Listu ja je parajtsï jarhuatani imani enga uéjka míteni jurhimbikuani

1. ¿Ambeksï úsïni máru kʼuiripuecha engachi aianguajka Biblieri ambe? (Úkuecha 13:​47, 48; 16:​14, 15).

PRIMERU siglurhu, engaksï orhetku kristianuecha ueenapka aianguani kʼuiripuechani Jesúsiiri ambe, imaksï sóntku jakajkuspti (arhinta je Úkuecha 13:​47, 48; 16:​14, 15). Iásïjtuksï jarhasti uánikua kʼuiripuecha engaksï tsípikua jingoni jiókuarhijka ambakiti aianhperakuani desde engaksï ueenajka kurhaani. Máteruechaksï ueenani jámani no uékasïndi joperuksï tátsekua uékasïndi jorhenguarhini Tata Diosïiri ambe. Ísï jimbo engachi exentaaka nemani enga mintsita jingoni uéjka jorhenguarhini Tata Diosïiri ambe, ¿ambechi jatsiski para úni?

2. ¿Andichisï terukutantajki aianhpikuani imani kʼuiripu jingoni enga mámaru jásï fruta ikarajka?

² Aianhpini ísïisti komu tsíri jatsini. Engachi exejka eska tiriapu jukaskia sóntkuchi nirasïnga pʼíkuntani. Májkueniisti aianhpikua jingoni, engachi méntku úndajka pʼorhembiani kʼuiripuechani para exeraani na enga xáni jukaparhakueka míteni Biblieri ambe, niárasïngachi exentani nemani enga uéjka sánderu ambe jorhenguarhini. Jimbochisï kánikua jánguarhintajka jarhuatani (Juanu 4:​35, 36). Engachi jánguarhintaska exeni náki kʼuiripu listu jarhaskia para jorhenguarhini Biblieri ambe ka náki nótki ambe, míteakachi néna jarhuatani mándani kʼuiripuni. Ini artikulu jimbochi tsimani ambe exeaka: ambechi uaa úni engachi exentaaka nemani enga listu jauakia para sánderu ambe míteni Biblieri ka néna jarhuatani paraka niáraaka Jesúsiiri chúxapatiini.

ENGA KʼUIRIPU UÉKAAKA JORHENGUARHINI BIBLIERI AMBE

3. Engachi aianhpini jauaka ka exentanchi nemani enga uékaaka sánderu ambe míteni, ¿ambechi uaa úni? (1 Korintu 9:26).

³ Engachi aianhpini jauaka ka exentanchi nemani enga uékaaka jorhenguarhini Biblieri ambe, ju je jánguarhintani jarhuatani paraka sánhani arhiaka sánderu sési míteni Tata Diosïni ka uékani kurhajchani. Ísï jimbo, desde engachi exentaaka inde jásï kʼuiripuni ma, sési japirindi eskachi kurhamarhiaka sini uékapirini jorhenguarhini Biblieri ambe ka nirani tánguarhikuecharhu (arhinta je 1 Korintu 9:26).

4. ¿Náki ejemplu xarhatasïni eskaksï jarhaska kʼuiripuecha engaksï uéjka jorhenguarhini Biblieri ambe desde engachi ueenajka uandontskuarhekuani?

⁴ Arhi je eskajtsï uaaka jorhendani Biblieri ambe. Jarhastiksï kʼuiripuecha engaksï jirejiresï uéjka jorhenguarhini Biblieri ambe desde engachi primeru uelta uandontskuarhejka. Ju je exeni ambe enga úkuarhipka Canadá. Juebesï ma jimbo, uátsï ma andarhieraspti karrituni ka pʼikuspti foietuni Tsípikua jingoni ireka je. Pirenchi enga jima japka arhispti eska indeni foietu jingoni úpiringa jorhenguarhini Biblieri ambe ka gratisi. Ka uátsï arhispti eska jo ka íntskuspti imeeri númeru. Ima mismu jurhiatikua, uátsï karakuspti pirenchini para arhini kánksï ueenapirini jorhenguarhini ka pirenchi arhispti eska ima fini de semana, joperu uátsï arhispti: “Ka andichisï no pauani ueenajki, ji tiempu jatsiaka”. Ísï pauandikuaksï ueenaspti jorhenguarhini, ka ima mismu fini de semana jimbo, niraspti tánguarhikuarhu ka tátsekua jánguarhintaspti sánderu sési míteni Tata Diosïni ka marhuakuni.

