Ju je kómarhijpikuani máteruechani

1. ¿Nénachi míteski eska para Tata Diosï Jeoba kánikua jukaparhakueska juchaari kómarhikuecha?

KʼÉRI intsïmperata máesti kómarhikua. Ju je eratsentani ini ambe: nájkiruka Tata Diosï Jeoba úraajka ánjeliichani paraksï jarhuatani ka kʼérati ánchikuarhita íntsaani Uájpani, no nemani íntskusti indeni ánchikuarhitani para kurhauani kómarhikuechani (Sal. 65:2; 91:11; Mat. 28:18). Ima meru uékasïndi kurhaani engachi kómarhini jarhajka.

2. ¿Ambejtsïni jorhendasïni Pablueri ejemplu?

² Nájkirukachi uaaka kómarhini Tata Diosï Jeobani engajtsïni uandanhiatani jauaka ambe ma, jatsiskachi para kómarhijpikuani máteruechani. Indeni ambesï úpti apostoli Pablu enga arhiapka Éfesu anapu kristianuechani: “Méntkuksïni kómarhijpichexaka” (Éfes. 1:16). Ka ístu kómarhijpikuasïreendi mándani erachini. Pori ejemplu, ini ambe karakuspti Timoteuni: “Ji diosmaiamukua arhisïnga Tata Diosïni [...], ka jíkeni méntkisï miántasïnga engani chúrikua ka jurhiakua kómarhini jarhajka Tata Diosïni” (2 Tim. 1:3). Nájkiruka Pablu uánikua uandanhiateechani jatsiapka para kómarhijpikurhini, ístu arhutasïreendi tiempu para kómarhijpikuani máteruechani (2 Kor. 11:23; 12:​7, 8).

3. ¿Andichisï úpirini mirikurhini kómarhijpikuani máteruechani?

³ Jamberichi úpiringa mirikurhini kómarhijpikuani máteruechani. ¿Andi? Pirenchi Sabrinaa uandasïndi andi: “Jukarichi úkua ambe jatsisïnga ka imani ambejkuchi eratseni jarhani ka kómarhijpikuarhini”. Engachi exejka eskachi indeni ambe úkuarhinchaxaka. I jorhenguarhikuajtsïni kánikua jarhuataati parachi exeni andisï xáni jukaparhakue eskachi kómarhijpikuauaka máteruechani ka ístu jarhuataatijtsïni exeni néna ísï úni.

¿ANDISÏ XÁNI JUKAPARHAKUE KÓMARHIJPIKUANI MÁTERUECHANI?

4, 5. ¿Néna marhuasïni kómarhijpikuani máteruechani? (Santiagu 5:16).

⁴ Kómarhijpikuani máteruechani “kánikua jarhuajpisïndi” (arhinta je Santiagu 5:16). ¿Joperu meru marhuasïni kómarhijpikuani máteruechani? Jo, jimboka Jesúsi arhispka apostoli Pedruni: “Joperukeni ji kómarhijpicheska parakari no jurajkuaka mintsikani Tata Diosïni”, ka ini ambe arhispti jimboka Pedru nóteru ióndani uandapiringa eska no mítespka Jesúsini (Luk. 22:32). Ka Pablujtu mítespti na enga xáni uinhapikua jatsika kómarhikua jimboka arhispka Filemónini: “Mintsikaxaka eskaksïni ménderu niuaka exeni indeni jimbo engajtsïni chá ísï kómarhijpicheni jaka”. Ini ambe jiáni uandaspti enga ísku jatini ónhanhapka kʼumanchikuarhu ma jini Roma (Filem. 22). Ka jimboka Tata Diosï kurhaaspka erachiicheeri kómarhikuani, no ióni jimbo Pablu jurajkunhaspti ka ima úspti seguiriini aianhpini.

⁵ Joperu inde ambe no arhikuekasïndi eska juchaari kómarhikuecha jingoni Tata Diosï Jeoba afuersa uaaka ambe engachi kurhakuaka. Sánderu sési, ima exesïndi ambe engajtsïni uandanhiatajka ka ménichani eratsesïndi ísï úni eskachi na kurhakuni jarhajka. Míteni ini ambe jarhuatasïndijtsïni sánderu mintsita jingoni kómarhini ka mintsikani eska ima imani ambe uaaka enga sánderu sési jauaka (Sal. 37:5; ístu exe je 2 Korintu 1:11 ka nota para sánderu ambe jorhenguarhini).

