Kánikua tsípikua jingoni marhuakuska Tata Diosï Jeobani

JUCHIITI FAMILIA

Uéxurhini 1934 andajpenuspka, juchiiti taatiichaksï Suiza anapuespti, joperuksï mótsispti Timmins, ireta ma engaksï minecha jaka ka enga Ontario jaka (Canadá). Uéxurhini 1939 jimbo ísï, juchiiti naandi ueenaspti arhintani rebista Aianhpiri ka ueenaspti nirani tánguarhikuecharhu Jeobaeri testiguecha jingoni. Juchiiti naandirini pájtasïreendi jíndeni ka ístu juchiiti seisi ermanuechani ka no ióndaspti itsï atakuarhini.

Juchiiti taati no sáni tsitispti ambe enga juchiiti naandi úpka, joperu juchiiti naandi eratsetixaptia marhuakuni Tata Diosï Jeobani. Ima sési marhuakuxapti Tata Diosï Jeobani nájkiruka 1940 jimboisï Jeobaeri testiguechanksï nóteru jurajkuapkia paraksï aianhpini Canadá. Méntkisï sési kámaspti juchiiti taatini, uékperakua jingoni ka janhanharhikua jingoni, nájkiruka ima no sáni sési arhienga. Imeeri ambakiti ejemplurini jarhuataspti jíndeni ka juchiiti ermanuechani parachi Jeobaeri testigu úkuarhini. Kánikua tsípispka enga juchiiti taati niárapka mójtakukuarhini tiempu jingoni ka sánderujtsïni sési kámania.

UEENASPKA MARHUAKUNI TATA DIOSÏ JEOBANI TIEMPU KOMPLETUERI

Uéxurhini 1950 jimboisï, niraspka k’éri tánguarhikuarhu ma jini Nueva York, enga arhinhapka “Aumento de la Teocracia”. Jima míteaspka uánikua erachiichani ka pirenchiichani iápurisï anapuechani ka kánikua sési járhati eksperiensiechani kurhauaspka erachiicheeri engaksï nípka Galaadiiri Jorhentperakuarhu. Kánikuarini jarhuataspti parani uékani sánderu marhuakuni Tata Diosï Jeobani. Nájkirukani t’uini eratsetini japkia marhuakuni Tata Diosï Jeobani tiempu kompletueri, iásï sánderuni uékaxapkia ísï úni. Engani na niántapkia juchiiti kʼumanchikuarhu, jirejiresï axaspka solisitudi ma parani prekursori regulari úkuarhini. Joperu Canadá anapu Betelirini mókuchintaspti eskani orheta jatsispka parani itsï atakuarhini. Ísï jimbo, 1 de oktubrini de 1950 jimbo itsï atakuarhispka. Ma kutsï tátsekua prekursori regulari úkuarhispka ka arhisptijtsïni eskani Kapuskasing nipiringa marhuani, iretarhu ma enga iauani pakareenga kʼumanchikuarhu uératini.

Uéxurhini 1951 jimbo, Beteli pʼímarhiaspti erachiichani engaksï jorhenapka fransési uandani paraksï nirani marhuani Quebec, nani enga fransési uandanheenga ka engaksï no uánikua Jeobaeri testiguecha japka. Ji jorhenaspka fransési ka inglesi uandani, ísï jimbo arhiaspka eskani úpiringa nirani ka axasptijtsïni Rouyn. Jima no nemani mítespka, imantkusïni mítepka náki kʼumanchikuarhu niárapirini. Joperu iámu ambe sési uéraspti. Marcel ka ji niáraspkachi kánikua sési pájperani ka kánikua sési marhuaspka kuatru uéxurhini Quebec, engani útasteru jima marhuani japka, prekursori espesiali únhaspka.

GALAADI NIRASPKA KA SÁNI IÓNDASPKA MÁRU AMBE ÚNI

Engani na Quebec japkia, pʼímarhisptijtsïni parani nirani klase 26 jimbo Galaadiiri Jorhentperakuarhu jini South Lansing (Nueva York). Kánikua tsípixapka ka 12 de febreruni de 1956 jimbo uéntaspka ka África Occidental axanhaspka, jini enga iásï Ghanab arhinhajka. Ante de nirani jatsispka parani Canadá kʼuanhatsentani, nani engani intsïnhaantapiringa juchiiti sïrandeechani parani úni nirani. Ji eratsespka eskani no ióndapiringa intsïnhaantani.

