Ju je mintsikaparini irekani

1. ¿Andisï Pablu sési pʼikuarhereeni imani ambe jimbo enga úpka?

APOSTOLI Pablu mítespti eska no ióndani uándikunhapiringia, joperu kánikua sési pʼikuarherasïreendi enga eratseenga ambe enga xáni úpkia. ¿Andi? Ima uandaspti: “Andaskia ini karrerani jimbo, ka iásï jamberini ji útasï mintsikaxaka Tata Diosïni” (2 Tim. 4:6-8). Apostoli Pablu ambakiti ambe erakuspti úni, erakuspti Tata Diosï Jeobani marhuakuni, jimbosï seguru japti eska Tata Diosï Jeoba tsípixapka imani jingoni. Májkueni eska apostoli Pablu, juchajtuchi uaaka ambakiti ambe erakuni úni ka ísï jaiapanherantani Tata Diosïni. ¿Nénachi uaa ísï úni?

2. ¿Ambe arhikuekaxapi Pablu ixú 2 Korintu 5:7 jimbo?

² Enga Pablu imeeri ambe uandani japka ka máteru kristianuecheeri, ísï uandaspti: “Jimbokachi jucha mintsikaparinisï irekani jaka ka no jimbokachi exexaka ambe ma” (2 Kor. 5:7). Ju je exeni ambe enga arhikuekani japka. kʼuiripu ma enga no mintsikajka Tata Diosï Jeobani, úsïndi ambe ma seguni ambe enga exejka, ambe enga kurhaajka ka ambe enga pʼikuarherajka. Joperu kʼuiripu enga mintsikajka Tata Diosï Jeobani, exesïndi ambe enga eratsejka Tata Diosï ka imani ambe úsïndi enga imani jaiapanherantaaka. Ka ambe enga i kʼuiripu újka, xarhatasïndi eska mintsikasïnga eska Tata Diosï Jeoba újchakuraaka. Ka eska kánikua sési nikuaka enga kurhajchaaska Tata Diosïiri juramukuechani (Sal. 119:66; Ebr. 11:6).

3. ¿Nénajtsïni marhuachesïni mintsikaparini irekani? (2 Korintu 4:18).

³ Ménisïchi imani ambe úsïnga seguni ambe engachi exejka, kurhaani ka pʼikuarherani. Joperujtsïni no sési nicheati engachi solu indeni ambe jimbojku úska ambe ma ka sánderia enga importanti ambeuaka, ¿andi? Jimboka no méntkisï mintsinharhikueska ambe engachi kurhaajka, pʼikuarherani ka exeni. Ka engachi solu irekaska imani ambe jimbojku engachi exejka, jamberichi nóteru kurhajchaapiringia Tata Diosïiri konsejuechani ka nijtu úni ambe enga ima uéjka (Ecl. 11:9; Mat. 24:37-39). Joperu engachi mintsikaparini irekaska, sánderuchi erakuaka úni imani ambe Tata jaiapanhentajki (Éfes. 5:10). Engachi úska ambe engajtsïni Tata Diosï arhijka, pínandikuachi jatsiaka ka kánikuachi sési pʼikuarheraaka (Sal. 16:8, 9; Is. 48:17, 18). Ka engachi seguiriini jauaka mintsikaparini irekani, uaakachi irekani para méntkisï (arhinta je 2 Korintu 4:18).

4. ¿Nénachi uaa míteni sinchi mintsikaparinisï irekaxaki o solu jimbokachi exexaka ambe ma?

⁴ ¿Nénachi uaa míteni sinchi mintsikaparinisï irekaxaki o solu jimbokachi exexaka ambe ma? Uaakachi ini ambe kurhamarhikuarhini: “¿Amberini jarhuatasïni ambakiti ambe erakuni úni? ¿Mintsikasïni Tata Diosï Jeobani ka imeeri juramukuechani o ísï úsïni ambe ma seguni ambe engani exejka? Ini jorhenguarhikua jimbochi exeni jauaka tanimu ambe parachi xarhatani eskachi mintsikaparini irekaxaka. Pori ejemplu, 1) jiáni engachi ánchikuarhita jámaaka jirinhani, 2) engachi erakuni jámaaka néni jingoni uambuchani o tembuchani ka 3) engachi instruksioniichani intsïnhauaka Jeobaeri kúnguarhikuarhu. Mándani puntu jimbochi exeni jauaka ambe ka ambechi jatsiski para eratsentani parachi ambakiti ambe erakuni úni.

