¿Néna úski Jesúsiri uarhikua ʻuánikuechani euajpiantaniʼ?
Ambe enga Biblia uandajka
Jesúsiri uarhikua jindeesti ambe enga Tata Diosï Jeoba úrajka para euajpiantani kʼuiripuechani, pekadurhu ka uarhikuarhu. Bibliarhu arhisïndi eska Jesúsiri iurhiri úranhaska para maianhpeni komu euajpintskua (Efesu 1:7; 1 Pedru 1:18, 19). Ísï jimbo, Jesúsi uandaspti eska jurhaspka “íntspini imeeri tsípikuani para uánikuechani euajpiantani” (Mateu 20:28).
Uétarhisïreendi “uánikuechani euajpiantani”
Orheta acheeti enga Tata Diosï kueraaka, Adáni, perfektuespti, no ma pekadu jingoni. Ístu, jatsispti sésikua para méntkisï irekani, joperu tsïtasti imani sésikuani jimboka erakuspka nóteru kurhajchania Tata Diosïni (Génesis 3:17-19). Adániri uájpeechaksï andajpenusti pekadu jingoni (Roma 5:12). Ísï jimbo, Biblia arhisïndi eska Adáni jandiajku íntspikuarhispka ka ístu imeeri uájpeechani komu jántspiricha pekadueri ka uarhikueri (Roma 7:14). Jimbokachi iáminduecha imperfektueska no nema uáti jatsini ménderu ambe enga Adáni tsïtaka (Salmo 49:7, 8).
Tata Diosï pʼamojkuaspti Adániri uájpeechani, jimboksï no sési jásï ambe nitamakuarhinchaxapka (Juanu 3:16). Peru ima jurhimbitisti, ka ísï jimbo no úpirindi uanhajchakuani o ísku jatini puákuantani pekaduechani (Salmo 89:14; Roma 3:23-26). Jimboka xénchaasïnga kʼuiripuechani, íntspispti ambe enga uétarhini japka no solu para puátspeantani pekaduechani, sino ístu para kénditaani (Roma 5:6-8). Ambe enga íntspika jindeesti euajpintskua.
Ambe enga arhikuekajka euajpintskua
Bibliarhu, i uandakua euajpintskua tanimu ambe arhikuekasïndi:
Jindeesti na enga xáni maianhpenhaaka (Números 3:46, 47).
Indeni jimbo, jurajkunhasïndi nema oksï kʼuanhaskuntasïndi ambe ma (Éxodo 21:30).
Xáni jukaparhasti seguni eska na xáni maianhpenhaka.a
Ju je exeni néna terukuntasïni i ambe Jesukristueri uarhikua jingoni.
Na enga xáni maianhpenhajka. Bibliarhu arhisïndi eskaksï kristianuecha piántskata jarhaska “kánikua jimbo” (1 Korintu 6:20; 7:23). Jesukristueri iurhiri jindeespti, ambe enga uétarhini japka para piántani para Tata Diosï kʼuiripuechani “engaksï táchani jásï tribueri anapueka, ka engaksï iámindu ambe jásï idioma uandajka, ka uápuru nasionicharhu ka iretecharhu anapuenksï” (Jaŋaskuecha [Apocalipsis] 5:8, 9).
Euajpintskua. Jesúsiri uarhikuajtsïni euajpintasïndi pekadurhu uératini (1 Korintu 1:30; Kolosasi 1:14; Ebreu 9:15).
Xáni maianhpentani eska na xáni jukaparhaka. Tsípikua enga Jesúsi íntspika májkuenisti imani tsípikua jingoni enga Adáni jatsipka no ma pekadu jingoni ka enga tsïtaka (1 Korintu 15:21, 22, 45, 46). Biblia arhisïndi: “Jimboka máechakua kʼuiripuni jimbo [Adani] enga no janhanharhipka [Tata] Diosïni, uánikuecha pekadori eratanhaska, ka ístu máechakua kʼuiripuni jimbo [Jesukristu] enga janhanharhipka [Tata] Diosïni, uánikuecha ambakikua exeminhaati” (Roma 5:19). I ambejtsïni xarhatachesïndi andisï ma kʼuiripueri uarhikua marhuajki para uánikuechani euajpiantani. Jesúsiri uarhikua jindeesti “para maianhpeni iáminduechani jimbo” imeecha engaksï jánguarhintajka úni ambe ma paraksï andakuarheni euajpintskuani (1 Timoteo 2:5, 6).
a Uandakuecha engaksï úrakuarhipka Bibliarhu, idioma orijinalicha jimbo engaksï úrapka para “euajpintskua” ístu arhikuekasïndi maianhpeni ambe máeri enga kánikua jukaparhakueka parachi intsïnhani ambe ma. Pori ejemplu, uandakua kafár enga ebreu jimboeka arhikuekasïndi ʻatarhini para ójchakuraniʼ (Génesis 6:14). I uandakua sánderu méntkisï úrakuarhesïndi para arhikuekani pekaduechani ójchakurani (Salmo 65:3). Máteru sáno májkueni jásï uandakua jindeesti kófer enga úrakuarhejka para arhikuekani íntspini ambe ma para úni ísï úni o enga jindeeka euajpintani ambe ma (Éxodo 21:30). Ístu, uandakua griegu lýtron, sáno méntkisï tradusirikuarisïndi “euajpintskua”, ístu tradusirikuarisïndi “íntspini imeeri tsípikuani para uánikuechani euajpiantani” (Mateu 20:28). Gresia anapu kararichaksï úrasïreendi i uandakuani para arhikuekani na enga xáni maianhpinhenga para euajpintani ónhakatani ma o jántspirini ma.