6. ¿Nénajtsïni sési pʼikuastasïni engachi kómarhijpikuajka máteruechani? (1 Pedru 3:8).

⁶ Kómarhijpikuani máteruechani jarhuatasïndijtsïni parachi sánderu pʼamojpitiini (arhinta je 1 Pedru 3:8). Ima kʼuiripu enga pʼamojpitiijka exesïndi engaksï máteruecha kómu nitamakuarhini jarhajka ka uékasïndi jarhuataani (Mar. 1:​40, 41). Miguel enga orhejtsïkutiika uandasïndi: “Engani kómarhijpikuajka máteruechani, exesïnga ambe engaksï nitamakuarhini jarhajka ka inde ambe úsïndi eskani sánderu jukaparharauaka, ka nájkirukaksï imeecha no kuenta íntskukuarheaka, ji sánderuni xénchaasïnga”. Ricardo enga ístu orhejtsïkutiika, ístu uandasïndi: “Engachi kómarhijpikujka nemani, sánderuchi uékasïnga jarhuatani, ka engachi ísï újka ísïisïndi enajkichi jarhuajpeni jarhajki paraka Tata Diosï mókuntaaka juchaari kómarhikuani”.

7. ¿Andisï kómarhijpikuani máteruechani jarhuatajkijtsïni ísï exeani juchaari problemechani eska Tata Diosï na exeajka? (Filipusï 2:​3, 4; ístu exea je imajeniichani).

⁷ Kómarhijpikuani máteruechani jarhuatasïndijtsïni ísï exeani juchaari problemechani eska Tata Diosï na exeajka (arhinta je Filipusï 2:​3, 4). Iáminduechachi jatsiaska uandanhiateechani jimbokachi ini parhakpini jimbo irekaxakachi enga Noambakiti juramuni jaka (1 Juanu 5:19; Apok. 12:12). Engachi pʼindejka kómarhijpikuani máteruechani miántasïngachi eskaksï “iámindu erachiicha iámu parhakpinirhu májkueni kómu nitamakuarhixaka” (1 Ped. 5:9). Katalina enga prekursora máeka, uandasïndi: “Engani kómarhijpikuajka máteruechani exesïnga eskani no jíjkusïni jatsiaka uandanhiateechani. Ka inde amberini jarhuatasïndi parani no jukarini jíjkumindu pendienti pákuarhini”.

¿NEECHANCHI ÚPIRINI KÓMARHIJPIKUANI?

8. ¿Neechanchi úpirini kómarhijpikuani?

⁸ ¿Neechanchi úpirini kómarhijpikuani? Úpiringachi kómarhijpikuani imeechani engaksï pʼamenchani jaka, tumbiichani engaksï eskuelarhu no sési kánhajka o teresmarhunhani, ka ístu imeechani engaksï kʼériini jakaia, o imeechani engaksï imeecheeri familiariicha o gobiernuecha no sési kaani jaka (Mat. 10:​18, 36; Úku. 12:5). Pori ejemplu jarhastiksï erachiicha engaksï jurajkuka imeecheeri kʼumanchikuani desastre naturali ma jimbo, problema ma jimbo o politika jimbo. Jamberichi no míteaka ini erachiichani, joperu engachi kómarhijpikuauaka xarhatani jarhasïngachi eskachi xénchperasïnga máteru ka máteruni jingoni ísï eska Jesúsi na juramuka (Juanu 13:34).

9. ¿Andichisï jatsi para kómarhijpikuani erachiichani engaksï responsabilidadi ma jatsika Tata Diosïiri kúnguarhikuarhu ka ístu témbeechani?

⁹ Ístuchi uaaka kómarhijpikuani imani erachiichani engaksï responsabilidadi ma jatsika Tata Diosïiri kúnguarhikuarhu, komu erachiichani engaksï Kuerpu Gobernantirhu jaka ka imeechani engaksï jarhuataajka, imeechani engaksï Komité de Sukursali ma jimbo jaka ka engaksï departamentuni ma orhejtsïkujka Beteli, sirkuitueri orhejtsïkutiichani, orhejtsïkutiicha ka sierbo ministerialiichani. Uánikua i erachiichaksï no solu jatsisïndi para orhepani uérakuani imeecheeri uandanhiateechani sino ístujtsïni jarhuatasïndi juchantsïni (2 Kor. 12:15). Marcos, enga sirkuitueri orhejtsïkutiika, uandantasïndi: “Kánikua uandanhiasïnga taatiicha jimbo. No imeecha jingoni jarhaska, jatiriistiksïa ka pʼamenchaxatiksï. Ka nájkiruka juchiiti ermana ka imeeri uámba xénchperakua jingonksï kuidariuajka, kánikua kómu pʼikuarherasïnga engani no jarhuataani jaka ísï eskani na tsitipiringa”. Nájkirukachi no míteka ambe enga xáni uandanhiataajka indeni erachiichani, sési jarhasti eskachi kómarhijpikuauaka (1 Tes. 5:​12, 13). Ístuchi uaaka kómarhijpikuani témbeechani engaksï kánikua apoiariuajka paraksï iicha seguiriini jarhani jarhuatani kúnguarhikuani.

