Ju je tsípikua jingoni aianhpini ísï eska Jesúsi

1. ¿Andiksïsï Jeobaeri testiguecha no májkueni eska imeecha engaksï uandajka eskaksï kristianueska?

JEOBAERI testiguechaksï kánikua tsitisïndi aianhpini ka jánguarhintasïndiksï ísï úni. Ka i ambe xarhatasïndi eskaksï no májkueniiska eska ima kʼuiripuecha engaksï uandajka eskaksï kristianueska (Titu 2:14). Joperu, jamberichi ménisï ísï pʼikuarherajka enajkichi kueratanchajki tsípikua jingoni aianhpini. Jamberijtsï chájtu ménisï ísï pʼikuarherajka eska i orhejtsïkuti enga uandantajka: “Ménichani no sáni ninhenchasïnga aianhpini”.

2. ¿Andisï ménisï úkua jukajki nirani aianhpini?

² Jamberi jati máteru ambe engachi kánikua tsitijka úni parachi Tata Diosïni marhuakuni ka eska uérani aianhpini. ¿Andi? Jimbokachi exesïnga eskachi jarhuajpexaka engachi Kʼumanchikuechani Reinueri uaajka o sési jájkuantani, o engachi jarhuataajka erachiichani enga desastre ambe jarhajka ka engachi uinhaperantaajka ka inde ambejtsïni sési pʼikuastasïndi. Ístu, sésichi ánchikuarhisïnga erachiicha jingoni ka uékperakua jingoni ka míteskachi eskaksï jukaparharasïnga juchaari ánchikuarhitani. Joperu jamberichi ménichani no xáni sési pʼikuarherajka uérani aianhpini, sánderia engachi ióni páni jakaia jimeesïsï aianhpini ka kʼuiripuechaksï no uékani kurhaani ambe engachi uandantajka. O jamberiksï jati máru engaksï ikiajka ka nóksï ma ambe uékani míteni. Joperuchi míteska eska enga nóteru ióni kueratani jauakia para iámu ambe kʼamajkunhani, eska sánderu uánikua kʼuiripu jauaka engajtsïni no sési kámaaka ka nóksï uékani kurhaani (Mat. 10:22). Jiájkani, ¿ambejtsïni jarhuataa seguiriini tsípikua jingoni aianhpini?

3. ¿Ambejtsïni jorhendasïni Lukasï 13:6-9 Jesúsiiri ambe?

³ Jesúsiiri ejemplujtsïni jarhuataati tsípikua jingoni aianhpini. Enga ima Echerirhu jámani japka, no méni kuatantaspti, sánderu sési, jánguarhintaspti sánderu tsípikua jingoni aianhpini (arhinta je Lukasï 13:6-9). Jesúsi mismu terukukuarhintaspti achamasï ma jingoni enga tanimu uéxurhini kuidariipkia anhatapuni ma enga no méni jukapka jígusï. Sáno májkueni, Jesúsi tanimu uéxurhini jámaspti aianguani judiuechani ambakiti aianhperakuani, joperu namunitu kʼuiripuechajkuksïsï niárapti imeeri chúxapatiini. Joperu májkueni eska ima achamasï enga no kuatantapka ka jánguarhintani paraka anhatapu jukapiringa jígusï, Jesúsijtu no kuatantaspti ka seguiriispti aianhpini. Jánguarhintaspti mintsitarhu niárakuani kʼuiripuechani.

4. ¿Ambe tʼámu ambechi exeni jaua ini jorhenguarhikua jimbo?

