SEMANA 50
PIREKUA 135 Jeobakini arhixati: “Mímixekua xarhata juchiti uátsï”
Nénaksï uaa taatiicha jarhuataani uájpeechani sánderu mintsikani Tata Diosïni
“Sési míteni ambe enga Tata Diosï uéjka, imani ambe enga sési jaka, ambe enga ima jaiapanhentajka ka ambe enga ambakiti ambeeka” (ROM. 12:2).
AMBE ENGACHI JORHENGUARHIAKA
Exeakachi ambe enga uaaka jarhuataani taatiichani paraksï uandontskuarhekuani uájpeechani Tata Diosïiri ambe ka Biblieri ambe. Inde ambe jarhuatauati sapiichani paraksï sánderu mintsikani Tata Diosïni.
1, 2. ¿Ambeksï jatsiski para úni taatiicha engaksï uájpeecha kurhamarhiauaka Biblieri ambe?
UÁNIKUECHAKSÏ uandasïndi eska kʼéri ánchikuarhita máeska tʼarhexeraani uájpeechani. Ísï jimbo taatiicha, ambakiti ánchikuarhitajtsï ma úxaka engajtsï jánguarhintani jaka paraksï sapiicha mintsikani Tata Diosï Jeobani (Deut. 6:6, 7). Joperu engaksï sapiicha sánhani arhini jarhajka kʼéni, ueenasïndiksï kurhamarhikuarhini andichisï mintsikajki Bibliani, o andisï Biblia uandajki eskachi máru ambe no uaaka.
2 Enga inde ambe úkuarhijka, jamberijtsï niárajka uandanhiani ka eratseni eskaksï chaari sapiicha nóteru xáni mintsikaxakaia Tata Diosïni. Joperu sapiichaksï jatsisti para indeni ambe kurhamarhikuarhini paraksï sánderu seguru jarhani ambe engaksï jakajkuaka (1 Kor. 13:11). Ísï jimbo, engaksïni chaari sapiicha kurhamarhiaka ambe ma, jánguarhinta je jorhendaani ka eskaksï eratsentaaka. Inde ambe jarhuatauati parakaksï sánderu mintsikaaka Tata Diosïni ka Bibliani.
3. ¿Ambechi jorhenguarhia?
3 Ini jorhenguarhikuarhu, exeakachi ambe engaksï uaaka úni taatiicha paraksï jarhuataani uájpeechani arini ambe úni: 1) sánderu mintsikani Tata Diosïni ka Bibliani, 2) kurhanguni andisï xáni jukaparhakue kurhajchaani Tata Diosïiri juramukuechani, ka 3) no chéni uandantani ambe engaksï jakajkujka. Ístuchi exeaka, andisï sési jaki eskaksï sapiicha mámaru ambe kurhamarhiauaka taati jémbeechani, ka úni máru ambe para jarhuataani sapiichani kurhanguni ambe engachi jakajkujka.
JARHUATAA JE CHAARI SAPIICHANI SÁNDERU MINTSIKANI TATA DIOSÏNI KA BIBLIANI
4. ¿Sapiichaksï ambe úpirini kurhamarhikuarhini, ka andi?
4 Ísï eska chá na sánhani arhipka mintsikani Tata Diosï Jeobani, chaari sapiichajtuksï májkueni uaati. Ísï jimbo, imeechajtuksï niárasïndi kurhamarhikuarhini: “¿Néna uaa míteni eska Tata Diosï jarhaska? ¿Néna uaa mintsikani eska ísïiska ambe enga Biblia uandajka?”. Ini ambe jimbosï Biblia arhiajti kristianuechani ʻeskaksï eratsentaaka’ paraksï “exeni eska iámindu ambe ísïiska” (Rom. 12:1; 1 Tes. 5:21). Ísï jimbo taatiicha, ¿nénajtsï uaa jarhuataani chaari sapiichani sánderu mintsikani Tata Diosïni ka Bibliani?
5. ¿Taatiicha nénajtsï uaa jarhuataani chaari sapiichani paraksï jakajkuni ambe enga uandajka Biblia? (Roma 12:2).
