Seguiriixaka jorhenguarhini

Ji 1927 jimbo andajpenuska Illinois (Estados Unidos) enga Chicago no iauani jaka. Jucha sinko uájpeeska orheta andajpenuspti Jetha, Don, ji tátsekua Karl ka últimu Joy. Iáminduechachi uékasïreenga marhuakuni Tata Diosï Jeobani iámu mintsita jingoni, jimbosï Jetha nípti Galaadiiri jorhentperakuarhu, klase 2 jimbo 1943 jimbo. Ístu Don, Karl ka Joy pʼímarhinhasptiksï Beteli Brooklyn (New York) 1944, 1947, ka 1951 jimbo. Juchiiti ermanuecheeri ejemplu ka ístu juchiiti taatiicheeri kánikuarini jarhuataspti.

JUCHIITI FAMILIA JORHENGUARHISÏNDI TATA JEOBAERI AMBE

Juchiiti taatiichaksï pʼindespti arhintani Bibliani ka xénchasïreendiksï Tata Diosïni, ísï jimbo jorhendasptijtsïni májkueni úni. Joperu papa na junguapkia Europa uératini uarhipeni primera guerra mundialirhu nóteru ambe ma uékasïreendia míteni relijioniiri ambe. Mama kánikua tsípixapti enga papa junguapkia, jimbosï arhipti: “Karl, ju ménderu ueenani nirani iglesiarhu” ka papa arhispti: “Niuakakini pámbetani joperuni ji no inchaaka” ka mama kurhamarhipti: “Andiresï no inchaa?”. Ka papa arhispti: “Guerrarhu relijioniiri orhejtsïkutiichaksï újchakuraasïndi armeechani ka sondaduechani tsimani ladu jimbo nájkirukaksï májku relijioniuaka. ¿Néna úpirini Tata Diosï tsimarhani apoiariuani jarhani?

Ísï tátsekua enga mama iglesiarhu nípti, tsimani Jeobaeri testiguecha niraspti juchaari kʼumanchikuarhu. Ka íntskusptiksï papani tsimani libruechani engaksï arhinheenga Luz, engaksï Bibliarhu anapu apokalipsisiiri ambe uandeenga. Enga mama exeapka libruechani, ueenasti arhiantani. Ka ma jurhiatikua exespti periodikurhu, eskaksï pʼímarhiaxapka kʼuiripuechani Biblieri ambe jorhenguarhini imani libruechani jingoni. Ísï jimbo, niraspti ka jima jarhaspti uarhiiti ma enga jatiripkia ka mama exeraspti libruni ka kurhamarhispti: “¿Ixúsï jorhenguarhinhajki i libru?”. Ima arhisti, jo jano je. Ka máteru semana jimbo mamajtsïni iámindu pájtaspti tánguarhikuarhu, ka jiáni uératini nóchi méni kuerataska tánguarhikuarhu.

Tánguarhikuarhu ma jimbo erachi enga orhejtsïkuni japka, arhisptirini eskani arhintapiringa Salmo 144:15, enga arhijka eskaksï tsípisïnga imeecha engaksï marhuakujka Tata Diosïni. ¡Kánikua tsitispka indeni tekstuni! Joperu ístuni kánikua tsitiaspka 1 Timoteu 1:11 enga arhijka eska Jeoba ima Tata Diosïiska enga kánikua tsípijka ka Éfesu 5:1 engajtsïni pʼímarhijka májkueni jámani eska Tata Diosï. Ísï jimbo, kurhanguspka eskani jatsispka parani tsípikua jingoni marhuakuani juchiiti Kuerajpirini ka diosmaiamukua arhini engareni jurajkuni japka marhuakuni. Inde ambe kánikua jukaparhakuespti para ji, ísï jimbo jánguarhisïreenga méntku miáni jarhani indeni tsimani ambe.