⁴ Ini jorhenguarhikua jimbo, exeni jauakachi na enga Jesúsi tsípikua jingoni aianhpipka imani últimu seisi mesi jimbo enga Echerirhu jámani japka (exe je nota para sánderu ambe jorhenguarhini “Después de estas cosas”, enga Lukasï 10:1 jimbo jaka). Tʼámu ambechi exeni jauaka na engajtsïni ambakiti ejemplu ma íntskujka: 1) méntkisï úspti ambe enga Tata Diosï Jeoba uékeenga, 2) sési míteaspti profesiechani, 3) méntkisï mintsikaspti eska Tata Diosï Jeoba jarhuatapiringa ka 4) no méni kuatantaspti ka méntkisï eratsespti eska nema kurhajchapiringa.

JÁNGUARHINTASPTI ÚNI AMBE ENGA TATA DIOSÏ JEOBA UÉKEENGA

5. ¿Néna xarhataspi Jesúsi eska sánderu jukaparharasïreenga imani ambe úni enga Tata Diosï uéjka?

⁵ Jesúsi tsípikua jingoni aianhpispti “ambakiti aianhperakua Tata Diosïiri Reinueri” ambe jimboka sési mítespka eska Tata Diosï indeni ambesï uékeenga eska úpiringa (Luk. 4:43). Para Jesúsi, i ambe sánderu jukaparhakuespti. Asta imani últimu mesiichani jimbo enga aianhpipka, “iámindu ireteecharhisï inchaakusïreendi ka ireta sapirhatiicharhisï ka jorhendaasïreendi kʼuiripuechani” (Luk. 13:22). Ístu jorhendaaspti imeeri chúxapatiichani parakaksï nipiringa aianhpini májkueni eska ima (Luk. 10:1).

6. Nájkirukachi újka máteru asignasioni ma Tata Diosïiri kúnguarhikuarhu, ¿Tata Diosï Jeoba néna exesïni aianhpikuani? (Ístu exea je imajeniichani).

⁶ Tata Diosï Jeoba ka Jesúsi uékasïndiksï eskachi aianhpiaka ambakiti aianhperakuani enga kánikua jukaparhakueka (Mat. 24:14; 28:19, 20). Ambe engachi xáni újka para Tata Diosï Jeoba, jarhuajpesïndi aianhpikuarhu. Pori ejemplu, uaasïngachi Kʼumanchikuechani Reinueri parakaksï ima kʼuiripuecha engachi aianguajka Tata Diosï Jeobaeri ambe uaaka nirani ka kʼéri ambeksï arhini. Iámindu ambe engachi Beteli újka ka máteru lugariicha jimbo engaksï sáno májkueniika, marhuasïndi aianhpikuarhu. Ka jiáni enga no sési ambe úkuarhijka, jarhuataasïngachi erachiichani paraksï no solu jatsikuarheni ambe engaksï uétarhinchaaka, sino ístu paraksï ménderu úni sési marhuakuni Tata Diosï Jeobani, komu nirani aianhpini. Ju je no méni mirikurhini eska Tata Diosï Jeoba uékasïnga eskachi aianhpiaka jimboka inde jindeeska sánderu kʼéri ánchikuarhita. Inde ambejtsïni jarhuataati aianhpini xáni eskachi xáni uaaka. Hungría anapu orhejtsïkuti ma enga Jánosi arhinhajka, uandasïndi: “Náki uéjki asignasioni machi jatsini Tata Diosï Jeobaeri kúnguarhikuarhu, jatsiskachi para uérani aianhpini jimboka inde jindeeska sánderu kʼéri ánchikuarhita engachi jatsika para úni”.

7. ¿Andisï uéjki Tata Diosï Jeoba eskachi seguiriaka aianhpini? (1 Timoteu 2:3, 4).

