3 | Biblia uandasïndi ambe engaksï nitamakuarhipka máru kʼuiripuecha

BIBLIARHU I EJEMPLUECHAKSÏ JARHASTI: Ambarhati kʼuiripuecheeri engaksï “májku jásïipka [o májkueni pʼikuarherani] eska jucha” (SANTIAGU 5:17).

¿Ambe arhikuekasïni i karakata?

Biblia uánikua achamasïichani ka uarhiitiichani uandaasïndi engaksï mámaru ambe niárapka pʼikuarherani. Engachi arhintaska ambe engaksï nitamakuarhipka, jamberichi exentaaka nemani enga májkueni nitamakuarhipka eska jucha.

¿Nénachi uaa úrani ini karakatani?

Iáminduechachi uétarhinchasïnga eskajtsïni máteruecha kurhanguchiaka, sánderia jiáni engachi pʼamenchakua ma kámajka mentirhu. Engachi arhintajka na engaksï pʼikuarhereenga ka ambe engaksï eratseenga inde kʼuiripuecha enga Biblia uandaajka, jamberichi exeaka eskachi juchajtu májkueni pʼikuarherasïnga eska indeecha. Inde ambejtsïni jarhuataati exeni eskachi no juchajkueska engachi jánguarhintani jaka nóteru xáni uandanhiania, nóteru méntku eratseni ni miántani imani ambe engajtsïni no sési pʼikuastajka.

Bibliajtsïni aiangusïndi ambe engaksï uandapka máru achamasïicha jimbokaksï nóteru jánhaskasïreengia ambe úni ka engaksï ísï pʼikuarhereenga enajkiksï nóteru úpirinia orhepani uérani. Ménisïjtsï niáraski uandani: “Nóteruni uaakia ini ambe jingoni”. Moisési, Elíasi ka Dabidi májkuenksï pʼikuarheraspti (Números 11:14; 1 Reyes 19:4; Salmo 55:4).
Bibliajtsïni Anaeri ambe aiangusïndi, uarhiiti ma enga kánikua no sési pʼikuarhereenga jimboka no úsïreenga uájpeechani kánguarhiani ka ístu jimboka jarhaspka uarhiiti ma enga kánikua arhincheenga jimboka ikiakusïreenga Anani (1 Samuel 1:6, 10).
Jamberijtsï chájtu májkueni pʼikuarherajka eska achamasï ma enga Biblia uandajka ka enga Job arhinheenga. Ima kánikua mintsikasïreendi Tata Diosïni, joperu ima ini ambe uandaspti jimboka xáni uandanhiaxapka: “Ikichasïnga na engani irekani jaka, nóteruni uékasïngia irekani” (Job 7:16).

Indeksï kʼuiripuecha jánguarhintaspti nóteru imani ambe eratsenia enga no sési pʼikuastauenga ka juchajtuchi uaaka májkueni úni engachi jánguarhintaska ísï úni eska indeecha.

Néna enga jarhuatajka Biblia Kevinini

Na engani pʼikuarherajka engani sési jarhajka ka mátirku no sési pʼikuarherani

“Engani 50 jatiriipka, pʼamenchakua ma exeminhantaspka enga arhinhajka trastorno bipolar. Ménisï ísï pʼikuarherasïreenga enajkini iámindu ambe úpirini úni, joperuni mátirku ísï pʼikuarherasïreenga enajkini nóteru irekapirinia”.

Na engareni jarhuatajka Biblia

“Ísï pʼikuarherasïnga eska apostoli Pedru. Ménisï, ima ísï pʼikuarherasïreendi enajki no ma ambe ueeni sési úni imani ambe jimbo enga antesi úpka. Joperu no jurajkuspti eska inde ambe andapiringa. Sánderu sési, jurajkuspti eskaksï imeeri amiguecha engaksï uandanhiauenga imani jimbo jarhuatapiringa. Indeni pʼamenchakua jimbo engani kánguarhijka, trastorno bipolar, jarhasïndiksï jurhiatikuecha engani kánikua no sési pʼikuarherajka, jimbokani méntkuni eratseni jarhasïnga imani ambe engani no újka úni ka inde ambe úsïndi eskani ísï pʼikuarheraaka enajkini para no ma ambe marhuajki. Ka engani ísï pʼikuarherani jarhajka, májkueni úsïnga eska Pedru, jurajkusïnga eskajtsïni juchiiti amiguecha jarhuataaka; imeechajtsïni jarhuatasïndi parani jánguarhintani seguiriini orhepani uérani.

”Ístuni eratsesïnga na enga pʼikuarherapka rei Dabidi. Uánikua xanhari, ima kómu pʼikuarherasïreendi imani ambe jimbo enga nitamakuarhipka ka ístu imani ambe jimbo enga úpka. Jíjtuni ménisï ísï pʼikuarherasïnga imani ambe jimbo engani úka ka uandani. Jimborenisï sési pʼikuastantajti ambe enga rei Dabidi karapka Salmo 51 jimbo. Bersikulu 3 jimbo, uandaspti: “Sési míteska ambe engani no sési niátaka ka méntkuni miáni jarhasïnga ambe engani no sési úka”. Jíjtuni ísï pʼikuarherasïnga jiáni engani kánikua kómu pʼikuarherani jarhajka. Úkua jukanchasïnga eratseni eskani sési ambe úsïnga, ka engani ísï pʼikuarherani jarhajka, eratsesïnga ambe enga rei Dabidi karapka bersikulu 10 jimbo: “Ú eska juchiiti mintsita pímbinhasïuaka, oh Tata Diosï, ka ú eskani jimbanhi espiritu ma jatsiaka, ma engakeni no méni jurajkuaka”. Jíjtuni sáno májkueni ambe kurhakusïnga Tata Diosïni, eskarini jarhuataaka sési pʼikuarherani. Ka ístureni kánikua sési pʼikuastantasïndi bersikulu 17, jimini arhisïndi: “Oh, Tata Diosï, tʼuri jiókuarhiaka ini mintsitani enga kánikua no sési pʼikuarherani jaka”. Engani arhintajka ini karakatani, miántasïnga na engareni xáni xénchajka Tata Diosï Jeoba.

”Engani eratseantajka indeni ejempluechani enga Biblia uandaajka ka iámindu ambe engareni Tata Diosï Jeoba íntskukia, sánderuni mintsikasïnga ambe enga ima uaaka sánderu orhepatini. Inde amberini jarhuatasïndi tekaantani ka no kuatantani jimbokani exesïnga eska meru ísï úkuarhiaka ambe enga Biblia aiatspejka”.