¿Chá míteskia néna tsípikua jingoni jámani?

1. ¿Nénachi pʼikuarherasïni imani ambe jimbo engajtsïni Tata Diosï Jeoba íntskujka ka arhikuekasïni eskachi no ma ambe jimbo jatsiska para uandanhiani?

ENGA chá jánguarhintajka jukaparharani imani ambe engaksïni Tata Diosï Jeoba íntskujka, chájtsï tsípikua jingoni jámasïnga ka pínandikua jatsini. Ísï jimbo, nójtsï ikiasïnga nijtu kurhurjaxeni imani ambe jimbo engajtsï no jatsika. Joperu i ambe no arhikuekasïndi eskachi no sáni uandanhiauaka, sánderu sési, jatsiskachi para sánderu jánguarhintani sési marhuakuni Tata Diosï Jeobani (Rom. 12:1; 1 Tim. 3:1). Ka nájkirukachi iáiasï no jatsiaka máru responsabilidadiichani Tata Diosï Jeobaeri kúnguarhikuarhu, seguiriixakachi tsípikua jingoni jámani.

2. ¿Ambechi úpirini niátani engachi no tsípini jauaka imani ambe jingoni engachi jatsika?

² Engachi no tsípini jaka imani ambe jingoni engachi jatsika, ueenaakachi imani ambe niátani enga no sési jaka. Pori ejemplu, máru erachiichaksï niárasïndi kánikua ánchikuarhini paraksï piaani imani ambe engaksï no uétarhinchajka. Ka máruksï niárasïndi sentabu sïpani ka máteru ambe engaksï tsitijka. Jamberiksï eratsejti: “I juchiitipirindi”, “Ini ambesïni uétarhinchani jaka” o “Uaaka pʼikuni sentabuni ka tátsekua juánguni”. Joperu Tata Diosï Jeoba kánikua no sési exesïndi engachi pʼikujka ambe ma enga no juchaariijka jimboka kánikua no sési pakatasïnga imeeri nombrini (Prov. 30:9). Ka máteru erachiichaksï niárasïndi jurajkuni Tata Diosï Jeobani jimbokaksï no méni intsïnhasïnga imani responsabilidadini engaksï uékeenga (Gal. 6:9). ¿Néna tekaasïni erachi o pirenchi ma indeni ambe niátani? Jamberi sánhani arhipti nóteru tsípikua jingoni jámania ka jimbosï ísï niátajti.

3. ¿Nénajtsïni sési pʼikuastantasïni Filipusï 4:11, 12?

³ Jamberichi úkua jukanchaaka tsípikua jingoni irekani jimbokachi no uánikua ambe jatsikuarheska, joperuchi jatsiska para míteni néna tsípikua jingoni jámani ka uaakachi ísï úni. Asta apostoli Pablu jamberi uandaspti: “Ji jorhenguarhiskia tsípini ambe uéjkini nitamakuarhini jarhani” (arhinta je Filipusï 4:11, 12 ka nota). Jiáni enga apostoli karapka ini ambe ónhakuarhetixapti, joperu seguirixapti tsípikua jingoni jámani. Ambe enga ima uandapka ka ambe enga nitamakuarhipka, exerasïndijtsïni eskachi juchajtu uaaka tsípikua jingoni jámani nájkirukachi ménisï úkua jukanchani jauaka. Ini artikulu jimbochi exeaka tanimu ambe engajtsïni jarhuataaka tsípikua jingoni jámani.

JU JE DIOSMAIAMUKUA ARHIJPINI

4. ¿Andichisï sési pʼikuarherajki engachi diosmaiamukua arhijpijka? (1 Tesalónika 5:18).

⁴ Uaachi sánderu tsípini engachi pʼindespka méntkisï diosmaiamukua arhijpini iámu ambe jimbo (arhinta je 1 Tesalónika 5:18). Pori ejemplu, engachi mintsita jingoni diosmaiamukua arhiaka Tata Diosï Jeobani jimbokajtsïni íntskuxaka iámindu ambe engachi xáni uétarhinchani jaka, nóteruchi eratseakia imani ambe engachi no jatsika. Ka engachi jukaparharaaka na engachi marhuakuni jaka iásï Tata Diosï Jeobani, inde ambejtsïni jarhuataati exeni nénachi úpirini sánderu sési marhuakuni ka no masi imani responsabilidadiichani eratseani jarhani engachi tsitipiringa jatsiani. ¡Jimbosï Biblia uandajti eskachi diosmaiamukua arhiaka Tata Diosï Jeobani méni engachi kómarhiaka! Engachi pʼindeaka diosmaiamukua arhijpini Tata Diosïjtsïni íntskuati pínandikua, “indeni pínandikua enga no ma kʼuiripu újka jánhaskani” (Filip. 4:6, 7).