10, 11. ¿Tata Diosï Jeoba sési exesïni engachi iáminduechani kómarhijpikuajka?

¹⁰ Sáno méntkisï, uánikua erachiichanchi kómarhijpikuasïnga, komu imeechani engaksï ónhakata jaka, engaksï uarhiranchaka nemani. Jamberichi kurhakujka Tata Diosï Jeobani eska jarhuatauaka iámindu ini erachiichani. Ísï jimbo, nóchi ma kʼuiripunku kómarhijpikusïnga. Ronaldo enga orhejtsïkuti máeka, uandasïndi: “Uánikua erachiicha ka pirenchiichaksï jarhasti engaksï kʼérati uandanhiateechani jatsiajka, ísï jimbo, jánguarhintasïngachi iáminduechani kómarhijpikuani”.

¹¹ ¿Tata Diosï Jeoba sési exesïni engachi iáminduechani kómarhijpikuajka? ¡Jo! Jimbokachi no míteska ambe engaksï meru uétarhinchani jarhajka erachiicha. Ísï jimbo, sési jarhasti engachi uánikua erachiichani kómarhijpikuauaka (Juanu 17:20; Éfes. 6:18). Ka ísïchi xarhatani jauaka eskachi ‘xénchaasïnga iámindu erachiichani’ (1 Ped. 2:17).

¿AMBECHI UAA ÚNI ENGACHI MÁNDANI ERACHINI KÓMARHIJPIKUA?

12. Engachi exeska ambe enga nitamakuarhini jaka mándani erachi, ¿nénajtsïni jarhuataa engachi kómarhijpikuani jauaka?

¹² Ju je jánguarhintani iámindu ambe exeni. Sési jarhasti eskachi uánikuechani kómarhijpikuauaka, joperu ístu eskachi mándani erachini kómarhijpikuaka. Pori ejemplu, jati erachi o pirenchi ma enga k’éri pʼamenchakua ma jatsika, tumbi ma enga kómu p’ikuarherani jaka jimbokaksï no sési kámasïnga eskuelarhu, taati o naandi ma enga imeeri uájpani jandiajku arhistakuni jaka ka jorhendani Tata Diosï Jeobaeri ambe, ísï jimbo, ¿úpirinchi mándani inde erachini kómarhijpikuni? (Éfes. 6:4). Engachi jánguarhintaska iámindu ambe exeni sánderuchi kurhangutspiaka ka inde ambejtsïni jarhuataati parachi kómarhijpikuani (Rom. 12:15).b

13. ¿Uaachi kómarhijpikuani imani erachiichani engachi no míteaka?

¹³ Ju je kómarhijpikuani nombri jimbo. Uaakachi kómarhijpikuani nájkirukachi no míteauaka. Pori ejemplu imeecha jimbo engaksï ónhakata jaka Crimea, Eritrea, Rusia ka Singapur. Internetirhu jw.org jimbo uaakachi exeantani imeecheeri nombriichani.c Brian enga sirkuitueri orhejtsïkutiika uandasïndi: “Engani karajka erachiiri nombrini ma enga ónhakata jaka ka ístu uandani imeeri nombrini, sánderu sóntkuni miántasïnga na enga arhinhajka ima erachi ka ísï úsïnga kómarhijpikuni imeeri nombri jimbo”.

14, 15. ¿Ambejtsïni jarhuataa ísï kómarhijpikuani erachiichani seguni ambe engaksï uétarhinchajka?

¹⁴ Ju je kómarhijpikuani imani ambe jimbo engaksï meru uétarhinchajka. Miguel engachi párrafu 6 jimbo uandaka, arini ambejtsïni arhisïndi: “Engani jw.org jimbo arhiantajka eksperiensiechani ima erachiicheeri engaksï ónhakuarhetini jaka, jánguarhintasïnga eranhaskani na engani p’ikuarherapiringa engani ji jima japiringa. Ji meru uandanhiani japiringa juchiiti uarhiiti jimbo ka uékapiringa míteni sinksï sési kuidarixaki. Jimbosïni kurhajpikuasïnga imani ambe engaksï uétarhinchani jaka ima erachiichani engaksï tembuchatini jaka ka ónhakataksï jarhani” (Ebr. 13:​3, nota).