5. ¿Ambechi jatsiski para miáni ante de arhini nemani eskachi uékasïnga jorhendani Biblieri ambe? (Ístu exea je imajeniichani).

⁵ Jatsiskachi para miáni eskachi sáno méntkisï imeeri ambe uandontskuarhekuauaka kʼuiripuechani ambe engaksï imeecha tsitijka jimbokaksï no iáminduecha ísïiska eska inde uátsï. Nájkiruka nema no jirejiresï uékaaka míteni Biblieri ambe, ju je seguiriini jánguarhintani ka xarhatani eskachi sési jimbo uékasïnga jarhuatani. ¿Nénachi uaa xarhatakuni indeni ambe kʼuiripuni ma? Uánikua erachiicha ka pirenchiicha engaksï sési mítekuka néna ueenani jorhentpini Biblieri ambe aiangusïndijtsïni ambe engaksï újka.

6. ¿Ambechi jatsiski para úni paraka kʼuiripu uékaaka jorhenguarhini Biblieri ambe?

⁶ Íksï aianhpiriicha uandantasïndi eska máru lugariicha jimbo sánderu sésiiska arhini kʼuiripuni sinchi úpirini uandontskuarheni sáni, o sini uékapirini sánderu sési míteni Biblieri ambe. Ka paraksï no arhini eskaksï ménderu kʼuanhatsentaaka, arhisïndiksï “Ma ísku pakarasïndi enga exejka eskajtsïni Biblia aiangusïnga ambe engachi desde iónisï kurhamarhikuarhikia” o “Biblia no solu relijioniiri ambe uandasïndi, ístu íntspiasïndi ambakiti konsejuechani”. Ka ístuksï arhisïndi kʼuiripuni: “Ma 10 o 15 minutu jimbo, chájtsï ambakiti ambe jorhenguarhiaka engaksïni kánikua jarhuataaka”. Nóchi jatsiska para arhini eskachi mándani semana niuaka parachi no ísku jatini uandanhiatani kʼuiripuni o eska obligadu pʼikuarheraaka.

7. ¿Káni úpirini kuenta íntskukuarheni nema eska exentaskia jurhimbikuani? (1 Korintu 14:​23-25).

⁷ Pʼímarhi je tánguarhikuarhu. Jiáni enga apostoli Pablu irekani japka, jarhasptiksï kʼuiripuecha engaksï primeru uelta nípka tánguarhini ka jirejiresïksï exeni eska ísïispka ambe engaksï jorhenguarhini japka (arhinta je 1 Korintu 14:​23-25). Iásïjtu májkueni úkuarhisïndi. Engaksï kʼuiripuecha ueenajka tánguarhini, sánderuksï sóntku marhuakusïndi Tata Diosïni. Ísï jimbo, ¿káni sési japirini pʼímarhini tánguarhikuecharhu? Jorhenguarhikua 10, librueri Tsípikua jingoni ireka je, uandasïndi indeeri ambe. Joperu nóchi jatsiska para erokuarhini astakachi jimini niáraaka para pʼímarhini kʼuiripuni. Uaakachi pʼímarhini desde jiáni engachi ueenaaka uandontskuarhekuni. Uaakachi arhini eska fini de semana jimbo jauaka tánguarhikua ma ka aianguni na enga arhinhajka arhijtsïkperata, o aianguni ma ambe enga rebista Aianhpiri uandajka ka enga imani fini de semana jimbo exenhaaka.

