Máru kʼuiripuechaksï úkua jukanchasïndi xénchani Tata Diosïni. Jimbokaksï eratsesïnga eska ima no uékasïnga eskachi míteaka, eska no uandanhiasïnga juchantsïni jimbo ka eska no sési kámpisïnga. Exe je ambe engaksï uandajka máru kʼuiripuecha:

• “Nájkirukani kurhakuenga Tata Diosïni eskarini jarhuatapiringa, ísï pʼikuarherasïrenga eska ima jukari iauani jarhaspka. Ísï exesïrenga enajki no ma pʼikuarherenga kʼuiripuecha jimbo.”​(Marco, Italia.)

• “Uékasïreenga marhuakuni Tata Diosïni, peru ísï exesïrenga enajki jukari iauani japi. Ísï exesïrenga eska Tata Diosï máeska enga méntkisï exeni jarhajka nénajtsïni kastigarini. No exesïrenga eska imajtsïni uandanhiasïreenga.”​(Rosa, Guatemala.)

• “Engani sapiipka ísï exesïreenga eska Tata Diosï solu exeni jarhasïreenga ambe engachi no sési uénga parajtsïni úni kastigarini. Tátsekua uénaspka exeni eska ísïispka komu nema enga iauani jaka ka enga ma no újka andarhierani, komu juramuti ma enga juramukuajka kʼuiripuechani ka enga no uandanhiajka imeecha jimbo.”​(Raimunda, Canadá.)

¿Chá na uandasïni? ¿Uaachi xénchani Tata Diosïni? Desde iónisïa kristianuechaksï niáraspti ini ambe kurhamarhikuarhini. Ístu jarhaspti ma tiempu engaksï kʼuiripuecha no kómarhienga Tata Diosïni. ¿Andi? Jimbokaksï chérhisïrenga. Will Durant enga istorieri ambe mítekuka, uandaspti: “¿Néna uaa kʼuiripu ma enga kʼamanharhintstika kómarhini Tata Diosïni, enga uaxantskuarhu jaka iauanisï ka enga chérpikueni xarharajka?”.

¿Ambe úski eskaksï kʼuiripuecha niáraka indeni ambe eratseni Tata Diosïri ambe? ¿Ambemindusï jorhentpijki Biblia? ¿Sánderu fásilipirini xénchani Tata Diosïni engachi mítepiringa jurhimbikua ambe imeeri ambe?

AMBE ENGA KʼUIRIPU UANDAJKA

“Nóchi niáraska de akuerdu jarhani sini Tata Diosï jatsiski nombri ma, ka enga ísïipiringa nóchi úpiringa míteni náki jindeeski imeeri nombri.” (Jorhentpiri David Cunningham, i ambe karasti imeeri librurhu Theological Studies.)

AMBE ENGA BIBLIA UANDAJKA

Tata Diosï mismu uandaspti: “Ji jindeeska Jeoba. Inde jindeesti juchiiti nombri” (Isaías 42:8). Jeoba nombri ebreu máesti enga arhikuekajka “Ima úsïndi eska niáraaka úkuarhini”​(Génesis 2:4, nota).

Jeoba uékasïndi eskachi úraaka imeeri nombri. Biblia uandasïndi: “Uandajpa je imeeri nombri jimbo, mítetarpi je iretecharhu ambe enga ima újka. Aianhpi je na enga xáni k’éri ambeeka imeeri nombri”​(Isaías 12:4).

Jesúsi úraspti Tata Diosïri nombri ka jorhendaspti imeeri chúxapatichani. Ka ma jurhiani kómarhispti imeeri Taatini, arhiparini: “Ji mítitaraska né engari jindeeka tʼu”. ¿Andisï mítitarapi imeeri chúxapatichani Tata Diosïri nombrini? Ima seguirisïndi uandani: “Para eska inde uékperakua engarini jimbo tʼu uékajka jíndeni, imeecha jingoniuaka ka ístu ji imeecha jingoni jauaka”​(Juanu 17:26).

ANDISÏ JUKAPARHAKUE ESKAJTSÏ MÍTIAKA INI AMBE

Walter Lowrie enga Biblieri ambe mítekuka, karasti: “Kʼuiripu enga no míteka Tata Diosïni nombri jimbo no mítesti na enga jásïka [...] ka no úsïndi xénchani enga solu exeaka komu uinhapikua ma”.