ENGACHI ÁNCHIKUARHITA MA JÁMANI JAUAKA JIRINHANI

5. ¿Soluchi uétarhisïni exeni náchi xáni andaa ánchikuarhitarhu ma?

⁵ Iáminduechachi uékasïnga ánchikuarhita ma jatsini parachi piákuarhini ambe engachi uétarhinchaaka jucha ka juchaari familia (Ecl. 7:12; 1 Tim. 5:8). Pori ejemplu, máruksï imani ánchikuarhitani jatsisti engaksï újka piákuarhini ambe engaksï xáni uéjka, asta paraksï patsakuarhini sáni sentabu. Joperuksï máteruecha sánititku andasïndi engaksï afuersa andangutajka para familiani kéndani. Ísï jimbo, engachi ánchikuarhita ma jámani jarhajka jirinhani, orhetachi exesïnga na engachi xáni andaaka. Joperu enga nema solu exepiringa na enga xáni andaaka, ísï irekani japirindi seguni ambe enga exejka.

6. Engachi ánchikuarhita ma jirinhani jarhajka, ¿nénachi xarhatasïni eskachi mintsikaparini irekaxaka? (Ebreu 13:5).

⁶ Engachi mintsikaparini irekani jaka, ístuchi jatsiska para exeni eskajtsïni inde ánchikuarhita no ójkutaaka parachi marhuakuni Tata Diosï Jeoba jingoni. Ju je kurhamarhikuarhini: “¿I ánchikuarhitarini imani ambe úraa enga Tata Diosï kurhunhijka? ¿Nóteruni uaaia sési marhuakuni? ¿Uaa eskani no xáni jauaka juchiiti familia jingoni?” (Prov. 6:16-19; Filip. 1:10). Engajtsï exeska eskaksïni ójkutaaka, sánderu sési japirindi eskajtsï no jiókuarhiaka indeni ánchikuarhitani nájkiruka úkua jukaaka exentani máteru. Jimbokachi mintsikaparini irekaxaka, imani ambechi erakuaka úni enga xarhataaka eskachi meru seguru jarhaska eskajtsïni Tata Diosï Jeoba íntskuaka ambe engachi uétarhinchaaka (Mat. 6:33; arhinta je Ebreu 13:5).

7, 8. ¿Néna xarhataski Javier eska mintsikaparini irekaxaka? (Ístu exe je imajenini).

⁷ Erachi Javiera enga Sudamérica anapueka, sési mítesti eska uétarhisïnga mintsikaparini irekani. Ima uandantasïndi: “Imani empresarhu engani ji ánchikuarhini japka, lugari ma jarhaspti engani úpiringa kánikua sentabu andani. Engani intsïnhapiringa indeni ánchikuarhitani, kánikuarini sési pʼikuastapirindi ka jimbosïni nípka kurhajkuarhini”. Joperu Javier ístu uékaxapti prekursoriini. Ima ístu uandantasïndi: “Arhisptijtsïni eskajtsïni uandontskuarhechipiringa parachi exeni indeni ánchikuarhiteeri ambe. Ante de nirani, kómarhispka Tata Diosï Jeobani mintsikaparini eska imasï sánderu sési mítepka ambe sánderu sési japirini para ji. Uékasïreenga sánderu sési ánchikuarhini ka sánderu andani, joperuni no jiókuarhipiringa engareni ójkutapiringa parani sánderu sési marhuakuni Tata Diosï Jeobani”.

⁸ Ánchikuarhitarhuksï arhispti Javierini eska jatsipiringa para pakarani sánderu ánchikuarhini. Ka Javier iatsitakuarhu arhiaspti eska no úpiringa ísï ánchikuarhini jimboka Tata Diosïni marhuakusïreenga. Javier no jiókuarhispti indeni ánchikuarhitani ka tsimani semana tátsekua prekursoriisptia. Sánderu tátsekua indeni mismu uéxurhini, exentaspti ánchikuarhita ma para terujkani jurhiatikuajku ánchikuarhini. Ima uandantasïndi: “Tata Diosï Jeoba kurhaasïreendi engani ji kómarhienga ka íntskustirini ánchikuarhita ma engareni jarhuatajka prekursoriini. Kánikua sési pʼikuarherasïnga ánchikuarhita ma jatsini engareni jarhuatajka sánderu marhuakuni Tata Diosïni ka juchiiti erachiichani”.

