Kánikua sésiisti andarhieraani erachiichani

1, 2. ¿Ambe kánikua jukaparharasïni Tata Diosï Jeoba ka ambe uékasïni eskachi uaaka?

NA ENGACHI kaajka máteru kʼuiripuechani kánikua jukaparhakuesti para Tata Diosï Jeoba. Jimbojtsïnisï Jesúsi jorhendati eskachi jatsiska para xénchaani máteruechani ísï eskachi juchajkumindu na xénchakuarhijka (Mat. 22:​37-39). Ísï jimbo, ístuchi jatsiska para sési kaani imeechani engaksï no marhuakujka Tata Diosï Jeobani. Indeni ambe úparini ísïchi úni jarhasïnga eska juchaari Taati auandarhu anapu, ima enga újka “eska andaraaka jurhiata para ambarhati kʼuiripuecha ka para no ambarhati kʼuiripuecha ka janirasïndi para imeecha engaksï sési jámajka ka ístu para imeecha engaksï no káni sési jámajka” (Mat. 5:45).

² Tata Diosï Jeoba xénchaasïndi iámindu kʼuiripuechani, joperu sánderumindu xénchaasïndi imeechani engaksï kurhajchajka (Juanu 14:21). Ka uékasïndi eskachi juchajtu májkueni uaaka, jimbojtsïnisï arhijti eskachi ‘kánikua xénchauaka’ juchaari erachiichani enajkichi ermanutiipirini (1 Ped. 4:8; Rom. 12:10). Jatsiskachi para ísï xénchaani ka sési kaani erachiichani enajkiksï juchaari familiarhu anapuepirini o ambakiti amigu ma.

3. ¿Ambechi uaa úni parachi niárani xénchpeni?

³ Ísï eska tsïtsïki ma na niárajka kʼéni jimbokachi itsï jatsikusïnga ka kuidarini, xénchperakua jingoni májkueniisti. Apostoli Pablu arhiaspti kristianuechani: “Seguirii je ísï xénchperani enajkijtsï iáminduecha ermanutiipirini” (Ebr. 13:1). Tata Diosï Jeoba uékasïndi eskachi pauani pauani jánguarhintaaka xénchaani máteruechani. Ísï jimbo, ju je exeni andichisï jatsi para sánderu andarhieraani juchaari erachiichani ka nénachi uaa ísï úni.

ANDICHISÏ JATSI PARA SÁNDERU ANDARHIERAANI ERACHIICHANI

4. Ísï eska Salmo 133:1 na uandajka, ¿ambejtsïni jarhuataa méntkisï jukaparharani na enga Tata Diosïiri ireta májku kʼéri jaka? (Ístu exea je imajeniichani).

⁴ (Arhinta je Salmo 133:1). Juchajtuchi uandasïnga eska kánikua sésiiska ka sési pʼikuarherakuarhini amigueni imeecheeri engaksï xénchajka Tata Diosï Jeobani. Joperu ísï eska kʼuiripu ma na kuatantajka pauani pauani exeni kʼéri anhatapuni ma, juchajtuchi úpiringa nóteru xáni jukaparharaania juchaari erachiichani jimbokachi someni exeasïnga o jamberi uánikua xanhari ma semana jimbo. Jiájkani, ¿ambejtsïni jarhuataa seguiriini jarhani jukaparharaani erachiichani ísï eska jiáni engachi míteapka? Ju je arhutani tiempu parachi eratsentani andichisï jucha xáni jukaparharaajki ka ístu andisï kúnguarhikua jukaparharajki mándani erachini ka pirenchini.

5. ¿Ambeksï úsïni máteru kʼuiripuecha engajtsïni exejka eskachi Testiguecha xénchperasïnga?