Acheeti ma enga Victor arhinhajka, nirasïrendi mándani semana iglesiarhu peru no ma ambe ma mítespti Tata Diosïri ambe. Ima uandasti: “Engani jorhenguarhipka eska Tata Diosïri nombri jindeeska Jeoba, ísï pʼikuarheraspka enajkijtsïni mítitarapi nemani. Iásï kʼóru úspkia míteni imeeri ambe engani xáni kurhandipka, niáraspka ísï exeni Tata Diosïni komueska kʼuiripu ma ka jiáni uératini niáraspti juchiiti amigueni”.

Jeoba andarhieraxati imeechani engaksï eratsentajka imeeri nombrini ka aiakuasïndi: “Jíksïni pʼamojperakua xarhatacheaka, ísï eska acheeti ma na xarhatakujka pʼamojperakua imeeri sapini enga marhuakujka” (Malaquías 3:​16, 17). Tata Diosï ístu újchakurasïndi imeechani engaksï uandajpajka imeeri nombrini jimbo. Biblia uandasïndi: “Iámindu imeecha engaksï kómarhiaka Tata Diosï Jeobaeri nombri jimbo, pʼímutantskateuatiksï” (Romanos 10:13, Traducción del Nuevo Mundo).

AMBE ENGA KʼUIRIPU UANDAJKA

El Diccionario Akal crítico de Teología uandasïndi: “Trinidadi ambe máesti engachi no újka kurhanguni, eska Tata Diosï tanimueska Taati, Uájpa ka Espiritu Santu”. Ka Diccionario abreviado del cristianismo uandasïndi: “Katolikuecha, ortodoxuecha, anglikanuecha ka protestantichaksï jakajkusïndiksï ini jorhenguarhikuani”.

AMBE ENGA BIBLIA UANDAJKA

Jesúsi, Tata Diosïri Uájpa no méni uandaspti eska ima májkueniska eska imeeri Taati jémba. Sánderu sési uandaspti: “Nirasïnga Diosï Taatini andarhientani, jimboka Taati sánderu kʼéri ambeeska ka eskani ji” (Juanu 14:28). Ístu, ma imeeri chúxapatichani arhispti: “Ji kénchintaxamka juchiiti Taatini ka chaari Taatini ka juchiiti Tata Diosïni ka chaari Tata Diosïni andarhientani”​(Juanu 20:17).

Espiritu santu no kʼuiripu máesti. Primeru kristianuechaksï “uinispti espiritu santu” ka Jeoba uandaspti: “Ji íntsauaka juchiiti espirituni iámindu kʼuiripuechani” (Ukuecha [Hechos] 2:1-4, 17). Espiritu santu no Trinidadiri kuenta úkuarhisïndi, sino Tata Diosïri uinhapikua enga ima úrajka para úni ambe ma.

ANDISÏ JUKAPARHAKUE ESKAJTSÏ MÍTEAKA INI AMBE

Karl Rahner ka Herbert Vorgrimler engaksï Biblieri ambe exejka uandasptiksï eska Trinidadi “no úpiringa mítekuarhini enga no japiringa jánhaskua ma ka enga na japiringia jánhaskua útasteruksï no úpiringa jánhaskani”. ¿Joperuchi uaa xénchani nemani engachi no míteka ni kurhangukuni? Nómbe. Jimbosï Trinidadiri jorhenguarhikua újti eskachi no uaaka xénchani Tata Diosïni.

Marco, engachi primeru artikulurhu uandaka ísï exesïreendi Trinidadi komueska ambe ma enga jarharitenga Tata Diosïni. Ima uandasïndi: “Eratsesïrenga eska Tata Diosï no uékasïreenga para mítenhani. I ambe úsïreendi eskani no úpiringa kurhanguni na enga jásïika ka ni andarhierani”. Peru Tata Diosïjtsïni xarhatachesïndi na enga jásïika. Jesúsi uandaspti: “Jucha kómarhisïnga imani engachi míteka”​(Juanu 4:22).

