SEMANA 7
PIREKUA 15 Ju je kʼéri ambe arhini Jeobaeri Orheta Uájpani
Kánikuajtsïni marhuachesïndi engajtsïni Tata Diosï Jeoba puáchentajka
“Jimbokari tʼu sési jimbo puákuantasïnga kʼuiripuechani” (SAL. 130:4).
AMBE ENGACHI JORHENGUARHIAKA
Biblia uánikua imajeniichani o ejempluechani uandaasïndi engaksï xarhatajka na enga Tata Diosï Jeoba puákuntajka mándani kʼuiripuni. I jorhenguarhikuajtsïni jarhuataati sánderu sési kurhanguni ka sánderu jukaparharani na engajtsïni Tata Diosï puáchentajka.
1. ¿Andisï úkua juka kurhanguni ambe enga arhikuekajka “puáchentaskakinia”?
ENGAJTSÏNI nema arhijka: “Puáchentaskakinia”, ¿a no eskajtsïni kánikua sési pʼikuastasïnga? Joperu, ¿ambe arhikuekasïni inde uandakua “puáchentaskakinia”? Máru kʼuiripuechaksï ísï uandasïndi paraksï xarhatani eskaksï mirikurhiskia ambe enga úkuarhipka ka eskaksï no méni arhirperaspka máteru kʼuiripu jingoni. Joperu máteruechaksï uandasïndi: “Puáchentaskakinia, joperu ixú para orhepatini nóteru májkueniuatia”.
2. ¿Néna uandasïni Biblia na enga puátspentajka Tata Diosï Jeoba? (Ístu exe je notani).
2 Joperu no ma kʼuiripu ísïisti eska Tata Diosï Jeoba. Ima kánikua ménderueniisti. Salmista ma uandaspti: “Jimbokari tʼu sési jimbo puákuantasïnga kʼuiripuechani, úsïngari eskaksïni imeecha chénharhiaka” (Sal. 130:4).a No nema ísï puátspentasïndi eska Tata Diosï Jeoba, jimboka ima sési jimbo puátspentasïnga. Ísï jimbo, engachi uéjka kurhanguni ambeeski sési jimbo puátspentani, jatsiskachi para exeni na enga puátspentajka Tata Diosï. Karakateecha engaksï Ebreu jimbo karanhaaka, ménichani uandakua ma úrakuarhesïndi para xarhatani na enga puátspentajka Tata Diosï Jeoba, ka no méni úrakuarhesïndi para kʼuiripuni ma arhikuekani.
3. ¿Andisï no májkuenii na enga puátspentajka Tata Diosï Jeoba ka eska kʼuiripuecha? (Isaías 55:6, 7).
3 Enga Tata Diosï Jeoba puákuntajka nemani, borrariuasïndi iámindu imeeri pekaduechani ka jurajkusïndi paraksï ménderu sési pájperantani imani jingoni. Tata Diosï Jeoba iámu mintsita jingoni puátspentasïndi. ¿No ísïiski eskajtsïni inde ambe kánikua sési pʼikuastasïnga? (Arhinta je Isaías 55:6, 7).
4. ¿Nénajtsïni jarhuatasïni Tata Diosï Jeoba kurhanguni ambe enga arhikuekajka sési jimbo puátspentani?
4 Tata Diosï Jeoba kánikua ménderueni puátspentasïndi ka no ísï eska jucha engachi imperfektueka. Imajtsïni jarhuatasïndi sési kurhanguni ambe enga arhikuekajka puátspentani ka úraasïndi máru imajeniichani o ejempluechani engaksï Bibliarhu jaka parajtsïni jarhuatani sési kurhanguni. Ini jorhenguarhikua jimbochi exeani jauaka ejempluechani engajtsïni jarhuatajka kurhanguni ambe enga xáni újka Tata Diosï Jeoba para borrariuani juchaari pekaduechani ka ístu ambe enga újka parachi ménderu sési pájperantani imani jingoni. Engachi jorhenguarhiaska ini ejempluechani, jarhuataatijtsïni sánderu xénchani ka agradeserikuni juchaari Taatini Tata Diosï Jeobani jimbokajtsïni ima uánikua xanhari puáchentasïnga.
TATA DIOSÏ JEOBA IAUANISÏ PAASÏNDI PEKADUECHANI
5. ¿Ambe úsïni Tata Diosï Jeoba engajtsïni puácheantajka juchaari pekaduechani?
