Ambe enga úka Tata Diosï Jeoba para pʼímutaantani kʼuiripuechani pekadueri ka uarhikueri

1, 2. a) ¿Ambeeski pekadu ka nénachi uaa andani? (Ístu exe je “Jukaparhakua ambe”). b) ¿Ambechi jorhenguarhia ini semana jimbo ka ístu máteruecha jimbo engaksï ini rebistarhu jaka? (Ístu exe je “Nota para arhintsti”, ini rebista jimbo).

¿CHÁ míteski na engaksïni xáni xénchajka Tata Diosï Jeoba? Engajtsï jorhenguarhiska ambe enga úka ima paraksïni pʼímutantani pekadueri ka uarhikueri, uaakajtsï míteni na engaksï xáni xénchajka. Pekadua juchaari ikiatspitiisti ka jandiajkuchi no uaaka andani. Iámindu kʼuiripuechachi pauani pauani no sési ambe úsïnga jimbokachi no perfektueska ka jimbochisï uarhijka (Rom. 5:12). Joperu ju je no uandanhiani, uaakachi seguru jarhani eskajtsïni Tata Diosï Jeoba jarhuataaka andani pekaduni.

² Tata Diosï Jeoba ióni páxatiia, ma 6,000 uéxurhinisï para jarhuataani kʼuiripuechani sési pájperani imani jingoni nájkirukaksï pekadoriika. ¿Joperu andijtsïnisï jarhuatajki? Jimbokajtsïni kánikua xénchasïnga. Tata Diosïjtsïni kánikua xénchaasïndi desde jiáni uératini engajtsïni kueraaka. Ka jimbokajtsïni xáni xénchasïnga, uánikua ambe ústia parajtsïni jarhuatani pekaduni jingoni. Ima mítesti eskachi niárasïnga uarhini pekadu jimbo ka ima no uékasïndi eskachi uarhiaka, sánderu sési, uékasïndi eskachi irekaaka para méntkisï (Rom. 6:23). ¡Ima uékasïndi eska chájtu irekaaka para méntkisï! Ka ini jorhenguarhikua jimbo, mókuantanchi jauaka tanimu kurhamarhikuechani: 1) ¿ambe úski Tata Diosï Jeoba parachi úni seguru jarhani eskachi sánderu orhepatini sési irekuarhiaka?, 2) ¿ambeksï úsïreeni ióntki anapu Tata Diosïiri marhuariicha paraksï úni jaiapanherantani imani nájkirukaksï no perfektuepka? ka 3) ¿ambe úski Jesúsi parakaksï kʼuiripuecha nóteru pekadoriuakia nijtu uarhini?

¿AMBE ÚSKI TATA DIOSÏ JEOBA PARA INTSAANI EROKUARHIKUA MA KʼUIRIPUECHANI?

3. ¿Nénaksï niáraspi Adáni ka Eba pekadoriini?

³ Enga Tata Diosï Jeoba kueraapka Adáni ka Ebani, uékasïreendi eskaksï tsípikua jingoni irekapiringa ka jimbosï sési jásï kʼumanchikua ma íntsaapti, úspti eskaksï niárapiringa temungurhiriini, arhiaspti eskaksï sapiichani kánguarhiapiringa paraksï sánhani arhini uániini parhakpinirhu ka ísï iámu Echeri paraisu máeni eska jardini de Edéni. Ka ma ambejkusï arhiapti eskaksï no úpiringa ka eskaksï uarhipiringa engaksï no kurhajchapiringa. Joperuchi míteskia ambe enga úkuarhipka. No sési jásï ánjeli ma enga no sáni xénchauenga kʼuiripuechani ni Tata Diosï Jeobani, tsʼéjkuspti Adáni ka Ebani parakaksï no kurhajchapiringa Tata Diosïni. Adáni ka Eba nóksï mintsinharhispti imeeri Taatini enga xáni xénchauenga ka nóksï kurhajchaspti ka pekariisptiksï. Ka ísï úkuarhispti eska Tata Diosï Jeoba na arhiapka. Jimbokaksï no kurhajchaspka Tata Diosïni, Adáni ka Eba kánikuaksï no sési nitamakuarhispti, ueenasptiksï pʼamenchani, tʼarhepini ka tátsekuaksï uarhispti (Gén. 1:28, 29; 2:8, 9, 16-18; 3:1-6, 17-19, 24; 5:5).

