“Ísï xarharasïrendi enajkini iámu ambe jatsipi”

NA ENGANI JÁMAENGA IÓNTKI

Montreal andajpenuska, sánderu kʼéri ireta Canadá anapu jini Quebec. Juchiti tátichajtsïni kánikua uékperakua jingoni tʼarhexeraspti jíndini ka juchiti tanimu ermanuechani barriurhu Rosemont jimbo. Kánikuachi pínandikua jingoni irekaspka ka sésichi pájperasïrenga.

Desde engani sapichuepka, tsitisïrenga Bibliaeri ambe mítini. Miásïnga engani 12 uéxurhini jatiripka, arhintasïrenga Nuebu Testamenturhu Jesusiri ambe ka kánikua tsitisïrenga. Ískurini pakatasïrendi imeri uékperakua ka pʼamojpikua, ka ji uékasïrenga ísïini eska ima. Joperu uénaspka nóteruni tsitinia engani na kʼéni japkia ka úndaspka kúnguarhini no ambarhati kʼuiripuechani jingoni, xáni no sési ambe.

Juchiti táti saksfoni kústasïrendi ka intsïnhaspka komu erensia imeri saksofonini ka engani jíjtuni kánikua tsitienga kústatiini. Kústakua jindespti ambe engani sánderu jukaparharenga. Xáni tsitisïrenga engani sóntkuni jorhenguarhipka guitarra kústani. Tiempu jingoni, úspka juchiti banda rockirini máru amiguecha jingoni ka kústasïrengachi máru kʼuínchikuecharhu. Máru produktoricha engaksï famosuepka, exesptijtsïni ka ofertajtsïni ma úchispti, ísïni firmarispka kontratu ma kʼéri kompania ma jingoni enga kústakua ambe petenga (discográfica). Juchiti kústakua, niáraspti kánikua mítikateni ka someni kurhaakuarhisïrendi radiurhu jini Quebec.

Ísï xarharasïrendi enajkini iámu ambe jatsipi. Tumbiispka, famosu ka kánikua tumina andasïrenga imani ambe úparini engani xáni tsitienga. Jurhiakua, jimnasiorhu nirasïrenga, entrebistarhinhasïrenga, autografuechani firmariuasïrenga ka telebisionirhu uérasïrenga. Chúrekuechani, kústasïrenga ka kʼuínchikuecharhu nirasïrenga. Parani aguantarhini kʼuripueri presioni, uénani jámani alkoli arasïrenga ka tátsekuani droga ambe úrasïrenguia. Ísku jándikua ambe niátasïrenga ka no sáni chésïrenga ambe engani úkuarhinchapiringa.

Uánikuaksï enbidiarisïrendi juchiti irekuani jimbokani ísï xarharasïrenga enajkini felisipi. Joperuni ji ísï pʼikuarhinhisïrenga enajkini no ma ambe jatsipi, sánderu jiáni engani jandiajku jarhaenga. Kómu pʼikuarherasïrenga ka uandanhiani. Engarini xáni sési nicheni japkia juchiti karrerarhu, juchiti tsimani produktorichaksï sida jimbo uarhispti, xáni no sési ambe. No úsïrenga jakajkuni. Kánikua tsitisïrenga kústani, joperu ikichasïrenga ambe enga jima úkuarhienga.

NA ENGARINI BIBLIA MÓJTAKUCHEKA IREKUA

Nájtukarini jindeni sési nicheni japka, exesïrenga eska parhakpinirhu kánikua no sési jánhaskuarhexapka. ¿Néna jimbo xáni no sési jánhaskuarhexaki? Kurhamarhikuarhisïrenga andisï Tata Diosï no ambe ma uéni. Asta jamberini kómarhisïrenga ka kurhakusïrenga eskarini mókuchentapiringa. Ma xanhari, engani mintsikuarhini japka juchiti biaji ma jimbo, uénaspka ménderu Bibliani arhintani. No kánikua kurhangusïrenga, joperuni niáraspka jánhaskani eska axuterku jarhaspkia enga parhakpini kʼamajkunhapiringa.