9. ¿Ambejtsïni jorhendasïni Trésoriiri eksperiensia?

⁹ ¿Ambechi uaa úni engajtsïni ánchikuarhita ójkutani jaka parachi sési marhuakuni Tata Diosïni? Ju je exeni ambe enga nitamakuarhipka Trésor, Congo anapu erachi ma. Ima uandantasïndi: “Jatsispka imani ánchikuarhitani engani xáni uékeenga, tanimu xanhari sánderuni andasïreenga eska antesi ka janhanharhisïreendijtsïni”. Joperu Trésor someni kuératasïreendi tánguarhikuecharhu jimboka ánchikuarhini pakarasïreenga. Ístuksï uinhamarhikusïreendi para chkuanderani ka no uandantani empresarhu anapu ambe. Uékasïreendia jurajkuni ánchikuarhitani joperu uandanhiasïreendi enga no úpiringa exentani máteru. ¿Ambe jarhuataspi? Ima uandantasïndi: “Ambe enga Habacuc 3:17-19 arhijka, kánikuarini jarhuataspti kurhanguni eskarini Tata Diosï Jeoba jarhuatapiringa nájkirukani nóteruni xáni sentabu andapiringia. Ísï jimbo, jurajkuspka ánchikuarhitani”. Trésor uandasïndi: “Uánikua patroniichaksï eratsesïndi eska ma jurajkuaka ambe uéjkini, komu no jarhani familia jingoni ni marhuakuni Tata Diosïni, nomasi para sánderu sentabu andani. Joperu ji kánikua sési pʼikuarherasïnga jimbokani no jurajkuspka eskarini ánchikuarhita ójkutapiringa parani marhuakuni Tata Diosï Jeobani. Ma uéxurhinisï tátsekua, Tata Diosïreni jarhuataspti exentani ánchikuarhita ma engareni jarhuatapka jatsini ambe engani xáni uétarhincheenga ka ístu parani sánderuni marhuakuni. Engachi orheta peeraska Tata Diosïiri ambe, jamberichi ménisï no kánikua sentabu jatsiaka, joperujtsïni ima kuidariuati”. Engachi mintsikaska Tata Diosïiri konsejuni ka ambe engajtsïni ima aiachijka, uaakachi mintsikaparini irekani ka imajtsïni kóndentaati.

ENGACHI EXENI JÁMAAKA NÉNI JINGONI TEMBUCHANI O UAMBUCHANI

10. Enga nema uéjka tembuchani o uambuchani, ¿néna xarhatapirini eska imani ambe úsïnga seguni ambe enga exejka?

¹⁰ Temungurhiriikua kʼéri kóntperata máesti Tata Diosï Jeobaeri, jimbosï no no sési jati enga nema uékaaka tembuchani o uambuchani. Enga pirenchi ma exeni jámaaka né jingoni uambuchaa, jamberi exeati na enga pʼikuastajka, na enga jásï kʼuiripu máeka, na jáxeski, na mítekateeski, jatsikuarheriiski, ka sini jarhuatasïni familiani.b Nájkiruka inde ambe jukaparhakueka, no jatsisti para indeni ambejku exeni, jimboka enga ísï úpiringa, ísï irekani japirindi seguni ambe enga exejka.

11. Engachi erakuni jámaaka né jingoni tembuchani o uambuchani, ¿nénachi xarhataa eskachi mintsikaparini irekaxaka? (1 Korintu 7:39).

¹¹ Tata Diosï Jeoba kánikua sési pʼikuarherasïndi imani erachiicha ka pirenchiicha jimbo engaksï jingontku exejka né jingoni uambuchani o tembuchani. Ka ma konseju enga Tata Diosï íntsaajka, jindeesti eskaksï “no jukari sapichueuaka” para úni mítperani nema jingoni (1 Kor. 7:36). Máteru jindeesti eska erachi o pirenchi exeaka eska ima enga jingoni uéjka uambuchani o tembuchani, sési járhati kualidadiichani jatsiauaka para úni ambakiti acheeti o uarhiiti máeni ísï eska Tata Diosï Jeoba na uéjka (Prov. 31:10-13, 26-28; Éfes. 5:33; 1 Tim. 5:8). Ka enga kʼuiripu ma enga no Testigueka uéjka míteni pirenchini o erachini ma, iichaksï jatsisti para miáni eskaksï “Tateeri chúxapati” ma jingontkusï tembuchaaka o uambuchani, ísï eska na arhijka 1 Korintu 7:39 (arhinta je). Ka i erachiicha ka pirenchiichaksï kurhajchasïndi Tata Diosï Jeobani jimbokaksï seguru jarhaska eska ima jarhuatauaka jiáni engaksï no sési pʼikuarherani jauaka oksï jandiajku pʼikuarherani jarhani (Sal. 55:22).