5 Biblia, uánikua xanhari uandasïndi eskaksï pekaduecha ísïiska komueska ambe ma enga kánikua kʼuetsapeka. Pori ejemplu, rei Dabidi uandaspti: “Jimbokani méntku miáni jarhasïnga imani ambe engani no sési úka; kʼuetsapeti ambeesti, kánikuamendu kʼuetsapesti para ji” (Sal. 38:4). Joperu Salmo 25:18; 32:5 uandasïndi eska Tata Diosï Jeoba puákuantasïnga imeechani engaksï móantajka. Uandakua enga ebreu jimboeka ka enga ísï tradusirikuarhijka komu “puácheantarini” arhikuekasïndi “tarhatani” o “páni”. I ambe úsïndi eskachi ísï eranhaskaaka Tata Diosï Jeobani komueska uiuinhasï achamasï ma engajtsïni euaajka juchaari pekaduechani ka ima paani.
“Puácheantarini [“tarhataa” o “paa”]” (Sal. 25:18).
6. ¿Nani paasïni Tata Diosï Jeoba juchaari pekaduechani?
6 Joperu, ¿nani paasïni Tata Diosï Jeoba juchaari pekaduechani? Salmo 103:12 jarhuatasïndijtsïni kurhanguni: “Ísï eska na xáni iauani jaka nani enga uérajka jurhiata asta nani enga inchajtsïkujka, xáni iauani peeraasti juchaari pekaduechani”. Jima enga uérajka jurhiata ka nani enga inchajtsïkujka, kánikuaksï jarharperatixati ka juchachi no úsïnga jánhaskani na enga xáni iauaniika. Jimajkani i bersikulujtsïni jorhendasïndi eska Tata Diosï Jeoba meru iauanisï paasïnga juchaari pekaduechani engajtsïni puáchentajka, jo, jima peeraasïndi engachi jucha no újka jánhaskani. ¿A no eskajtsïni i ambe kánikua sési pʼikuastantasïnga?
“Ísï eska na xáni iauani jaka nani enga uérajka jurhiata asta nani enga inchajtsïkujka” (Sal. 103:12).
7. ¿Nénajtsïni kurhangutarasïni Tata Diosï Jeoba ambe enga újka juchaari pekaduecha jingoni? (Miqueas 7:18, 19).
7 Enga Tata Diosï Jeoba iauanisï paajka juchaari pekaduechani, ¿arhikuekasïni eska ima útasï miáni jarhasïnga ambe engachi no sési úka? Nómbe, jimboka rei Esekíasi uandaspka: “Tʼuri tátsepani peeraaska iámindu juchiiti pekaduechani” o ísï eska nota na uandajka, “Nóteruri exeaxakaia imani pekaduechani engani ji uaapka” (Is. 38:9, 17; nota). Ísï jimbo, jiáni engachi jucha móantajka, Tata Diosï Jeoba tarhataasïndi juchaari pekaduechani ka iauanisï kʼuanikuasïndi jima enga nóteru méni exeauakia. Inde tekstu ístu úpirindi ísï tradusirikuarhini: “Ísïri exesïnga enajkini ji no méni no sési ambe niáta”. Ka Tata Diosï Jeobajtsïni jarhuatasïndi sánderu sési kurhanguni indeni ambe imani ambe jimbo enga Miqueas 7:18, 19 uandajka (arhinta je). Jimini arhisïndi eska ima marirhu kʼuanimaasïnga juchaari pekaduechani astakaksï andamieraaka. Ióntki, enga ambe ma marirhu andamiereenga, nóksï méni úsïreendi pʼímantani.
“Tʼuri tátsepani kʼuanikuaska iámindu juchiiti pekaduechani” (Is. 38:17).
“Tʼuri marirhu kʼuanimauaka iámu juchaari pekaduechani, jima enga sánderu jauameka” (Miq. 7:19).
8. Ixú jamberi, ¿ambechi jorhenguarhiskia?
8 Ini ejempluecha jingonchi exeskia eska Tata Diosï Jeoba paasïnga juchaari pekaduechani ka ísïjtsïni kénditacheni kʼuetsapiti ambe jimbokajtsïni puáchentasïnga. Jimbosï Dabidi uandapti: “Tsípisïndiksï imeecha enga Tata Diosï puákuantakia ambe engaksï no sési niátaka ka enga mirikurhikia [o ójchakuraakia] imeecheeri pekaduechani; tsípisïndi ima kʼuiripu enga Tata Diosï Jeoba méntku no miáuaka ambe enga ima no sési niátaka” (Rom. 4:7, 8). ¡Ísïsï jindeeti puátspentani!
