SEMANA 15
PIREKUA 30 Juchiti Amigu, Tata Diosï ka Táti
Kánikuajtsïni marhuachesïndi andarhierani Tata Diosïni
“Kánikua sésisti para ji, Tata Diosïni andarhierani” (SAL. 73:28).
AMBE ENGACHI JORHENGUARHIAKA
Exeakachi nénachi uaa andarhierani Tata Diosï Jeobani ka nénajtsïni marhuachia engachi ísï úska.
1, 2. a) ¿Ambe uétarhisïni para ambakiti amiguni ma jatsini? b) ¿Ambechi exea ini jorhenguarhikua jimbo?
¿JATSISKIJTSÏ amiguni ma? ¿Miásïntsï nénajtsï niáraski xáni sési pájperani? Jamberijtsï someni imani jingoni jarheenga, niáraskajtsï míteni ambe enga xáni nitamakuarhika, ístujtsï míteskia ambe tsitisïni ka ambe nómbe. Ístu, exeskajtsï eska ima ambakiti kʼuiripu máeska ka eska chájtu uékasïnga májkueni jámani eska ima ka ísïjtsï niáraspka kánikua xénchani.
2 Para úni sési pájperani nemani jingoni uétarhisïndi tiempu arhutani ka jánguarhintani. Ka májkueni ambe uétarhisïndi parachi úni sési pájperani Tata Diosï jingoni. Ini jorhenguarhikua jimbo exeni jauakachi nénachi uaa sánderu andarhierani Tata Diosï Jeobani, juchaari amiguni, ka nénajtsïni marhuachesïni ísï úni. Joperu orheta ju je exeni andisï xáni sésii andarhierani Tata Diosï Jeoba.
3. ¿Andisï sésii eskachi eratsentaaka na enga xáni marhuajka andarhierani Tata Diosï Jeobani? Uandanta je ejemplu ma.
3 Kánikua jukaparhakuesti eskachi eratsentaaka andisï xáni sésii andarhierani Tata Diosï Jeobani (Sal. 63:6-8). Pori ejemplu, k’uiripuechaksï mítesti eska kánikua marhuasïnga sési tʼireni, kánikua itsïmani, ejersisiu úni ka sési mintsikuarhini. Máruksï no úsïndi ini ambe ka niárasïndiksï pʼamenchani, joperu ima kʼuiripuecha engaksï eratsentajka andisï xáni marhuajki sési tʼireni, itsïmani ka máteru ambe úni, jánguarhintasïndiksï ísï úni ka nóksï xáni pʼamenchasïndi. Ka májkueniisti, juchachi míteska eskachi jatsiska para andarhierani Tata Diosï Jeobani, jimboka sési jarhaska ísï úni. Joperu engachi meru sési eratsentajka andichisï jatsi para ísï úni, sánderuchi jánguarhintasïnga andarhierani (Sal. 119:27-30).
4. ¿Salmista ambe uandaspi Salmo 73:28 jimbo?
4 (Arhinta je Salmo 73:28). Ima enga Salmo 73 karaka Lebíiri triburhu anapu máespti ka templurhu kústasïreendi. Jamberi ióni sési marhuakuptia Tata Diosï Jeobani, joperu kuenta íntskukuarhespti eska jatsispka para seguiriini jarhani jánguarhintani andarhierani imani jimboka inde ambe marhuakupirindi. Ka uékasïreendi eskaksï máteruecha exepiringa na enga xáni sésiika sési pájperani Tata Diosï Jeoba jingoni. Ju je exeni andisï xáni sésii andarhierani Tata Diosï Jeobani.
SÉSICHI P’IKUARHERASÏNGA ENGACHI ANDARHIERAJKA TATA DIOSÏNI
5. a) ¿Andichisï sési pʼikuarherajki andarhierani Tata Diosï Jeobani? b) Ambe engajtsïni jorhendajka Tata Diosï Jeoba, ¿nénajtsïni jarhuatasïni ka kuájchakuni? (Proverbios 2:6-16).