5 Jarhuataa je chaari sapiichani paraksï imeecha mismu exeni eska ísïiska ambe engachi jakajkujka (arhinta je Roma 12:2). Engaksïni chaari sapiicha kurhamarhiaka ambe ma, jarhuataa je paraksï imeecha mismu exeni ambe enga ísïika, ka uaakajtsï úraani arini publikasionichani Índice de las publicaciones Watch Tower ka jarhuajperata paraksï Jeobaeri testiguecha estudiariini. Tátsekua uaatiksï nirani jima engani arhijka “Biblia”, partirhu “Tata Diosïni jimboesti” parakaksï exeaka eska Biblia no solu jindeeska libru ma engaksï kʼuiripuecha karaka, sino “Tata Diosïiri uandakua” (1 Tes. 2:13). Pori ejemplu, paraksï exeni eska Biblia jurhimbitku uandasïnga uaatiksï jirinhantani Nínibeeri ambe, ióntki anapu ireta ma enga Asiria japka. Máru kʼuiripuechaksï uandasïreendi eska inde ireta no méni jarhaspka. Joperu 1850 jimboisï, niárasptiksï exentani na enga pakarapka inde ireta enga na kʼamajkunhapkia (Sof. 2:13-15). Ka ístu rebista Aianhpiri nobiembriiri 2021 anapu, uandasïndi na engaksï niárapka kumplirikuarhini ima profesiecha engaksï Nínibeeri ambe uandeenga. Ka paraksï exeni eska inde ambe ísï úkuarhispka, uaatiksï arhintani partirhu “¿Mítespijtsï?”. Engaksï chaari sapiicha exeaka ambe engaksï uandajka publikasionicha imani ambe jingoni engaksï ensiklopediecha uandajka ka máteru libruecha, niáraatiksï sánderu mintsikani Bibliani.
6. ¿Na jatinksï taatiicha úpirini jarhuataani sapiichani paraksï eratsentani ambe ma? (Ístu exe je imajenini).
6 Jarhuataa je sapiichani paraksï eratsentani ka sési kurhanguni. Jiáni engaksï taatiicha jimeesïsï niuaka engaksï planteecha jauaka o museu ma jimbo oksï Beteli nirani, uaatiksï uandontskuarhekuani sapiichani Biblieri ambe paraksï jarhuataani sánderu mintsikani Tata Diosïni. Pori ejemplu, engaksï museu ma jimbo niuaka oksï internetirhu uératini exeni, taatiichaksï uaati arhiani sapiichani: “Exe indeni ambe”, o “¿exeskiri ambe enga úkuarhipka indeni uéxurhini jimbo?”. Ka ísïksï jarhuatauati uájpeechani sánderu seguru jarhani eska ísïiska ambe enga Biblia uandajka. ¿Chaari sapiicha míteski eska Tata Diosïiri nombri tsakapurhu ma jarhaska enga ma 3,000 uéxurhinisï anapueka? Inde tsakapu ísï mítekateesti eska piedra moabita ka Paris (Francia) jarhasti jini Museo del Louvre. Ka ístu Warwick (Nueva York) enga sentrali mundiali jaka Jeobaeri testiguecheeri, museu ma jarhasti enga arhinhajka “Biblia ka Tata Diosïri nombri” jimajtuksï uaati exentani kopia ma indeni tsakapueri enga Tata Diosïiri nombri jukaka. Indeni tsakapu jimbo uandasïndi eska Moabi anapu rei enga Mesá arhinheenga, no uékasïreenga kurhajchani ireta Israelini ka Biblia uandasïndi eska inde ambe ísï úkuarhispka (2 Rey. 3:4, 5). Engaksï chaari sapiicha exeaka eska meru ísï úkuarhispka ambe enga Biblia arhijka, niáraatiksï sánderu mintsikani Tata Diosïni (terukutanta je 2 Crónicas 9:6 jingoni).
Engajtsï uéraska nani ojtsï museu ma jimbo nirani, uaakajtsï mámaru ambe kurhamarhiani chaari sapiichani paraksï imeecha eratsentani. (Exe je párrafu 6).
7, 8. a) Na enga xáni sési kueraakata jaka iámindu ambe Echerirhu, ¿ambe xarhatasïni? Uanda je ejemplu ma. (Ístu exea je imajeniichani). b) ¿Ambejtsï úpirini kurhamarhiani sapiichani paraksï jakajkuni eska jarhaska Kuerajpiri ma?