5. ¿Andiksïsï israeliteecha jatsipi para diosmaiamukua arhini Tata Diosï Jeobani? (Ístu exe je imajenini).

⁵ Ju je exeni israeliteecheeri ambe. Imeechaksï mémindu arhispti Tata Diosï Jeobani eskaksï Ejiptu anapusï tʼirekua anhencheenga (Núm. 11:4-6). Ka nájkiruka úkua jukapka desierturhisï irekani, imeechaksï úpirindi tsípikua jingoni jámani engaksï jukaparharapiringa ambe enga xáni úni japka Tata Diosï Jeoba imeecha jimbo. Jatsipirindiksï para miántani na enga Tata Diosï 10 plaguecha jingoni kastigariuapka Ejiptu anapuechani para úni petaantani israeliteechani. Antesi, Ejiptu anapuechaksï kánikua no sési kaasïreendi israeliteechani ka jántspiriksï uaaspti, joperu jiáni engaksï uéakuntapka, euasptiksï Ejiptu anapuechani kánikua plata, oru ka takusï ambe (Éx. 12:35, 36). Ístu, Tata Diosï Jeoba imeeri uinhapikuani úraspti para arhukuni mari Charhapitini ka ísïksï israeliteecha úspti sïpakuarhikuani Ejiptu anapu sondaduechani. Ka engaksï desierturhisï jámani japka, Tata Diosï Jeoba pauani pauani tʼireraasïreendi maná jingoni. Ísï jimbo, nóksï tʼirekuasï uétarhincheendi, sino jiniksïsï no agradesiduepti jimboksïsï no ueendi tsípikua jingoni irekani.

6. ¿Ambejtsïni jarhuataa parachi méntkisï diosmaiamukua arhijpini?

⁶ Parachi agradesidueni, ini ambechi jatsiska para úni, orheta, jatsiskachi para pauani pauani tiempu arhutani parachi eratsentani indeni ambe engajtsïni sési pʼikuastajka. Úpiringachi tsimani o tanimu ambe karani parachi diosmaiamukua arhini Tata Diosïni (Lam. 3:22, 23). Segundu, jatsiskachi para diosmaiamu arhiani máteruechani ka sánderia Tata Diosï Jeobani jimbokaksï uánikua ambe úsïnga juchantsïni jimbo (Sal. 75:1). Terseru, engachi imeecha jingoni kúnguarhiska engaksï pʼindeka diosmaiamukua arhijpini, juchajtuchi májkueni uaaka, joperu engachi imeechani kurhiaska engaksï no ísï újka, juchajtuchi no ísï uaaka (Deut. 1:26-28; 2 Tim. 3:1, 2, 5). Engachi jirinhakuntaska parachi diosmaiamukua arhijpini, nóchi xáni miáni jauaka imani ambe engachi no jatsika.

7. ¿Ambe jarhuataspi pirenchini para sánderu tsípikua jingoni irekani?

⁷ Ju je pirenchi Laileeria ejempluni exeni enga Indonesia irekaka. Ima uandantasïndi: “Enga pandemia COVID-19 japka, ji ueenaspka exeni na engani nitamakuarhini japka ji ka na engaksï irekani japka máteru erachiicha ka úndaspka no sési pʼikuarherani” (Gal. 6:4). Pirenchi uandantasïndi ambe enga jarhuatapka: “Ueenaspka eratsentani na engareni Tata Diosï Jeoba xáni kóndeni japka ka na engareni xáni ambakiti ambe íntskuni japka imeeri kúnguarhikuarhu, jiájkani diosmaiamukua arhispka Tata Diosï Jeobani ka i ambe úspti eskani sánderuni sési pʼikuarherantapiringa”. Eratsentani ini ejempluni, jarhuataatijtsïni parachi no no sési pʼikuarherani indeni ambe jimbo engachi nitamakuarhini jarhajka.

JU JE KAXUMBITIINI

8. ¿Ambe úkuarhinchaspi Baruki?