4. ¿Andisï Tata Diosï Jeoba kurhunhijki pekaduni ka andijtsïnisï jarhuatajki parachi úni andani pekaduni? (Roma 8:20, 21).

⁴ Ambe enga ióntki úkuarhipka, kánikuajtsïni no sési pʼikuastasïndi, joperu Tata Diosï Jeoba ústi eska karakata pakarapiringa Bibliarhu parachi úni kurhanguni andisï ima xáni kurhunhijki pekaduni. Pekadu jimbochi no úsïnga andarhierani juchaari Taatini ka ístu úsïndi eskachi uarhiaka (Is. 59:2). Satanási kurhunhisïndi Tata Diosï Jeobani ka ístu kʼuiripuechani, jimbosï tsʼéjkupti Adáni ka Ebani ka seguirixati májkueni úni ini jurhiatikuecha jimbo. Jamberi Satanási eratsepti eska andaspkia Tata Diosïni imani ambe jimbo enga úpka jardini de Edénirhu. Joperu no kurhangusïreendi na enga xáni xénchpejka Tata Diosï Jeoba. Tata Diosï no méni mójtakusti ambe enga eratsetini japka úni Adáni ka Ebaeri uájpeecha jingoni. Ima kánikua uékaasïndi kʼuiripuechani jimbosï jirejiresï úpti ambe ma para íntsaani erokuarhikua ma iámindu Adániiri uájpeechani (arhinta je Roma 8:20, 21). Ima mítespti eskaksï japiringa máru kʼuiripuecha engaksï xénchapiringa ka uékanksï kurhajchani, ka jarhuataapirindi kʼuiripuechani paraksï andarhierani imani ka únksï andani pekaduni ka uarhikuani jimboka imajtsïni kueraaska ka juchaari Taatiisti. Joperu ¿néna jarhuataapirini kʼuiripuechani?

5. ¿Tata Diosï Jeoba na jatini ka néna ueenaspi aiakuani ambakiti ambe kʼuiripuechani? (Génesis 3:15).

⁵ (Arhinta je Génesis 3:15). Tata Diosï uandaspti eska japiringa desendensia ma enga kánikua jukaparhakuepiringa jimboka éjpurhu chʼatajtsïkupiringa Satanásini ka sési peentapirindi iámu uandanhiateechani engaksï jardini de Edénirhu ueenaka jarhani (1 Juanu 3:8). Ísï jimbo, Tata Diosï Jeoba ueenaspti ambakiti ambe aiakuani kʼuiripuechani jiáni enga uandapka eska kʼamajkupiringa Satanásini. Joperu orheta Satanási uándikupirindi indeni desendensiani. Ka nájkiruka i ambe kánikua no sési pʼikuastapiringa Tata Diosï Jeobani, ima seguru jarhaspti eska i ambe kánikua marhuapiringa jimboka uánikua kʼuiripuechaksï pʼímutanhantapiringa pekadueri ka uarhikueri.

¿AMBEKSÏ ÚSÏREENI IÓNTKI ANAPU KʼUIRIPUECHA PARAKSÏ JAIAPANHERANTANI TATA DIOSÏNI NÁJKIRUKAKSÏ NO PERFEKTUEPKA?

6. ¿Ambeksï úspi máru ambakiti achamasïicha komueska Abeli ka Noe paraksï sánderu andarhierani Tata Diosï Jeobani?