¹⁵ Eratsentani ambe engaksï pauani pauani uétarhinchajka erachiicha engaksï ónhakata jaka, úsïngachi exeni ambe jimbochi uaa kómarhijpikuani. Pori ejemplu, paraka kárselirhu anapu kuári no no sési káuaka o eskaksï jurajkuauaka paraksï kómarhini Tata Diosïni (1 Tim. 2:​1, 2). Ístuchi uaaka kómarhini Tata Diosïni paraka inde erachiicheeri ejemplu uinhaperantauaka imeecheeri kúnguarhikuechani ka eska ima engaksï no Testigueka uékaaka kurhaani Tata Diosïiri ambe (1 Ped. 2:12). Ju je jánguarhintani exeni ambe enga nitamakuarhini jaka erachi o pirenchi ma, nombri jimbo kómarhijpikuni ka imani ambe jimbo enga meru uétarhinchani jaka. Ka uaakachi májkueni úni imeecha jimbo engaksï ónhakuarhetini jaka ka ísïchi xarhatani jauaka eskachi kánikua xénchaasïnga (1 Tes. 3:12).

JU JE EXENI AMBECHI KURHAKUA

16. ¿Ambe ka ambechi jatsiski para exeni ante de kómarhini Tata Diosïni? (Mateu 6:8).

¹⁶ Eskachi na exekia, juchaari kómarhikuechaksï kánikua uinhapikua jatsisti, kánikua jarhuataasïndi máteruechani. Joperu jatsiskachi para xéparini jámani. Pori ejemplu ju je miáni eska Tata Diosï tʼuini mítesïngia ambe engachi uéjka arhini, ístu, nóchi jatsipiringa para arhini na enga jatsika para úni ambe ma. Ima mítestia ambe engachi uétarhinchajka ante dechi jucha kuenta íntskukuarheni (arhinta je Mateu 6:8). Jiájkani, ¿andichisï kómarhijpikuajki máteruechani? Jimbokachi pendienti jarhasïnga máteruecha jimbo ka no solu indeni ambe jimbo engachi ini jorhenguarhikua jimbo exeka. Juchachi xénchaasïnga máteruechani, jimbochisï kómarhijpikuajka. Ka Tata Diosï Jeoba tsípini pʼikuarherasïndi engachi ísï xénchpejka eska ima.

17, 18. Uandanta je ejemplu ma jingoni eska Tata Diosï Jeoba exeni jarhasïnga engachi kómarhijpikuajka máteruechani.

¹⁷ Ka ménisï jauati engaksï erachiicha seguiriini jauaka no sési nitamakuarhini ka ísï xarharani enajki no marhuajki juchaari kómarhikua, ju je no mirikurhini eskachi xarhatani jarhasïnga eskachi xénchaasïnga juchaari erachiichani, ka Tata Diosï Jeoba exeni jarhasïndi indeni ambe. Pori ejemplu, ju je eratseni taatini ma enga tataka sapichuni ma kámajka ka ma nanaka sapichuni. Tataka sapichu pʼamenchaxati ka nanaka sapichu méntku arhixati taati jémbani: “Jarhuata sáni”. Taati jémba exexatiia iámu ambe, xénchasïndi imeeri uájpani ka sési kuidarixati, joperu kánikua sési pʼikuarherasïndi enga exejka eska nanaka sapichu kánikua xénchasïnga ermanu jémbani ka jimbosï kurhakuni jati taati jémbani eska jarhuataaka.

¹⁸ Májkueni, Tata Diosï Jeoba uékasïndi eskachi pendienti paaka máteruecha jimbo ka eskachi kómarhijpikuauaka. Ísïchi xarhatani jauaka eskachi no solu juchajkusï pendienti pákuarhijka sino ístu juchaari erachiicha jimbo ka Tata Diosï Jeoba no mirikurhiati indeni ambe (2 Tes. 1:3; Ebr. 6:10). Ka eskachi na exekia, uaakachi kánikua jarhuataani erachiichani engachi kómarhijpikuaska parakaksï imeecha sési jauaka. ¡Jiájkani ju je no méni mirikurhini kómarhijpikuani juchaari erachiichani!