Siete kutsï pakaraspka Toronto engani jamberi intsïnhantapka juchiiti sïrandeechani. Imani tiempu jimbo temungurhiri ma jingoni pakaraxapka engaksï arhikuarhienga Cripps, imeechaksï uátsï ma kámasïreenga enga arhinheenga Sheila ka tsitijperaspkachi. Engani na eratsepkia kurhajkuarhini, intsïnhantaspka juchiiti bisani. Ísï jimbo Sheila ka ji kómarhispkachi Tata Diosï Jeobani ka eratsespkachi eskani ji nipiringa marhuani joperu eskachi seguiriini japiringa karatsperani, parachi exeni sinchi úpiringa tembuperani sánderu orhepatini. Nájkirukachi úkua jukanchapka indeni ambe erakuni, tiempu jingonchi niáraspka exeni eskachi kánikua sési úspka engachi ísï eratsepka.

Treni jimbo niraspka, barku jimbo ka abioni jimbo, jimbosïni ma kutsï jimbo niárapka Accra enga Ghana kapitalika. Distritueri orhejtsïkuti únhaspka ka jatsispka parani iámu Ghana jámani, Costa de Marfil ka Togolandia (enga iásï Togo arhinhajkia). Betelirini karru ma íntskuspti parakani úpiringa iápurisï jámani. Sáno méntkisï jandiajku nirasïreenga ka kánikua sési pʼikuarherasïreenga pʼorhembiani kúnguarhikuechani.

Fini de semanecha jimbo arhijtsïkperateechani jatsiasïreenga para k’éri tánguarhikua sirkuitueri, ka jimbokachi no jatsiaspka kʼumanchikuechani para k’éri tánguarhikuecha, erachiichaksï kuákueni járhatiichani uaasïreendi bambú jingoni ka palmeecha jimboksï ójtsïtasïreendi parajtsïni no xáni tsánda atani. Ka jimboka no jarhaspka nani patsani t’irekua ambe, erachiichaksï jimeesïsï jatsiasïreendi máru animaliichani paraksï uándikuani ka tʼireraani imeechani engaksï nipiringa k’éri tánguarhikuarhu.

Ménichani mámaru ambe úkuarhisïreendi k’éri tánguarhikuecharhu, miásïnga ma xanhari enga misioneru ma enga Herb Jennings arhinheenga,c arhijtsïkperata ma nitamataraxapti ka enga ma repentku jini jupka japka uiriipuni toru ma ka jimeesïsï nitamaspka enga Herb japka ka erachiicha, toru no mítespti naniisïsï nirani ka Herb ísku pakaraspka chérakata ka no mítespti ambe uandani. Tátsekua kuatru erachiichaksï jupikaspti toruni ka kénditasptiksï ka iáminduechaksï úndaspti pasajkuni.

Entre semana nirasïreenga ireta sapirhatiicharhu engaksï jimeesïsï japka parani exeraani pelikula ma enga arhinhajka La Sociedad del Nuevo Mundo en acción. Tsimani posticharhu o tsimani anhatapuecharhu jatsikusïreenga takusï urapiti ma paraka úpiringa xarharani. ¡Kʼuiripu kánikua tsitisïreendi exeni! Uánikuechaksï nótki ma xanhari exexapti pelikula ma. Ísï jimbo, kánikuaksï tsipisïreendi ka pasajkuni engaksï exeenga kʼuiripuechani itsï atakuarhini jarhani. Inde pelikula exerasïreendi eskaksï Testiguecha interu parhakpinirhu jarhaska.

Engani na tsimani uéxurhini japkia África, úspka nirani k’éri tánguarhikua internasionalirhu enga 1958 jimbo úkuarhipka jini Nueva York. ¡Kánikua joperu kánikua tsípispka engani ménderu exepka Sheilani! Ima prekursora espesialispti jini Quebec, ka jima uératini niraspti k’éri tánguarhikuarhu. Antesichi seguirixapka karta axatsperani, joperu engachi na ménderu exejperapkia arhispka sini ima uékasïreeni uambuchani jíndeni jingoni ka imarini arhispti eska jo. Karakuspka erachini Knorrd parani kurhamarhini sini Sheila úpirini nirani Galaadi ka jima uératinksï África axani ka erachi Knorr arhisptirini eska jo. Enga Sheila na niárapkia Ghana tembuperaspkachi Accra 3 de oktubri de 1959 jimbo. Ísïchi p’ikuarheraspka eskajtsïni Tata Diosï Jeoba újchakuraspka jimbokachi imani orheta peeraspka.