⁶ Desde iónisïa, Tata Diosï Jeobajtsïni sánhani arhisti aianguni nénachi uaa andarhierani imani nájkirukachi no perfektueka. Ísï tátsekua enga Adáni ka Eba no kurhajchapkia Tata Diosï Jeobani, primeru kʼuiripu enga ueenapka mintsikani Tata Diosïni jindeespti Abeli. Ima kéjtsïtakuspti Tata Diosï Jeobani jimboka xénchasïreenja ka uékasïreendi jaiapanherantani ka andarhierani. Abeli karichiichani eranguasïreendi ka sánderu ambakiti karichiichani kéjtsïtakuaspti Tata Diosïni. ¿Néna exespi Tata Diosï ambe enga úpka Abeli? “Jaiapanhentaspti Abelini ka ístu ambe enga ima kéjtsïtakupka” (Gén. 4:4). Tátsekua, ístu jiókuarhiaspti máru kéjtsïtakuechani engaksï máteru kʼuiripuecha úkupka, komueska Noe, jimbokaksï xénchasïreenga ka mintsikanksï (Gén. 8:20, 21). I ambe xarhatasïndi eskaksï kʼuiripuecha uaaka jaiapanherantani ka andarhierani imani nájkirukaksï no perfektueuaka.b

7. ¿Ambejtsïni jorhendasïni Abraániiri ejemplu enga ísï uékapka íntspini imeeri uájpani?

⁷ Abraáni kánikua mintsikasïreendi Tata Diosï Jeobani ka Tata Diosï kurhakuspti eska úpiringa ambe ma enga kánikua úkua jukapka. Arhispti eska kéjtsïtakupiringa imeeri uájpani, Isaakini. Seguruchi jarhaska eska Abraáni kánikua no sési pʼikuarherapka indeni ambe jimbo enga jatsipka para úni. Joperu ima uékasïreendi kurhajchani Tata Diosï Jeobani. Enga Abraáni uándikuni jámeengia imeeri uájpani, Tata Diosï arhispti eska no uándikupiringa. Abraániiri ejemplujtsïni jorhendasïndi kánikua jukaparhakueka ambe: Tata Diosï Jeoba, májkueni eska Abraáni, íntspipirindi imeeri Uájpani jimboka kánikua xénchaasïnga kʼuiripuechani (Gén. 22:1-18).

8. ¿Ambechi jorhenguarhisïni ima kéjtsïtakuecheeri enga Moisésiiri Lei uandeenga? (Levítico 4:27-29; 17:11).

⁸ Ísï tátsekua enga Tata Diosï Jeoba na íntsaapkia Leini israeliteechani, arhiaspti eskaksï kéjtsïtakupiringa animaliichani paraka ima puákuantapiringa pekaduechani (arhinta je Levítico 4:27-29; 17:11). Inde kéjtsïtakuechaksï xarhataxapti eska Tata Diosï sánderu ambakiti kéjtsïtakua ma íntspipiringa, jimboka inde kéjtsïtakua méntku kʼamajkupiringa pekaduni. Tata Diosïiri profeteecha uandaspti eska uarhiitiiri desendensia, enga jindeeka Tata Diosïiri máechakua Uájpa, jatsipiringa para no sési nitamakuarhini ka uarhini, sáno májkueni komueska karichi ma enga kéjtsïtanheenga (Is. 53:1-12). Exe je, Tata Diosï Jeoba íntspipirindi imeeri Uájpani para pʼímutaantani pekadueri ka uarhikueri iámindu kʼuiripuechani, asta juchantsïni jamberi.

¿AMBE ÚSKI JESÚSI PARA PʼÍMUTAANTANI KʼUIRIPUECHANI?

9. ¿Ambe uandantaspi Juanu enga itsï atauenga kʼuiripuechani? (Ebreu 9:22; 10:1-4, 12).