Jatsisïreengachi para Chicago nirani tánguarhikuecharhu nájkiruka 32 kilometru ísï iauani japka (20 millas) jima uératini engachi irekapka, joperuchi no méni kuerataspka, ka ísï úspka sánderu ambe jorhenguarhini Biblieri ambe. Miásïnga eska ma xanhari Jetha komentariispka, engani kurhajchapka, ji eratsepka: “Andisïni no tarhata jájkini, jíjtuni úpiringa komentariini”. Jiáni uératini, ueenaspka prepararikuarhini para tánguarhikuecha parani úni komentariini. Joperu sánderu jukaparhakua ambe, jindeesti eskani sánderu andarhieraspka Tata Diosï Jeobani ísï eska juchiiti ermanuecha, ka 1941 jimbo itsï atakuarhiska.

UÁNIKUA AMBE JORHENGUARHIPKA K’ERI TÁNGUARHIKUECHARHU

Sési miásïnga kʼéri tánguarhikuani ma enga 1942 jimbo úkuarhipka Cleveland (Ohio). Uánikua erachiicha ka pirenchiicha úpirindiksï kurhaani programani telefonu jimbo, jukari 50 ireteecharhu Estados Unidos. Juchiiti familia ka ji, máteru erachiicha jingonchi pakaraspka jima no iauani enga kʼéri tánguarhikua úkuarhipiringa, ka ískuchi no nani máru jándu pakaraspka ka kuákueni jarhatiichanchi uaaspka, joperu jiánisï Segunda Guerra Mundiali jimbo, kánikua no sési jánhaskuarhixapti ka Jeobaeri testiguechaksï sánderu no sési kánhaxaptia. Ísï jimbo erachiichaksï jimajku peeraaspti karruechani ka chúrikuechani jimaksï pakarasïreendi jatarini parajtsïni kuájchakuni jarhani ka engajtsïni nema nipiringa andarhierani imeechaksï tsonhastaapirindi ka pitariipirindiksï parachi iáminduecha jarhuajperani. Indeni ambe exeparini, ji eratsespka “Tata Diosïiri ireta kánikua sési preparadu jarhasti para ambe uéjki enga úkuarhiaka”. Ísï jimbo no chéspka ka ma agustu kʼuíspka.

Máru uéxurhini ísï tátsekua, enga miántapka imani kʼéri tánguarhikuani, exespka eska mama no sáni chéspka nijtu uandanhiani. Ima mintsikasïreendi Tata Diosï Jeobani ka imeeri kúnguarhikuani. No méni mirikurhiaka imeeri ambakiti ejempluni.

Nótki ióniispti enga mama prekursora regulari úkuarhipka, ísï jimbo kʼéri tánguarhikua ísku jarhaspti kurhauani imani arhijtsïkperateechani engaksï uandeenga néna marhuani tiempu kompletu. Engachi níntani japkia, imajtsïni arhispti: “Tsitipiringa seguiriini prekursoreni. Joperuni néna jámaa, jimbokani kánikua úkua ambe jatsiska kʼumanchikuarhu”. Jimajkani imajtsïni kurhamarhispti sinchi úpirini jarhuatani ka jucha arhispka eska jo. Ísï jimbo, imajtsïni arhispti eskachi ambantskantapiringa ma o tsimani kuartuecharhu ante dechi almosariini. Engachi jucha na nireengia eskuela, juchiiti naandi exesïreendi eska iámu ambe sési pakarapiringa jucheeni ka tátsekua nirasïreendia aianhpini. Nájkiruka mama kánikua úkua ambe jatsienga, nójtsïni méni ísku exesïreendi, engachi na niánteengia eskuela uératini parachi tʼireni, ima méntkisï juchantsïni jingoni jarhasïreendi. Ka ménichani engachi eskuela uératini niánteengia, nirasïreengachi pámbetani aianhpini ka inde ambejtsïni jarhuataspti exeni ambe engaksï xáni újka prekursoriicha.

