Nóksï iámindu kʼuiripuecha jakajkusïndi

Ma ambe engajtsïni jarhuataaka jaiapanherantani Tata Diosï Jeobani, jindeesti mintsikani. Joperu Biblia uandasïndi eskaksï “no iámindu kʼuiripuecha jakajkusïnga” (2 Tes. 3:2). Enga apostoli Pablu ini uandakuechani karapka, imeechanisï arhikuekaani japti engaksï no sési kámeenga, jo, imani kʼuiripuechani engaksï xáni no ambakepka, ka enga jatsipka para kuájchakukuarhini imeecheeri. Joperu ístu ambe enga uandapka, uaati arhikuekaani máteru kʼuiripuechani. Pori ejemplu, imeechani engaksï no uékajka jiókuarhini eska jarhaska Tata Diosï ma enga iámindu ambe kueraaka (Rom. 1:20). O ístu imeechani engaksï solu jakajkujka eska jarhaska nema enga sánderu kʼéri ambeeka eskaksï kʼuiripuecha. Joperu Tata Diosï Jeoba no jaiapanhentasïndi indeni ambejku.

Parachi jaiapanherantani Tata Diosïni, jatsiskachi para jakajkuni eska ima meru jarhaska ka eska kóndeantasïnga imeechani engaksï kánikua mintsikajka imani (Ebr. 11:6). Ka Biblia uandasïndi eska espiritu santusï jarhuatajka kʼuiripuni ma para mintsikani Tata Diosïni. Ka engachi jucha uéjka eskajtsïni espiritu santu jarhuataaka, jatsiskachi para kómarhini Tata Diosï Jeobani eskajtsïni íntskuaka (Luk. 11:9, 10, 13). Ístu jukaparhakuesti eskachi arhintaaka Bibliani enga Tata Diosï kararkuarhika espiritu santu jimbo, ka tátsekuachi eratsentani ambe engachi arhintaka ka jánguarhintanchi ísï úni eskachi na arhintaka. Ka engachi ini ambe úska espiritu santujtsïni uaati jarhuatani parachi úni mintsikani Tata Diosï Jeobani ísï eska ima na jaiapanhentajka.