⁹ Uéxurhini 29 jimbo, Juanu enga itsï atauenga kʼuiripuechani, exespti Jesúsini Nasareti anapuni ka uandaspti: “¡Exe je, inde jindeesti Tata Diosïiri Karichi sapichu enga pʼikurhiantajka pekadu parhakpini anapu kʼuiripuechani!” (Juanu 1:29). Enga ima ísï uandapka, xarhataspti eska Jesúsi jindeespka ima Desendencia enga Tata Diosï aiatspipka. Jesúsi íntspipirindi imeeri tsípikuani komueska kéjtsïtakua ma. Jo, iásï kʼóruksï kʼuiripuecha jatsisptia né enga jarhuataapiringa paraksï úni andani pekaduni ka uarhikuani (arhinta je Ebreu 9:22; 10:1-4, 12).

10. ¿Néna xarhataspi Jesúsi eska pekadoriichanisï jupka jirinhaantani?

¹⁰ Jesúsi sánderu imani kʼuiripuechani jarhuatasïreendi engaksï no sési nitamakuarhini jarheenga pekadu jimbo. Ima pʼímarhiasïreendi paraksï nirani chúxapani. Jesúsi mítespti eskaksï kʼuiripuecha pekadu jimbosï komu nitamakuarhijka, jimbosï nireendi andarhieraani imani kʼuiripuechani engaksï ísï mítekateepka komueska no sési úriicha. Jesúsi ísï uandaspti arini ejempluni úraparini: “Imeecha engaksï sési jámani jaka nóksï uétarhinchasïndi doktorini, joperu pʼamenchatiichaksï kʼóru jo”. Ka ístu uandaspti: “No jurhaska ióarhiani imeechani engaksï sési jámajka sino pekadoriichani” (Mat. 9:12, 13). Ka ísï úspti, pori ejemplu puákuantaspti pekaduechani uarhiitini ma enga imeeri uekua jingoni jupandukupka (Luk. 7:37-50). Ka máteru uelta, jorhendaaspti jukaparhakua ambe Biblieri uarhiitini ma enga Samaria anapuepka ka enga itsï pʼitani japka posurhu ma, ka ísï úspti no arhiparini eska ima uarhiiti ísku jándikua ambe niátani japka (Juanu 4:7, 17-19, 25, 26). Tata Jeoba ístu íntskuspti uinhapikua Jesúsini para úni tsítaantani acheetiichani, uarhiitiichani, tatakeechani, nanakechani ka sapiichani para úni andani uarhikuani enga jindeeka pekadu (Mat. 11:5).

11. ¿Andiksïsï ima kʼuiripuecha engaksï kʼérati pekaduechani uauenga sésiksï pʼikuarhereeni Jesúsi jingoni jarhani?

¹¹ Asta ima kʼuiripuecha engaksï kʼérati pekaduechani uaauenga sésiksï pʼikuarherasïreendi Jesúsi jingoni jarhani. Ka nójtsïni ísku pakatasïndi míteni eskaksï uékasïreenga andarhierani Jesúsini, jimboka ima kurhangukuasïreenga ka xarhatakuani pʼamojperakua (Luk. 15:1, 2). Ka jimbokaksï kʼuiripuecha mintsikasïreenga imani, Jesúsi sési arhiasïreendi ka xénchaani (Luk. 19:1-10). Ima sési xarhataspti na enga xáni xénchpejka imeeri Taati (Juanu 14:9). Ambe enga uandapka ka ambe enga ueenga, xarhataspti na engajtsïni xáni xénchajka Tata Diosï Jeoba ka pʼamojkuntsïni ka ístu eskajtsïni Tata Diosï uékasïnga jarhuatani parachi úni andani pekaduni. Jesúsi úsïreendi eskaksï kʼuiripuecha uékapiringa móantani ka chúxapanksï (Luk. 5:27, 28).

12. ¿Ambe xáni uandaspi Jesúsi imeeri uarhikueri ambe?