⁷ Engachi ísï exeauaka kʼuiripuechani eska Tata Diosï Jeoba na exeajka, jarhuataatijtsïni sánderu tsípikua jingoni aianhpini. Ima uékasïndi eskaksï meru uánikua kʼuiripuecha kurhauaka ka jiókuarhini ambakiti aianhperakuani (arhinta je 1 Timoteu 2:3, 4). Jimboka i ambe uaaka pʼímutantani imeecheeri tsípikuani, Tata Diosï Jeobajtsïni jarhuatasïndi parachi sánderu sési aianguani kʼuiripuechani. Pori ejemplu, foietu Xénchaa je kʼuiripuechani arhisïndijtsïni nénachi ueenaa uandontskuarheni kʼuiripuecha jingoni ka jorhendaani Biblieri ambe ka ísïksï niárani Jesúsiiri chúxapatiini. Nájkirukaksï orhetku no jiókuarhiaka aianhperakuani, jamberiksï móantaati jiáni ante de kʼamakurhini ima jurhiatikua enga kánikua no sési jánhaskuarhiaka. Ambe engachi iásï arhiajka jamberi jarhuatauati parakaksï jiókuarhiaka sánderu orhepatini. Jimbosï xáni jukaparhakueti eskachi seguiriuaka aianhpini.

IMA SÉSI KURHANGUASÏREENDI PROFESIECHANI

8. ¿Néna jarhuataspi Jesúsini míteani profesiechani?

⁸ Jesúsi mítespti néna engaksï kumplirikuarhipiringa Bibliarhu anapu profesiecha, jimbosï mítepti eska tanimu uéxurhini ka terujkantku aianhpepiringa (Dan. 9:26, 27). Ístu mítetixapti néna engaksï uándikupiringa ka na jatini jimboka karakata jarhaspkia (Luk. 18:31-34). Míteni ambe enga úkuarhipiringa, úspti eska Jesúsi tsípikua jingoni aianhpepiringa xáni eska xáni úpiringa ka eska kʼamarapiringa ánchikuarhitani enga Tata Diosï íntskupka.

9. Míteani Bibliarhu anapu profesiechani, ¿nénajtsïni jarhuatasïni tsípikua jingoni aianhpini?

⁹ Sési kurhanguani Bibliarhu anapu profesiechani, jarhuataatijtsïni sánderu tsípikua jingoni aianhpini. Míteskachia eska no ióni jimbo kʼamakurhiakia parhakpini anapu ambe. Exesïngachi ambe enga úkuarhini jaka iásï ka na engaksï jámajka kʼuiripuecha. Ístuchi kuenta íntskukuarheskia eska ísïiska ambe enga Biblia uandapka eska úkuarhipiringa últimu jurhiatikuecha jimbo. Kurhangusïngachi na engaksï kumplirikuarhini jaka profesiecha engaksï uandajka eska últimu jurhiatikua jimbo, rei del suri (Reino Unido ka Estados Unidos) uarhiperapiringa rei del norti jingoni (Rusia ka imeeri jarhuajpiriicha) (Dan. 11:40). Ístuchi kurhangusïnga eska estatueri jantsiriicha enga Daniel 2:43-45 uandajka, imani juramukuanksï arhikuekasïnga enga xáni uinhapikua jatsika ka enga jindeeka Reino Unido ka Estados Unidos. Engachi ini profesieri ambe jorhenguarhini jarhajka, úsïngachi exeni eska Tata Diosïiri Reinu no ióni jimbo kʼamajkuaka parhakpini anapu juramutiichani. Iámu i profesiechaksï xarhatasïndi ambe jurhiatikua jimbochisï irekani jakiia ka úsïndiksï eskachi sánderu jánguarhintaaka aianhpini.

10. ¿Ístujtsïni néna uaa jarhuatani Biblieri profesiecha parachi tsípikua jingoni aianhpini?

