4 | Ambakiti konsejuecha engaksï Bibliarhu jaka

¿Ambe arhikuekasïni i karakata?

Nájkiruka Biblia no jindeeka libru ma enga medisineeri ambe uandajka, ambakiti konsejuechani íntskuasïndi imeechani engaksï jánguarhintani jaka orhepani uérani jimbokaksï pʼamenchakua ma kámasïnga mentirhu. Ju je exeani arini ejempluechani.

¿Nénachi uaa úrani ini karakatani?

“Imeecha engaksï no malu jarhajka, nóksï uétarhinchasïndi doktorini, solu imeecha engaksï malu jarhajka” (MATEU 9:12).

Biblia uandasïndi eska ménisï uétarhiaka eskachi doktori jingoni niuaka. Uánikua kʼuiripuecha engaksï pʼamenchakua ma kámajka mentirhu, iásïksï sánderu sáni sési pʼikuarherasïndia jimbokaksï míteskia andiksïsï ísï pʼikuarherajki ka ístu jimbokaksï niraska doktori jingoni.

“Marhuasïndi ejersisiu úni” (1 TIMOTEO 4:8, TNM).

Úrani juchaari tiempuni ka uinhapikuani para imani ambe úni engajtsïni marhuachejka kánikua jarhuataati juchaari mentini. Máru ambe engachi uaaka úni jindeesti someni ejersisiu úni, imani ambe arhani engajtsïni sési úchiaka ka sési kʼuíni.

“Mintsita ma enga tsípini pʼikuarherajka ísïisti eska ambakiti medisina, peru nema enga no sési pʼikuarherani jarhajka no uinhapiti jarhasïndi” (PROVERBIOS 17:22).

Imani Biblieri karakateechani arhiantani engajtsïni sési pʼikuastantajka ka ístu imani ambe eratseni úni engachi jucha exejka eskachi uaaka úni, jarhuataatijtsïni sánderu sési pʼikuarherantani. Engachi ambakiti ambe eratseni jauaka ka eska sánderu orhepani sési jánhaskuarhintaaka, inde ambejtsïni jarhuataati parachi no xáni no sési pʼikuarherani ka únchi orhepani uérakuni indeni ambe engajtsïni no sési pʼikuastajka.

“Imeecha engaksï exejka eskaksï no iámindu ambe úsïnga úni jánhaskatiistiksï” (PROVERBIOS 11:2).

Jamberijtsï uétarhinchaaka eskaksïni máteruecha jarhuataaka parajtsï úni máru ambe. Ísï jimbo, jurajku je eskaksïni jarhuataaka. Jamberiksïni chaari amiguecha o familiariicha uéjti jarhuatani joperuksï no míteni néna ísï úni. Ísï jimbo, arhia je ambejtsïsï uétarhinchani jaki. Joperu asï jáma je no sési pʼikuarherani engaksïni imeecha no uaaka ísï jarhuatani eska chá na uékapiringa ka diosmaiamukua arhia je iámindu ambe jimbo engaksï imeecha uaaka chánksïni jimbo.

Néna jarhuataasïni Biblia imeechani engaksï pʼamenchakua ma kámajka mentirhu

“Doktora ma jingoni niraspka jimbokani ueenaspka no sési pʼikuarherani. Ka imarini arhispti ambe engani ueenga ka jarhuatasptireni parani no xáni no sési pʼikuarherani indeni pʼamenchakua jimbo. Ístureni arhispti náki sïpiati ambe jarhaspi engani úpiringa arhani para inde pʼamenchakua” (Nicole,a enga trastorno bipolari kámajka).

“Kánikuarini jarhuatasïndi pauani pauani arhintani Bibliani juchiiti uarhiiti jingoni. Xarhentkuni ueenasïnga ambakiti ambe eratseni engareni jarhuatajka sési pʼikuarherani. Exeska eska jiáni engani sánderu no sési pʼikuarherani jarhajka, méntkisï exentasïnga karakata ma engareni mintsitarhu niárachejka” (Peter, enga depresioni kámajka).

“Ueenani jámani kʼuratsesïreenga máteruechani aiangukuarhiani ambe engani ueenga. Peru juchiiti amiga ma kánikuarini kurhanguchisïreendi ka sésirini kámasïreendi ka inde amberini jarhuataspti sánderu sési pʼikuarherantani ka ístureni jarhuataspti kuenta íntskukuarheni eskani no jandiajku jarhaspka” (Ji-yoo, enga pʼamenchakua ma kámajka enga arhinhajka trastorno alimentario).

“Bibliarini jarhuatasti sésku ánchikuarhini, ístu parani sési mintsikuarhini. Biblieri konsejuechajtsïni jarhuatasti parani exeni ambe úni engani no sési pʼikuarherani jarhajka” (Timothy, enga pʼamenchakua ma kámajka enga arhinhajka trastorno obsesivo-compulsivo).