⁸ Ma xanhari, profeta Jeremíasiiri sekretariu, enga Baruki arhinheenga, nóteru xáni tsípikua jingoni irekaxaptia. Ima jatsispti para Jeremíasini jarhuatani ka aianguani israeliteechani ambe engaksï úkuarhinchapiringa jimbokaksï nóteru kurhajchaxapkia Tata Diosï Jeobani. Joperu Baruki ueenaspti eratseni ambe enga ima uékeenga úni ka nóteru jukaparharania ambe enga Tata Diosï Jeoba uékeenga eska úpiringa. Ísï jimbo, Tata Diosï Jeoba profeta Jeremíasini úraspti para arhini Barukini: “Joperuri tʼu kʼéri ambe jirinhani jámaxaka para t’u. Ásteru jirinhia indeni ambe” (Jer. 45:3-5). Arhikuekaxapti: “Tsípikua jingoni ireka ambe uéjkiri nitamakuarhini jarhani”. Ka Baruki kurhajchaspti jimbosï Tata Diosï seguiriini japti sési exeni.

9. ¿Ambejtsïni jorhendasïni 1 Korintu 4:6, 7? (Ístu exea je imajeniichani).

⁹ Ménisï, jamberi erachi ma eratsejti: “Ji úpiringia arini responsabilidadi intsïnhani jimbokani uánikua ambe jorhenaska úni, uinhamu ánchikuarhisïnga kúnguarhikuarhu o jimbokani ióni marhuakuskia Tata Diosï Jeobani”. Joperu ménisï máteru erachi intsïnhasïndi indeni responsabilidadini enga i erachi uékani japka. Ísï jimbo, ¿ambe jarhuataa ini erachini paraka no ikiauaka? Uaati eratsentani ambe enga apostoli Pablu karapka ixú 1 Korintu 4:6, 7 jimbo (arhinta je). Ambe engachi jucha jorhenaka úni o jatsiani máru responsabilidadiichani, Tata Diosï Jeobaeri intsïmperata máesti jimbokajtsïni ima meru kánikua xénchasïnga (Rom. 12:3, 6; Éfes. 2:8, 9).

10. ¿Ambejtsïni jarhuataa kaxumbitiini?

¹⁰ Engachi eratsentaaka na enga jámapka Jesúsi, jarhuataatijtsïni kaxumbitiini. Nájkiruka ima mítepka eska Tata Diosïiri Uájpeespka ka eska jatsispka juramukua, ima jupandukuaspti apostoliichani. Apostoli Juanu ísï karaspti Jesúsiiri ambe: “Míteparini eska Taati imani jurajkukuspka iámindu ambe ka eska Tata Diosï axaspka ka eska ménderu Tata Diosïni jingoni kʼuanhatsentapiringa, Jesúsi [...] ueenaspti jupandukuani imeeri chúxapatiichani” (Juanu 13:3-5). Jimboka mítetixapka indeni ambe, Jesúsi úpirindi uandani eskaksï apostoliichasï jatsipka para jupandukuni. Joperu no méni eratsespti eska jatsispka para kʼéri kʼumanchikua ma jimbo irekani, kánikua sentabu jatsini ka no ma ambe jimbo uandanhiani (Luk. 9:58). Joperu Jesúsi kaxumbitiispti ka tsípisïreendi imani ambe jingoni enga jatsikuarhepka. Jesúsijtsïni ambakiti ejemplu ma jurajkuchesti (Juanu 13:15).

11. ¿Ambe jarhuataski Dennisini para sánderu tsípikua jingoni jámani?

¹¹ dennis enga Holanda anapueka, uandantasïndi eska ima jánguarhintasïnga májkueni kaxumbitiini eska Jesúsi joperu eska ménisï úkua jukanchasïnga. Ima uandantasïndi: “Engani exejka eska máteru erachi intsïnhaska imani asignasionini engani ji uékani japka, kómu pʼikuarherasïnga ka sáni ikiani. Ka engani ini ambe nitamakuarhini jarhajka, jorhenguarhisïnga kaxumbikueri ambe. Ka jimbokani aplikasionirhu JW Library^® jimbo uánikua tekstuechani etiketa ma jatsikuaska engaksï kaxumbikueri ambe uandajka, sóntkuni exeantasïnga ka ménderuni arhiantasïnga. Ístuni telefonurhu uánikua diskursuechani kaaxaka engaksï indeeri ambe uandajka ka jimbosïni someni kurhauajka.b Jorhenguarhiskia eska iámindu ambe engachi újka jindeeska para Tata Diosï Jeobani kʼéri ambe arhini ka no para ma kʼéri ambe exenhani. I ánchikuarhita Tata Diosï Jeobaeriisti ka imajtsïni jurajkusïndi parachi jarhuatani sáni”. Ísï jimbo, engachi ménisï niáraska ísï pʼikuarherani eska i erachi, ju je jánguarhintani kaxumbitiini ka engachi ísï úska, sánderuchi sési pájperaaka Tata Diosï Jeoba jingoni ka sánderuchi tsípikua jingoni jámaaka (Sant. 4:6, 8).