UEENASPKA TIEMPU KOMPLETUERI MARHUANI

Engani 16 jatiripka prekursori úkuarhispka. Nájkiruka papa no Jeobaeri testiguepka, ima uékasïndi míteni na engareni nicheenga aianhpikuarhu. Ma chúrikua aianguspka, eska nájkirukani jánguarhintani japka no úsïreenga exentani nemani para jorhendani Biblieri ambe. Ísku pakaraspti no ma amberini arhispti. Ísï jimbo kurhamarhispka: “¿Paa chá no uékapirini jorhenguarhini Biblieri ambe?” Ima eratsentaspti ma ratu ka arhisptirini: “Jo uaakachi jorhenguarhini”. Ísï jimbo papani uénaspka jorhendani Biblieri ambe. Inde ambe kánikua jukaparhakuespti para ji.

Ueenaspkachi jorhenguarhini libru “La verdad os hará libres”. Engachi na jorhenguarhini japkia, exespka eskarini papa jarhuataxapka parani ambakiti jorhentpiri máeni ka ístu parani sánderu sési jorhenguarhini Biblieri ambe. Pori ejemplu, ma chúrikua engachi jorhenguarhini japka paparini arhispti: “Indeni ambesï uandajti. Joperu, ¿tʼu néna míteski eska ísïiska ambe uandajka libru?”. Ísï jimbo arhispka: “Iáiasï no míteska. Joperu máteru uelta jimbo engachi jorhenguarhiaka mókuchintaakakini”. ¡Ka ísï úspka! Exeantaspka máru tekstuechani engaksï imeeri ambe uandeenga. Jiáni uératini exespka eska jukaparhakueska sési jirinhantaani ambe enga Biblia uandajka, jimbokani úpiringa tʼuini listu jarhania para jiáni engachi Biblieri ambe jorhenguarhipiringa. Inde ambe jarhuataspti papani ka jíndeni parachi sánderu andarhierani Tata Diosï Jeobani. Ima ísï úspti na enga jorhenguarhipka ka 1952 jimbo itsï atakuarhispti.

JATSIANI METEECHANI JARHUATASPTIRENI PARANI SEGUIRIINI JORHENGUARHINI

Engani 17 jatiriipka támu niraspka irekani. Juchiiti ermana Jethaa misionerespti ka Donini Beteli niraspti marhuani. Tsimarhanksï kánikua tsípikua jingoni marhuaxapti, ka jíjtu ísï uékasïreenga úni. Ísï jimbo uininharhintaspka solisitudi para Beteli ka para Galaadiiri jorhentperakuarhu ka Tata Diosï Jeobani jurajkukuspka. Ka 1946 jimbo pʼímarhinhaspka Beteli.

Uánikua ánchikuarhiteechani uaaskia Beteli. Ísï jimbo uánikua ambe jorhenguarhiskia engani antesi no mítepka. Pori ejemplu imprimiriuani libruechani, sentabueri ambe exeni ka ístu piáni ambe enga Beteli uétarhienga ka axani ambe máteru lugariichani jimbo. Paxakaia 75 uéxurhini Beteli, ka ambe engani sánderu tsitijka jindeesti tsípa anapu jorhenguarhikuecha ka ístu máteru programeecha.

Ístuni uánikua ambe jorhenguarhispka juchiiti ermanueri enga sánderu sapichueka eska ji, Karl enga 1947 jimbo janopka Beteli. Ima ambakiti jorhenguarhiri máespti ka ístu sési jorhentpisïreendi Biblieri ambe. Ma xanhari arhispka eskarini jarhuatapiringa arhijtsïkperata ma jingoni. Arhispka eskani uánikua ambe jirinhantaspka joperu eska no kurhangukuarhisïreenga. Imarini kurhamarhispti: “Joeli, ¿ambeeri uandasïndi arhijtsïkperata?”. Jirejiresï kurhanguspka ambe enga arhikuekani japka. Jatsispka parani solu imani ambe úrani enga jukaparhakuepka. No méni mirikurhiaka indeni ambe.

