SEMANA 34
PIREKUA 3 Jeoba, tʼuri jíndeni jingoni jarhaska
Seguru ja eskakeni Tata Diosï Jeoba puáchentaskia
“T’urini puácheantaska pekaduechani ka ambe engani no sési úka” (SAL. 32:5).
AMBE ENGACHI JORHENGUARHIAKA
Exeakachi na engajtsïni Biblia jorhendajka eska Tata Diosï Jeoba puákuantasïnga imeechani engaksï sési jimbo moántajka ka andisï xáni jukaparhakue eskachi seguru jauaka eska ísïiska.
1, 2. ¿Ambe úsïni Tata Diosï Jeoba engachi moántajka ka nénachi niárasïni pʼikuarherani? (Ístu exe imajenini enga jaka).
REI Dabidi kánikua no sési pʼikuarheraspti imani ambe jimbo enga no sési niátapka (Sal. 40:12; 51:3; enkabesamientu). Joperu enga ima mintsita jingoni móantapka Tata Diosï puákuntaspti (2 Sam. 12:13). Ka enga Dabidi na kurhangupkia eska Tata Diosï Jeoba puákuntaspka, ima kánikua sési pʼikuarhenhintaspti ka tsípispti (Sal. 32:1).
2 Ísï eska Dabidi na kánikua sési pʼikuarhenhintapka ka tsípini, juchajtuchi májkueni pʼikuarheraaka engachi sési jimbo móantaska. Kómarhini Tata Diosïni eskajtsïni puáchentaaka, uandontskuarheni orhejtsïkutiicha jingoni ka jánguarhintani nóteru imani ambe únia, Tata Diosï Jeobajtsïni puáchentaati jimboka ima exeaka eskachi mintsita jingoni moántaskia (Prov. 28:13; Úku. 26:20; 1 Juanu 1:9). Ka kánikuachi sési pʼikuarharasïnga míteni eskajtsïni Tata Diosï mátirku borrarichesïnga pekaduni engajtsïni puáchentajka ka ísï exesïndi enajkichi no méni no sési ambe niáta (Ezeq. 33:16).
Rei Dabidi uánikua pirekuechani uaantaspti engaksï uandajka na engajtsïni Tata Diosï Jeoba puáchentajka. (Exea párrafuechani 1, 2).
3, 4. ¿Néna pʼikuarherasïreeni Jennifer ka ambechi exeni jaua ini artikulu jimbo?
3 Joperu, ménisï úkua jukaati jakajkuni eskajtsïni Tata Diosï Jeoba puáchentaskia. Ísïsï pʼikuarhereendi Jennifer. Enga ima sapichuepka, taati jémbeechaksï jorhendaspti Tata Diosï Jeobaeri ambe, joperu enga kʼépkia, ima ueenaspti sïpatikuarku no sési ambe niátani. Ka ísï ióni jimbo, ménderu ueenaspti jorhenguarhini Tata Diosï Jeobaeri ambe ka niáraspti itsï atakuarhini. Jennifer uandantasïndi: “Ísku jándikua ambe niátasïreenga ka tsitisïreenga jatsikuarhekua ambe, kauisïreenga ka iámu ambe jimbo kurhurjaxeni. Ji mítespkia eska Biblia uandasïnga eskajtsïni Tata Diosï Jeoba puácheantasïnga pekaduechani tata Jesukristueri uarhikua jimbo. Joperuni meru no úsïreenga jakajkuni eska ima ísï úpiringa nájkirukani móantapkia ka arhini eskarini puáchentapiringa”.
4 Jamberiri tʼujtu ménisï eratsejka eskakeni Tata Diosï Jeoba no puáchentaxaka ima amberi engari úpka. Joperu miá, ísï eska Dabidi, uaakari seguru jarhani eska Tata Diosï pʼamojpitiiska ka eska puátspentasïnga. Ini artikulu jimbo exenchi jauaka andisï xáni jukaparhakue seguru jarhani eskajtsïni Tata Diosï Jeoba puáchentaskia ka ambejtsïni jarhuataa meru jakajkuni eska ísï úskia.
¿ANDICHISÏ JATSI PARA SEGURU JARHANI ESKAJTSÏNI TATA DIOSÏ JEOBA PUÁCHENTASKIA?