8. Engachi pʼímarhiska nemani tánguarhikuarhu, ¿ambechi úpirini aianguni? (Isaías 54:13).

⁸ Engachi pʼímarhiaka kʼuiripuni, uaakachi arhini eskaksï juchaari tánguarhikuecha no májkueniiska eska máteru relijioniicheeri. Ma uelta, nanaka ma niraspti tánguarhikuarhu ka exespti na engachi jorhenguarhijka rebista Aianhpiri jingoni. Tátsekua, kurhamarhispti pirenchini enga jorhendani japka Biblieri ambe: “Ima enga kurhamarhikuechani uaani japka, ¿míteaski iáminduechani?”. Ka pirenchi arhispti eska kúnguarhikua ísïiska komu familia ma ka eskachi jimbosï jánguarhintajka míteni na engaksï arhinhajka máteruecha, ka nanaka arhispi eska imeeri iglesiarhu kasi no nema míteska na engaksï arhinhajka máteruecha. Ístu ménisï kʼuiripu no mítesïndi andichisï tánguarhijki, jiájkani, sési japirindi aianguani (arhinta je Isaías 54:13). Tánguarhisïngachi para kʼéri ambe arhini Tata Diosï Jeobani, jorhenguarhini imeeri ambe ka parachi uinhaperperantani (Ebr. 2:12; 10:​24, 25). Ka nóchi tinguixurhisïnga o máteru inde jásï ambe úni, juchaari tánguarhikuechaksï sési úkuarhisïndi jimbochisï újka ambakiti ambe jorhenguarhini (1 Kor. 14:40). Ka jima engachi tánguarhijka, sési úkata jarhasïndi parachi sési jorhenguarhini. Ka jimbokachi no inchamukusïnga politikarhisï, nóchi jámasïnga indeeri ambe uandani o partiduni ma apoiariini jarhani. Níjtuchi jámajki arhirperani ni uinhachatsperani. Paraka kʼuiripu eranhaskaaka na engaksï úkuarhijka tánguarhikuecha, uaakachi exerani bideuni ¿Nénaksï úkuarhisïni juchari tánguarhikuecha?

9, 10. Engachi pʼímarhiaka nemani tánguarhikuarhu, ¿ambechi uaa úni paraka no chéni pʼikuarheraaka? (Ístu exe je imajenini).

⁹ Máruksï no nirasïndi tánguarhikuecharhu jimbokaksï chésïnga eskaksï Jeobaeri testigu únhaaka. Ísï jimbo, ju je aianguani kʼuiripuechani eskaksï ístu úsïnga nirani imeecha engaksï no Testigueka ka eska engaksï uékaaka nirani, uaatiksï nirani, ka no nema afuersa arhiauati eskaksï komentariuaka o eskaksï jurajkuaka imeecheeri relijionini. No úkuarhisïndi tánguarhikua ma para sapiicha ka máteru para kʼératiicha, sino familiechaksï márku uaxakasïndi paraksï iáminduecha jorhenguarhini, ka ísï, taatiichaksï jimajku jatsikuarhiasïndi uájpeechani ka mítesïndiksï ambeksïsï jorhenguarhini jarhajki (Deut. 31:12). Ka nóchi ma sentabu euajpisïnga, ísïchi úsïnga eska Jesúsi na uandapka: “Chájtsï no ma sentabu maiampiska, ísï jimbo, chájtu asï ma sentabu euajpi je” (Mat. 10:8). Uaakachi arhini eska no uétarhisïnga imani takusï jukapani enga kánikua jukaparhaka jimboka Tata Diosï no exesïnga na enga xarharajka kʼuiripu ma, sino mintsitani (1 Sam. 16:7).

¹⁰ Engachi pʼímarhiska nemani, ju je úni ambe ma paraka ima agustu pʼikuarheraaka. Ju je mítetaraani orhejtsïkutiichani ka máteru erachiichani. Engachi sési pʼikuastaaka, jamberi ménderu uékaati nirani. Enga no kámani jauaka Biblia ma, uaakachi exeraani karakateechani, jarhuatani kurhanguni arhijtsïkperatani ka na engachi jorhenguarhijka májku kʼéri.