Marco seguirisïndi uandani: “Engani jorhenguarhipka eska Tata Diosï no Trinidadiri ma jarhaska, jiáni úndaspka ambakiti pájperakua ma jatsini imani jingoni”. Engachi ísï exeaka Jeobani komueska kʼuiripu ma ka no komueska nema enga no uékaka eskachi míteaka, sánderu fásiliuati eskachi xénchaaka. Jimbosï Biblia uandajti: “Ima enga no uékpijka no mítesti [Tata] Diosïni, jimboka [Tata] Diosï jindeeska uékperakua” (1 Juanu 4:8).

AMBE ENGA KʼUIRIPU UANDAJKA

“Almecha imeecheri engaksï uarhijka, engaksï kʼérati pekaduecha uaajka infiernurhuksï nirasïndi engaksï uarhijka, ka jimaksï kómu nitamakuarhini jarhasïndi infiernurhu, enga jindeeka ʻchpiri enga no méni pátakuarhijka’.” (Catecismo de la Iglesia Católica.) Máru relijioniri orhejtsïkutichaksï uandasïndi eska ima enga infiernurhu jarhajka iauani jarharitini jarhasïndi Tata Diosïni.

AMBE ENGA BIBLIA UANDAJKA

“Alma enga pekadu újka jindeesti enga uarhiaaka.” (Ezequiel 18:⁠4.) Uarhirichaksï “méntku nóteru ambe ma mítestia” (Eclesiastés 9:⁠5). Ísï jimbo, enga alma uarhijka ka engaksï uarhiricha méntku nóteru ambe ma mítejkia, ¿néna úpirinksï no sési nitamakuarhini jarhani “chpirirhu enga no méni k’amakuarhijka” o iauani jarharitinksï jarhani Tata Diosïni?

Uánikua kʼuiripu eratsesïndi eska uandakua Hades arhikuekasïndi infiernu, joperu i uandakua uarhikueri ambe uandasïndi. Pori ejemplu, Bibliarhu jarhasti profesia ma enga Jesúsiri ambe uandajka: “Jimbokani erokaxaka eskari tʼu no jurajkuaka juchiiti almani uarhikuarhu” (Ukuecha [Hechos] 2:​27). Ísï jimbo, Jesúsi no nani jarhaspti enga kómu nitamakuarhini japiringa o enga iauani jarharitini japiringa Tata Diosïni, ima uarhirixapti.

ANDISÏ JUKAPARHAKUE ESKAJTSÏ MÍTIAKA INI AMBE

Ísï exeni Tata Diosïni eska no sési kámpisïnga; úsïndi eskachi jarhariaka imani. Rocío enga México anapueka, uandasïndi: “Engani sapiipka jorhendanhaspka eska infiernu jarhaska. Kánikua chérhisïrenga Tata Diosïni engani jamberi eratsenga eska ima no jatsiaspka sési járhati kualidadichani. Eratsesïrenga eska ima méntkisï ikiani jarhasïreenga ka eska kánikua maluespka”.

Ambe enga Biblia uandajka Tata Diosïri ambe ka na engaksï jarhajka uarhiricha, úspti eska Rocío ménderueni eratsepiringa. Ima uandasïndi: “Libri pʼikuarheraspka, komusiekajtsïni kénditachepiringa kʼuetsapeti ambe ma, kuenta íntskukuarhespka eska Tata Diosï uékasïnga eskachi sési jauaka, eskajtsïni xénchasïnga ka eskani jíjtuni úpiringa xénchani. Iásï ísï exesïngia komueska Taati ma enga sési kuidarijka imeeri sapiichani ka enga uéjka eska sési nikuauaka”​(Isaías 41:13).

Uánikua kʼuiripuechaksï jatsiska relijioni ma jimbokaksï chérhisïnga inifiernuni. Joperu Tata Diosï no uékasïndi eskaksï chétapu jimbo marhuakuaka. Jesúsi mismu uandaspti: “Uékaakari chiiti Tata Diosï [Jeobani]” (MarkusΛ 12:29, 30). Ísï jimbo, engachi kurhangujka eska Tata Diosï jurhimbikua jingoni úsïnga iámindu ambe, sánderu fásiliuati mintsikani eska sánderu orhepatini májkueni uaaka. Ísï eska Eliú, Jobueri amigu ma, uaakachi mintsikakua jingoni uandani: “¡No uétarhisïndi ni sikiera eratseni eska Tata Diosï jurhimbiti no sési jásï ambe niátasïnga, eska ima enga Iámindu ambe újka Úni, no jurhimbikua jingoni uáka ambe ma!”​(Job 34:10).