5. ¿Ambe uékasïni Satanási eskachi jakajkuaka? Úra je ejemplu ma.
5 Engachi seguru jauaka eskajtsïni Tata Diosï Jeoba xénchasïnga ka eskajtsïni puáchentasïnga, nóchi jakajkuaka Satanásiiri chkuanderakuechani. Satanási ambe uéjki úsïndi parachi nóteru marhuakunia Tata Diosï Jeobani. Pori ejemplu, ima uékasïndi eskachi jakajkuaka eskajtsïni Tata Diosï no méni puáchentaaka engachi no sési ambe niátaaka. Ju je exeni ambe enga nitamakuarhipka Korintu anapu acheeti ma enga ísku jándikua ambe niátapka ka enga petanhantapka kúnguarhikuarhu (1 Kor. 5:1, 5, 13). Ísï tátsekua ima móantaspti, joperu Satanási no uékasïreendi eskaksï erachiicha puákuntapiringa ni eska kʼuanhatsentapiringa kúnguarhikuarhu. Ka enga ísï úkuarhipiringa, Satanásini sési uérakupirindi jimboka ima achamasï niárapiringa ísï eratseni eska meru no sési ambe úspka ka eska Tata Diosï no méni puákuntapiringa. Jiájkani nóteru marhuakupirindia Tata Diosï Jeobani jimboka ‘jukari kómu pʼikuarherani japiringa ka niárani kuatantani’. Noambakiti seguirixati májkueni ambe úrani, jimboka ima uékasïnga eskachi nóteru marhuakuakia Tata Diosï Jeobani. Joperuchi jucha sési mítetixaka ‘na enga xáni mámaru ambe jirinhakuntajka’ (2 Kor. 2:5-11).
6. ¿Ambejtsïni jarhuataa nóteru no sési pʼikuarherania?
6 Engachi seguru jarhajka eskajtsïni Tata Diosï Jeoba puáchentaskia, nóteruchi no sési pʼikuarhenhisïngia. Engachi no sési ambe újka, sésiisïndi engachi no sési p’ikuarherajka jimboka inde ambe xarhatasïnga eskajtsïni juchaari konsiensia jarhuataaka mójtakurhini ka imani ambe úni enga sési jaka (Sal. 51:17; 2 Kor. 7:10, 11). Joperu engachi móantakia ka útasïchi seguiriini jarhani no sési p’ikuarherani, inde ambe uaati eskachi nóteru marhuakuakia Tata Diosï Jeobani. Engachi seguru jauaka eskajtsïni ima puáchentaskia, uaakachi mirikurhini ambe engachi no sési úpka ka seguiriinchi jánguarhintani marhuakuni. Ka engachi ísï uaaka, tsípikua jingonchi marhuakuaka Tata Diosï Jeobani ka juchaari konsiensia sési jauati (Kol. 1:10, 11; 2 Tim. 1:3). Iásï, ju je exeni ambejtsïni jarhuataa mintsita jingoni jakajkuni eskajtsïni Tata Diosï Jeoba puáchentaskia.
¿AMBEKINI UAA JARHUATANI SEGURU JARHANI ESKAKINI TATA DIOSÏ JEOBA PUÁCHENTASKIA?
7, 8. ¿Ambe uandaspi Tata Diosï Jeoba imeeri ambe Éxodo 34:6, 7 jimbo, ka ambeerichi uaa seguru jarhani?
7 Eratsenta ambe enga Tata Diosï Jeoba uandajka imeeri ambe. Exe ambe enga arhipka Moisésini juáta Sinaí jimbo (arhinta Éxodo 34:6, 7).a Tata Diosï Jeoba úpirindi mámaru ambe arhini Moisésini, joperu solu arhispti eska ‘pʼamojpitiiska ka eska sési kámpisïnga’. Jiájkani, ¿t’u exesïni eska ima no uékapiringa puákuntani imani enga mintsita jingoni xénchajka ka enga moántakia? ¿A no eska ima puákuntapiringa jimboka kánikua pʼamojpisïnga?