ENGACHI UEENASKA JORHENDANI NEMANI BIBLIERI AMBE

11. ¿Nénachi xarhatasïni eskachi jukaparharasïnga kʼuiripueri tiempuni?

¹¹ Engachi ueenaska jorhendani nemani Biblieri ambe, ju je jánguarhintani ísï úni eskachi na arhiaka kʼuiripuni. Pori ejemplu, engachi arhika na engachi jandora niuaka pʼorhembini, ju je ima jandora nirani. Ístu, sési japirindi eskachi no xáni tiempu paaka engachi primeru uelta niraska jorhendani. Máru erachiicha engaksï sési míteka jorhentpini, uandasïndiksï eskachi xántku jorhenguarhiaka na engachi xáni uandapkia nájkiruka kʼuiripu uékaaka sánderu ambe míteni. Ka ístuksï uandasïndi eskachi no jatsiska para jukari uandani sino eska sánderu kʼuiripu uandaaka (Prov. 10:19).

12. ¿Ambechi uékasïni jorhendaani imani kʼuiripuechani engaksï jorhenguarhini jaka Biblieri ambe?

¹² Desde engachi ueenaaka jorhendani kʼuiripuni Biblieri ambe, uékasïngachi eska niáraaka míteni ka xénchani Tata Diosï Jeobani ka Jesúsini. Ka para ísï úni, jatsiskachi para Biblia jingoni jorhendani ka no ambe engachi jucha eratsejka (Úku. 10:​25, 26). Apostoli Pablu jánguarhintaspti jorhendaani kʼuiripuechani Jesúsiiri ambe, ima enga Tata Diosï Jeoba axapka parajtsïni jarhuatani míteni ka xénchani Tata Diosïni (1 Kor. 2:​1, 2). Pablu ístu uandaspti eska jukaparhakueska jarhuatani imani enga apenasi ueenani jaka jorhenguarhini para xarhataani kualidadiichani engaksï xáni jukaparhakueka komueska oru, plata ka máteru sési jásï tsakapuecha (1 Kor. 3:​11-15). Íksï kualidadiicha jindeesti, mintsikani, jánhaskani, kurhanguni ka chénharhini Tata Diosï Jeobani (Sal. 19:​9, 10; Prov. 3:​13-15; 1 Ped. 1:7). Ju je májkueni úni eska Pablu, jarhuatani jorhenguarhirini paraka mintsikaaka Tata Diosï Jeobani ka imeeri amigueni (2 Kor. 1:24).

13. ¿Nénachi uaa xarhatakuni jorhenguarhirini eskachi kurhangukusïnga ka tekaakuntani? (2 Korintu 10:​4, 5; ístu exe je imajenini).

¹³ Enga Jesúsi jorhendauenga kʼuiripuechani, ima kurhangukuasïreendi ka tekaakuantani, ka juchajtuchi uaaka májkueni úni. Ju je no imani ambe kurhamarhini enga no sési pʼikuastaaka. Enga jauaka ambe ma enga ima no kurhanguni jauaka, uaakachi tátsekua exenia. Ka engachi exeaka eska úkua jukanchaxaka jiókuarhini ambe ma enga Biblia jorhentpijka, ju je no afuersa uékani eska jirejiresï mójtakuaka ambe enga eratsejka, sino ju je jurajkuni eska iatsitakuarhu niárakuaka mintsitarhu (Juanu 16:12; Kol. 2:​6, 7). Biblia uandasïndi eska ima chkuanderakua ambe engaksï relijioniicha jorhentpijka ísïiska komueska “uíuinhasï tsïntsïkata ma”. Ima uandakua enga úrakuarhipka para indeni ambe arhikuekani, úsïreendi eska kʼuiripu ma kʼéri torreni ma eranhaskapiringa enga jatsika para kuáskunhani (arhinta je 2 Korintu 10:​4, 5). Ísï jimbo, paraka kʼuiripu ma nóteru jakajkuakia chkuanderakua ambe, orhetachi jatsiska para jarhuatani mintsikani Tata Diosï Jeobani (Sal. 91:9).