Ma jurhiani, Jesúsi uandaspti jini Jerusaléni imeeri Taatiri ambe ka uandantaspti na enga relijioniri orhejtsïkuticha no jurhimbiti uénga ambe ma imani tiempu jimbo (Juanu 8:​12-​30). Ambe enga uandapka xarhatachesïndijtsïni na engachi jatsika para sési inbestigarini ambe enga jakajkunhajka Tata Diosïri ambe. Jesúsi uandaspti: “Engajtsï chá méntku jauenaska úni eskaksïni ji na arhijka, sési jimbo chá jindeaka juchiiti jorhenguarhiticha. Ka míteakajtsï indeni ambe enga sési jimboeka, ka inde enga sési jimboeka, uaati eska chá nóteru jindeaka jántspiricha” (Juanu 8:31, 32).

Enga Jesúsi uandapka “Engajtsï chá méntku jauenaska úni eskaksïni ji na arhijka”, arhikuekaxapti eskachi uaaka míteni sini ambe engaksï relijionicha jorhentpijka jurhimbitiska o nómbe. Engaksïni nema arhiaka ambe ma Tata Diosïri ambe, kurhamarhikuarhi je: “¿I ambe terukuntasïni imani ambe enga Jesúsi jorhentpipka ka ístu iámindu ambe enga Biblia jorhentpipka?”. Májkueni ú je eska imeecha engaksï kurhajchapka apostoli Pabluni: sési jirinhanta je Bibliarhu abersieka ísïika ambe engaksïni arhijka (Ukuecha [Hechos] 17:11).

I ambeksïsï úpti Marco, Rosa, ka Raimunda, engaksï antesi uandapka: jorhenguarhisptiksï Bibliani Jeobaeri testiguecha jingoni. ¿Ambeksï jorhenguarhispi?

Marco: “Jeobaeri testigu engajtsïni jorhendaenga Biblieri ambe, méntkisï úrasïreenga Bibliani parajtsïni mókuchintani kurhamarhikuechani engachi jatsienga juchiiti uarhiiti ka ji. Sánhani arhispkachi xénchani Jeobani ka sánderuchi sési irekasïrengia juchaari temungurhirikuarhu”.

Rosa: “Eratsesïrenga eska Biblia jindeespka libru ma engaksï kʼuiripuecha uandanteenga neeski Tata Diosï. Peru tiempu jingoni, Bibliarhu exeantaspka mókuntskuechani imani kurhamarhikuecheri engani jatsiapka. Iásï, jakajkusïngia eska Jeoba jarhaska, ima jindeesti nema engani uaaka mintsikani”.

Raimunda: “Kurhakuspka Tata Diosïni eskarini jarhuatapiringa míteni. Sánisï tátsekua, juchiiti acheeti ka ji uénaspkachi jorhenguarhini Biblieri ambe. Iásï kʼóruchi míteska jurhimbikua Jeobaeri ambe. Kánikuachi tsípixapka, jimbokachi mítespka na enga jásïika Tata Diosï”.

Tata Diosïri Karakata, enga jindeeka Biblia, no solu uandantasïndi imeeri jurhimbikueri ambe, ístu uandasïndi na enga xáni sési járhati kualidadichani jatsiaka. Ka ístujtsïni jarhuatasïndi “míteni ambe engajtsïni Diosï kóndentaaka” (1 Korintu 2:12). ¿Andisï chá no inbestigarijki ambe enga Biblia uandajka Tata Diosïri ambe, ambe enga uékajka úni ka ambe engachi úkuarhinchaaka sánderu orhepatini? Uaakajtsï arhintani sánderu i amberi www.pr418.com/trs partirhu enga arhijka “Bibliaeri jorhenguarhikuecha > Kurhamarhikuecha enga Biblia mókuantaajka”. Jimintujtsï uaaka kurhajkuarhini Biblieri jorhenguarhikua ma Jeobaeri testigu ma jingoni. Engajtsï ísï úska, seguru eskajtsï kuenta íntskukuarheaka eskajtsï uaaka xénchani Tata Diosïni.