7 Jarhuataa je sapiichani eratsentani ambe enga xáni kueraaka Tata Diosï. Taatiicha, engajtsï juátarhisï jámani jauaka chaari sapiicha jingoni, arhia je eskaksï jingontku exeaka iámindu ambe. Exeraa je eska indeni ambe ima kueraaska enga kánikua inteligentiika ka jánhaskatiini. Pori ejemplu, engaksï exeaka karakolini ma, tsïtsïkiichani, máru chkurhiichani o jóskuechani, kuenta íntskukuarheatiksï eska inde ambe sáno májkueni jásï forma jukaska ka i ambe niárasïndi ísï úkuarhini sucesión de Fibonacci jimbo. Ka sientifikuechaksï ióni jánguarhintastia míteti andisï uánikua ambe sáno májkueni jásï forma juka.a
8 Klaserhu Ciencias jimbo, sapiichaksï uaati jorhenguarhini eska uánikua ambe sáno májkueni úkata jarhaska. Pori ejemplu, anhatapu ma uéxkurhiasïndi rameechani, ka indeni rameecha jimbo, máteru rameechaksï uéxkurhisïndi engaksï sánderu sapirhajka ka i ambe ísï mítekateesti komueska Fractal. Uánikua ambe enga kueraakata jaka, sáno májkueni úkata jarhasti. Joperu, ¿né úski eska inde ambe májkueni jásï forma jukapiringa? ¿O né uandaski eska inde ambe xáni sési úkata japiringa? Engaksï sapiicha méntkisï jánguarhintaska indeni ambe eratseni, niáraatiksï jakajkuni ka seguru jarhani eska Tata Diosï kueraaska iámindu ambe (Ebr. 3:4). Ka tátsekuajtsï úpiringa arhiani: “Enga Tata Diosï kueraaka ini ambe, ¿tʼu no exesïni eskajtsïni ístu arhipiringa nénachi uaa tsípikua jingoni irekani?”. Ka tátsekuajtsï uaaka arhini eska ima ambe engajtsïni Tata Diosï juramuchijka, ístu Bibliarhu jarhaska.
NASA, ESA, and the Hubble Heritage (STScl/AURA)-ESA/Hubble Collaboration
¿Né kueraaski xáni sési jásï ambe enga Echerirhu jaka? (Exea je párrafuechani 7 ka 8).
JARHUATAA JE SAPIICHANI KURHANGUNI AMBE SÉSI JARHASKI KA AMBE NÓMBE
9. ¿Ambe jimboksï úpirini sapiicha no seguru jarhani ambe enga Biblia juramujka?
9 Enga chaari sapi no seguru jaka sini sési jarhaski ambe enga Biblia juramujka, jánguarhinta je kurhangukuni andisï ísï eratsejki. ¿No seguru jarhaski jimboka no uékasïnga jiókuarhini ambe enga Biblia uandajka? ¿O jindeeski jimboka no úsïnga máteruechani aianguani ambe enga jakajkujka? Taatiicha, jorhenguarhi je chaari sapiicha jingoni ka úra je libruni Tsípikua jingoni ireka je, ka ísïjtsï jarhuatauaka chaari sapiichani paraksï kurhanguni na engaksï xáni jukaparhakueka Biblieri prinsipiuecha.b
10. ¿Nénajtsï uaa jarhuataani chaari sapiichani paraksï sánderu sési pájperani Tata Diosï Jeoba jingoni?
10 Jarhuataa je sapiichani sánderu sési pájperani Tata Diosï Jeoba jingoni. Engajtsï imeecha jingoni jorhenguarhini jauaka Bibliani, úraa je ejempluechani engaksï librurhu jaka Tsípikua jingoni ireka je ka úkua je kurhamarhikuechani, ísïjtsï uaaka míteni ambeksï eratsesïni chaari sapiicha o náksï exesïni ambe ma (Prov. 20:5). Pori ejemplu, jorhenguarhikua 8, uandasïndi eska Tata Diosï Jeoba ísïiska komu ima amigu engajtsïni miátantajka ambe engachi jatsika para úni parajtsïni sési nicheni ka parachi no no sési ambe úkuarhinchani. Ka engajtsï na arhintaakia 1 Juanu 5:3, úpiringajtsï kurhamarhiani: “Míteni eska Tata Diosï Jeoba juchaari amigueska ka eskajtsïni xénchasïnga, ¿nénachi jatsipirini para exeni ambe engajtsïni ima kurhachejka? I ambe jarhuataati sapini para kurhanguni eskajtsïni Tata Diosï Jeoba xénchperakua jimbosï arhijka ambe engachi jatsika para úni (Is. 48:17, 18).