5 Engachi sánderu andarhieraaka Tata Diosï Jeobani, sánderuchi tsípikua jingoni irekaaka (Sal. 65:4). ¿Andichisï ísï uandajki? Jimbokajtsïni sési nichesïnga engachi ísï újka eskaksï Bibliarhu anapu konsejuecha na uandajka. Ka ambe engajtsïni jorhendajka Tata Diosï Jeoba kuájchakusïndijtsïni parajtsïni no sési úriicha no támisï pájtamani ka ístujtsïni jarhuatasïndi parachi no niárani k’éri pekadu ambe úni (arhinta je Proverbios 2:6-16). Jimbosï Biblia uandajti: “Tsípisïndi ima kʼuiripu enga jánhaskakuani exentajka ka ístu ima enga újka míteni ambe enga sésiika ka ambe enga no sésiika” (Prov. 3:13).
6. ¿Andisï xáni kómu pʼikuarherapi salmista?
6 Joperu inde ambe no arhikuekasïndi eska Tata Diosï Jeobaeri amiguecha no méni niáraaka kómu p’ikuarherani. Ima enga Salmo 73 karaka niáraspti kánikua kómu p’ikuarherani jimboka úndaspka ísï eratseni eska máru ambe no jurhimbikua jingoni úkuarhisïreenga. Kánikua no sési pʼikuarheraspti jimboka úndaspka eratseni eska sánderu sési nikuasïnga imani kʼuiripuechani engaksï no mintsikajka Tata Diosïni ka nóksï kurhajchani, ka ueenaspti enbidia p’ikuarherani. Salmista ísï exesïreendi eska sánderu sési nikuasïnga imani kʼuiripuechani engaksï no sési kámpijka ka kʼéramakuarhinksï, ístu eskaksï jatsikuarheriisïnga, eskaksï no pʼamenchasïnga ka eskaksï no no sési nitamakuarhisïnga. Joperu inde ambe méntku no ísïisti (Sal. 73:3-7, 12). Jimboka salmista puru indeni ambe exeni jarhasïreenga, úndaspti eratseni sini meru jukaparhakuespi marhuakuni Tata Diosï Jeobani. Ima xáni kómu pʼikuarheraxapti enga uandapka: “Ískuesti engani xáni jánguarhintani jaka pímbinhasï jatsini juchiiti mintsitani ka no marhuasïndi ambakiti kʼuiripu máeni” (Sal. 73:13).
7. ¿Nénachi uaa sési pʼikuarherantani engachi kómu p’ikuarherani jauaka? (Ístu exe je imajenini).
7 Joperu salmista úspti ambe ma para nóteru xáni kómu pʼikuarherania. Ima “inchaspti Tata Diosïiri pímbinhasï templurhu”, ka jima, Tata Diosï Jeoba jarhuataspti para nóteru ísï eratsenia (Sal. 73:17-19). Tata Diosï Jeoba mítesïndi engachi kómu p’ikuarherani jarhajka jimboka ima juchaari amigueska. Ísï jimbo, jatsiskachi para kómarhini parajtsïni ima jarhuatani, joperu ístuchi jatsiska para ísï úni eskajtsïni ima na arhiaka Bibliani úraparini ka kúnguarhikuani. I ambejtsïni íntskuati uinhapikua ka nóteruchi kómu pʼikuarheraakia. Ka nájkirukachi kuatantakia uandanhiateecha jimbo, Tata Diosï Jeobajtsïni sési pʼikuastantaati ka uinhaperantani (Sal. 94:19).a
Lebita enga Salmo 73 karaka, “Tata Diosïiri pímbinhasï templurhu” jarhasti. (Exe je párrafu 7).
ANDARHIERANI TATA DIOSÏNI JARHUATASÏNDIJTSÏNI SÉSI IREKANI KA PARACHI AMBAKITI AMBE EROKUARHINI
8. ¿Nénaterujtsïni jarhuatasïni andarhierani Tata Diosïni?
8 Andarhierani Tata Diosï Jeobani tsimani ambe jimbojtsïni jarhuatasïndi. Úsïndi eskachi míteaka andichisï irekani jaki. Ka ístujtsïni jarhuatasïndi jimboka úsïnga eskachi ambakiti ambe erokuarhini jauaka para sánderu orhepatini (Jer. 29:11). Ju je exeni andichisï ísï uandajki.
9. ¿Andichisï tsípikua jingoni irekajki engachi andarhierajka Tata Diosï Jeobani?
