Jeobaeri ánjili kuájchakusïndi Esekiasini

Asiriuechaksï imeri juramukua jimbo jatsistia Israeliri reinuni enga diesi tribuerika. Iásï, Asiria anapu rei Senakeribi, ístu uékasïndi pakatakuarhini Juda anapu reinuni enga tsimani tribuerika. Ísï jimbo, uénaspti mándani arhini andaani iretechani engaksï Juda japka. Peru iretani enga ima sánderu uékenga, jindespti Jerusaleni. Ambe enga Senakeribi no mítipka, jindespti eska Jeoba kuájchakuxapka imani iretani.

Esekiasi, Juda anapu rei, kánikua meiamuspti Senakeribini paraka no ma ambe úkupiringa Jerusalenini. Senakeribi jiókuarhispti tuminani, peru útasï axaspti imeri ejersituni para kʼamajkuni Jerusalenini. Iretarhu anapu kʼuiripu kánikua chéxapti jimbokaksï asiriuecha niáraxapkia. Jimajkani, Esekiasi arhiaspti: “Asï ché je. Asiriuechaksï uinhapisti, peru Jeoba uáti eskachi sánderu uinhapiaka eskaksï ima”.

Senakeribi axaspti imeri mensajeruni enga rabsakepka, paraka teresmarhupiringa Jerusaleni anapu kʼuiripuni. Rabsake iretarhu uérakua pakaraspti ka uinhachaparini arhiaspti: “Jeobaksïni no uáti jarhuatani. Asï jurajku je eskaksïni Esekiasi enganiariuaka. No ma diosï uátiksïni kuájchakuni paraksïni no ma ambe úcheni”.

Esekiasi Jeobani kurhamarhispti ambe jatsispi para úni ka Jeoba arhispti: “Asï ché imani ambe jimbo enga rabsake uandani jaka. Senakeribi no kʼamajkuati Jerusalenini”. Tátsekua, Esekiasi intsïnhaaspti máru kartechani enga Senakeribi axaapka, engaksï uandaenga: “Entregarikuarhi je. Jeobaksïni no uáti salbarini”. Jimajkani Esekiasi kómarhispti: “Jeoba, jimboetakua, salbarijtsïni, parakaksï iáminduecha mítiaka eskari tʼujku jindeska Tata Diosï enga jurhimbitiika”. Ka Jeoba mókukuntaspti: “Asiria anapu rei no inchaakuati Jerusaleni. Ji kuájchakuaka juchiti iretani”.

Senakeribi seguru jarhaspti eska sóntku andapiringa Jerusalenini. Peru ma chúrikua, Jeoba axaspti imeri ánjilini asiriuecheri kampamenturhu enga iretarhu uérakua japka. ¡Ima ánjili 185,000 soldaduechani uándikuaspti! Uarhisptiksï sánderu uinhapiti soldaduecha rei Senakeribiri ka nóteru ambe ma úspti únia maske níntani. Ísï úparini, Jeoba kuájchakuspti Esekiasini ka Jerusalenini eska na uandapka. Engari tʼu Jerusaleni japiringa, ¿mintsikapiriniri Jeobani?