¿Para ambeksï úrasïni Jeobaeri testiguecha imani sentabu enga kʼuiripu íntspijka?
Úrasïngachi indeni sentabuni para iámindu ánchikuarhita ambe engachi Jeobaeri testiguecha újka ka para jarhuajpeni jiáni enga no sési ambe úkuarhijka. Iámindu ambe engachi újka, jindesti para jarhuataani kʼuiripuechani paraksï Jesukristueri chúxapati úkuarhini (Mateu 28:19, 20).
Nóchi méni úrasïnga indeni sentabu para nema sánderu jatsikuarheni. No ma Jeobaeri testigu maiamunhasïndi para kʼumanchikuecharhisï aianhpini jámani ni para kúnguarhikuani ma orhejtsïkuni. Níjtuksï imecha maiamunhajki engaksï sukursalicharhu jarhuajpejka ka ni imecha engaksï jarhuajpejka Kʼumanchikuarhu nani engaksï Interu Parhakpini anapu Jeobaeri Testiguecheri Ánchikuarhitani Exejka, ni Grupuni enga Orhejtsïkuajka iámindu kúnguarhikuechani.
Na engachi úrajka sentabuni
Para publikasionichani uáni: Mándani uéxurhini, tradusiriuasïngachi, imprimirini ka etsakuani uánikua Bibliaecha ka karakatecha engaksï Bibliarhu pʼitakata jaka ka no nemanchi euasïnga sentabu indeni ambe jimbo. Ístu, juchari publikasionichaksï jarhasti pájinarhu jw.org ka aplikasionirhu JW Library ka no nema jatsisti para maiampini para ini ambe úrani.
Para uáni ka sési jatsiani kʼumanchikuechani engachi úraajka: Iámu parhakpinirhu, uásïngachi ka sési jatsiasïngachi kʼumanchikuechani engachi úraajka para Tata Diosïni kómarhini. Indeni ambe jimbo, iámindu kúnguarhikuechaksï jatsisïndi kʼumanchikua ma nani tánguarhini. Ístuchi uásïnga sukursalichani ka ofisinechani para tradusirini ka jánguarhintasïngachi méntkisï sési jatsiani. Sáno iámindu i ánchikuarhita, imechaksï úsïndi engaksï uéjka jarhuajpeni, ísï jimbosï no kánikua sentabu úrakuarhejti.
Para máteru ambe enga uétarhijka: Sentabu engaksï kʼuiripuecha íntspijka para jarhuajpeni ini ánchikuarhitani úni interu parhakpinirhu, ístu marhuasïndi para jarhuataani ima erachichani engaksï jámajka iámindu kúnguarhikuechani pʼorhembiani, para iámindu ánchikuarhita enga jima úkuarhijka Kʼumanchikuarhu nani engaksï Interu Parhakpini anapu Jeobaeri Testiguecheri Ánchikuarhitani Exejka, sukursalicharhu ka ofisinecharhu para tradusirini.
Para aianhpini: No ma Jeobaeri testigu maiamunhasïndi para ambakiti ambe uandantani o para jorhentpini “[Tata] Diosïri uandakuani” (2 Korintu 2:17). Joperu, ísï eska na úkuarhienga primeru siglurhu, máru erachicha engaksï jorhendanhaka para sési úni ambe ma, o imecha engaksï kʼamakʼamasï úrajka tiempu para aianhpini, intsïnhasïndiksï nani engaksï uáka irekani ka sánisï ambe jingonksï jarhuatanhasïndi (Filipusʌ 4:16, 17; 1 Timoteo 5:17, 18).
Para jorhentpini: Ístu, imani sentabu engaksï kʼuiripuecha íntspijka, úrakuarhesïndi para kʼéri tánguarhikuechani uáni. Ístuchi uásïnga bideuecha ka audiuecha engaksï Bibliarhu pʼitakata jaka. Ístuchi uásïnga kursuechani para sánderu sési jorhendaani kúnguarhikuarhu anapu orhejtsïkutichani ka ístu imechani engaksï kʼamakʼamasï marhuajka paraksï sánderu sési úni imecheri ánchikuarhita.
Ánchikuarhita para jarhuajpeni: Enga nani no sési ambe úkuarhijka, jarhuataasïngachi imechani engaksï uétarhinchani jarhajka. Íntsaasïngachi tʼirekua, itsï ka nani engaksï uáka pakarani. I ambe engachi újka, marhuakuasïndi juchari erachichani, joperu ístu imechani engaksï no Jeobaeri testigueka (Galasia 6:10).