¿Nóteruksï uandajpaasïni Jeobaeri testiguecha imechani engaksï nóteru imecheri relijioni anapuejkia?

Seguirisïngachi uandajpaani imechani engaksï itsï atakuarhijkia komueska Jeobaeri testiguecha, peru engaksï nóteru tánguarhijkia ka niksï nirani eianhpini. Jánguarhintasïngachi jarhuaatani parakaksï andarhentaaka Tata Diosïni ka parakaksï kúnguarhiaka ménderu juchantsïni jingoni.

Enga Jeobaeri testigu ma kʼéri pekadu ma újka, uáti petanhantani kúnguarhikuarhu uératini. Peru paraksï úni ísï úni, orhetaksï exesïndi máru ambe. Enga kʼuiripu pʼindekia no kurhajchaani Bibliarhu anapu juramukuechani ka no moantani, jimajkani petanhantaati kúnguarhikuarhu uératini, ka kúnguarhikuarhu anapuechaksï nóteru uandajpaatia. Biblia uandasïndi: “Jimajkani késtata je imani no sési urini enga chánksïni jingoni jaka” (1 Korintu 5:13).

¿Ambe úkuarhisïni enga achati ma petanhantajka kúnguarhikuarhu uératini, peru imeri témba ka uájpechaksï útasï Jeobaeri testigueni? Nájkiruka imecheri pájperakua mójtakuarhiaka para Tata Diosïri ambe jingoni, no mójtakurhisïndi familiarhu anapu ambe. No mójtakurhisïndi imecheri sési pájperakua temungurhirikuarhu, ístu pájperakua táti ma uájpa jingoni.

Imecha engaksï petanhantaka kúnguarhikuarhu uératini, uátiksï nirani juchantsïni jingoni tánguarhini ka, engaksï uékaska, kúnguarhikuarhu anapu orhejtsïkutichaksï íntskuati jarhuajperata Biblia jingoni. I ambe jindesti paraka ima uáka ménderu Jeobaeri testigueni. Imecha engaksï ikichajka no sési jánguani ka sési jimbo xarhatani eskaksï uékasïnga ísï irekani eskaksï na uandajka Bibliarhu anapu prinsipiuecha, uátiksï ménderu kúnguarhikuarhu jarhani.