MARKUCHI MARHUASPKA CAMERÚN

Uéxurhini 1961 jimbo axanhaspkachi Camerún ka arhisptijtsïni eskani jarhuajpepiringa uaxastani jimbanhi Betelini ma. Uánikua ambe jatsispka para úni ka ístuni jatsispka para exeni na enga nirani japka ánchikuarhita, ísï jimbo uánikua ambe jatsispka parani jorhenguarhini. Para 1965 jimbo, Sheila embarasada pakaraspti ka kánikuachi úkua jukanchaspka engachi mítepka eskachi sapini ma kánguarhipiringa, joperu engachi ueenapka kánikua tsípini indeni ambe jimbo, eratsexapkachia Canadá kʼuanhatsentani ka jimajkani úkuarhispti ambe ma engachi no erokuarhini japka.

Sheila tsïtaspti charhakuni. Doktorijtsïni arhispti eska tataka máespka. Nájkiruka jukari 50 uéxurhini nitamakia útasïchi no úsïnga mirikurhini ambe enga úkuarhipka. Ka nájkirukachi kánikua no sési pʼikuarherani japka eratsespkachi jima pakarani parachi seguiriini jima marhuani.

Camerún anapu erachiichaksï someni no sési kánhasïreendi jimbokaksï no inchamukusïreenga politikarhisï. Ka jiáni sánderu no sési jánhaskuarhisïreendi engaksï uékeenga erakuni jimbanhi juramutini ma. Uéxurhini 13 de maiu de 1970 jimbo, úkuarhispti ambe ma engachi eratseni japka, gobiernu nóteru jurajkuasptia Jeobaeri testiguechani paraksï úni imeecheeri ánchikuarhitani. Euakuarhisptijtsïni xáni sési jásï Betelini engachi jatsipka ka engachi solu sinko kutsïjku úrapka ka ma semana jimbojku, iámindu misioneruechantsïni petantaspti paisirhu. Kánikua úkua jukaspti jurajkuani erachiichani jimbokachi kánikua xénchasïreenga ka uandanhiaxapkachi ambe engaksï úpiringa úkuarhinchani.

Seisi kutsï jarhaspkachi Francia anapu Betelirhu ka jima uératini jánguarhintaxapka jarhuataani Camerún anapu erachiichani parakaksï no ma ambe kueratanchapiringa. Ka disiembrini ima mismu uéxurhini, Nigeria anapu Betelichi axanhaspka. Indeni jurhiatikuecha jimbo, inde Beteli ueenaspti exeni néna úkuarhixapi aianhpikua Camerún. Ka Nigeria anapu erachiichajtsïni sési erokaspti. Kánikuachi sési pʼikuarheraspka imani uéxurhiniichani jima marhuani.

ÚKUA JUKANCHASPKACHI ERAKUNI AMBE ENGACHI ÚPIRINGA

Sheila jukari 14 uéxurhini páxaptia jíndeni jingoni marhuani África Occidental, jimbosïni xáni sési pʼikuarherasïreenga imani jimbo. Joperu 1973 jimbo, jatsispkachi para imani ambe erakuni úni enga kánikua úkua jukapka. Sheila ióni páxaptia pʼamenchani. Engachi Nueva York japka kʼéri tánguarhikua ma jimbo, ueparindini arhispti: “Nóteruni uaakia. Méntkuni pʼamenchani jarhasïnga. Nóteruni uaakia seguiriini ini ambe úni”. Jimbochisï jatsispka para mójtakuni máru ambe. Tátsekua, uandontskuarhespkachi indeeri ambe, kómarhispkachi Tata Diosï Jeobani ka aianguspkachi iámindu ambe ka eratsespkachi Canadá kʼuanhatsentani, nani enga Sheila úpiringa nirani doktori ma jingoni. Meruchi kánikua no sési pʼikuarheraspka jurajkuni juchaari asignasionini ka nóteru marhuania tiempu kompletueri. Kánikuachi úkua jukanchaspka jurajkuni indeni ambe.

Engachi na niántapkia Canadá, úspka exentani ánchikuarhita juchiiti amigu ma jingoni engani ióntki mítepka. Ima karruechani ataraantasïreendi ireta ma jimbo enga norterhisï japka Toronto. Rentarispkachi kʼumanchikua sapichu ma ka imani mueblichanksï piáspka engaksï úrakateepkia. Mótsispkachi ka nóchi ma kántspeni pakaraspka. Uékasïreengachi arisku sáni irekani, jimbokachi uékasïreenga ma jurhiani ménderu tiempu kompletueri marhuani. Ískuchi pakaraspka engachi no ióni jimbo ménderu ísï marhuani japkia.