¹⁰ Biblieri profesiechaksï ambakiti ambe uandasïndi jimbochisï uéjka iáminduechani aianguani. Pirenchi Carrie enga República Dominicana marhuani jaka, uandasïndi: “Engani eratsentajka ambe engajtsïni xáni aiachini jaka Tata Diosï Jeoba, uékasïnga aianguani máteruechani. Ka engani exejka na engaksï kómu nitamakuarhini jarhajka kʼuiripuecha, úsïndi eskani eratseaka eska Tata Diosï Jeoba imeechantu aiakuaxaka ini ambe”. Bibliarhu anapu profesiechajtsïni uinhaperantasïndi parachi seguiriini aianhpini jimbokajtsïni miátantasïnga eskajtsïni Tata Diosï Jeoba méntkisï jarhuataaka ísï úni. Pirenchi Leila enga Hungría anapueka, uandasïndi: “Isaías 11:6-9 jorhendasïndirini eska Tata Diosï Jeoba jarhuataaka náki uéjki kʼuiripuni para mójtakurhini ka i amberini uinhaperantasïndi parani ístu aianguani imani engaksï ísï xarharajka enajkiksï no uékaa kurhaani Biblieri ambe”. Ka Christopher enga Zambia anapueka, uandasïndi: “Ísï eska na arhijka Markusï 13:10, ambakiti aianhperakua aianhpinhaxati iámu parhakpinirhu ka para ji kʼéri kóntperata máesti jarhuajpeni paraka kumplirikuarhiaka inde profesia”. ¿Ka chánksïni náki profesia jarhuatasïni seguiriini jarhani aianhpini?

MINTSIKASPTI ESKA TATA DIOSÏ JEOBA JARHUATAPIRINGA

11. ¿Andisï uétarhieni eska Jesúsini mintsikapiringa Tata Diosï Jeobani para seguiriini tsípikua jingoni aianhpini? (Lukasï 12:49, 53).

¹¹ Jesúsi mintsikaspti eska Tata Diosï jarhuatapiringa para ima úni seguiriini tsípikua jingoni aianhpini. Nájkiruka Jesúsi respetu jingoni aianhpienga, mítespti eskaksï máru kʼuiripuecha no sési ambe uandapiringa oksï no jurajkuni eska Jesúsi aianhpepiringa Reinueri ambe (arhinta je Lukasï 12:49, 53). Ka relijioniiri orhejtsïkutiichaksï kánikua ikiakusïreendi jimboka ima aianhpini jámasïreenga, jimboksïsï uánikua xanhari jánguarhintapti uándikuni (Juanu 8:59; 10:31, 39). Nájkirukaksï ísï kámapka, Jesúsi seguiriixapti aianhpini jimboka mítespka eska Tata Diosï imani jingoni jarhaspka. Ima uandaspti: “Ji no jandiajku jarhaska, Taati jíndeni jingoni jarhasti, ima engareni axaka” (Juanu 8:16). Ka ístu uandaspti: “Nóreni méni jandiajku jurajkuxati jimbokani ji méntkisï úsïnga ambe enga ima jaiapanhentajka” (Juanu 8:16, 29).

12. ¿Néna jarhuataaspi Jesúsi imeeri chúxapatiichani paraksï seguiriini aianhpini nájkirukaksï no sési kánhapiringa?

¹² Jesúsi miátaantaspti imeeri chúxapatiichani eskaksï mintsikapiringa eska Tata Diosï jarhuataapiringa. Jimboka Jesúsi mítespka eskaksï no sési kánhapiringa, méntku úndaspti arhiani eska Tata Diosï jarhuataapiringa (Mat. 10:18-20; Luk. 12:11, 12). Ka arhiaspti eskaksï jingontku jámapiringa (Mat. 10:16; Luk. 10:3). Ístu arhiaspti eskaksï no afuersa aianguapiringa imani kʼuiripuechani engaksï no uékapiringa kurhaani ambakiti aianhperakuani (Luk. 10:10, 11). Joperu ístu arhiasti eskaksï sïpakuarhipiringa engaksï no sési kánhani japiringa (Mat. 10:23). Nájkiruka Jesúsi mintsikeenga Tata Diosï Jeobani ka tsípikua jingoni aianhpini, no jimeesïsï jámasïreendi enga peligru ambe japiringa (Juanu 11:53, 54).