JU JE ERATSENTANI NA ENGACHI SÉSI IREKAAKA SÁNDERU ORHEPANI

12. ¿Ambejtsïni jarhuataa tsípikua jingoni irekani? (Isaías 65:21-25).

¹² Tata Diosï Jeobajtsïni aiachisti eskachi sánderu orhepani kánikua sési irekaaka ka engachi eratsentaaka ini ambe, jarhuatatijtsïni tsípikua jingoni jámani ambe uéjkichi nitamakuarhini jarhani. Profeta Isaíasi karaspti eska Tata Diosï Jeoba kurhangusïnga eskachi ini parhakpini jimbo niárasïnga uandanhiani, joperu ístujtsïni aiachistia eska no ióni jimbo kʼamajkuaka iámindu ambe engajtsïni uandanhiatajka (arhinta je Isaías 65:21-25). Jimbanhi parhakpinirhu, iáminduechachi sési járhati kʼumanchikuechani jatsiauaka ka kʼérati, tsípikua jingonchi ánchikuarhiaka ka imani ambechi auaka enga kánikua áspika ka engajtsïni no no sési úchiaka. Nóteruchi méni chéakia jimbokachi nóteru no sési nitamakuarhiakia ka nijtu juchaari sapiicha (Is. 32:17, 18; Ezeq. 34:25). Ambakiti ambechi jatsikuarheaka ka i ambe meru niárati ísï úkuarhini.

13. ¿Ambechi niárasïni nitamakuarhini ka nénajtsïni jarhuataa engachi eratsentaska na engachi irekaaka sánderu orhepani?

¹³ Jimbokachi últimu jurhiatikuecha jimbo irekaxaka ka jatsinchi para tekaantani, uétarhisïndi eskachi pauani pauani eratsentaaka na engachi irekaaka sánderu orhepatini (2 Tim. 3:1). Ka Tata Diosï Jeobajtsïni jarhuatasïndi tekaantani jimbokajtsïni arhisïnga ambe engachi jatsika para úni, íntskusïndijtsïni uinhapikua ka ambe engachi xáni uétarhinchajka (Sal. 145:14). Ka ístu nájkirukachi jatsijka para kánikua ánchikuarhini para úni tʼirekua ambe piáni, xukuparhakua ambe o kʼumanchikua ma, Tata Diosï Jeobajtsïni aiachisïndi eskachi no méntkisï ísï irekaka jimboka jimbanhi parhakpinirhu, imajtsïni íntskuati iámindu ambe (Sal. 9:18; 72:12-14). Ístu, nájkirukachi iásï kʼéri pʼamenchakua ma jatsika, pauani pauani pʼamerhikuarhini o depresioni kamani, no arhikuekasïndi eskachi méntkisï ísï irekaka, jimbokajtsïni Tata Diosï Jeoba aiachiska eska jimbanhi parhakpinirhu nóteru jauakia pʼamenchakua ni uarhikua (Apok. 21:3, 4). Iámindu ambe engajtsïni Tata Diosï aiachikia, jarhuatasïndijtsïni no xáni uandanhiani ka no ikiani jarhani na uéjkichi nitamakuarhini jarhani iásï. Ísï jimbo, nájkirukajtsïni nema no sési kámaaka ochi pʼamenchani jarhani ochi uarhiranchani nemani, mítetixakachi eskachi uaaka tsípikua jingoni irekani. Ambe uéjkichi nitamakuarhini jarhani iásï, míteskachi eska inde ambe ariskusï nitamaaka ka eskachi nóteru méni kómu nitamakuarhiakia jimbanhi parhakpinirhu (2 Kor. 4:17, 18).

14. ¿Nénachi uaa sánderu mintsikani imani ambe engachi erokuarhini jaka?