¹² Jesúsi sési mítetixaptia ambe enga úkuarhinchapiringa. Uánikua xanhari arhiasptia imeeri chúxapatiichani eska traisionarinhapiringa ka uándikunhani (Mat. 17:22; 20:18, 19). Ístu mítespti eska imeeri uarhikua jimbo pʼikurhiantapiringa pekaduni parhakpini anapu kʼuiripuechani, ísï eska na uandapkia Juanu ka máteru profeteecha. Ístu jorhentpispti eska ísï tátsekua enga na uarhipiringia ‘mámaru jásï kʼuiripuecha andarhierapiringa’ (Juanu 12:32). Imeecha engaksï mintsikapiringa Jesúsini ka kurhajchanksï, úpirindiksï jaiapanherantani Tata Diosï Jeobani ka pʼímutanhantani paraksï “nóteru pekadueri jántspiriinia” (Rom. 6:14, 18, 22; Juanu 8:32). Ísï jimbo, parajtsïni Jesúsi úni jarhuatani, jatsispti para kánikua balori jukani jimboka niárapiringa uarhini (Juanu 10:17, 18).

13. ¿Néna uarhispi Jesúsi, ka inde ambejtsïni ambe jorhendasïni Tata Diosï Jeobaeri ambe? (Ístu exea je imajeniichani).

¹³ Jesúsini, imeeri amigu ma traisionariispti, tátsekua imeeri ikiatspitiichaksï jupikaspti, no sésiksï arhispti, chkuanderakua ambeksï jauatakuspti, no sésiksï kámaspti ka arhisptiksï eska uándikunhapiringa. Ka últimu, máru soldaduechaksï chkarirhu ma cháparhataspti paraksï uándikuni. Jesúsi tekaantaspti nájkiruka xáni no sési nitamakuarhipka ka no sési kánhani ka ístu Tata Diosï Jeoba kánikua no sési pʼikuarheraspti enga ísï exeni japka imeeri Uájpani. Ka nájkiruka kánikua xéncheenga imeeri Uájpani ka ístu jatsini uinhapikua, Tata Diosï no jarhuataspti. ¿Andi? Xénchperakua jimbo. Jesúsi uandaspti: “Tata Diosï xáni xénchaasti parhakpini anapuechani, jimbosï íntspiti imeeri máechakua Uájpani, parakaksï imeecha engaksï imani mintsikaaka nóksï kʼamajkunhaaka, sánderu sési, jatsinksï tsípikua para méntkisï” (Juanu 3:16).

14. ¿Ambeksïni jorhendasïni chánksïni ambe enga úka Jesúsi?

¹⁴ Kánikua jukaparhakua ambeesti ambe enga úka Jesúsi, jimbokajtsïni xarhatacheska na engajtsïni xáni xénchajka Tata Diosï Jeoba iáminduechani ka ístu chánksïni, jo iámindu Adáni ka Ebaeri uájpeechani. Míteni ambe enga xáni úka Tata Diosï Jeoba ka na enga xáni no sési pʼikuarherapka parajtsïni úni pʼímutantani pekadueri ka uarhikueri, kánikuajtsïni ísku pakatasïndi ¿a no? (1 Juanu 4:9, 10). Tata Diosï Jeoba uékasïndi jarhuataani iáminduechani parachi no no sési ambe niátani ka ísïchi úni andani pekaduni.

15. ¿Ambechi jatsiski para úni parajtsïni marhuacheni tata Jesukristueri uarhikua?

¹⁵ Kʼéri intsïmperata máesti engajtsïni Tata Diosï Jeoba ísï íntskuka imeeri orheta Uájpani jimbokachi ísï úsïnga puáminhaantani pekaduechani. Joperu juchajtuchi jatsiska para úni ambe ma. Juanu enga itsï atauenga kʼuiripuechani ka Jesúsi, uandasptiksï ambe engachi jatsika para úni: “Móanta je, jimboka auandarhu anapu Reinu janoxakaia” (Mat. 3:1, 2; 4:17). Ísï jimbo, engachi uéjka andarhierani juchaari Taatini ka úni eskajtsïni ima puáchentaaka jatsiskachi para móantani. Joperu, ¿ambe arhikuekasïni moántani ka nénajtsïni jarhuatasïni jaiapanherantani Tata Diosï Jeobani nájkirukachi no perfektueka? Máteru jorhenguarhikua jimbochi exeni jauaka mókuntskuani.