11. ¿Taatiicha ambe máteru ambejtsï uaa úni parajtsï jarhuataani chaari sapiichani sánderu jukaparharaani Biblieri prinsipiuechani? (Proverbios 2:10, 11).
11 Uandontskuarhekua je eska sésiiska kurhajchaani Biblieri prinsipiuechani. Engajtsï májku kʼéri arhintani jauaka Bibliani o Karakatani para mándani jurhiatikua, uandontskuarhi je chaari sapiicha jingoni na engaksï Biblieri prinsipiuecha jarhuatakia chaari familiani. Pori ejemplu, ¿chaari sapiicha exesïni na enga xáni sésiika ánchikuarhiriini ka jurhimbitku jámani? (Ebr. 13:18). Ístujtsï uaaka exeraani na engajtsïni inde prinsipiuecha jarhuatajka parachi no xáni pʼamenchani ka parachi tsípikua jingoni irekani (Prov. 14:29, 30). Enga chá uandontskuarhekuaska prinsipiuecheri ambe, imeechaksï niáraati sánderu mintsikaani Biblieri konsejuechani (arhinta je Proverbios 2:10, 11).
12. ¿Ambe úsïni temungurhiri ma paraka imeecheeri uájpa kurhanguaka na engaksï xáni marhuajka Biblieri prinsipiuecha?
12 Erachi Steve enga Francia irekaka uandantasïndi ambe enga újka imeeri témba jingoni, paraksï jarhuatani imeeri uájpani enga tumbi sapichu máeka para kurhanguni andijtsïnisï Tata Diosï Jeoba íntsaajki juramukuechani. Ini ambeksï kurhamarhisïndi uájpani enga Ethan arhinhajka: “¿Andijtsïnisï Tata Diosï arhijki eskachi ísï uaaka eska i prinsipiu na uandajka? ¿Néna xarhatasïni i prinsipiu eskajtsïni Tata Diosï xénchasïnga? ¿Ka amberi úkuarhinchapirini engari no ísï úpiringa?”. Engaksï ísï újka, jarhuatasïndiksï uájpani exeni eska jatsiska para seguiriini jarhani kurhajchani Tata Diosï Jeobani. Steve uandantasïndi: “Jucha uékasïnga eska Ethan kurhanguaka eska Biblia sánderu jarhuajpesïnga eska náki uéjki kʼuiripu ma enga jánhastiuaka”.
13. ¿Taatiicha nénajtsï úpirini jarhuataani chaari sapiichani paraksï úraani Biblieri prinsipiuechani? Uanda je ejemplu ma.
13 Jorhendaa je sapiichani úraani Biblieri prinsipiuechani. Eranhaska je eska maestru ma arhisïnga chaari sapini eska libru ma arhintaaka. Ka indeni libru kʼuiripuecheri ambe uandasïndi engaksï ísku jándiika ka uarhipenksï jámani, ka ístu uandasïndi eska no no sési jarhaska ísï jámani. Enga inde ambe úkuarhipiringa, úpiringajtsï arhini chaari sapini eska exeaka ambe enga inde libru uandajka ka terukutantani imani kʼuiripuecha jingoni enga Biblia uandaajka (Prov. 22:24, 25; 1 Kor. 15:33; Filip. 4:8). Enga chaari sapi ísï uaaka, jamberi uaati aianguni imeeri maestruni ka kompanieruechani ambe enga arhintaka Bibliarhu.
JORHENDAA SAPIICHANI PARAKSÏ NO CHÉNI UANDANTANI AMBE ENGAKSÏ JAKAJKUJKA
14. ¿Na jatini úpirini kristianu ma enga eskuela nirajka chéni uandantani ambe enga jakajkujka?