¹⁴ Ísï eska kʼuiripu ma na uétarhinchajka lentiichani para sánderu sési exeni, juchajtuchi jatsiska para jánguarhintani sánderu mintsikani ambe engachi erokuarhini jaka ka exeni eska Paraisu axuterku jarhaskia. Engachi uandanhiani jauaka sentabu ambe jimbo, uaakachi eranhaskani na engachi irekaaka jiáni engachi nóteru uétarhinchaakia sentabu, níteruchi kántspenia ka níteru kómu jámania. Ka engachi no sési pʼikuarherajka jimbokachi no intsïnhaxaka responsabilidadi ma engachi uéjka, uaakachi eratseni eskachi jimbanhi parhakpinirhu nóteru jamberi miáuakia jimbokachi perfektueuakia ka uánikua uéxurhinchi páni jauakia marhuakuni Tata Diosï Jeobani (1 Tim. 6:19). Ka jamberichi iásï úkua jukanchajka eratsentani na engachi irekuarhiaka sánderu orhepani jimbokachi uánikua uandanhiateechani jatsiaska. Joperu engachi pʼindeska indeni ambe eratsentani, tátsekuachi nóteru xáni úkua jukanchaakia.

15. ¿Ambeksïni jorhendasïni pirenchi Cristali?

¹⁵ Ju je jorhenguarhini pirenchi Cristaliiri ambe, i pirenchi Dennisiiri témbeesti, erachi engachi párrafu  11 jimbo uandaka. Pirenchi uandantasïndi: “Pʼamenchakua ma kámasïnga engareni pauani pauani sánderu chkérajka jimbosïni siia de rueda jimbo jámajka ka puru kamarhu jarhasïnga ka méntkisï pʼamerhikuarhini jarhasïnga. Nótki xáni ióniisti engari doktorini arhika eskani nóteruni uaakia sési pʼikuarherantani. Engareni ísï arhipka, ji eratsespka: ‘I doktori no exexati na engani irekuarhiakia sánderu orhepatini’. I amberini jarhuatasïndi sési pʼikuarherantani. Iáiasï solu jatsiska parani tekaantani, joperu jimbanhi parhakpinirhu meru kánikua sési irekuarhiaka!”.

‘NO MA AMBE KUERATAKUASÏNDI IMEECHANI ENGAKSÏ CHÉNHARHIJKA’

16. ¿Andisï Dabidi uandapi eska ‘no ma ambe kueratakuasïnga imeechani engaksï chénharhijka’ Tata Diosï Jeobani?

¹⁶ Nájkirukachi jánguarhintaaka tsípikua jingoni irekani, siemprichi jatsiauaka uandanhiateechani. Ísï eska rei Dabidi, ima tanimu uájpeechani uarhiranchaaspti, chkuanderakua ambeksï jauatakuspti, imeeri amigu jémbeechaksï traisionarispti ka rei ma ióni jámaspti jirinhantani para uándikuni. Nájkiruka Dabidi ini ambe nitamakuarhipka ima jánguarhintasïreendi tsípikua jingoni irekani. Asta ísï uandaspti Tata Diosï Jeobaeri ambe: ‘No ma ambe kueratakuasïndi imeechani engaksï chénharhijka’ (Sal. 34:9, 10). Dabidi ísï uandaspti jimboka mítespka eska nájkirukajtsïni Tata Diosï Jeoba no kénditacheajka problemeechani, imajtsïni méntkisï íntskusïndi ambe engachi meru uétarhinchani jarhajka (Sal. 145:16). Ísï jimbo, májkueni eska Dabidi, juchajtuchi tsípikua jingoni irekasïnga jimbokachi seguru jarhaska eska Tata Diosï Jeoba juchantsïni jingoni jauaka ambe uéjkichi nitamakuarhini jarhani.

17. ¿Chá andisï uéjki méntkisï tsípikua jingoni jámani?

¹⁷ Tata Diosï Jeoba uékasïndi eskachi tsípikua jingoni irekaaka ambe uéjkichi nitamakuarhini jarhani (Sal. 131:1, 2). Ka iásï engachi mítekia ambe engajtsïni jarhuataaka, ju je jánguarhintani diosmaiamukua arhijpini, kaxumbitiini ka eratsentani na engachi xáni sési irekaaka sánderu orhepani ka jiáni kʼóruchi uaaka uandani: “Ji jorhenguarhiskia tsípini jarhani” (Filip. 4:11).