Kánikua kʼarhikʼarhindexati | ¿Ambe uandasïni Biblia?

• “Kánikua aparhikuarhixati China ka ini jingoni tanimu xanhariistia enga emenda jimbo kánikua kʼarhikʼarhindejka” (The Guardian, 7 de septiembri de 2022).

• “Uandanhasïndi eska ini jingoni sinko uéxurhiniuakia enga kʼarhikʼarhindejka Gran Cuerno de África (Noticias ONU, 26 de agostu de 2022).

• “Jukari terujkani Europa arhinhastiksïa eskaksï jingontku jauaka jimboka kánikua kʼarhikʼarhindeska, jamberi 500 uéxurhini jimbo, no méni xáni kʼarhikʼarhindeni japti eska iásï (BBC News, 23 de agostu de 2022).

Uánikua kʼuiripuecha engaksï mítekuka, uandasïndiksï eska seguiriini jauaka kʼarhikʼarhindeni o eska jamberi sánderu kʼarhikʼarhindeaka. ¿Niáraa ima jurhiatikua enga sési jánhaskuarhintaaka? ¿Ambe uandasïni Biblia?

Ambe enga Biblia tʼuini uandarini japkia enga ísï kʼarhikʼarhindejka

Biblia tʼuini uandasptia eska i ambe úkuarhini japiringa ini jurhiatikuechani jimbo:

• “Uápuru jauati kʼarhingua” (Lukasʌ 21:11).

Uánikua xanhari no jarhasïndi tʼirekua jimboka no jarhasïnga itsï. Ka Biblia indenisï uandarini japtia eska japiringa kʼarhingua ambe, ka eska indeni ambe jimbo, kʼuiripuechaksï niárapiringa kómu nitamakuarhini ka uarhini (Jaŋaskuecha 6:6, 8).

¿Andisï sánderu kʼarhikʼarhindeni jaki?

Biblia uandasïndi ma ambe enga jimbo xánhaskuarhini jaka. Arhisïndi:

• “Kʼuiripu enga xanharani jaka ni sikiera sésikua jatsi para exeni nani enga ísï jatsika para xanharani” (Jeremías 10:23).

I ambe arhikuekasïndi eska no sési nikuauaka kʼuiripuechani engaksï imeechajkumindu uékaaka exeni nani enga ísïksï jatsika para xanharani o engaksï uékaaka juramukuarhini. Ka indeni jimbo engaksï no újka sési úni ambe ma, úsïndiksï eska no jauaka itsï ka eska kʼarhikʼarhindeaka.

• Sáno iámindu sientifikuechaksï uandasïndi eska ambe engaksï kʼuiripuecha újka, úsïnga eska echerirhu sánderu aparhikuarhiaka, jimbosï iásï sánderu kʼarhikʼarhindejtia iámu parhakpinirhu.

• No ióni jimbo xántkuiuatia itsï enga pakarani jaka. ¿Andi? Jimbokaksï kʼuiripuecha kánikua tsitisïnga sentabu ambe ka ístu jimbokaksï mámaru ambe úsïnga seguni paraksï sóntku sési peentani ambe ma, ka ísï jimbo, niárasïndiksï chʼapaani anhatapuechani, sánderu kontaminasioni jarhasïndi ka ískuksï úrasïndi ambe enga xáni echerirhu jaka.

Joperu Biblia uandasïndi eska sési jánhaskuarhintaaka.

¿Niáraa ima jurhiatikua enga sési jánhaskuarhintaaka?

Biblia uandasïndi eska Tata Diosï uaaka eska iápurisï kánikua itsï jauaka. ¿Néna uaa ísï úni?

1. 1. Tata Diosï ‘kʼamajkuantauati imeechani engaksï ikichakua újka parhakpinini’ (Jaŋaskuecha 11:18). Kʼamajkuati indeni ambe enga úni jaka eska nóteru jauakia itsï: kʼuiripuechani engaksï no sési úriika ka engaksï kánikua tsitijka sentabu ambe ka engaksï no sési úkuni jaka echerini (2 Timoteo 3:1, 2).

2. 2. “Jimeesïsï enga kʼarhikʼarhindeka jimboka aparhikuarhisïnga, niáraati kánikua itsï jatani, nani enga uinimeaka pʼatamu ambe” (Isaías 35:1, 6, 7) Ambe enga xáni no sési úkuarhini jaka jimboka nóteru jarhaskia itsï, Tata Diosï méntku iámindu ambe sési peentaati ka uaati eska i parhakpini paraisu máeuaka nani enga kánikua itsï jauaka.

3. 3. “Tʼuri kuidarisïnga echerini ka úsïngari eska mámaru ambe jukaaka ka áspiti ambe” (Salmo 65:9). Tata Diosï újchakuraati echerini ka uaati eska kánikua tʼirekua jauaka ka eskaksï iáminduecha jatsiaka itsï pímbinhanharhi.