Sábaduechani ueenaspka jarhuajpeni konstruksionirhu nani enga únhani japka Kʼumanchikua para Kʼéri Tánguarhikuecha Norval (Ontario). Ísï tátsekua, arhisptijtsïni eskani exepiringa iámu ánchikuarhitani enga únhani japka konstruksionirhu. Ka jimboka Sheila sánderu sési jarhaspkia, exespkachi eskachi úpiringa jiókuarhini indeni jimbanhi ánchikuarhitani. Juniu 1974 jimbo, mótsispkachi jima enga únhani japka Kʼumanchikua para Kʼéri Tánguarhikuecha. Kánikuachi tsípixapka engachi ménderu úpiringia marhuani tiempu kompletueri.

Kánikua tsípixapka jimboka Sheila sánderu sési jarhaspkia. Tsimani uéxurhini tátsekua, arhisptijtsïni parani sirkuitueri orhejtsïkutiini ka úspkachi ísï úni. Manitoba anapu kúnguarhikuechanchi pʼorhembiasïreenga enga Canadá jaka, nani enga kánikua tsʼirakuarhijka. Joperuchi kánikua sési pʼikuarherasïreenga jimbokaksï kúnguarhikuarhu anapu erachiicha kánikua uékperakua xarhatachesïreenga. Jorhenguarhiskachi eska ambe enga sánderu jukaparhakueka jindeeska iámu mintsita jingoni marhuakuni Tata Diosï Jeobani nani uéjkisïchi marhuani jarhani.

KÁNIKUA AMBAKITI AMBE JORHENGUARHISÏNGA

Uánikua uéxurhinchi páxapkia marhuani sirkuiturhu, ka 1978 jimbo, pʼímarhisptijtsïni parachi nirani marhuani Canadá anapu Betelirhu. Sánisï tátsekua, ambakiti ambe jorhenguarhispka joperu engareni kánikua no sési pʼikuastapka. Enga Montreal tánguarhikua espesiali ma úkuarhipka, arhisptijtsïni eskani arhijtsïkperata ma nitamatarapiringa ma ora ka terujkani fransési jimbo, joperu imeecha engaksï jima japka nóksï tsitispti na engani arhijtsïkpepka ka erachi ma enga Grupurhu japka enga exejka na enga Aianhpinhani jaka, uandontskuarhespti jíndeni jingoni, jiánisï ji no kuenta íntskukuarhesïreenga eskani ji no úsïreenga sési nitamatarani arhijtsïkperateechani. Miásïnga eskani kánikua no sési p’ikuarheraspka ambe engareni arhipka ima erachi, ísï pʼikuarherasïreenga eska ima kánikua ménderueni eratsesïreenga ka eska jukari ambe uandaxapka. No ma ambe sési uandaspti na engani nitamatarapka arhijtsïkperatani. No sési úspka engani no jiókuarhiapka konsejuechani nomasi imani jimbojku né engareni íntskupka ka na engareni arhipka.

Ísï tátsekua erachi ma enga Beteliiri orhejtsïkutiipka uandontskuarhespti jíndeni jingoni ka aianguspka eskani no jiókuarhispka konsejuni ka eskani no sési úspka. Tátsekua niraspka imani erachini arhini engareni konseju íntskupka eskarini tekaachentapiringa ka iumarini uékperakua jingoni puáchentaspti. Ambe enga nitamakuarhipka, jorhenguarhiska ambe ma engani no méni mirikurhiaka, eska uétarhisïnga kaxumbitiini (Prov. 16:18). Uánikua xanhari kómarhiskia Tata Diosï Jeobani imani ambe jimbo engani no sési úpka. Ka eratsetixakaia méntkisï jiókuarhini konseju ma engajtsïni íntskuaka.

Jukari 40 uéxurhini páxakaia Beteli enga Canadá jaka ka 1985 uératini jarhuajpexaka Grupurhu enga Canadá anapu Betelini Orhejtsïkujka. Febreru 2021 jimbo, juchiiti uarhiiti Sheila uarhisti ka kánikua jirinhantasïnga; ka jíjtuni pʼamenchasïngia. Kánikua okupadu jarhaska jimbokani seguiriixaka tsípikua jingoni marhuakuni Tata Diosï Jeobani ka jimbosïni ísï exejka eska tiempu arisku sáni mirasïnga (Ecl. 5:20, nota). Ísïisti eskani uánikua no sési ambe nitamakuarhiska, peru inde ambe no ma ambeesti imani ambe jingoni na engani xáni tsípini p’ikuarherajka Tata Diosï Jeobani marhuakuni. K’éri tsípikuarhita máesti para ji orheta peerani Tata Diosïiri ambe ka marhuani tiempu kompletueri 70 uéxurhini jimbo. Kómarhisïnga Tata Diosï Jeobani eskaksï iámindu tumbiicha marhuakuaka imani, jimbokani seguru jarhaska eskaksï solu ísï uaaka kánikua tsípikua jingoni irekani.