Bibliani arhintaparini, exespka eska Jesusi 40 jurhiatikua no tʼirespka enga desierturhu japka (Mateu 4:1, 2). Eratsispka eska engani jíjtuni ísï úpiringa, jamberi Tata Diosïrini xarhachepiringa, jimbosïni erakupka jurhiatikua ma parani uénani. Tsimani semana antesi de uénani no tʼireni, tsimani Jeobaeri testiguechaksï uámutaspti juchiti puertarhu ka ji pʼímarhiaspka eskaksï inchaakupiringa enajkini eroani japia. Ískuni pakaraspka eratini ma testiguni imeri éskuecharhu, enga Jacques arhinhenga, ka arhispka: “¿Nénachi uá seguru jarhani eskachi últimu jurhiatikua jimbo irekaxaka ini parhakpiniri?”. Pʼirakuspti imeri Bibliani ka arhichentasptirini 2 Timoteo 3:1-5. Uánikua máteru kurhamarhikuechani úkuaspka ka ískujtsïni pakataspti imecheri ambakiti mókuntskuecha jimbo, engaksï meru ísïpka ka engaksï méntkisï Bibliarhu jupindaskata japka. Solu máru bisitechani jimbo, kuenta íntskukuarhispka eskani no uétarhinchasïrenga en aiunasi jarhani.

Uénaspka estudiu bíbliku ma Testiguecha jingoni. Tiempu jingoni, kuinakuarhispka ka uénaspka nirani tánguarhikuecharhu Kʼumanchikua Reinueri jimbo. Na engajtsïni xáni uékperakua jingoni erokapka ini tánguarhikuecharhu, sánderuni seguru jarhaspkia eskani iásï k’oru exentaspkia jurhimbikuani.

Jo ísïsti, uánikua ambe jatsispka para mójtakuni juchiti irekuarhu parani úni ambe engani jorhenguarhini japka Bibliarhu. Por ejemplu, jatsispka parani jurajkuni droga ambe úrani ka nóteru ísku jándikua ambe niátania. Támtuni jatsispka para nóteru xáni jíjkuni pendienti pákuarhinia, sánderu sési, uandanhiania máteruechani jimbo. Ka jimbokani táti solteruepka, jatsispka parani kuidariuani juchiti tsimani sapiichani na engaksï pʼikuarheraenga ka Bibliaeri ambe jorhendaani. Ísï jimbosïni jurajkupka juchiti karrera kústakueri ka jiókuarhispka ánchikuarhita ma engani sánitu maiamunhenga fábrikarhu ma.

Arhiaksïni, kánikua úkua jukanchaspka mójtakuni juchiti irekuani. Mientrasi engani jánguarhintani japka jurajkuni drogaechani, ménisï, niáraspka ménderu drogarikuarini juchiti pʼamenchakua jimbo enga iámu juchiti kuerpu nóteru sési marhuauenguia (síndrome de abstinencia) (Roma 7:19, 21-24). Joperu ambe engani sánderuni úkua jukanchapka jurajkuni jindespti ísku jándikua ambe. Ístu, ánchikuarhitarhini kánikua kuatajkusïrhendi ka ima xáni sánititu tumina engani andenga, norini sáni animarisïrendi. Iásï tanimu kutsï jimbo andasïrenguia imani tuminani engani tsimani ora jimbojku andenga kústani jámani.

Kómarhikuarhini kánikua jarhuatasti mójtakuni imani ambe enga xáni úkua jukapka. Ka ísturini kánikua marhuachisti engani méntku úndapka Bibliani arhintani. Miásïnga máru bersikuluechani engarini espesialmenti marhuachika. Ma jindesti 2 Korintu 7:1, enga pʼímarhiajka kristianuechani paraksï pímbinhasïntani “indeni no sési jásï ambe jingoni enga kuerpu újka ka enga mintsita tamapu eratsijka”. Máteru tekstu engarini jarhuatapka exeni eskani úpiringa jurajkuni no sési járhati úkuechani, jindesti Filipusʌ 4:13, enga arhijka: “Parani úni iámindu ambe, uinhapikua jatsiska imani jimbo engarini uinhaperantajka”. Jeoba mókuantaasti juchiti kómarhikuechani ka jarhuatastirini kurhanguni ka úraani Bibliaeri prinsipiuechani. Inde ambe ústi eskani aiakupiringa juchiti tsípikuani Jeobani (1 Pedru 4:1, 2). Uéxurhini 1997 jimbo, itsï atakuarhiska komu Jeobaeri testigu ma.

NÁKI KÓNTPERATECHANI INTSÏNHAASKIA

Seguru jarhaska eska engani útasï ísï irekani japiringa, iásï jamberini uarhipiringia. Joperu, iásï k’oruni sési jimbo felisiskia. Juchiti ambakiti uarhiiti, Elvie, kʼéri kóntperata máesti para ji. Tsimarhanchi tiempu kompletueri marhuaxaka ka tsípisïngachi jorhendaani máteruechani Bibliaeri jurhimbikua ambe. Kánikua sési pʼikuarherasïnga indeni ambe jimbo ka agustu irekaska. Mintsita jingoni agradeserikusïnga Jeobani engarini ioarhika parani andarherani (Juanu 6:44).