13. ¿Andichisï uaa seguru jarhani eskajtsïni Tata Diosï jarhuataaka?

¹³ Iásïjtuchi no sési kánhasïnga, ísï jimbo uétarhinchasïngachi eskajtsïni Tata Diosï Jeoba jarhuataaka parachi seguiriini tsípikua jingoni aianhpini (Apok. 12:17). ¿Andichisï uaa seguru jarhani eskajtsïni Tata Diosï Jeoba jarhuataaka? Jimboka Jesúsi kómarhispka imeeri Taatini eska jarhuataapiringa imeeri chúxapatiichani ka Tata Diosï Jeoba kurhajchaspti. Inde kómarhikua Juanu 17 jimbo jarhasti. Ka libru Úkuecha jimbo, uandantasïndi na enga Tata Diosï jarhuataapka apostoliichani paraksï tsípikua jingoni aianhpini nájkirukaksï no sési kánhani japka. Ístu, kómarhispti Tata Diosï Jeobani eska kuájchakuapiringa imani kʼuiripuechani engaksï mintsikapiringa ambe engaksï apostoliicha uandanteenga. Ístu, inde kómarhikua jindeesti para jucha. Ísï jimbo, uaakachi seguru jarhani eska Tata Diosï Jeoba seguiriini jauaka mókuntani Jesúsiiri kómarhikuani ka jarhuatantsïni ísï eska na úpka apostoliicha jingoni (Juanu 17: 11, 15, 20).

14. ¿Andichisï uaa seguru jarhani eskachi uaaka tsípikua jingoni aianhpini? (Ístu exe je imajenini).

¹⁴ Jamberi jiáni enga na axuterku jauakia para kʼamarani parhakpini anapu ambe sánderu úkua jukaati tsípikua jingoni aianhpini. Joperu Jesúsijtsïni arhisti eskajtsïni jarhuataaka imani ambe jingoni engachi uétarhinchaaka (Luk. 21:12-15). Májkueni eska Jesúsi ka imeeri chúxapatiicha, juchajtuchi no arhirperasïnga kʼuiripuecha jingoni nijtuchi afuersa uéjki eskajtsïni kurhajchaaka. Nájkirukaksï máru ireteecha jimbo juchaari erachiicha no jurajkunhajka paraksï aianhpini, imeechaksï seguiriini jarhasïndi ísï úni jimbokaksï mintsikasïnga Tata Diosï Jeobani ka nóksï imeechajku mintsinharhikuarhini. Ísï eska primeru siglurhu, Tata Diosï íntsaaspti uinhapikua imeeri marhuariichani paraksï “aianhpini ambe enga xáni arhijka Tata Diosïiri karakatarhu”, ka iásïjtu, juchantsïntu íntskusïndi uinhapikua parachi úni aianhpini astaka ima uandaaka eska nóteria (2 Tim. 4:17). Ju je seguru jarhani: engachi mintsikaska Tata Diosï Jeobani, uaakachi tsípikua jingoni aianhpini.

IMA NO KUATANTASPTI

15. ¿Nénachi míteski eska Jesúsi méntkisï mintsikasïreenga eska nema uékapiringa kurhaani ambakiti aianhperakuani?

¹⁵ Jesúsi mintsikasïreendi eskaksï japiringa kʼuiripuecha engaksï uékapiringa kurhaani ambakiti aianhperakuani ka inde ambe jarhuataspti para seguiriini tsípikua jingoni aianhpini. Enga na uérani jámeengia uéxurhini 30, Jesúsi exespti eskaksï uánikua kʼuiripuecha jarhaspka engaksï uékeenga kurhaani ambakiti aianhperakuani ka ísï terukutantaspti komueska tarheta ma enga listu japkia para pʼikuntskua (Juanu 4:35). Ma uéxurhinisï tátsekua, Jesúsi arhiaspti imeeri chúxapatiichani: “Kánikuesti para pʼikuntani” (Mat. 9:37, 38). Ka sánderu tátsekua ménderu arhiaspti: Kánikuesti para pʼikuntani, [...] kómarhi je pʼikuntskueri Dueniuni eska axauaka ánchikuarhiriichani” (Luk. 10:2). Jesúsi mítespti eskaksï uánikua kʼuiripuecha jiókuarhipiringa aianhpikuani, ka enga ma kʼuiripu jiókuarhienga, Jesúsi kánikua tsipisïreendi (Luk. 10:21).