12. ¿Ambechi jorhenguarhisïni Rosaeri ejempluni jingoni?

¹² Ju je exeni Rosaeri ejempluni, Colombia anapu prekursora ma. Ánchikuarhitarhu tatakani ma mítespti enga no testiguepka ka ueenaspti tsitini Rosani, ka Rosajtu ueenaspti tsitini. I Pirenchi uandantasïndi: “Ísï xarharasïreendi enajki ambakiti kʼuiripu máepi. Sési jámasïreendi ka ístu jarhuajpesïreendi iretarhu. Kánikua sési pʼikuarherasïreenga na engareni kámeenga. Indeni jásï kʼuiripunisïni ma uékani japka, nomasi no Jeobaeri testiguespti”. Rosa ístu uandantasïndi: “Para ji kánikua úkua jukaspti arhini eska nómbe jimbokani mintsita jingoni uékasïreenga. Jiánisï, ji jandiajkuni pʼikuarherasïreenga ka uékasïreenga uambuchani, joperuni no ma erachini exentaxapka”. Joperu Rosa no imani ambejku eratsespti seguni ambe enga exeni japka, sino eratsentaspti ambe enga úkuarhinchapiringa enga no kurhajchapiringa Tata Diosï Jeobani. Ísï jimbo, nóteru pájperasptia imani tataka jingoni ka sánderu jánguarhintaspti marhuakuni Tata Diosïni. Ísï tátsekua pʼímarhinhaspti Jorhentperakuarhu para Aianhpiriicha Reinueri, ka iásï prekursora espesialiistia. Rosa uandantasïni: “Tata Diosï Jeobareni uánikua kóntperateechani íntsaastia engajtsïni kánikua sési pʼikuastajka”. Ísïisti, no méntkisï fásiliisïndi kurhajchani Tata Diosï Jeobani ka sánderia engachi mintsita jingoni uéjka ambe ma, joperu engachi ísï eratseska eska Tata Diosï Jeoba méntkisïjtsïni sési nicheati.

ENGAJTSÏNI JEOBAERI KÚNGUARHIKUA INSTRUKSIONIICHANI ÍNTSKUAJKA

13. Engajtsïni Jeobaeri kúnguarhikua arhiaka ambe engachi jatsika para úni, ¿nénachi xarhatani japirindi eskachi ísï irekaxaka seguni ambe engachi exejka?

¹³ Uánikua xanhari, Jeobaeri kúnguarhikuajtsïni jarhuatasïndi parachi sési marhuakuni Tata Diosïni ka úraasïndi orhejtsïkutiichani, sirkuitueri orhejtsïkutiichani, Betelini o Kuerpu Gobernantini. Joperu ménisïchi no kurhanguaka andijtsïnisï arhini jaki eskachi ísï uaaka máru ambe. Engachi no kurhanguni jauaka, ¿ambechi uaa? ¿Ueenaachi uandani eska máru ambe no sési uéraaka engachi ísï uaaka eskajtsïni Jeobaeri kúnguarhikua na arhini jaka? ¿Ueenaachi no sési ambe uandani imani erachiicheeri ambe engajtsïni indeni instruksioniichani íntsaani jaka? Engachi ini ambe úska, ísïchi irekani jauaka seguni ambe engachi exejka.

14. Engajtsïni Jeobaeri kúnguarhikua arhiaka ambe engachi uaaka, ¿nénachi xarhataa eskachi mintsikaparini irekaxaka? (Ebreu 13:17).

¹⁴ Engachi mintsikaparini irekaska, kurhanguakachi eska Tata Diosï Jeoba sési míteska ambe úni o nénajtsïni jarhuatani ka ístu eska míteska na engachi nitamakuarhini jaka. Ísï jimbo, juchachi jirejiresï tsípikua jingoni kurhajchasïnga (arhinta je Ebreu 13:17). Juchachi míteska eska kurhandirani, marhuasïnga parachi sési pájperani kúnguarhikuarhu (Éfes. 4:2, 3). Míteskachi eskaksï no perfektueska ima erachiicha engajtsïni instruksioniichani íntskuajka, joperujtsïni Tata Diosï Jeoba újchakuraati engachi kurhajchaaska (1 Sam. 15:22). Ka enga Tata Diosï exeaka eska uétarhisïnga mójtakuni máru ambe, ísï uaati jiáni enga uétarhiaka (Miq. 7:7).

