Konsejuecha para sési pájperani máteruecha jingoni

Puátspenta je

Puátsperanta je “enga nema jatsika arhijperakua máteruni jingoni” (KOLOSASI 3:13).

Jamberijtsïni nema no sési pʼikuastati o juchachi no sési pʼikuastani nemani jimbokachi iáminduecha pekadoriska. Ísï jimbo, iáminduechachi uétarhinchasïnga eskajtsïni tekaachintaaka ka juchajtuchi jatsiska para tekaakuantani máteruechani. Engachi ísï újka, nóteruchi ikiani pakarasïngia ima kʼuiripu jingoni. Nóchi jámasïnga “no sési úkuntani” ‘imani engajtsïni no sési úchika’ ka nijtuchi someni miátantani jarhani ambe enga no sési úka (Roma 12:17). Joperu, ¿ambechi uaa úni engajtsïni kánikua no sési úchika ka juchachi no úni mirikurhini? Jimajkani, jatsiskachi para tsimarhani uandontskuarheni, joperu kánikua janhanharhikua jingoni. Uékasïngachi sési pájperantani imani kʼuiripu jingoni ka no xarhatani eska ísïiska ambe engachi jucha uandajka o eratseni (Roma 12:18).

Kaxumbitii je ka janhanharpeni

“Kaxumbikua jingoni sánderu kʼéri ambe exea je máteruechani ka eska chájkumindu” (FILIPUSΛ 2:3).

Kʼuiripuechaksï uékaati juchantsïni jingoni jarhani engachi jucha kaxumbitiuaka ka engachi janhanharhikua jingoni kaaska. Imeechaksï míteati eskachi sési kámpisïnga, kurhangutspini ka eskachi no méni uékapiringa no sési úkuani. Joperu, engachi jucha eratseska eskachi sánderu kʼéri ambeeska eska máteruecha ka engachi méntkisï uékaska eska ísï úkuarhika eskachi jucha na tsitijka, ambe engachi uaaka, jindeesti eskachi no sési pájperaaka máteruecha jingoni ka arhijperanchi. Kʼuiripuechaksï no uékaati juchantsïni jingoni jarhani ka nóchi uánikua amiguechani jatsiauaka... o jamberi no ma.

Májkueni kaa je iáminduechani

Tata “Diosï no nani kʼuetsapesïn[di], sino jaiapanhentasïn[di] nákinterku ma nasioni anapu kʼuiripuni enga janhanharhijka imani, ka sési úni” (UKUECHA [HECHOS] 10:34, 35).

Juchaari Kueraajpiri iáminduechani májkueni kaasïndi, no arhiparini naniksï anapueski, náki idiomaksï uandasïni, na xánksï jatsikuarheski o na jásïksï koloriski. “Májku iurhiri jimbo kueraasti iámindu kʼuiripuechani” (Ukuecha 17:26). I ambe arhikuekasïndi eskachi iámindu ermanueska. Engachi iáminduechani janhanharhikua ka uékperakua jingoni kaajka, imaksï sési pʼikuarherasïndi, juchachi sési pʼikuarherasïnga ka juchaari Kueraajpirijtu sési pʼikuarherasïndi.

Asï sóntku ikia je

“Ka no ikiatsperani” (KOLOSASI 3:12).

Engachi sési kámpiska ka no sóntku ikiani, máteruechaksï sési pʼikuarheraati juchantsïni jingoni ka exeatiksï eskajtsïni uaaka aianguni ambee engaksï imeecha uékaaka, astajtsïni jurhimberantani, jimbokaksï mítesïnga eskachi no sóntku ikiasïnga. Ka enga nema ikiaska juchantsïni jingoni, iatsitakuarhu mókuntani jarhuataati máteruni paraka tsʼirapintaaka. Proverbios 15:1 uandasïndi: “Enga mókuntskua tekaantskua jingonijka, kénditasïndi ikiatapuni, peru uandakua enga no sési pʼikuastpijka úsïndi eska nema sánderu ikiauaka”.

Intsïmpirii je ka agradesidueni

“Sánderu sésiisti intsïmpini ka eska intsïmbinhani” (UKUECHA 20:35).

Uánikua kʼuiripuechaksï no uandanhiasïndi máteruechani ka soluksï eratsesïndi sánderu ka sánderu ambe jatsini. Joperu, engachi jucha intsïmpiriiska, sánderuchi sési pʼikuarheraaka (Lukasʌ 6:38). Imeecha engaksï intsïmbirijka sánderuksï tsípikua jingoni irekasïndi, jimbokaksï xarhatasïnga eskaksï sánderu xénchaasïnga kʼuiripuechani ka eska jatsikuarhekua ambe ka inde ambe úsïndi eskaksï agradesidueuaka ka xarhatasïndiksï indeni ambe enga nema íntskuajka ambe ma (Kolosasi 3:15). Kurhamarhikuarhi je: “¿Né jingoni tsitipirini jarhani? ¿Nema jingoni enga no uandanhiajka máteruecha jimbo ka no agradesidueni o nema jingoni enga intsïmpiriika ka agradesidueni?”. Ambe engachi jorhenguarhika, jindeesti eskachi jatsiska para ísïini eskachi jucha na tsitipiringa eskaksï jindeepiringa máteruecha (Mateu 7:12).