⁵ Jiáni engaksï kʼuiripuecha ueenajka juchantsïni jingoni tánguarhini, ískuksï pakarasïndi jimbokaksï exesïnga eskachi jucha xénchperasïnga, ka niárasïndiksï jakajkuni eska i jindeeska relijioni enga jurhimbitiika. Jesúsi uandaspti: “Engajtsï ísï úska, iáminduechaksï míteati eskajtsï juchiiti chúxapatiiska: engajtsï xénchperaaka máteru ka máteruni jingoni” (Juanu 13:35). Ju je exeni ambe enga nitamakuarhipka Kristina.a Ima jiáni ueenaspti jorhenguarhini Biblieri ambe enga unibersidadirhu jámani japka. Ka uékaspti nirani kʼéri tánguarhikuarhu rejioniiri ma. Enga na nitamapkia primeru jurhiatikua, arhispti imani pirenchini enga Biblieri ambe jorhendani japka: “Juchiiti taatiichajtsïni no méni sáni kamakamataspti. ¡Joperu primeru jurhiatikua jimbo engani tʼungini jingoni nika, 52 kʼuiripuechajtsïni kamakamataspti! I Tata Diosï Jeobaeri familia ústi eskani pʼikuarherapiringa na engareni xáni xénchaajka ima. Jíjtuni uéksïnga ixú jarhani”. Kristina seguirispti jorhenguarhini Biblieri ambe ka 2024 jimbo itsï atakuarhisti. I ejemplu xarhatasïndi eskaksï uánikua kʼuiripuecha niárasïnga marhuakuni Tata Diosï Jeobani jimbokaksï exesïndi eskachi ambakiti ambe úsïnga; eskachi xénchperasïnga (Mat. 5:16).

6. ¿Nénajtsïni kuájchakusïni engachi sánderu andarhieraajka erachiichani?

⁶ Engachi sánderu andarhieraajka erachiichani, niárasïngachi kuájchakukuarhini. Apostoli Pablu arhiaspti kristianuechani: “Seguirii je pauani pauani uinhaperperantani [...] parakaksïni pekadu no choperachiaka chaari mintsitani, jimboka inde jirinhakuntasïnga nénaksïni támisï páni” (Ebr. 3:13). Enga Tata Diosï Jeoba exejka eskachi ueenaxakaia chkéni o imani ambe úni enga no sési jaka, ima úrasïndi erachiini ma parajtsïni jarhuatani (Sal. 73:​2, 17, 23). ¿A no eska kánikua sésiiska engajtsïni erachiicha jarhuatajka?

7. ¿Nénajtsïni jarhuatasïni xénchperakua májku kʼéri jarhani? (Kolosasi 3:​13, 14).

⁷ Juchachi imani kʼuiripuecha jingoni jarhaska engaksï jánguarhintajka xarhatatsperani xénchperakua, jimbochisï uánikua kóntperateechani jatsiajka (1 Juanu 4:11). Pori ejemplu, jimbokachi xénchaasïnga máteruechani indeni ambejtsïni jarhuatasïndi parachi seguiriini jarhani tekaatsperantani mintsita jingoni, ka inde ambe úsïndi eskachi májku kʼéri jauaka (Éfes. 4:​2-6; arhinta je Kolosasi 3:​13, 14). Ísï jimbo, engachi nirajka tánguarhikuarhu kánikuachi sési pʼikuarherasïnga ka nóchi nani xáni sési pʼikuarherasïnga eska jima.

JU JE JANHANHARHIANI MÁTERUECHANI

8. ¿Nénajtsïni jarhuatasïndi Tata Diosï Jeoba parachi májku kʼéri jarhani?

⁸ Juchachi no perfektueska, ísï jimbo, kʼéri milagru máesti Tata Diosï Jeobaeri engachi erachiicha májku kʼéri jaka interu parhakpinirhu (1 Kor. 12:25). Biblia uandasïndi eskajtsïni juchantsïni Tata Diosïsï jorhendani jaka parachi xénchperani (1 Tes. 4:9). ¿Nénajtsïni jorhendasïni? Imeeri Karakata jimbojtsïni arhisïndi ambe engachi jatsika para úni parachi andarhieraani erachiichani, ka juchachi jurajkusïnga eskajtsïni Tata Diosï Jeoba jorhendaaka. Jo jingontkuchi kurhajchasïnga ambe engajtsïni ima arhijka ka ísïminduchi úsïnga (Ebr. 4:12; Sant. 1:25). Indeni ambechisï jánguarhintajka úni Jeobaeri testiguecha.

9. Parachi janhanharhiani erachiichani, ¿ambejtsïni jorhendasïni Roma 12:​9-13?

⁹ Tata Diosïiri Karakatajtsïni jarhuatasïndi sánderu andarhieraani erachiichani. Ju je exeni ambe enga uandapka apostoli Pablu ixú Roma 12:​9-13 jimbo (arhinta je). Ka exeauakachi arini uandakuechani: “Ka chá ueena je janhanharhiani máteruechani”. ¿Nénachi uaa indeni ambe úni? Jatsiskachi para exeni nénachi uaa xarhatakuani juchaari erachiichani eskachi ísï xénchaasïnga enajkiksï juchaari ermanutiipirini. Pori ejemplu ju je puákuantani, sési kaani ka intsïmbiani ambe ma (Éfes. 4:32). Nóchi jatsiska para eratseni eskajtsïni máteruechasï jatsika para ueenani uandontskuarhechini, juchachi jatsika para ueenani ísï úni. Ka ísï, exeakachi eska ísïiska ambe enga Jesúsi uandapka: “Ma sánderu sési pʼikuarherasïndi intsïmpini ka eska intsïmbinhani” (Úku. 20:35).

