TUMBIICHAKSÏ KURHANGUARHISÏNDI
¿Nénarini uaa jarhuatani Biblia? Parti 2: Ambe engari uaaka úni parari tsitini Bibliani arhintani
“Úpiringari ísï exeni enajki kánikua úkua juka Biblia arhintani. Peru jiánisï úkua jukajti, enga ma no míteka néna arhintani”, ísï uandasïndi tumbi ma enga Will arhinhajka.
¿Uékapirini míteni amberi uaa úni parari tsitini Bibliani arhintani? I jorhenguarhikuakini jarhuataati míteni ambe engari uaaka úni.
Eranhaska ambe engari arhintajka Bibliarhu
Ini ambe ú parari eranhaskani eskari t’u jima jarhaska:
Eraku náki partiri uékasïndi arhintani Bibliarhu. Uaati jindeeni relatu ma, ma parti ebanjeliucheri o Biblieri arhintskuecha engaksï uandantskueni arhikuarhintajka engaksï jw.org jimbo jaka.
Arhinta relatuni. Uaakari jandiajku arhintani o chiiti familia o amiguechani jingoni. Nema uaati jindeeni ima enga uandantani jaka relatuni ka máteruechaksï uaati arhintani ambe engaksï máteru k’uiripuecha uandapka indeni relatu jimbo.
Uaakari ini ambe úni:
Ú dibuju ma ima relatueri o uánikua dibujuechani engaksï xarhataaka na enga úkuarhipapka ima ambe engari arhintani jaka ka kara ambe ma enga uandaaka ambe enga arhikuekajka mándani dibuju.
Engari arhintani jauaka nemeeri enga no méni jurajkupka Tata Diosï Jeobani, uaakari karani ambe enga úpka ka ambakiti ambe enga xarhatapka ka ístu kóntperatechani enga pʼiuapka.
Ú enajkiri inbestigasioni ma úni japirini. Eranhaska eskari mámaru ambe kurhamarhixaka imeechani engari Bibliarhu arhiantani jaka ka ístu máteru kʼuiripuechani engaksï jima japka.
Engari arhintani jauaka nemeeri enga no sési ambe úpka, eranhaska ambe enga úkuarhipiringa enga ménderueni úpiringa ambe ma. Pori ejemplu, eratsi Pedruni jiáni enga uandapka eska no mítespka Jesúsini (Markusʌ 14:66-72). ¿Ambe sánderu sési japirini eska uandapiringa Pedru?
Uaakari karani relatuni ísï eskari tʼu na kurhanguka ka jatsiku ambe engari jorhenguarhijka imani relatu jingoni (Roma 15:4).
Engari eranhaskaska ambe engari arhintajka Bibliarhu, ísïri p’ikuarheraaka enajkiri tʼu jima jaki.
Jirinhanta sánderu informasioni
Engari jirinhantaska sánderu informasioni Biblieri relatueri ma, uaakari jukaparhakua ambe jorhenguarhini. Engari exentajka sánderu ambe, uaatikini jarhuatani parari sánderu sési kurhanguni ambe ma.
Pori ejemplu, uaakari terukutantani ambe enga uandajka Mateu 28:7, imani ambe jingoni enga Markusʌ 16:7 uandajka.
¿Andisï uandapi Markusï eska Jesúsi no ióni jimbo xarhakuapiringa imeeri chúxapatichani “ka Pedruni”?
Jarhuataakaksïni sáni: Markusï no jima jarhaspti, peeringa Pedrusï aiangupka.
Jukaparhakua ambe Biblieri: ¿Andisï sési pʼikuarherapi Pedru enga mítepka eska Jesúsi uékaxapka exeni? (Markusʌ 14:66-72). ¿Jesúsi néna xarhatakuspi Pedruni eska ambakiti amigu máespka? Engari tʼujtu uéjka ambakiti amigu máeni, ¿nénari uaa májkueni úni eska Jesúsi?
Engari eranhaskajka Biblieri relatuechani ka jirinhantani sánderu informasioni, niárasïngari tsitini Bibliani arhintani.