8 Enga Tata Diosï Jeoba arhijka eska ima pʼamojpitiiska uaakachi seguru jarhani eska ísïiska, jimboka ima no méni chkuanderasïnga (Sal. 31:5). Joperu engari úkua jukanchajka jakajkuni eskakeni Tata Diosï Jeoba puáchentaskia, eratsenta arini ambe: engari seguru jaka eska Tata Diosï Jeoba pʼamojpitiiska ka puákuantani iáminduechani engaksï moántajka jimboka sési kámpisïnga, tʼujturi uaaka seguru jarhani eskakeni tʼungintu puáchentaskia.
9. ¿Ambejtsïni jorhendasïni Salmo 32:5 na enga Tata Diosï Jeoba puátspentajka?
9 Eratsenta na engajtsïni Tata Diosï Jeoba puáchentajka. Pori ejemplu, Dabidi arhispti Tata Diosï Jeobani: “Tʼurini puácheantaska pekaduechani ka ambe engani no sési úka” (arhinta Salmo 32:5). Uandakua ebreu enga ístu tradusirikuarhijka “puátspentani” ístu arhikuekasïndi “páni” o “tarhatani”. Ísï jimbo, enga Tata Diosï Jeoba puákuntapka Dabidini, ima pʼíjtsamaspti ka kánikua sési pʼikuarheraspti jimboka ísïispka enajki Tata Diosï Jeoba kʼuetsapiti ambe euaparhakupi ka ima páni (Sal. 32:2-4). Ka juchajtuchi uaaka májkueni sési p’ikuarherani eska Dabidi engachi sési jimbo móantaska. Nóteruchi jatsiskia para no sési p’ikuarherani imani ambe jimbo engachi úpka, sánderu sési, uaakachi sési p’ikuarherani jimbokajtsïni Tata Diosï Jeoba sési jimbo puáchentaskia.
10, 11. ¿Ambejtsïni jorhendasïni Salmo 86:5 Tata Diosï Jeobaeri ambe?
10 (Arhinta Salmo 86:5). Dabidi uandaspti eska Tata Diosï Jeoba ‘jingontku jarhasïnga para puátspentani’. I ambe arhikuekasïndi eska Tata Diosï Jeoba no sóntku ikiasïnga juchantsïni jingoni engachi no sési ambe újka ka ima méntkisï uékasïndi puákuantani imeechani engaksï móantajka. Ka ísï úsïndi jimboka bersikulu arhisïnga: “Kánikuari xénchaasïnga iámindu imeechani engaksïni kómarhijka parari jarhuataani”. Eskachi na exekia máteru artikulu jimbo, ima mintsita jingoni xénchaasïndi imeeri marhuariichani ka no méni jurajkuauati. Ka jimboka kánikua xénchpesïnga, inde ambe úsïndi eska mintsita jingoni puákuantauaka imeechani engaksï moántajka (Is. 55:7). Engari úkua jukanchani jaka seguru jarhani eskakeni Tata Diosï Jeoba puáchentaskia, kánikuakeni marhuacheati ísï eratseni: “Ji exeskia eska Tata Diosï Jeoba puákuantasïnga imeechani engaksï moántajka ka engaksï arhijka eska pʼamojkuauaka. Ísï jimbo, uaaka seguru jarhani eskarini jíndentu puáchentaskia”.
11 Ístujtsïni Biblia jorhendasïndi eska Tata Diosï Jeoba míteska na engachi úkata jaka ka eska kurhangusïnga eskachi imperfektueska ka inde ambe míteni sésijtsïni pʼikuastantasïndi (Sal. 139:1, 2). Ísï jimbo, exeakachi ambe enga Dabidi karapka máteru salmo jimbo, ka nénajtsïni uaa inde ambe jarhuatani seguru jarhani eskajtsïni Tata Diosï Jeoba uékasïnga puáchentani.
AMBE ENGA TATA DIOSÏ JEOBA MIÁJKA JUCHAARI AMBE
12, 13. Eska na arhijka Salmo 103:14, ¿ambe miásïni Tata Diosï Jeoba juchaari ambe, ka nénajtsïni kámasïni?
