Niáraati ima jurhiatikua engaksï nóteru jauakia guerrecha ni atajperakuecha

TATA DIOSÏ K’AMAJKUAUATI JURAMUTIICHANI

Biblia arhisïndi eska Tata Diosï kʼamajkuauaka juramutiichani guerra ma jimbo enga Armajedoni arhinhajka (Apokalipsisi 16:16).a Enga niárakia inde jurhiatikua, iámu echeri anapu juramutiichaksï tánanhantaati “paraksï uarhipeni Tata Diosïiri kʼéri jurhiatikua jimbo, ima Tata Diosï enga iámindu ambe újka úni” (Apokalipsisi 16:14). Armajedonirhu, Tata Diosï kʼamajkuauati iámindu guerrecha.

Tata Diosï imeeri Reinu peeraati enga na kénditauakia parhakpini anapu juramutiichani. Inde Reinu juramuati auandarhu uératini ka no méni kʼamajkunhaati (Daniel 2:44). Tata Diosï erakusptia Reini ka jindeesti imeeri Uájpa tata Jesukristu (Isaías 9:6, 7; Mateu 28:18). Ka Jesúsi ini Reinuerib ambesï uandani japti jiáni enga jorhendaapka imeeri chúxapatiichani kómarhini (Mateu 6:9, 10). Ini Reinu jimbo, iámu kʼuiripuechaksï májku úkuarhintatini jauati Jesúsi jindeuati juramuti.

Enga Jesúsi na Reiuakia, no úraati imeeri juramukuani para imajku sési uéranchani ísï eskaksï na újka parhakpini anapu juramutiicha. Ima iáminduechani sési káuati jimboka sési juramuaka ka no nema no sési nitamakuarhiati jimboka máteru raseeska o máteru naniisï anapueni (Isaías 11:3, 4). Kʼuiripuechaksï nóteru jatsiatia para uarhiperani paraksï jatsini ambe engaksï uéjka jimboka Jesúsi íntsauaka ambe engaksï xáni uétarhinchajka. Ima jarhuataati “imani enga no jatsikuarheka ka enga jarhuajperata kurhajkuarhini jaka, ístu imani enga kaxumbitiika ka imani enga no jatsika né enga jarhuataaka […]. Kuájpiauati paraksï nóteru kómu nitamakuarhinia, nijtuksï no sési kánhani” (Salmo 72:12-14).

Tata Diosïiri Reinu kʼamajkuauti armeechani engaksï kʼuiripuecha úrajka paraksï uándikpini (Miqueas 4:3). Ístu, kʼamajkuauati no ambarhati kʼuiripuechani ka imeechani engaksï no jurajkujka eskaksï máteruecha agustu irekaaka (Salmo 37:9, 10). Acheetiicha, uarhiitiicha ka sapiichaksï seguru pʼikuarheraati nani uéjkiksï nirani (Ezequiel 34:28).

Tata Diosïiri Reinu jimbo, sési irenhaatia. Nóteru ambe ma jauatia enga újka eskachi no sési nitamakuarhiaka. Nóteru nema pobriuatia, nóteru jauatia kʼarhingua ka jatsikuarhinhaati kʼumanchikua ambe. Méntkisï jauati t’irekua para iáminduecha, k’uiripuechaksï jatsiauati kʼumanchikuechani engaksï seguru pʼikuarheraaka (Salmo 72:16; Isaías 65:21-23).

Enga Tata Diosïiri Reinu juramuni jauakia Echerirhu, guerrechaksï nóteru no sési játskaatia, ni uandanhiatani kʼuiripuni nijtu chérani. Ka imeecha engaksï uarhipkia tsíntaatiksï, ménderuksï irekaati Echerirhu (Isaías 25:8; 26:19; 35:5, 6). Familiechaksï ménderu májku k’eri jauatia ka nóteru nema miáuatia na enga no sési nitamakuarhipka guerra ma jimbo (Apokalipsisi 21:4).

TATA DIOSÏ K’AMAJKUATI PEKADUNI

Tata Diosïiri Reinu jimbo, k’uiripuechaksï májku k’eri úkuarhintaati paraksï kómarhini Tata Diosï jurhimbitini enga jindeeka Tata Diosï Jeoba,c “Tata Diosï enga xáni xénchpejka ka enga pínandikua íntspijka” (2 Korintu 13:11). K’uiripuechaksï jorhenguarhiati pínandikua jingoni irekani (Isaías 2:3, 4; 11:9). Imeecha engaksï kurhajchaaka Tata Diosïni, nóteruksï jukaraatia pekaduni ka perfektueuatiksïa (Roma 8:20, 21).

TATA DIOSÏ K’AMAJKUATI SATANÁSINI KA IMEERI DEMONIUECHANI

Tata Diosïiri Reinu kʼamajkuati Satanásini ka imeeri demoniuechani. Iichaksï nóteru uaatia úni eskaksï kʼuiripuecha guerra ambe jatsiaka (Apokalipsisi 20:1-3, 10). Engaksï imeecha nóteru jauakia, ʻkánikua pínandikua jauatia’ (Salmo 72:7).

Uaakajtsï seguru jarhani eska Tata Diosï kʼamajkuauaka guerrechani ka atajperakua ambe, jimboka ima no solu uékasïnga ísï úni, uaati ísï úni.

• Tata Diosï jatsisti uinhapikua para kʼamajkuni guerrani ka atajperakua ambe ka sési mítesti néna úni indeni ambe (Job 9:4). Para ima no ma ambe úkua jukasti (Job 42:2).

• Tata Diosï no sáni tsitisïndi exeni na enga kʼuiripu kómu nitamakuarhini jaka (Isaías 63:9). Ima ʻikimchasïndi né uéjkini enga atajperakua ambe tsitijka’ (Salmo 11:5).

• Tata Diosï méntkisï kumplirisïndi ambe enga aiatspejka, ima no chkuanderasïndi (Isaías 55:10, 11; Titu 1:2).