9 Iásï uánikua kʼuiripu uandasïndi eska Tata Diosï no jarhaska ka nóksï mítesti andiksïsï irekani jaki. Ístuksï uandasïndi eska ma jurhiani kʼuiripu nóteru jauakia parhakpinirhu. Joperu juchachi jorhenguarhiskia ambe enga uandajka Biblia. Seguruchi jarhaska eska Tata Diosï “jarhaska ka eska kóndentasïnga imani enga jánguarhintajka úni ambe enga Tata Diosï uéjka” (Ebr. 11:6). Juchaari Taati auandarhu anapu, Tata Diosï Jeoba, ísïjtsïni kueraasti parachi exeni eskachi uétarhinchasïnga kómarhini. Jo, andarhierani Tata Diosïni, úsïndi eskachi míteaka andichisï irekani jaki. Ka jimbokachi marhuakuxaka, sésichi irekasïnga ka tsípikua jingoni (Deut. 10:12, 13).
10. Eska na uandajka Salmo 37:29, ¿ambeksï erokuarhixaki imeecha engaksï mintsikajka Tata Diosï Jeobani?
10 Uánikua k’uiripuechaksï sánderu jánguarhintasïndi ánchikuarhini, tʼarhexeraani uájpeechani ka sentabu patsani para jiáni engaksï jatiriuakia ka méntkuksï no sáni miásïndi Tata Diosïni. Joperu Tata Diosï Jeobaeri marhuariichachi kʼóru mintsikasïnga imani (Sal. 25:3-5; 1 Tim. 6:17). Mintsikasïngachi Tata Diosïni enga ísïika komueska juchaari amigu ma, ka míteskachi eska ima ísï uaaka eskajtsïni na aiachikia. Jo, uánikua ambakiti ambechi erokuarhixaka, pori ejemplu, uaakachi kómarhini Tata Diosï Jeobani para méntkisï Paraisurhu (arhinta je Salmo 37:29).
11. ¿Nénajtsïni jarhuatasïni andarhierani Tata Diosï Jeobani, ka néna p’ikuarherasïni ima engachi ísï újka?
11 Ka útasteru uánikua ambe jarhasti enga jimbo sésiika andarhierani Tata Diosï Jeobani. Pori ejemplu, imajtsïni aiachisïndi eskajtsïni puácheantauaka pekaduechani engachi móantaska (Is. 1:18). Jimbochisï nóteru no sési pʼikuarherajkia imani ambe jimbo engachi ióntki úpka (Sal. 32:1-5). Ístu, sésichi pʼikuarherasïnga míteparini eskachi kánikua sési pʼikuastasïnga Tata Diosï Jeobaeri mintsitani (Prov. 23:15). Ka uánikuachi kóntperatechani jatsiaskia jimbokachi Tata Diosï Jeobaeri amigueska, ¿joperu ambechi uaa úni parachi sánderu andarhierani?
AMBECHI UAA ÚNI PARACHI PAUANI PAUANI SÁNDERU ANDARHIERANI TATA DIOSÏ JEOBANI
12. ¿Ambejtsï xáni úskia parajtsï sánderu andarhierani Tata Diosï Jeobani?
12 Engajtsï chá itsï atakuarhikia komu Jeobaeri testigu ma, inde ambe xarhatasïndi eskajtsï uánikua ambe jorhenguarhiskia Tata Diosï Jeobaeri ambe ka Jesúsiiri, móantaskajtsïa chaari pekaduecheeri, xarhataskajtsïa eskajtsï mintsikasïnga Tata Diosïni ka jánguarhintaxakajtsï ísï úni ambe engajtsïni ima juramuchijka. Ísï jimbo, andarhieraskajtsïa Tata Diosï Jeobani ojtsï uánikua ambe míteskia imeeri ambe. Joperu parachi sánderu andarhierani, jatsiskachi para seguiriini jarhani indeni ambe úni (Kol. 2:6).
13. ¿Náki tanimu ambechi jatsiski para úni parachi sánderu andarhierani Tata Diosï Jeobani?
