Ambe enga kurhanguarhijka ima enga arhintajka

Enga Jesúsi uaxastapka Tateeri Senani, ¿naniksï jarhaspi imeeri 70 disipuluecha enga ima antesi axaapka aianhpini? ¿Jurajkuspiksïa?

Nóchi jatsiska para eratseni eska jiáni enga Jesúsi uaxastapka Tateeri Senani, imeeri 70 chúxapatiichaksï jurajkuspkia o eska Jesúsi nóteru jaiapanhiantasïreengia. Imani jurhiatikua jimbo, Jesúsi solu uékasïreendi imeeri apostoliicha jingoni jarhani.

Jesúsi jaiapanheantasïrendi 12 disipuluechani ka ístu 70 imeeri chúxapatiichani. Iámindu ima kʼuiripuecheri engaksï jámeenga chúxapani, Jesúsi 12 achamasïichani erakuaspti enga arhiapti apostoliicha (Luk. 6:12-16). Galilea jarhaspti jiáni enga ‘tánaantapka 12 apostoliichani’ ka “axaaspti paraksï Tata Diosïiri Reinueri ambe uandantani ka paraksï ambakeraantani pʼamenchatiichani” (Luk. 9:1-6). Tátsekua Judea surirhisï, “erakuaspti máteru 70 chúxapatiichani ka tsimandani axaaspti” (Luk. 9:51; 10:1). Ísï jimbo, nani uéjkisï enga aianhpinhapiringa imeeri ambe jarhasïreendiksï kʼuiripuecha engaksï chúxapeenga Jesúsini.

Judiuecha engaksï niáreenga Jesúsiiri chúxapatiini útasïksï úntasïreendi Paskuani mándani uéxurhini, jamberi imeecheeri familia jingoni (Éx. 12:17-20). Enga niárani japkia paraksï uándikuni, Jesúsi niraspti imeeri apostoliicha jingoni Jerusaléni. Joperu máru chúxapatiichani engaksï Judea, Galilea ka Perea anapuepka no arhiaspti eskaksï imani jingoni úntapiringa Paskuani. Péringa imeeri apostoliicha jingontku uékeenga úndani. Jimbosï arhiapti: “Meru uékaxapkia chánksïni jingoni arhani Paskueri tʼirekua ante de ji ueenani no sési nitamakuarhini...” (Luk. 22:15).

¿Ka andisï uékeeni solu imeecha jingoni jarhani? Jimboka no ióni jimbo ísï uarhipiringia komueska “Tata Diosïiri Karichi sapichu enga pʼikurhiantajka pekadu parhakpini anapu kʼuiripuechani” (Juanu 1:29). Jerusaléni uarhipirindi, jima engaksï desde iónisï kéjtsïtakuenga Tata Diosïni. Jesúsiiri uarhikua sánderu uánikua kʼuiripuechani pʼímutantaapirindi ka eska ima karichi sapichu engaksï israeliteecha ápka ima chúrikua engaksï Ejiptu uéakuntapka (1 Kor. 5:7, 8). Jesúsiiri kéjtsïtakua jimbo 12 apostoliichaksï niárapirindi uaxastani kúnguarhikua kristianani (Éfes. 2:20-22). Kánikua jukaparhakuesti exeni eska pímbinhasï ireta enga jindeeka Jerusaléni “12 puerteechani jukaaspti engaksï pítsekuepka” ka jimaksï “12 nombriicha karanharhikukata jarhaspti 12 apostoliicheeri engaksï Karichi sapichueriika” (Apok. 21:10-14). Ísïisti, apostoliichaksï kʼéri ánchikuarhita ma jatsipirindi paraka uaaka kumplirikuarhini ambe enga Tata Diosï eratsetini jaka úni. Ísï jimbo, kurhangusïngachi andisï Jesúsi solu uékeni imeecha jingoni jarhani paraksï úntani últimu Paskuani ka ísï tátsekua uaxastani Tateeri Senani.

Ima 70 Jesúsiiri chúxapatiicha ka ístu máteruecha, nóksï Jesúsi jingoni jarhaspti ima chúrikua. Joperu iámindu chúxapatiicha engaksï no méni jurajkupiringa, jatsiapirindiksï imani kóntperateechani engaksï niárapiringa jarhani Tateeri Sena jimbo. ¿Andi? Jimboka iáminduecha engaksï niárapiringa kristianu erakukateeni, niárapirindiksï kuenta úkuarhini imani pakatperakua jimbo enga Jesúsi úkuapka imeeri apostoliichani ima chúrikua paraksï ístu juramuni (Luk. 22:29, 30).