12 (Arhinta Salmo 103:14). Dabidi uandaspti eska Tata Diosï Jeoba ‘miásïnga eskachi tʼupuriska’. Ini ambe jingoni Dabidi xarhataspti eskajtsïni Tata Diosï Jeoba puáchentasïnga engachi moántajka, jimboka ima míteska eskachi imperfektueska. Ju je exeni ambe sánderu ambe uandaspi Dabidi ka ambe arhikuekasïni.
13 Dabidi karaspti eska Tata Diosï Jeoba míteska “na engachi úkata jaka”, Tata Diosï Jeoba kueraaspti Adánini tʼupuri úraparini, ísï jimbo, mítesti na engachi úkata jaka kʼuiripuecha ka ambe engachi uétarhinchajka. Pori ejemplu, uétarhinchasïngachi tʼireni, kʼuíni ka jirejtani. Ka na uéjkichi perfektueuaka, méntkisïchi uétarhinchaaka indeni ambe (Gén. 2:7). Desde jiáni enga Adáni ka Eba pekariipka, i uandakua ‘tʼupuriskachi’ ístu arhikuekasïndi eskachi sóntku no sési ambe niátasïnga, jimbosï iásï sánderu uétarhijti eskachi jánguarhintaaka no imani ambe úni enga no sési jaka. Tata Diosï Jeobajtsïni sési mítesti. Ka enga Dabidi uandapka eska ima miásïnga eskachi tʼupuriska, ístu arhikuekaxapti eska míteska eskachi pekadoriiska joperu eskajtsïni méntkisï pʼamojperakua jingoni kámasïnga ka eskajtsïni puáchentasïnga (Sal. 78:38, 39).
14. a) ¿Ambejtsïni jorhendasïni Salmo 103:12 na enga Tata Diosï Jeoba puátspentajka? b) ¿Néna xarhatasïni Dabidiiri ejemplu eska Tata Diosï Jeoba mátirku puátspentasïnga? (Exe rekuadruni “Tata Diosï Jeoba puátspentasïndi ka méntku mirikurhisïndi pekaduni”).
14 (Arhinta Salmo 103:12). ¿Ambejtsïni jorhendasïni Salmo 103 na engajtsïni puáchentajka Tata Diosï Jeoba pekaduechani? Dabidi uandaspti eska, engajtsïni Tata Diosï Jeoba puáchentajka, xáni iauani peeraasïnga juchaari pekaduechani “eska na xáni iauani jaka nani enga uérajka jurhiata asta nani enga inchajtsïkujka”. Libru ma enga íri ambe uandajka, uandasïndi eska “Tata Diosï meru iauanisï paasïnga juchaari pekaduechani, ísï jimbo, uaakachi uandani eska méntku no ma ambe pakatasïnga pekadueri níteru miájkia” (El tesoro de David, de Charles Spurgeon, volumen 2, traducción de Samuel Vila). Ménisïchi sïpirusïnga ambe ma ka miántasïngachi máru ambe. Joperu engajtsïni Tata Diosï puáchentajka, ima nóteru sáni sïpirusïndia parajtsïni miátantani jarhani ambe engachi no sési úpka (Ezeq. 18:21, 22; Úku. 3:19).
15. ¿Ambechi uaa úni engachi seguiriini jauaka no sési p’ikuarherani imani ambe jimbo engachi ióntki úpka?
15 Engari seguiriini jaka no sési pʼikuarherani imani ambe jimbo engari ióntki úpka, jarhuataatikeni eratsentani ambe enga uandajka Salmo 103 para seguru jarhani eskakeni Tata Diosï puáchentaskia. Eratsi: “Enga Tata Diosï Jeoba miájka eskani imperfektueska ka eskarini uékasïnga puáchentani jimbokani moántaskia, jíjtuni jatsiska para májkueni eratseni. Ístu, enga Tata Diosï Jeoba mirikurhikia juchiiti pekaduechani ka nóterurini méntku arhini jarhania ambe engani no sési úka, jíjtuni jatsiska parani mirikurhini”. Engakeni Tata Diosï no méntku miátantani jarhajka ambe engakeni puáchentakia, ¿andiresï tʼu seguiriini japirini miáni? (Sal. 130:3). Ísï jimbo engari na seguru jauakia eskakeni Tata Diosï Jeoba puáchentaskia nóteruri no sési pʼikuarheraakia, ka uaakari seguiriini orhepani uérani.