TATA DIOSÏ JEOBA BORRARIUASÏNDI PEKADUECHANI
9. ¿Tata Diosï Jeoba náki ejempluni úrasïni parajtsïni jarhuatani kurhanguni na engajtsïni xáni puáchentajka?
9 Iásï ju je exeani máteru ejempluechani engaksï Bibliarhu jaka ka engajtsïni jarhuatajka kurhanguni na enga Tata Diosï Jeoba iámu borrariuajka imeecheeri pekaduechani engaksï móantajka, ka ísï úsïndi jimbokajtsïni euajpintaska. Pori ejemplu, Biblia uandasïndi eska Tata Diosï Jeoba juparhiantaasïnga ka kutsurhiantani pekaduechani, ka ísï pímbinhajkuntasïndi imani enga no sési ambe niátaka (Sal. 51:7; Is. 4:4; Jer. 33:8). Ka Tata Diosï Jeoba mismujtsïni aiangusïndi na engajtsïni jájkuntajka: “Nájkirukaksï chaari pekaduecha ísïiuaka komueska charhapiti ambe, urapintaatiksï komueska niebi; nájkirukaksï ísïiuaka komueska takusï charhapiti, ísïksï pakaraati komueska lana” (Is. 1:18). Kánikua úkua jukasïndi sési jájkuntani takusïni ma enga no sési jáxejka, sánderia enga charhapiti ambe jáxejka. Ini ejemplu jingoni, Tata Diosï Jeobajtsïni arhixati eska ima úsïnga tʼuputʼupujkuantani juchaari pekaduechani o kénditaani paraksï méntku nóteru xarharania.
“Nájkirukaksï chaari pekaduecha ísïiuaka komueska charhapiti ambe, urapintaatiksï komueska niebi” (Is. 1:18).
10. ¿Náki máteru ejemplu úrasïni Tata Diosï Jeoba parajtsïni jarhuatani kurhanguni eskajtsïni ima mintsita jingoni puáchentasïnga?
10 Eskachi na uandapka máteru jorhenguarhikua jimbo, pekaduechaksï ísïisti komueska kántsperateecha (Mat. 6:12; Luk. 11:4). Ísï jimbo, méni engachi no kurhajchajka Tata Diosï Jeobani ísïisïndi komu seguiriini jarhani sentabu kánguni. Joperu engajtsïni ima puáchentajka, ísïisïndi komu kuerajchani, jo, imajtsïni nóteru uékasïndia kobrariini. Engajtsïni ima na puáchentajkia, nóteru uékasïndia eskachi maiamuntaaka. ¿A no eskajtsïni kánikua sési pʼikuastasïnga kurhanguni na engajtsïni puáchentajka Tata Diosï Jeoba?
“Puáchentajtsïni imani ambe jimbo engachi no sési újka” (Mat. 6:12).
11. ¿Ambe arhikuekasïni Bibliarhu enga uandajka eskachi nóteru exeminhaasïngia pekaduechani? (Úkuecha 3:19).
11 Tata Diosï Jeoba no solu ústi eskachi nóteru kántspeakia, sino ístujtsïni nóteru exechiasïndia pekaduechani (arhinta je Úkuecha 3:19). Uandakua griegu enga ísï tradusirikuarhijka komu “nóteru exeminhauakia”, arhikuekasïndi “borrariminhaani”. Pori ejemplu eranhaska je eskachi sentabu kánguxaka kʼuiripuni ma, joperu ima sïrandarhu jatsikusïndi eskachi nóteru ma kánguxakaia, ka nájkiruka indeni ambe újka, seguiriini jarhasïndi xarharani na engachi xáni kánguni japka. Joperu Tata Diosï Jeoba no ísï úsïndi, ima méntku borrariuasïndi juchaari pekaduechani. Parachi sánderu sési kurhanguni, ju je miántani eska ióntki tinta ma jingoni karanhasïreenga enga karboni, goma ka itsï jingoni úkata japka jimbosï xani fásiliuendi borrarini esponja ma jingoni. Ísï jimbo, enga kántsperata ma borrarinheenga, méntku nóteru xarharasïreendia ka nóteru nema úsïrendia exeni ambe enga karakata japka. Ísïisïrendi enajki no méni karanhapirini. Kánikuachi agradeseriisïnga engajtsïni Tata Diosï Jeoba ísï puácheantajka juchaari pekaduechani ka méntku borrariuani (Sal. 51:9).
“Parakajtsï nóteru exeminhauakia [o “borrariminhauakia”] chaari pekaduechani” (Úku. 3:19).