10. Enga nema ánchikuarhiriijka, ¿néna xarhatasïni eska janhanharhiasïnga máteruechani? (Ístu exe je imajenini).

¹⁰ Ju je exeni ambe enga uandapka apostoli Pablu ísï tátsekua enga na uandapkia eskachi jatsiska para jucha ueenani janhanharpini. Ima uandaspti: “Kánikua jánguarhintsï je ánchikuarhini, asï jáma je xépini”. Ima enga ánchikuarhiriijka tsípikua jingoni jámasïndi ka enga arhinhajka eska uaaka ambe ma, sóntku sóntku úsïndi. Proverbios 3:​27, 28 arhisïndi: “Asï pʼíngukuarhi parari jarhuataani imechani engaksï uétarhinchani jauaka engari exekuarhijka eskari uáka jarhuataani”. Ísï jimbo, engachi exeaka eska nema uétarhinchaxaka jarhuajperata, ju je jarhuatani ka no ísku exeni nijtu eratseni eskaksï máteruecha jarhuataaka (1 Juanu 3:​17, 18).

11. ¿Ambejtsïni jarhuataa sánderu andarhieraani erachiichani?

¹¹ Máteru ambe engachi uaaka úni para xarhatani eskachi janhanharhiasïnga máteruechani, jindeesti sóntku puákuantani engajtsïni no sési ambe úchiaka. Éfesu 4:26 arhisïndi: “Asï chúskuta je ikiani” para no jurajkuni eskajtsïni “Noambakiti inchaakucheaka” ísï eska na uandajka bersikulu 27. Tata Diosï Jeobajtsïni mémindu arhisïndi imeeri Karakatarhu eskachi puákuantauaka máteruechani. Ka Kolosasi 3:13 arhisïndi: ʻSeguirii je […] mintsita jingoni puátsperantaniʼ. Engachi no kasu úska ambe engajtsïni máteruecha úchiaka ka puákuantani, jarhuataatijtsïni sánderu andarhieraani. Ka ísïchi iáminduecha májku kʼéri jauaka espiritu santu jimbo ka uaakachi májku kʼéri jarhani engachi jánguarhintaaka sési pájperani iáminduechani jingoni (Éfes. 4:3). Parachi mátirku uandani, engachi no puátspentaska, nóchi uaaka májku kʼéri jarhani níjtu sési pájperani.

12. ¿Nénajtsïni jarhuatasïni Tata Diosï Jeoba puákuantani máteruechani?

¹² Ísïisti ménisï kánikua úkua jukasïndi puákuntani nemani engajtsïni kánikua no sési úchika, joperujtsïni Tata Diosï jarhuataati imeeri espiritu santu jingoni. Biblia arhisïndi eskachi xénchauaka máteruechani ka ánchikuarhini, ka ístu uandasïndi: “Eskaksïni espiritu santu jarhuataaka parajtsï chá kánikua jánguarhintani”. I ambe arhikuekasïndi eskajtsïni espiritu santu jarhuatasïnga tsípikua jingoni jámani parachi imani ambe úni enga Tata Diosï uéjka, ka ima uékasïndi eskachi ísï exeauaka máteruechani komueska juchaari familia ka mintsita jingoni puákuantaani (Rom. 12:11). Ísï jimbo, kurhakusïngachi Tata Diosï Jeobani eskajtsïni jarhuataaka (Luk. 11:13).

“ASÏ JÁMA JE TÁCHANISÏ JÁMANI”

13. ¿Ambe úpirini úni eskachi táchanisï jámaka?

¹³ Kúnguarhikuecharhu mámaru jásï kʼuiripu jarhasti (1 Tim. 2:​3, 4). Nóchi iáminduecha májkueni tʼarhexeranhasïnga jimbochisï no májkueni eratsejka. Pori ejemplu, táchanisïchi erakusïnga néna xukuparhani, na jásï medisina jiókuarhini o ambe jingoni tsípikuarhini. Ísï jimbo, jatsiskachi para jingontku jámani jimboka inde ambe uaaka úni eskachi táchani jámaaka (Rom. 14:4; 1 Kor. 1:10). Ka Tata Diosï Jeobajtsïni jorhendasïndi xénchaani erachiichani. Jimbochisï no jámajka uandani eskachi jucha sánderu sési erakusïnga úni ambe ma ka eska máteruecha (Filip. 2:3).