13 Ju je exeni ambe engajtsïni jarhuatajka sánderu andarhierani Tata Diosï Jeobani. 1) Jatsiskachi para méntkisï arhintani Bibliani ka sési estudiarini. Nóchi uékasïnga imani ambejku míteni engachi orhetku jorhenguarhika Tata Diosïiri ambe. Ístuchi jatsiska para jánguarhintani kurhanguni na enga eratsejka ka ambe enga uéjka úni para jucha. Ístuchi jatsiska para jánguarhintani ísï irekani eskaksï Biblieri prinsipiuecha na uandajka (Éfes. 5:15-17). 2) Jatsiskachi para jánguarhintani sánderu mintsikani. Ka uaakachi ísï úni engachi eratsentaska ambe enga xáni úkia Tata Diosï Jeoba parajtsïni xarhatacheni na engajtsïni xáni xénchajka. 3) Jatsiskachi para kurhunhini imani ambe enga no sési pʼikuastajka Tata Diosï Jeobani ka ístuchi no jatsiska para sési pájperani imani kʼuiripuecha jingoni engaksï no sési ambe niátajka (Sal. 1:1; 101:3).
14. ¿Ambechi uaa úni pauani pauani parachi jaiapanherantani Tata Diosï Jeobani? (1 Korintu 10:31; ístu exea je imajeniichani).
14 (Arhinta je 1 Korintu 10:31). Kánikua jukaparhakuesti eskachi jánguarhintaaka imani ambe úni enga sési pʼikuastajka Tata Diosï Jeobani. Ísï jimbo, no solu uétarhisïndi uérani aianhpini ka tánguarhikuecharhu nirani, jatsiskachi para pauani pauani imani ambe úni ambe enga Tata Diosï Jeoba jaiapanhintajka. Pori ejemplu, míteskachi eska Tata Diosï Jeoba kánikua sési pʼikuarherasïnga engachi méntkisï sési jámajka ka engachi mintsita jingoni intsïmpiaka ambe engachi jatsikuarheaka (2 Kor. 8:21; 9:7). Tata Diosï erokuarhisïndi eskachi xarhataaka eskachi jukaparharasïnga tsípikuani engajtsïni ima íntskuka. Ísï jimbo, engachi jánguarhintajka sési tʼireni ka itsïmani ka no imani ambe arhani engajtsïni uaaka pʼamenchatani, xarhatasïngachi eskachi sánderu andarhieraxaka imani. Engachi jánguarhintajka úni ambe engajtsïni Tata Diosï arhijka, imajtsïni sánderu xénchasïndi (Luk. 16:10).
Parachi úni sési pʼikuastani Tata Diosï Jeobani, uaakachi xéparini xanhatatani karruni, ejersisiu úni parachi no xáni pʼamenchani, sési tʼireni ka intsïmpitiini. (Exe je párrafu 14).
15. ¿Néna uékasïni Tata Diosï Jeoba eskachi kaauaka máteruechani?
15 Tata Diosï Jeoba iáminduechani sési kaasïndi, ambarhati kʼuiripuechani ka ístu imeechani engaksï no káni sési jámajka (Mat. 5:45). Ima erokuarhisïndi eskachi juchajtu májkueni kámpiaka. Pori ejemplu, Tata Diosï Jeoba no uékasïndi eskaksï imeeri marhuariicha ʻno sési ambe uandaaka máteruecheeri’, nijtu úrhutani jámani máteruecha jingoni, sánderu sési, ima uékasïndi eskachi ‘méntkisï iatsitakuarhu jámaaka iámindu kʼuiripuecha jingoni’ (Titu 3:2). Ísï jimbo, nóchi kʼéramakuarhisïnga o eratseni eskachi sánderu ambe míteska eska máteruecha (2 Tim. 2:23-25). Engachi méntkisï sési káuaka máteruechani, sánderuchi andarhieraaka Tata Diosï Jeobani.
ENGACHI NO SÉSI P’IKUARHERANI JAUAKA, JU JE ANDARHIERANI TATA DIOSÏ JEOBANI
16. ¿Néna niáraspi pʼikuarherani ima enga Salmo 73 karaka?