15, 16. ¿Ambe jarhuataaspi Kevinini para mintsikaparini irekani? (Ístu exe je imajenini).

¹⁵ Ju je exeni ejemplu ma enga xarhatajka na enga marhuajka mintsikaparini irekani. Nájkiruka Perú sánderu utusï uandanhajka, jarhastiksï uánikua kʼuiripuecha engaksï máteru idioma uandajka. Pori ejemplu kechua. Uánikua uéxurhini jimbo, erachiichaksï ióni jámaspti jirinhaantani kʼuiripuechani engaksï indeni idioma uandajka. Joperu tátsekua mójtakurhispti iámu ambe jimbokaksï paisirhu anapu leiicha mójtakurhispka (Rom. 13:1). Ísï jimbo, máru erachiichaksï ueenaspti kurhamarhikuarhini iásïksï néna úpirinia exeantani imeechani engaksï kechua uandeenga. Joperu erachiichaksï kurhandiraspti ambe enga Jeobaeri kúnguarhikua arhiapka eskaksï úpiringa ka Tata Diosï Jeoba újchakuraaspti engaksï jánguarhintani japka jirinhaantani imani kʼuiripuechani engaksï kechua uandeenga.

¹⁶ Kevin enga orhejtsïkutiika kúnguarhikuarhu enga kechua uandanhajka, uandasïndi eska no kurhangusïreenga andiksïsï iásï ménderueni aianhpipirinia. Ima uandantasïndi: “Kurhamarhikuarhisïreenga, ʻ¿iásï néna exeantauaia imeechani engaksï kechua uandajka?’”. ¿Ambe úspi Kevini? Ima uandantasïndi: “Miáspka ambe enga uandajka Proverbios 3:5. Ka ístuni eratsentaspka Moisésiiri ambe. Tata Diosï Jeoba arhispti eska petantapiringa Israelini Ejiptu ka eska mari Charhapitirhisï paapiringa. Imani lugari jimbo, ísï xarharasïreendi enajkiksï no úpirini sïpakuarhini. Joperu Moisési kurhandiraspti ka Tata Diosï Jeoba újchakuraspti ka kʼéri milagru ma úspti” (Éx. 14:1, 2, 9-11, 21, 22). Kevini ísï úspti eska na arhinhapka, ima uandantasïni: “Ískuni pakaraspka na engajtsïni Tata Diosï Jeoba újchakurapka. Antesichi kánikua xanharasïreenga aianhpikuarhu, ka ménichanchi ma o tsimani kʼuiripunkusï exenteenga. Joperu iásïchi jimeesïsï aianhpisïngia engaksï uánikua kechuecha jaka. Sánderuchi uandontskuarhesïngia imeecha jingoni, nirasïngachi pʼorhembiantani ka jorhendaasïngachi Biblieri ambe. Ístuksï uánikuecha nirasïndia tánguarhikuecharhu”. I ambe xarhatasïndi eska engachi mintsikaparini irekajka, Tata Diosï Jeobajtsïni kóndentasïndi.

17. ¿Ambechi jorhenguarhiski ini artikulu jimbo?

¹⁷ Exeskachia tanimu ambe nani engachi uaaka xarhatani eskachi mintsikaparini irekaxaka. Ka jatsiskachi para iápurisï xarhatani, pori ejemplu ambe jingonchi tsípikuarhia, nani jamberichi niua eskuela ka nénachi tʼarhexeraua sapiichani. Méntkisï engachi erakuni jámaaka ambe ma, jatsiskachi para kurhajchaani Tata Diosï Jeobaeri konsejuechani, no mirikurhini eskajtsïni ima kuidariuaka, no imani ambejku eratseni jarhani engachi exejka ka ístu eskajtsïni no ójkutaaka marhuakuni Tata Diosï Jeobani. Engachi ísï úska, “juchachi Jeobaeri nombri jimbo jámaaka enga juchari Tata Diosïka para méntkisï” (Miq. 4:5).