12. ¿Náki máteru ejemplu úrasïni Tata Diosï Jeoba ka ambejtsïni jorhendasïni?
12 Isaías 44:22 jimbo, Tata Diosï Jeoba úrasïndi máteru ejempluni para xarhatani ambe enga újka juchaari pekaduecha jingoni: “Uaaka eska nóteru xarharaakia ima ambe engari no sési úka, nube ma jingoni ójchakuraaka, ka ójchakurauaka chiiti pekaduechani kʼéri nube ma jingoni”. Engajtsïni Tata Diosï Jeoba puácheantajka juchaari pekaduechani, ísïisïndi enajki kʼéri nube ma ójchakuraajki paraka nóteru nema uaakia exeani.
“Uaaka eska nóteru xarharaakia ambe engari no sési úka, nube ma jingoni ójchakuraaka” (Is. 44:22).
13. ¿Nénachi pʼikuarherasïni engajtsïni Tata Diosï Jeoba puáchentajka pekaduechani?
13 ¿Ambechi jorhenguarhisïni ini ejempluecha jingoni? Eskachi nóteru jatsiskia para no sési pʼikuarherani jarhani juchaari pekaduecha jimbo jimbokajtsïni Tata Diosï Jeoba puáchentaskia. Juchaari kántsperateechaksï maiampinhastia tata Jesukristueri iurhiri jimbo. Ísï jimbo, nóteruchi jatsiskia para jucha maiampintani jarhani. Jimboka Tata Diosï Jeoba sési borrariuaskia juchaari pekaduechani, ísïisti enajkichi no méni no sési ambe ú. Tata Diosï Jeobajtsïni sési jimbo puáchentasïndi engachi jucha mintsita jingoni móantajka.
TATA DIOSÏ JEOBA UÉKASÏNDI ESKACHI MÉNDERU IMEERI AMIGUEUAKA
Engajtsïni juchaari Taati auandarhu anapu puáchentajka, úsïngachi ménderu sési pájperantani imani jingoni. (Exe je párrafu 14).
14. ¿Andichisï uaa seguru jarhani eskajtsïni Tata Diosï Jeoba puáchentasïnga? (Ístu exea je imajeniichani).
14 Engajtsïni Tata Diosï Jeoba puáchentajka, uaakachi seguru jarhani eska ima ménderu juchaari amiguesïngia. Míteni ini ambe, jarhuatasïndijtsïni nóteru no sési pʼikuarherania imani ambe jimbo engachi úpka. Imajtsïni no méni jatanhechiati ka no méni jirinhakuntaati parajtsïni kastigarini. ¿Andichisï ísï uandajki? Jimboka ima mismu arhispka profeta Jeremíasini: “Ji puákuntaaka ambe enga no sési úka ka no méntku miáni jauaka imeeri pekaduni” (Jer. 31:34). Apostoli Pablujtu indeni karakatani úraspti enga uandapka: “Méntkuni no miáuaka ambe engaksï no sési ambe niátaaka” (Ebr. 8:12). ¿Ambeksï arhikuekasïni i uandakuecha?
“No méntku miáni jauaka imeeri pekaduni” (Jer. 31:34).
15. ¿Ambe arhikuekasïni Tata Diosï Jeoba enga uandajka eska nóteru miáuasïngia juchaari pekaduechani?
15 Bibliarhu i uandakua miáni, no méntkisï arhikuekasïndi miántani ióntki anapu ambe. Ménisï arhikuekasïndi úni ambe ma. Pori ejemplu, no sési úri ma enga Jesúsiiri máekandu jimbo tirhipakuarhetini japka, arhispti Jesúsini: “Miántarini sáni engari chiiti Reinurhu jauakia” (Luk. 23:42, 43). Ima achamasï no arhixapti Jesúsini eska jiántku miápiringa. Ka Jesúsi arhispti eska jarhuatapiringa: tsítantapirindi. Ísï jimbo, enga Tata Diosï Jeoba uandajka eska nóteru miáuakia juchaari pekaduechani, arhikuekasïndi eskajtsïni no arhinharhikuaka ambe engachi no sési úka, ka no méni ísï uaati, ni iásï ni pauani jimbokajtsïni puáchentaskia.
