILIA

“Uéa je chaari uarhiitichani komueska chájkumindu na uékakuarhijka. Ka ístu uarhiiticha janhanharhiaueksï imeecheri acheetichani” (EFESU 5:33).

AMBAKITI KONSEJUECHA PARA SÉSI PÁJPERANI MÁTERUECHA JINGONI

“Jurajku ikiatapuni, asï ikia; asï jáma kurhurjaxeni, jamberiri niáraka no sési ambe úni” (SALMO 37:8).

Engajtsï úska ambe engaksï Biblieri konsejuecha arhijka, jarhuatatiksïni sési irekani iásï ka ístu sánderu orhepani. Bibliajtsïni arhisïndi na enga jindeuaka ima irekua engajtsïni Tata Diosï aiachini jaka.

PÍNANDIKUA JAUATI KA SEGURU IRENHAATI

“Sésiksï pʼikuarheraati jimboka kánikua pínandikua jauaka” (SALMO 37:11).

IÁMINDUECHAKSÏ JATSIATI KʼUMANCHIKUA KA TʼIREKUA

“Uáuatiksï kʼumanchikuechani ka jimaksï irekaati; ka niáraatiksï ubasï jatsikuni ka akuatiksï frutani” (ISAÍAS 65:21).

NO NEMA PʼAMENCHAATI NI UARHINI

“Nóteru jauatia uarhikua, ka ni uandanhiata, ka nóteru nema ueraati o pʼamenchani” (JAŊASKUECHA [APOCALIPSIS] 21:4).

¿Ambejtsï jatsiski para úni parajtsï ísï irekani sánderu orhepani? Máteru jorhenguarhikuarhujtsï exeaka.

a Exe je jorhenguarhikua 5 librueri “Tsípikua jingoni ireka je”, exentaakajtsï jorhenguarhikuechani ka bideuechani engaksï uandajka néna enga tradusirinhaka ka etsakunhani Biblia, incha je pájina internetirhu www.jw.org, ka jaiasku je jima enga arhijka PUBLIKASIONICHA > LIBRUECHA KA FOIETUECHA.

b Parajtsï exentani sánderu informasioni i ambeeri, exe je jorhenguarhikua 3 librueri “Tsípikua jingoni ireka je”, incha je pájina internetirhu www.jw.org, ka jaiasku je jima enga arhijka PUBLIKASIONICHA > LIBRUECHA KA FOIETUECHA.