16. ¿Andichisï no jatsi para méntku miántani jarhani imani ambe engachi ióntki no sési úpka? (Ístu exe imajenini).
16 Eranhaska je arini ejempluni. Enga nema manejarini jarhajka karruni ma, jamberi exejti espejuni enga jindeeska para tátsepanisï exeni, joperu no méntku exeni jarhasïndi indeni espejuni jimboka úpiringa no sési úkuarhinchani. Ka paraka no ma ambe úkuarhinchaaka enga manejariini jauaka, jatsisti para méntku orhepanisï exeni jarhani. Sáno májkueni, ménichani sési japirindi eskari eratsentapiringa imani ambe engari no sési úpka, jimbokakeni uánikua ambe jorhendaaka ka ístukeni jarhuataati parari jánguarhintani no májkueni ambe úni. Joperu engari méntku imani ambe eratsentani jauaka, sánderuri no sési pʼikuarheraaka ka nóri jamberi uaaka sési marhuakuni Tata Diosï Jeobani. Ísï jimbo, méntku orhepanisï exeni ja, jo, imani xanharuni enga jimbanhi parhakpinirhu pájpejka, jima “nóteru miánhantaatia” no sési jásï ambe (Is. 65:17; Prov. 4:25).
Ima enga manejariini jarhajka no sánderu exeni jarhasïndi imani espejuni enga jindeeka para tátsepanisï exeni, sino orhepanisï exeni jarhasïndi. Juchajtuchi jatsiska para imani kóntperateechani eratseantani engachi sánderu orhepatini jatsiauaka ka no ambe engachi ióntki úpka. (Exe je párrafu 16).
JU JE SEGUIRIINI SEGURU JARHANI
17. ¿Andichisï jatsi para seguiriini jarhani jakajkutarani juchaari mintsitani eskajtsïni Tata Diosï Jeoba xénchasïnga ka puáchentani?
17 Ju je jakajkutarani juchaari mintsitani eskajtsïni Tata Diosï Jeoba xénchasïnga ka eskajtsïni uékasïnga puáchentani (1 Juanu 3:19, nota). Ka jatsiskachi para ísï úni, jimbokajtsïni Satanási seguiriini jauaka ísï exerani eskajtsïni Tata Diosï Jeoba no xénchasïnga ka eskajtsïni no méni puáchentaaka. Ima uékasïndi eskachi nóteru marhuakuakia Tata Diosï Jeobani. Ka méni enga uaaka, jánguarhintaati paraka inde ambe sési uérakuaka jimboka míteska eska no ióni jimbo kʼamajkunhaakia (Apok. 12:12). Joperu ju je méntku no jurajkuni eska sési uérakuaka.
18. ¿Amberi uaa úni parari seguru jarhani eskakeni Tata Diosï Jeoba xénchasïnga ka eskakeni puáchentaskia?
18 Máteru artikulu jimbo exeskachi ambe engakeni uaaka jarhuatani parari seguru jarhani eskakeni Tata Diosï Jeoba xénchasïnga. Ka ini artikulu jimbo exeskachi ambe engakeni uaaka jarhuatani seguru jarhani eskakeni Tata Diosï Jeoba puáchentaskia. Eratsi ambe enga uandajka Tata Diosï Jeoba imeeri ambe ka ambe enga Biblia uandajka na engajtsïni ima puáchentajka. Asï mirikurhi eska ima méntkisï miáni jarhasïnga eskari imperfektueska ka pʼamojkusïndikini. Ístu miá eska Tata Diosï Jeoba mátirku puátspentasïnga. Engari ini ambe úska, uaakari májkueni uandani eska Dabidi: “¡Diosmaiamu Tata Diosï Jeoba, jimbokarini puáchentaska ‘pekaduechani ka ambe engani no sési úka’!” (Sal. 32:5).
PIREKUA 1 Na enga jásïka Tata Jeoba
a Arhinta artikuluni “Acérquese a Dios: Jehová se describe a sí mismo” rebistarhu Aianhpiri 1 de maiu de 2009, utusï jimbo.