16. Eska Biblia na uandajka, ¿nénachi pʼikuarherasïni engajtsïni Tata Diosï Jeoba puáchentajka?
16 Ju je exeni máteru ejempluni engajtsïni jarhuatajka kurhanguni na engachi pʼikuarherajka engajtsïni Tata Diosï Jeoba puáchentajka. Jimboka no nema perfektueska, ísïisti enajkichi ‘pekadueri jántspirii’. Joperu engajtsïni Tata Diosï Jeoba puáchentajka, ísïisïndi enajki ima katsïkuajki kadeneechani, ka ísïchi “nóteru pekadueri jántspiriinia” (Rom. 6:17, 18; Apok. 1:5). Ísï jimbo, míteni eskajtsïni Tata Diosï Jeoba puáchentaskia úsïndi eskachi májkueni tsípiaka eska ima kʼuiripu enga nóteru jántspirijkia.
“Jimbokajtsï chá pʼímutanhantaskia parajtsï nóteru pekadueri jántspiriinia” (Rom. 6:18).
17. Engajtsïni Tata Diosï Jeoba puáchentajka, ¿andisï ísïi komueska ambakentani kʼéri pʼamenchakueri ma? (Isaías 53:5).
17 (Arhinta je Isaías 53:5). Ístu, Biblia uandasïndi eskaksï juchaari pekaduecha ísïiska komueska kʼéri pʼamenchakua ma engajtsïni uándikujka. Joperu Tata Diosï Jeobajtsïni ambakerantastia enga íntspika imeeri Uájpani para uarhini juchantsïni jimbo, ka inde ambe úsïndi eskachi ménderu sési pájperantaaka Tata Diosï jingoni (1 Ped. 2:24). Enga kʼuiripu ma niárajka ambakentani kʼéri pʼamenchakueri ma, kánikua sési pʼikuarherasïndi. Ka juchajtuchi májkueni pʼikuarherasïnga engajtsïni Tata Diosï Jeoba puáchentajka ka ambakerantantsïni parachi ménderu úni sési pájperani imani jingoni.
“Jimboka ima atanhaska, juchachi ambakeranhantaska” (Is. 53:5).
NÉNAJTSÏNI PʼIKUASTASÏNI MÍTENI ESKAJTSÏNI TATA DIOSÏ JEOBA PUÁCHENTASÏNGA
18. ¿Ambejtsïni jorhendasïni Biblieri ejempluecha na enga puátspentajka Tata Diosï Jeoba? (Ístu exe je rekuadruni “Nénajtsïni puáchentasïni Tata Diosï Jeoba”).
18 Ejempluecha engaksï xarharajka na engajtsïni puáchentajka Tata Diosï Jeoba, ¿ambejtsïni jorhendasïni? Eska ima mátirku borrariuasïnga juchaari pekaduechani engajtsïni puáchentajka. Inde ambe úsïndi eskachi sési pájperaaka juchaari Taati auandarhu anapu jingoni. Joperu ju je no mirikurhini eskachi no juchasï andakuarhejka parajtsïni puáchentani ka nijtuchi uaa afuersa arhini eska ísï uaaka. Sánderu sési, regalu máesti engajtsï Tata Diosï Jeoba íntskujka jimbokajtsïni xénchasïnga ka jimboka kánikua intsïmpitiiska (Rom. 3:24).
19. a) ¿Andichisï xáni agradesidu jaki? (Roma 4:8). b) ¿Ambechi exea máteru jorhenguarhikua jimbo?
19 (Arhinta je Roma 4:8). Kánikuachi sési pʼikuarherasïnga engajtsïni Tata Diosï Jeoba ísï puáchentajka. Meru ísïisti eska Salmo 130:4 na arhijka, eska Tata Diosï Jeobajkusï ‘sési jimbo puákuantajka kʼuiripuechani’. Ísï jimbo, engachi uéjka eskajtsïni Tata Diosï Jeoba puáchentaaka, jatsiskachi para úni ambe engajtsïni Jesúsi arhijka: “Engajtsï chá no puákuantaska máteruechani ambe engaksïni no sési úchijka, ístuksïni chaari Taati no puáchentaati ambe engajtsï chá no sési újka” (Mat. 6:14, 15). Ísï jimbo, kánikua jukaparhakuesti eskachi májkueni puátspentaaka eska Tata Diosï Jeoba. Ka máteru jorhenguarhikua jimbo exeakachi nénachi uaa ísï úni.
PIREKUA 46 Diosmeiamu, Jeoba
a Uandakua enga ebreu jimbo úrakuarhepka arhikuekasïreendi “puátspentani”. Ka i uandakuajkusï arhikuekajti sési jimbo puátspentani nájkirukaksï jaka máteru uandakuecha. Máteru Bibliechaksï no jatsikusïndi uandakuani sési jimbo puátspentani, joperu Traducción del Nuevo Mundo kʼóru úrasïndi ini uandakuani Salmo 130:4 jimbo.