Para ma tsípikua jingoni marhuani Beteli, jatsisti para aianhpini xáni eska xáni uaaka. Engachi ísï uaaka, jatsiauakachi uánikua eksperiensiechani. Pori ejemplu, ma xanhari engani erachi ma jingoni uerapka aianhpini, niraspkachi exeni uarhiitini ma enga na chúrini japkia enga jiókuarhipka rebisteechani Aianhpiri ka ¡Tsínharhi! Para ueenani, arhispkachi: “I chúrikua jorhendaxakachi ambakiti ambe enga Biblia uandajka”. Ka arhisptijtsïni: “Enga Biblieri ambeeka, incha je”. Arhiantaspkachi máru tekstuechani engaksï Tata Diosïiri Reinueri ambe uandajka ka eska no ióni jimbo jimbanhi parhakpini ma jauaka. Kánikua tsitispti, jimboka máteru semana jimbo, pʼímarhiaspka imeeri amiguechani ka niáraspti acheeti jémba jingoni marhuakuni Tata Diosï Jeobani.

UÁNIKUA AMBE JORHENGUARHISKA JUCHIITI UARHIITIIRI AMBE

Nájkiruka uandapka eskani tembuchapiringa 10 uéxurhini nitamaspti engani mítepka juchiiti uarhiitini. ¿Amberini jarhuataspi ambakiti uarhiitini ma exentani? Kómarhispka Tata Diosï Jeobani eskarini jarhuatapiringa ka kurhamarhikuarhispka: “¿Ambe uékasïni úni engani na tembuchakia?”.

Enga na úkuarhipkia kʼéri tánguarhikua 1953 jimbo estadiu Yankees, mítespka Mary Aniolini. Juchiiti ermanani jingonksï niraspti Galaadiiri jorhentperakuarhu ka iásïksï tsimarhani jámasïreendia aianhpini. Mary tsípikua jingondeni aianguasïreni néna enga aianhpienga Caribe ka na enga uánikuechani jorhendaapkia enga jima jámapka aianhpini. Sánhani arhispkachi mítperani ka tsimarhanchi uékasïreenga marhuani tiempu kompletueri. Jimbochisï tembuperapka abrilini 1955 jimbo. Mary ambakiti regalu máespti Tata Diosï Jeobaeri ka uánikua ambe jorhenguarhispka imeeri ambe. Ima tsípikua jingoni úsïreendi ambe uéjkiini. Kánikua ánchikuarhisïreendi, uandanhiasïreendi máteruechani jimbo ka méntkisï orheta peerasïreendi Tata Diosïiri Reinueri ambe (Mat. 6:33). Tanimu uéxurhinchi marhuaska komu sirkuitueri orhejtsïkuti ka 1958 jimbo pʼímarhisptijtsïni Beteli.

Uánikua ambe jorhenguarhispka juchiiti uarhitiri. Pori ejemplu, engachi tembuperapkia ueenaspkachi arhintani Biblia ka 15 bersikuluechanchi arhintasïreenga. Ka engachi na arhintenguia, exesïreengachi nénajtsïni jarhuatapirini. Mary somendini aiangusïreendi ambe enga jorhenguarhipka Galaadi o enga misionerepka. Inde amberini jarhuataspti parani sánderu jánhastiini ka parani sánderu sési arhijtsïkpini ka parani exeni néna jarhuatani pirenchiichani (Prov. 25:11).

Mary 2013 jimbo uarhisti. ¡Uékaxakia exeni jimbanhi parhakpinirhu! Enga jamberi niáraaka jurhiatikua, seguiriini jauaka jorhenguarhini ka mintsikani Tata Diosï Jeobani iámu mintsita jingoni (Prov. 3:5, 6). Eratsentani ambe enga uaaka Tata Diosïiri ireta jimbanhi parhakpinirhu, uinhaperantasïndireni ka sésirini pʼikuastani. Jiáni juchaari sánderu Kʼéri Jorhentpiri, uánikua jimbanhi ambejtsïni jorhendaati. Tata Diosï Jeoba, uánikua amberini jorhendastia ka uánikua ambe jimborini xarhatachestia na engareni xáni xénchaajka ka no méni uaaka maiamuntani.