14. ¿Ambechi jatsiski para méntkisï jánguarhintani úni ka andi?

¹⁴ Máteru ambe engachi uaaka úni paraka kúnguarhikua májku kʼéri jauaka, jindeesti sési pʼikuastaani máteruechani ka uinhaperantaani (1 Tes. 5:11). Nótki xáni ióniisti engaksï uánikua kʼuiripuecha kʼuanhatsentaka Tata Diosï Jeoba jingoni, komu imeecha engaksï nóteru nireengia tánguarhikuecharhu ka imeecha engaksï petanhantapka kúnguarhikuarhu, joperu juchachi kánikua sési eroantaska (2 Kor. 2:8). Pirenchi ma enga jukari 10 uéxurhini nóteru tánguarhipkia, uandantasïndi: “Engani ménderu ueenapka nirani, iáminduechajtsïni tsípikua jingoni erokaspti ka sésijtsïni uandajpani” (Úku. 3:19). ¿Néna pʼikuarherapi pirenchi engaksï máteruecha sési erokapka? Ima uandasïndi: “Kánikua sési pʼikuarheraspka. Exespka eska Tata Diosï Jeoba uékasïnga eskani tsípikua jingoni irekaaka”. Engachi jánguarhintajka jarhuataani máteruechani, Jesúsijtsïni uaati úrani parachi sési pʼikuastaantani imeechani engaksï “kʼuetsapeti ambe páni jaka” (Mat. 11:​28, 29).

15. ¿Ambechi uaa úni parachi májku kʼéri jarhani? (Ístu exe je imajenini).

¹⁵ Ístuchi uaaka jucha ueenani úni ambe ma parachi jarhuajpeni májku kʼéri jarhani. Pori ejemplu sési eratsentani ambe engachi uandaaka. Job 12:11 arhisïndi: “¿No ísïski eska kutsïkua kurhauasïnga uandakuechani ísï eska katamba na tsʼémujka tʼirekua ambe?”. Kʼuiripu ma enga úmantajka, méntkisï orheta tsʼémusïndi ante de jatsiratspeni para exeni sini áspiski. Májkueni, ante dechi uandani, jatsiskachi para eratsentani eska ima ambe engachi uandaaka sési pʼikuastantauaka, uinhaperantauaka ka jarhuataani imeechani engajtsïni kurhajchani jauaka (Sal. 141:3; Éfes. 4:29).

16. ¿Neechaksï sánderu jatsiski para imani uandakuechani úraani engaksï uinhaperpintajka?

¹⁶ Ima erachiicha engaksï tembuchatini jaka, taatiicha ka naandiicha, jatsistiksï para jánguarhintani imani uandakuechani úraani engaksï uinhaperpintajka (Kol. 3:​19, 21; Titu 2:4). Ístuksï orhejtsïkutiicha úsïndi sési pʼikuastaantani ka uinhaperaantani Tata Diosïiri marhuariichani (Is. 32:​1, 2; Gal. 6:1). Bibliajtsïni arhisïndi: “¡Xáni enga sésiika uandakua ma jiáni enga meru uétarhini jarhajka!” (Prov. 15:23).

“JU JE ÚKUECHA JINGONI XARHATANI ESKACHI MINTSITA JINGONI XÉNCHPESÏNGA”

17. ¿Ambechi uaa úni parachi mintsita jingoni xénchaani juchaari erachiichani?

¹⁷ Apostoli Juanu uandaspti: “Ju je no jinijku uandani eskachi xénchpesïnga, sánderu sési, ju je úkuecha jingoni xarhatani eskachi mintsita jingoni xénchpesïnga” (1 Juanu 3:18). Engachi tiempu arhutaska para juchaari erachiicha jingoni jarhani, sánderuchi sési míteauaka ka sánderuchi xénchauaka. Ísï jimbo, ju je jánguarhintani erachiicha jingoni jarhani tánguarhikuecharhu ka ístu aianhpikuarhu. Ka ístuchi uaaka nirani pʼorhembiani. Engachi ísï úska, kʼuiripuechaksï niáraati uandani: “Chaanksïni Tata Diosï jorhendaxati parajtsï xénchpeni” (1 Tes. 4:9). Ka juchachi mismu uaaka exekuarhini “na enga xáni sésiika ka sési pʼikuarherakuarhini” engaksï erachiicha májku kʼéri jaka (Sal. 133:1).