14 Máru tumbiicha engaksï kristianueka, chésïndiksï uandantani ambe engaksï jakajkujka. Jamberiksï eratsejti eskaksï no uaaka aianguani máteruechani andiksïsï no jakajkujki ebolusioniiri ambe. Ka sánderia jimbokaksï máru maestruecha uandasïnga eska iámindu ambe ebolusioni jimboeska. Ísï jimbo taatiicha, ¿nénajtsï uaa jarhuataani chaari sapiichani parakaksï imeecha no chéaka uandantani ambe engaksï jakajkujka?
15. ¿Ambe uaa jarhuataani tumbiichani paraksï sánderu seguru jarhani ambe engaksï jakajkujka?
15 Jarhuataa je sapiichani paraksï sánderu seguru jarhani ambe engaksï jakajkujka. Chaari sapiichaksï no jatsisti para kʼuratseni uandani eska jarhaska Kuerajpiri ma (2 Tim. 1:8). Uánikua sientifikuechaksï jarhasti engaksï eratsejka eska no ísku jatini úkuarhiska ambe enga xáni Echerirhu jaka. Engaksï exejka na enga xáni sési úkata jaka iámindu ambe enga Echerirhu jaka, niárasïndiksï kuenta íntskukuarheni eska indeni ambe ima kueraaska enga kánikua inteligentiika. Ísï jimbo, niárasïndiksï kurhanguni eska no ísïiska ebolusioni nájkiruka uánikua eskuelecharhu jorhentperanhajka inde ambe. Jiájkani ambe enga uaaka jarhuataani tumbiichani paraksï sánderu seguru jarhani ambe engaksï jakajkujka, jindeesti exeani erachiicheeri ka pirenchiicheeri eksperiensia engaksï uandantajka andiksïsï jakajkujki eska jarhaska kueraajpiri ma.c
16. ¿Taatiicha nénajtsï uaa jarhuataani chaari sapiichani paraksï úni uandantani eska jarhaska Kuerajpiri ma? (1 Pedru 3:15; ístu exe je imajenini).
16 Arhistakua je sapiichani paraksï úni uandantani eska jarhaska Kuerajpiri ma (arhinta je 1 Pedru 3:15). Jamberijtsï úpiringa májku kʼéri exeani artikuluechani o bideuechani ixú “Bibliaeri jorhenguarhikuecha,” tátsekua “Biblia ka siensia” ka “¿Jatsipirini parani jakajkuni ebolusionini?”. Tátsekua, úpiringajtsï kurhamarhiani chaari sapiichani nénaksï úpirini aianguani imeeri kompanieruechani eska jarhaska Kuerajpiri ma, ka ensaiarini. Ka arhia je chaari sapiichani eskaksï no jámaaka arhirperani imeeri kompanieruecha jingoni. Joperu enga nema uékaaka sánderu ambe míteni, chaari sapi uaati aianguni imani ambe úraparini enga sóntku kurhangukuarhiaka ka sési. Jamberi kompanieru ma arhiati chaari sapini: “Ji imani ambejkusïni jakajkujka ambe engani exejka, ka jimbokani no méni exexaka Tata Diosïni, no uaaka uandani eska jarhaska”. Ka chaari sapi úpirini arhini: “Eranhaska eskari juátarhisï jámaxaka, jimeesïsï enga no ma ambe jaka, joperu tátsekuari exesïnga posuni ma enga tsakapu jingoni úkata jaka, ¿tʼu uandapirini eska inde posu ísku jatini xarharaska? ¿Nómbe a no? Indeni posuni nema ústi. Jiájkani uaakachi uandani eska iámindu ambe enga unibersurhu jaka, jindeeska jimboka ima úska enga kánikua inteligentiika”.
Engari chiiti kompanieruechani aianguani jauaka Biblieri ambe, uaakari imani ambe úrani enga sóntku kurhangukuarhiaka ka sési. (Exea je párrafuechani 16 ka 17).d
17. ¿Nénaksï uaa taatiicha jarhuataani sapiichani paraksï úni aianguani máteruechani ambe engaksï jakajkujka? Uanda je ejemplu ma ambe enga úpiringa arhini tumbi ma imeeri kompanieruni.