ENGA KʼUIRIPU NIRAJKA TÁNGUARHIKUARHU MA

14. ¿Nénachi jatsiski para kaani imeechani engaksï tánguarhikuarhu nirajka?

¹⁴ Tata Diosï Jeoba uékasïndi eskachi májkueni káuaka iámindu imani kʼuiripuechani engaksï niuaka tánguarhikuarhu, ka xénchaani nájkirukaksï máteru naniisï anapueuaka, jatsikuarhiriini o nómbe o sinksï máteru járhati pʼindekuechani jatsiani (Sant. 2:​1-4, 9). Ju je exeni nénachi uaa ísï úni.

15, 16. ¿Ambechi uaa úni parachi sési pʼikuastaani imeechani engaksï primeru uelta nirajka tánguarhikuarhu?

¹⁵ Máru kʼuiripuechaksï nirasïndi tánguarhikuecharhu jimbokaksï uékasïnga míteni nénaksï úkuarhisïni o jimboka nema pʼímarhiaska. Ísï jimbo, engachi exeaka eska nema primeru uelta nirasïnga, ju je sési erokani ka sési kámani joperu no jukari ambe uékani míteni imeeri ambe. Ístuchi úpiringa arhini sini uékasïni juchantsïni jingoni uaxakani. Uaakachi Biblia ma kurhajpikuni o publikasioniichani o jucha kuánetani. Ju je exeni ambe máteru ambechi úpirini úni para ima agustu pʼikuarherani. Ma jurhiatikua, acheeti ma enga primeru uelta nípka tánguarhikuarhu, uandasïndi eska kʼuratsexapka jimboka no ísï xukuparhatini niraspka eskaksï máteruecha. Joperu erachi ma arhispti eska no uandanhiapiringa jimbokaksï Jeobaeri testiguecha májkueniiska eska náki uéjki kʼuiripu. Acheeti nóteru kʼuratsesptia ka no méni mirikurhispti na enga kámapka erachi. Tátsekua itsï atakuarhispti. Engachi exeaka eska kʼuiripu ma nirasïnga tánguarhikuarhu ka uandajpanchi, ju je xéparini jámani parachi no imani ambe kurhamarhini enga no sési pʼikuastaaka (1 Ped. 4:15).

¹⁶ Enga nema niraska tánguarhikuarhu, ¿ambechi uaa úni? Pori ejemplu, engachi uandontskuarheni jauaka, komentariini o parti ma nitamatarani, ju je respetu xarhatakuani imeechani engaksï no Testigueka. Ju je no imani ambe uandani enga no sési pʼikuastauaka ka tátsekuaksï nóteru uékania nirani (Titu 2:8; 3:2). No sési japirindi no sési uandani jarhani ambe engaksï imeecha jakajkujka (2 Kor. 6:3). Erachiicha engaksï arhijtsïkperata ma nitamatarajka jatsistiksï para sánderu xéparini jámani indeni ambe jingoni. Ka engaksï imani uandakuechani úrauaka engachi solu Testiguecha úrajka, jatsistiksï para auandani ambe engaksï arhikuekajka parakaksï imeecha uaaka kurhanguni.

17. Engachi na exentaakia nemani enga mintsita jingoni uéjka jatsini tsípikua para méntkisï, ¿ambechi jatsiski para úni?

¹⁷ Uétarhisïndi eskachi sánderu jánguarhintaaka aianhpini ka imani kʼuiripuechani jirinhaantani engaksï mintsita jingoni uéjka jatsini tsípikua para méntkisï (Úku. 13:48). Ísï jimbo, engachi exentaaka nemani enga uékaaka jorhenguarhini Tata Diosïiri ambe, ju je arhini eskachi uaaka jorhendani Biblieri ambe ka pʼímarhini tánguarhikuecharhu ka ísïchi jarhuataaka imani xanharu jimbo nirani enga tsípikuarhu pájpejka (Mat. 7:14).