16. ¿Náki ejempluechani úraaspi Jesúsi para xarhatani na enga xáni jukaparhakueka no kuatantani aianhpini ambakiti aianhperakuani? (Lukasï 13:18-21; ístu exe je imajenini).

¹⁶ Jesúsi jarhuataaspti imeeri chúxapatiichani paraksï no kuatantani ka seguiriinksï tsípikua jingoni aianhpini. Ju je exeani tsimani ejempluechani enga úraapka (arhinta je Lukasï 13:18-21). Uandaspti eska Tata Diosïiri Reinu ísïiska eska semiia mostaseri enga niárajka tsikini ka xáni kʼéni komueska anhatapu ma. Ini ambe jingoni arhikuekaxapti eskaksï uánikua kʼuiripuecha jiókuarhipiringa ambakiti aianhperakuani ka eska no ma ambe japiringa enga ójkutapiringa. Ístu uandaspti eska Tata Diosïiri Reinu ísïispka komueska xarhipiti. Ini ambe jingoni arhikuekaxapti eska ambakiti aianhperakua uápurisï mítekuarhipiringa Echerirhu ka eska jarhuataapiringa kʼuiripuechani paraksï mójtakurhini nájkirukaksï máteruecha no exepiringa eskaksï mójtakurhini japiringa. Ini ejempluecha jingoni, jarhuataaspti imeeri chúxapatiichani paraksï exeni eska ambakiti aianhperakua kánikua marhuapiringa.

17. ¿Ambejtsïni jarhuatasïni seguiriini jarhani aianhpini?

¹⁷ Exeni ambe enga xáni úkuarhini jaka Echerirhu aianhperakua jimbo, jarhuatasïndijtsïni seguiriini tsípikua jingoni aianhpini. Mándani uéxurhini, uánikua kʼuiripuechaksï nirasïndi tata Jesukristueri uarhikuani miántani ka ístuksï ueenasïndi jorhenguarhini Biblieri ambe. Ka ístuksï uánikuesti engaksï ueenajka aianhpini juchantsïni jingoni ka itsï atakuarhinksï. ¿Namuni kʼuiripu kueratani jaki míteni ambakiti aianhperakua? Nóchi míteska, ambe engachi kʼóru míteka jindeesti eska Tata Diosï Jeoba tánaantaxaka uánikua kʼuiripuechani parakaksï tsípiti pakaraaka jiáni enga no sési nitamakuarhinhaaka (Apok. 7:9, 14). Tata Diosï Jeoba enga pʼikuntskueri Dueniueka exexati eska útasï jarhaska kʼuiripu enga uékaaka míteni imeeri ambe ka jimbochisï seguiriini jaka aianhpini.

18. ¿Ambechi uékasïni eskaksï exeaka kʼuiripuecha?

¹⁸ Desde iónisïa, Jesúsirini chúxapatiichaksï ísï mítekateeska eskaksï tsípikua jingoni aianhpisïnga. Engaksï kʼuiripuecha exepka eskaksï apostoliicha no sáni chésïreenga ka tsípikua jingonksï jámani, “míteantasptiksï eskaksï Jesúsini jingoni jámasïreenga” (Úku. 4:13). Juchajtuchi uékasïnga eskaksï kʼuiripuecha exeaka eskachi májkueni tsípikua jingoni jámasïnga eska Jesúsi.