17 Arhia je sapiichani eskaksï exeaka na jatini úpirini uandontskuarheni Biblieri ambe (Rom. 10:10). Para Biblieri ambe uandontskuarheni ísïisti komueska jorhenani kústani. Orheta sáni úkua jukasïndi. Joperu enga nema na sánhani arhijka jorhenguarhini, nóteru xáni úkua jukasïndia. Ka asta niárasïndi sési járhati pirekuechani kústaani. Jiájkani, sáno májkueniisti engachi máteruechani uéjka aianguani ambe engachi jakajkujka, uétarhisïndi eskachi imeeri ambe ueenaaka uandontskuarheni enga no xáni úkua jukaaka. Pori ejemplu, ima tumbi enga útasï eskuela nirajka, jamberi úpirindi kurhamarhini kompanieruni ma: “¿Tʼu mítespi eska uánikua ambe engaksï ingenieruecha újka naturalesarhuksï kopiarisïnga?”. Tátsekua úpirindi bideu ma exerani enga ini partirhu jaka “¿Ísku úkuarhiski o nema úski?”. Ka kurhamarhini: “Exe, sientifikuechaksï kʼéri ambe exenhasïndi jimbokaksï imeecha uánikua ambe naturalesarhu kopiarisïnga, ¿tʼu no ísï exesïni eskachi jatsipiringa para kʼéri ambe arhini imani enga meru kueraaka naturalesani?”.
SEGUIRII JE JARHUATAANI SAPIICHANI SÁNDERU MINTSIKANI TATA DIOSÏNI
18. ¿Taatiicha nénajtsï uaa jarhuataani chaari sapiichani parakaksï seguiriuaka mintsikani Tata Diosïni?
18 Iásï, uánikua kʼuiripu jarhasti enga no jakajkujka Tata Diosï Jeobani (2 Ped. 3:3). Ísï jimbo taatiicha, jarhuata je chaari sapiichani parakaksï imani ambe jorhenguarhiaka enga jarhuatauaka sánderu janhanharhini Tata Diosïiri karakatani ka ambe enga juramujka. Jarhuataa je chaari sapiichani parakaksï eratsentaaka xáni sési jásï ambe enga Tata Diosï kueraaka, ka parakaksï kurhanguaka na engaksï máru Biblieri profesiecha kumplirikuarhikia. Kómarhijpikua je ka ístu imeecha jingoni kómarhi je Tata Diosïni. Taatiicha, uaakajtsï seguru jarhani eskaksïni Tata Diosï Jeoba újchakuraaka jimbokajtsï jánguarhintaxaka paraksï chaari sapiicha sánderu mintsikani imani (2 Crón. 15:7).
PIREKUA 133 Marhuaku Jeobani iásï engari sapichkueka
a Engajtsï uéjka sánderu ambe míteni, exe je bideuni jw.org jimbo Xáni ambakiti kueraakata ambe, xarhatasïndi na enga xáni kʼéri ambeka Tata Diosï: Ánchikuarhita ambe engachi kueraakatarhu exejka.
b Engajtsï kʼamarakia jorhenguarhini chaari sapiicha jingoni libruni Tsípikua jingoni ireka je, uaakajtsï ménderu exeani máru jorhenguarhikuechani engaksï parti 3 ka 4 jimbo jaka. Jimini uandasïndi ambe enga Tata Diosï juramujka Bibliarhu.
c Arhinta je artikuluni “Por qué creemos que hay un Creador” rebistarhu ¡Tsínharhi!, septiembri de 2006 utusï jimbo, ka foietuni El origen de la vida. Cinco cuestiones dignas de análisis. Incha je pájinarhu jw.org jimbo parajtsï exeani máru bideuechani engaksï ini parti jimbo jaka “Ambe enga uandanhajka tsípikueri ambe”.
d AMBE ENGA XARHATAJKA IMAJENI: Tumbi sapichu ma enga Testigueka, imeeri kompanieru jingoni jarhasti enga tsitiajka droniichani ka exeraxati bideu ma enga ini partirhu jaka “Ísku úkuarhiski o nema úski”.