2 | “Engachi indeni karakatani arhintaaka, eskachi sési pʼikuarheraaka”

BIBLIA UANDASÏNDI: “Inde ambe enga ióntki karanhaka, juchantsïni jimbo karanhasti, eskachi jurhengorheaka ambakiti ambe erokorheni, tekantskua jinguni, ka engachi indeni karakatani arhintaaka eskachi sési pʼikuarheraaka” (ROMA 15:4, Táta Diósïri Uandakua Tata Jesukristueri Aiatsperakua).

¿Ambe arhikuekasïni i karakata?

Biblia imani ambe uandasïndi engajtsïni sési pʼikuastantajka, engajtsïni jarhuatajka tekaantani, engajtsïni íntskujka uinhapikua parachi úni orhepani uérani jiáni engachi ueenaaka imani ambe eratseni engajtsïni no sési pʼikuastajka. Ístu, Bibliajtsïni aiachisïndi eska no ióni jimbo, nóteru jauakia ima ambe engajtsïni no sési pʼikuastajka.

¿Nénachi uaa úrani ini karakatani?

Ménisï, juchachi kómu pʼikuarherani jarhasïnga o uandanhiani jarhani. Joperu imeecha engaksï depresioni kámajka, oksï no nani máru pʼikuarherani jarhani, jamberiksï jatsijti para pauani pauani jánguarhintani orhepani uérani. ¿Néna uaa jarhuataani Biblia?

Biblia uánikua ambe uandasïndi engajtsïni jarhuatajka sési jásï ambe eratseni ka nóteru imani ambeia enga újka eskachi no sési pʼikuarheraaka (Filipusʌ 4:8). Bibliajtsïni jarhuatasïndi imani ambe eratseni engajtsïni kánikua sési pʼikuastajka ka engajtsïni jarhuatajka parachi no no sési pʼikuarherani (Salmo 94:18, 19).
Bibliajtsïni jarhuatasïndi parachi no ísï pʼikuarherani eskachi no jukaparhakueska (Lukasʌ 12:6, 7).
Bibliarhu, uánikua ejempluechaksï jarhasti engajtsïni exerajka eskachi no jandiajku jarhaska, ka eska Tata Diosï, juchaari Kuerajpiri, kánikuajtsïni sési kurhanguchisïnga na engachi pʼikuarherajka (Salmo 34:18; 1 Juanu 3:19, 20).
Bibliajtsïni aiachisïndi eska Tata Diosï uaaka eskachi nóteru méni miántaakia imani ambe engajtsïni no sési pʼikuastajka (Isaías 65:17; Jaŋaskuecha 21:4). Engachi kánikua kómu pʼikuarherani jarhajka, jamberijtsïni kánikua uinhaperantajti ambe engajtsïni Biblia aiachijka parachi úni orhepani uérani.

Néna enga jarhuatajka Biblia Jessicani

Na engani pʼikuarherajka depresioni jimbo

“Engani 25 jatiriipka, ískuni úndaspka kánikua no sési pʼikuarherani ka chéni. Tátsekua arhinhaspka eskani depresión grave kámasïreenga. Kánikua no sési pʼikuarherasïreenga jimbokani no úsïreenga mirikurhini imani ambe engani ióntki nitamakuarhipka ka mátirkuni miántasïreenga imani ambe. Doktorichajtsïni arhispti eska imani ambe jimbo engani ióntki nitamakuarhipka, imani ambe eratsesïreenga engareni no sési pʼikuasteenga ka eska inde ambe úspka eskani depresioni pʼamenchapiringa. Ísï jimbo, imani medisina uétarhinchaxapka engareni sési úchipiringa ka espesialista ma jingoni nirani engareni jarhuatapiringa exeni andisïni ísï pʼikuarhereeni ka ístu parani nóteruni imani ambe eratsenia engareni no sési pʼikuasteenga”.

Na engareni jarhuatajka Biblia

“Engareni depresioni pʼinteenga, ji ueenasïreenga kánikua chéni, no nani máru pʼikuarherani ka no úsïreenga kʼuíni. Chúrikuechani, kánikua uandanhiasïreenga jimbokani méntkuni eratseni jarhasïreenga ambe ma. Joperu eska na arhijka Salmo 94:19, Tata Diosïjtsïni uinhaperantasïndi ka sésijtsïni pʼikuastantani jiáni engajtsïni ambe ma kánikua uandanhiatani jarhajka. Jimbosïni Biblia ma jatsipka libreta sapichu ma jingoni kamarhu máekandu, ka indeni libreta jimbo, Biblieri karakateechani jatsiaspka engajtsïni uinhaperanteenga. Jiáni engani no úni jarheenga kʼuíni, jurajkusïreenga eskarini Tata Diosï sési pʼikuastantapiringa imeeri Karakata jingoni.

”Míteskachia na enga eratsejka Tata Diosï, jimbosïjtsïni Biblia arhijti eskachi no jámaaka eratseni imani ambe enga no terukuntajka imani ambe jingoni enga Tata Diosï eratsejka. Pori ejemplu, ióntki eratsesïreenga eskani no ma ambe úsïreenga sési úni ka eskani no jukanchaspka eskajtsïni máteruecha xénchapiringa, joperuni exespka eska Biblia no indeni ambesï jorhentpijka. Jimini uandasïndi eska Tata Diosï, Taati máeska enga kánikua xénchpejka ka eska pʼamojpesïnga ka uandanhiani mándani kʼuiripu jimbo. Sánhani arhispka jánguarhintani nóteru eratsenia imani ambe engareni no sési pʼikuasteenga ka no jurajkusïreenga eskarini inde ambe andapiringa. Iásï, jánguarhintasïngia ísï eratseni eskarini Tata Diosï na exejka ka i amberini jarhuatasïndi parani nóteruni ísï exekuarhinia eska antesi.

”Uékaxakaia eska niáraaka ima jurhiatikua engachi nóteru no sési pʼikuarheraakia imani ambe jimbo engachi ióntki nitamakuarhika. Ka nájkirukani útasï depresioni kámajka, míteska eska no ióni jimbo, nóteruksï jauakia i jásï pʼamenchakuecha ka inde amberini íntskusïndi uinhapikua parani seguiriini jarhani irekani asta ima jurhiatikua engani nóteruni méni ísï pʼikuarheraakia”.