16 Jamberichi niáraka ísï p’ikuarherani enajkijtsïni Tata Diosï Jeoba jurajkupia jimbokachi no sési ambe úspka. Ju je exeni ambe enga úkuarhinchapka ima enga Salmo 73 karapka. Ima pʼamondakuarhiparini karaspti: “Ji sáno támisï niraska, sáno pitsïjpataska” (Sal. 73:2). Uandaspti eska iámu ambe no sési exesïreenga, “eska no ma ambe kurhangusïreenga” ka eska Tata Jeobani japarini “ísïispka komueska animali ma enga no kurhangujka” (Sal. 73:21, 22). Niáraspti eratseni eska Tata Diosï Jeoba nóteru xénchasïreengia ka eska ísku exepiringia jimboka no sési ambe úsïreenga.
17. a) ¿Ambe úspi salmista enga niárapka no sési p’ikuarherani? b) ¿Ambechi jorhenguarhisïni salmisteeri ambe? (Ístu exea je imajeniichani).
17 ¿Salmista ióni jamberi ísï pʼikuarheraspi enajki Tata Diosï Jeoba nóteru jaiapanhinteenia? Nómbe, jimboka jiáni enga ísï pʼikuarherapka enajki nóteru úpirinia iámu ambe jingoni, kuenta íntskukuarhespti eska jatsispka para sánderu andarhierani Tata Diosï Jeobani. Ka míteskachi ini ambe jimboka ima ísï uandaspka: “Joperu iásï méntkisï tʼungini jingoni jarhasïnga; tʼurini jupijkutixaka jurhijkandani jimbo. Arhistachisïngarini chíti konsejuecha jingoni”, ʻka niáraakarini jaiapanhentani’ (Sal. 73:23, 24). Engachi no sési p’ikuarherani jauaka o kómu p’ikuarherani, jatsiskachi para no jurajkuni Tata Diosï Jeobani jimboka ima jindeeska juchaari kʼerenda ka sésichi pʼikuarherantaaka (Sal. 73:26; 94:18). ¿Ka ambechi uaa engachi k’éri pekadu ma niátaaka ka jurajkuni Tata Diosï Jeobani? Uaakachi andarhientani mintsikaparini eskajtsïni ima puáchentaaka ‘jimboka ima jingontku jarhasïnga para puátspentani’ (Sal. 86:5). Jiáni engachi kánikua no sési p’ikuarherani jauaka, jiánchisï jatsika para sánderu andarhierani juchaari Tata Diosïni (Sal. 103:13, 14).
Jiáni engachi pʼikuarheraaka eskachi nóteru xáni mitsikaxakaia Tata Diosïni, jiánchisï jatsika para sánderu andarhierani, kómarhiparini ka no kueratani tánguarhikuecharhu. (Exe je párrafu 17).
JU JE MÉNTKISÏ ANDARHIERANI TATA DIOSÏNI
18. ¿Andichisï uaa seguiriini jarhani andarhierani Tata Diosï Jeobani?
18 Méntkisïchi uaaka sánderu andarhierani Tata Diosï Jeobani, nóchi méni kʼamaraaka míteni imeeri ambe. Biblia uandasïndi eska no nema uaaka méntku sési míteni na enga xáni jánhastiika Tata Diosï, níjtu ambe enga xáni míteka ka no nema uaati kurhanguni “ambe enga xáni újka” (Rom. 11:33).
19. ¿Ambe ambakiti ambejtsïni aiachisïni Salmuecha?
19 Salmo 73:13 uandasïndi: “Jucha engachi chiiti ireteeka, ka karichiicha engari tʼu eranguani jaka, juchaksïni méntkisï diosmaiamukua arhiaka ka méntkisïksïni k’éri ambe arhiaka”. Uaakajtsï seguru jarhani eskajtsï chá uaaka méntkisï andarhierani Tata Diosï Jeobani ka imaksïni újchakuraati para méntkisï ka chájtujtsï uaaka uandani: “Tata Diosï jindeesti kʼerenda juchiiti mintsiteeri ka ambe enga jindeeka para ji para méntkisï” (Sal. 73:26).
PIREKUA 32 ¡Jeobani jingoni jáma!
a Imeecha engaksï ióni páni jakaia uandanhiani o kómu p’ikuarherani, jamberiksï uétarhinchajti doktori ma jingoni nirani. Exentaakajtsï sánderu informasioni rebistarhu Aianhpiri, númeru 1, 2023 anapu.